Yeremia
23 “Bulighe oko balisya abakatoghotaya n’eripanza-panza esyombuli esiri omo bulisiryo bwaghe!” Yehova atya.
2 Busana n’ekyo, bino byo Yehova oMungu we Israeli akabugha oko balisya abakalisaya abandu baghe: “Mwabiripanza-panza esyombuli syaghe, mumwataleka eripanza-panzasyo, kandi mumwatatsomanasyo.”
“Busana n’ekyo, ngendibatswera busana n’emikolere yenyu mibi,” Yehova atya.
3 “Neryo ngendikuma-kuma esyombuli syaghe esikiriho omw’ilusyasyo omo bihugho byosi eyo napanza-panzirasyo; ngendisubyasyo omo bulisiryo bwasyo. Kandi sikendibuta-butana n’erikanyirira. 4 Ngendisombolerasyo abalisya abakendilisyasyo ndeke. Sisyendisyasyasagha kutse erisaghisibwa, kandi sihali n’eyikandisyabula,” Yehova atya.
5 “Muhulikirire! Ebiro binemwasa,” Yehova atya. “Omo biro ebyo, ngendisyahulukirya Daudi erisasa* eritunganene. Omwami akendisyatabala n’erikola n’amenge; akendisyakola ebyuwene n’ebitunganene omo kihugho. 6 Omo biro ebyo akendisyatabalamo, Yuda akendisyasabulwa na Israeli akendisyikala buholo. Akendisyahulwa omo rina rino: Yehova yo ritunganene ryetu.”
7 “Aliwe, ebiro binemwasa,” Yehova atya. “Omo biro ebyo, sibendisyasyabugha bati, ‘Oko kwenene-kwenene ngoko Yehova aliho, oyo walusaya abandu be Israeli omo kihugho kye Misri!’ 8 Aliwe bakendisyabugha bati: ‘Oko kwenene-kwenene ngoko Yehova aliho, oyo walusaya abana b’omo nyumba ya Israeli omo kihugho ky’oko luhande lw’endata n’omo bihugho byosi ebyo abapanza-panziramo n’eribasubulya.’ Kandi bakendisyikala omo kihugho kyabo-kyabo.”
9 Ngabugha oko baminyereri niti:
Omutima waghe abiribunika.
Amakuha waghe wosi akatitimana.
Niri ng’omutamiri,
Ng’omundu oyo wabirinywa edivai nene.
Niri nitya busana na Yehova kandi busana n’ebinywa biwe bibuyirire.
10 Kundi ekihugho kiswiremo abasingiri.
Ekihugho kiri omo kiriro busana n’eritakirwa ryakyo
N’ebiharo by’erilisiryamo by’omo mbwarara byabiryuma.
Bakakola ebibi kandi bakakolesaya obukulu bwabo bo muhanda.
11 “Omuminyereri n’omuhereri, abosi batsandire.*
Mungasunga obubi bwabo n’ibya nomo nyumba yaghe,” Yehova atya.
12 “Busana n’ekyo, enzira yabo ikenditendera n’eribyamo omwirimya.
Omundu akendisyabakuna, neryo ibawa ahisi.
Kundi ngendisyaleterabo obuhanya
Nibya n’omo mwaka ogho bakendisyahabwamo amalipizi,” Yehova atya.
13 “Mungalangira omwatsi owakita esyonye omo baminyereri be Samaria.
Baali yukabughisayabo amaminyereri wabo,
Kandi babirileka abandu baghe Abaisraeli ibahera.
14 Mungalangira n’omo baminyereri be Yerusalema mw’emyatsi eyikita obuba.
Bakakola obusingiri, n’engebe yabo yiswiremo amabehi,
Bakatsotsaya* abandu erikola emyatsi mibi
Kandi sibalitsira erikola ebibi.
Okw’ingye, abosi bali nge Sodomo.
N’abikalani bamo bali nge Gomora.”
15 Busana n’ekyo, bino byo Yehova w’emilondo akabugha oko baminyereri abo:
“Ngendibalisya engalihira
N’eribanywisa amaghetse awalimo esumu.
Kundi abaminyereri be Yerusalema babirileka abandu bosi b’omo kihugho ibayilusya oko Mungu.”
16 Yehova w’emilondo ati:
“Isimwahulikirira ebinywa by’abaminyereri abakababwira obuminyereri.
Kundi bakabateba.*
Enzoli eyo bakababwira bakayipika-pikirayo.
Siyirilua omo buno bwa Yehova.
17 Bakabera eribwira abakanipokaya bati:
‘Yehova mwakabugha ati: “Mukendibya omo buholo.”’
Bakabwira n’oyukakwama omutima wiwe omo righundu bati:
‘Sihali obuhanya obukendikuhikira.’
