Yeremia
15 Neryo Yehova mwanibwira ati: “Nomo Musa na Samweli bangimanire embere syaghe, sinilyendikangania* abandu aba b’olukogho. Ulusayebo embere syaghe. Baghende! 2 Bamabikubulya bati, ‘Kwe uti tuyehi?’, iwabasubirya uti: ‘Yehova ati:
“Abatolere erihola omo kihunzo ekikita, bahole omo kihunzo ekikita!
Abatolere erihola omo muyali, bahole omo muyali!
Abatolere erihola omo nzala, bahole omo nzala!
N’abatolere eritwalwa omo bunyewa, batwalawe omo bunyewa!”’
3 “‘Ngendibaletera amaligho ani,’* Yehova atya, ‘omuyali busana n’eriita, esyombwa busana n’erikurubana, esyonyunyu syomo kyanya n’esyonyama sy’omoli busana n’eritomera n’eritsandya. 4 Ngendiyirabo mo kindu ekikendileka amami wosi w’oko kihugho iniasagha, busana na Manase mughala wa Hezekia, omwami we Yuda, kandi busana n’ebyo akola e Yerusalema.
5 Iwe Yerusalema, nindi yukendikukwira obulighe?
Nindi yukendiyowa muhanda busana naghu?
Kandi nindi yukendimana n’eribulya nga unuwene?’
6 ‘Wabirinilekerania,’ Yehova atya.
‘Wabiriniloleryako omughongo.*
Busana n’ekyo, ngendikakya ebyala byaghe nitoke erikuha amalipizi n’erikutsandya.
Nabiriluha erikukwira obulighe.*
7 Ngendighulukyabo omo kanya oko milango y’emiyi y’omo kihugho.
Ngendibabughako abana.
Ngenditsandya abandu baghe.
Kundi babirighana erileka emibere yabo mibi.
8 Abakwa-kali babo bakendibya banene embere syaghe kulenga omutsanga w’esyongetse.
Oko medi, ngendileta omutsandya oyukendilwa nabo, oyukendilwa n’abomama n’abalwana.
Ngendibaletera erihangya-hangya n’obuba bunene kitsumbukirania.
9 Omukali oyo wabuta abana 7 abirinogha.
N’erihumula ryabirimulema.*
Eryuba riwe ryabirilenga isibwebwira,
Kyo kyabirileka iniakwa esisoni n’erihemuka.’*
‘N’abandu balebe abalyasaka kubo,
Ngendileka ibakwa omo muyali w’esyonzighu syabo,’ Yehova atya.”
10 Bulighe bwaghe, mama waghe!
Muwanibuta busanaki?
Niri mundu oyo bandu bosi b’omo kihugho bakaletako obuhaka n’erilwa naye.
Sinditabweka kutse eryiyibweka;
Aliwe abosi bakanitakira.
11 Yehova mwanibwira ati: “Oko kwenene, ngendikukolera ebyuwene.
Oko kwenene, ngendisyakuwatikya omughulu enzighu yaghu ikendisyalwa naghu.
Omughulu w’obuhanya, omughulu w’amaligho.
12 Hane oyo wangatoka eritsutsanga ekyuma,
Ekyuma ekikalua oko luhande lw’endata, kutse hane oyo wangatoka eritsutsanga ekwivre?*
13 Ngendileka obuteke n’ebindu byaghu by’obughuli ibyapurwa,
Sibyendighulwa, aliwe bikendipurwa busana n’amalolo waghu wosi ogho wabirikola omo biharo byaghu byosi.
14 Ngendihabyo esyonzighu syaghu
Sitoke eritwalabyo omo kihugho ekyo utasi.
Kundi ekinigha kyaghe kyabiryakya omuliro.
N’omuliro oyo anemwaka atoke erikuhisya.”
15 Yehova, unasi ebyo ngalabamo.
Unyibuke n’erinitsomana.
Uhe abakaniaghalaya b’amalipizi,
Uhitane luba, bite bitya ibakanibughaho.*
Uminye ngoko ngahemulawa busana naghu.
16 Mungabya nabisunga ebinywa byaghu, namalyabyo;
N’ekinywa kyaghu mukikusulaya omo mutima waghe m’obutseme n’eriyisyandira.
Kundi nihekire erina ryaghu, Yehova oMungu w’emilondo!
17 Sindikala haghuma n’abandu abanzire esyofete nitoke eriyitsemesya.
Nikere ingyuwene kundi ebyala byaghu biri okw’ingye.
Kusangwa wabirinisulyamo erihitana.*
18 Busanaki obulumi bwaghe sibulihwa, n’ekironda kyaghe sikirilama?
Kyabirighana erilama.
Okw’ingye, ukendibya ng’ekindu ky’eribikamo amaghetse eky’amabehi,
Ekyo mundu ate angayiketera?
19 Busana n’ekyo, Yehova ati:
“Wamabinisubira, ingendikulamya,
Kandi ighukendimana embere syaghe.
Wamabilusya ekindu ky’obughuli ahali ekindu ekite na mughaso,
Ighukendibya ukanibughira.*
Abandu ibakendibya oko luhande lwaghu,
Aliwe iwe, isiwendibya oko luhande lwabo.”
20 “Ngakuyira mo luhimbo lw’ekwivre* oluwatire omo kati-kati k’abandu aba.
Oko kwenene, bakendisyalwa naghu,
Aliwe sibendisyakusinga.
Kundi nine haghuma naghu nitoke erikusabula n’erikubalya,” Yehova atya.
21 “Ngendikulusya omo byala by’ababi
N’erikukombola omo byala by’abandu abatekwa obulighe.”