Yeremia
33 Yeremia iniakinaboherwe omo Kibugha ky’Abateya, Yehova mwakania naye engendo y’akabiri, amamubwira ati: 2 “Yehova Omuhangyiki w’ekihugho, Yehova oyo wabumbakyo n’eriwatyakyo, oyukahulawa mo Yehova ati: 3 ‘Unibirikire, naghe ngendisyakusubirya, ngendisyalw’inakubwira emyatsi mikulu-mikulu kandi eyikalire eryowa, eyo utasi.’”
4 “Kundi bino byo Yehova oMungu we Israeli akabugha oko manyumba w’omo muyi n’amanyumba w’abami be Yuda, agho bandu bahimbula batoke erilwa n’enzighu eyabya iyabiribatimbyako oluba yitoke erilwa nabo kandi batoke eribala oko muyali, 5 n’oko bandu abakasyalwa n’Abakaldayo, abakusulaya omo myanya eno mw’ebinda by’abandu abo niita omo buhitane n’omo kinigha kyaghe kinene, abo obubi bwabo bwaleka inatatsomana omuyi ono:* 6 ‘Ngendyuwania omuyi ono n’erilamyagho, ngendilamya abandu abo n’eribaha obuholo bunene n’ekwenene nene. 7 Ngendisubulya abanyewa be Yuda n’abe Israeli, ngenditasyabahimba ngoko nakola oko mwanzo. 8 Ngendibalusyako omusango wosi w’amalolo ogho banikolera. Ngendighanyira omusango wosi w’amalolo wabo n’amakosa ogho banikolera. 9 Erikumayira ry’omuyi ono rikendisyaleka inatsema kutsibu, n’ebihanda byosi ebiri oko kihugho bikendisyanipipa n’eriniha olukengerwa omughulu bikendisyowa ebibuya byosi ebyo nakolera ababya omo bunyewa. Bikendisyasagha n’erititimana busana n’ebibuya byosi n’obuholo obo ngendisyaleta omo muyi ono.’”
10 “Yehova ati: ‘Omo mwanya ono ogho mukendisyabughako muti ni mbwarara, eyitemo mundu kutse enyama, omo miyi ye Yuda n’omo syonzira sye Yerusalema esitelabamo mundu, esitemo mundu, omwikalani, kutse enyama, abandu bakendisyatasyowamo 11 omulenge w’obutseme bunene n’ow’eriyisyandira, omulenge w’omulunga mulume n’omulenge w’omulunga mukali, omulenge w’abakabugha bati: “Musime Yehova w’emilondo, kundi Yehova ni mubuya; olwanzo lwiwe oluteleghula ni lwa kera na kera!”’
“‘Bakendisyaleta ebihembo by’eriha ewasingya omo nyumba ya Yehova, kundi ngendisyasubya abandu b’omo kihugho ababya omo bunyewa, n’emyatsi ikendisyabya ngoko yanabya oko mwanzo,’ Yehova atya.”
12 “Yehova w’emilondo ati: ‘Omo mbwarara eno, eyitemo mundu kutse enyama, n’omo miyi yosi yamo, mukendisyatasyabya emyanya y’erilisiryamo eyo balisya bakendisyabya bakaluhukirya esyonyama syabo.’
13 “‘Omo miyi y’omo kiharo ky’ebitwa, omo miyi y’omo ribanda, omo miyi y’oko luhande lw’eyikwa, omo kiharo kya Benyamini, omo biharo ebitimbire oko Yerusalema, n’omo miyi ye Yuda, esyonyama sikendisyasyalaba eyikwa w’ebyala by’oyukaghanzasyo,’ Yehova atya.”
14 “‘Muhulikirire! Ebiro binemwasa,’ Yehova atya. “Omo biro ebyo, ngendisyaberererya endaghane eyuwene eyo nabugha oko bandu be Israeli n’abe Yuda. 15 Omo biro ebyo n’oko mughulu oyo, ngendisyalasirya Daudi y’erisasa* eritunganene, erisasa eryo rikendisyakola ebyuwene n’ebitunganene omo kihugho. 16 Omo biro ebyo, Yuda akendisyasabulwa na Yerusalema akendisyikala buholo. N’omuyi oyo akendisyahulwa mo: Yehova ni ritunganene ryetu.’”
17 “Kundi Yehova ati: ‘Omo kihanda kya Daudi mo mukendisyabya mukalua omulume oyukikala oko kitumbi ky’obwami kye Israeli. 18 N’omo bahereri Balawi simwendisyabula omulume oyukimana embere syaghe atoke eriherera amahere w’eryokererya, erihisya obuhere bw’akalyo, n’eriherera awandi mahere.’”
19 Kandi Yehova mwakania na Yeremia, amamubwira ati: 20 “Yehova ati, ‘Mwamabya imwanganatoka eritwa endaghane yaghe eyilebirye eritungyi n’endaghane yaghe eyilebirye ekiro, mutoke erikakirya eritungyi n’ekiro eryasa oko ndambi eyitolere, 21 ni bugha ambu endaghane yaghe eyo nakola n’omughombe waghe Daudi iyanganatwika, neryo isihendibya omughala wa Daudi oyukikala oko kitumbi kiwe ky’obwami, kutya n’endaghane yaghe eyo nakola n’abahereri Balawi, abaghombe baghe, nayo iyanganatwika. 22 Ngoko omundu syangatoka erighanza ebindu ebiri elubula n’eripima omutsanga w’engetse, ko ngendisyakanyirirya nitya olubuto lw’omughombe waghe Daudi n’erikanyirirya Abalawi abakanikolera.’”
23 Kandi Yehova mwakania na Yeremia, amamubwira ati: 24 “Wanabiryowa ebyo bandu aba bakakanaya? Banemubugha bati, ‘Yehova akendilekerania ebihanda bibiri ebyo asombola.’ Neryo banemukolera abandu baghe omo butakenga, kandi sibakibalangire mo kihanda.
25 “Yehova ati: ‘Oko kwenene-kwenene ngoko nakola endaghane yaghe eyilebirye eritungyi n’ekiro, ngoko nahiraho emighambo eyikasondola olubula n’ekihugho, 26 kutya sinendisyaghana n’ahake olubuto lwa Yakobo n’olw’omughombe waghe Daudi, neryo inabula erimya abatabali omo lubuto lwiwe abakenditabala abana ba Abrahamu, Isaka, na Yakobo. Kundi ngedisyatasyakuma-kuma abandu babo abatwalawa omo bunyewa kandi ngendisyakwirabo obulighe.’”