18 Kundi hane oyo wabirimana omo kati-kati k’abira ba Yehova b’oko mutima,
Atoke erilangira n’eryowa ekinywa kiwe?
Nindi yo watsomana ekinywa kiwe atoke eryowakyo?
19 Mulebaye! Ekihunga kinene kya Yehova kikendibuhirira omo buhitane;
Kikenditoghera oko mutwe w’ababi ng’akanyabungu.
20 Ekinigha kya Yehova sikyendisyabondera
Ate abugha erikola ebiri omo mutima wiwe.
Omo biro by’enduli, mukendisyowa omwatsi oyo wo ndeke.
21 Munatatuma abaminyereri abo, aliwe mubatibita.
Munatakania nabo, aliwe mubabugha obuminyereri.
22 Bangimanire omo kati-kati k’abira baghe b’oko mutima,
Bangawatikirye abandu baghe eryowa ebinywa byaghe
Bangawatikirye abandu baghe erileka emighendere yabo mibi n’emikolere yabo mibi.”
23 Yehova ati: “Niri Mungu omughulu niri hakuhi risa? Sindi Mungu n’omughulu niri hali?”
24 Yehova ati: “Omundu anganabisama oho nitenangamulangira?”
Kandi Yehova ati: “Omo lubula n’omo kihugho, mune ekyo nitenangalangira?”*
25 “Mungowa abaminyereri bakabugha obuminyereri bw’amabehi omo rina ryaghe bati, ‘Mungalota! Mungalota!’ 26 Erihika mughulu wahi abaminyereri abo bakendisyabya ikobanemubugha obuminyereri bw’amabehi? Abaminyereri abo bakayitungira amabehi agho bakabugha mo buminyereri. 27 Erilabira esyonzoli esyo bakakaniranaya, bakasonda erileka abandu baghe ibibirirwa erina ryaghe, ngoko abotata-kulu wabo babirirawa erina ryaghe busana na Baali. 28 Omuminyereri oyulyalangira enzoli, muleke abugheyo! Aliwe oyuli n’ebinywa byaghe abughebyo ngoko bine.”
Yehova ati: “Esyombuba* sinalingene n’engano?”
29 Yehova ati: “Ekinywa kyaghe sikiri ng’omuliro kandi ng’ehama y’omuhesi eyikatulanga olukuka?”*
30 “Busana n’ekyo, ngendilwa n’abaminyereri abo abakibanako ebinywa byaghe,” Yehova atya.
31 “Ngendilwa n’abaminyereri abo,” Yehova atya, “abakakolesaya olulimi lwagho omw’ibugha bati, ‘Akabugha ati!’”
32 “Ngendilwa n’abaminyereri abakalangira esyonzoli sy’amabehi,” Yehova atya, “abakabwirasyo abandu, neryo ibaleka abandu baghe ibahera busana n’amabehi wabo n’eriyihalamba ryabo.”
“Aliwe sinditatumabo, kandi sinditabwirabo niti babughe obuminyereri. Neryo sibendiletera abandu aba b’endundi yosi-yosi,” Yehova atya.
33 “Abandu aba, kutse omuminyereri mulebe, kutse omuhereri mulebe amabibulya ati, ‘Omuheke* wa Yehova ni wahi?’, litolere iwamusubirya uti, “‘Omuheke oyo, n’inywe! Ngendibaghusa,” Yehova atya.’ 34 N’omuminyereri mulebe, kutse omuhereri mulebe, kutse oghundi mundu amabibugha ati, ‘Ono w’omuheke* wa Yehova!’, ingye ngendisoha omundu oyo n’ekihanda kiwe. 35 Bino byo obuli mughuma w’okw’inywe akabulaya mulikyabo na mughala wabo, ‘Yehova mwakasubiraya atiki? Kandi Yehova mwakabugha atiki?’ 36 Aliwe isimwasyasyahula omuheke* wa Yehova, kundi omuheke* oyo ky’ekinywa ky’obuli mughuma w’okw’inywe, kandi mwabiribindula ebinywa by’oMungu oyuliho, Yehova w’emilondo, oMungu wetu.
37 “Ukendibwira omuminyereri uti, ‘Yehova mwakakusubiraya atiki? Kandi Yehova mwakabugha atiki? 38 Wamabibera eribya ukabugha uti, “Omuheke* wa Yehova,” Yehova ati: “Kundi ukabugha uti, ‘Ekinywa kino w’omuheke* wa Yehova,” inabirikubwira niti isiwabugha uti: “Omuheke* wa Yehova!”’, 39 ngendikusumba n’erikughusa hali naghe, iwe n’omuyi ogho nabaha, iwe n’abotata-kulu waghu. 40 Kandi ngendikuletera esisoni sya kera na kera n’erihemuka rya kera na kera, eryo utendisyibirirwa.”’”