Amosi
3 “Muhulikirire ebinywa ebi ebyo Yehova ababughako, inywe Baisraeli, ebyo abugha oko kihanda kyosi ekyo nalusaya omo kihugho kye Misri:
2 ‘Inywe basa bo naminya omo bihanda byosi ebiri oko kihugho.
Busana n’ekyo, ngendisyabaha amalipizi busana n’amakosa wenyu wosi.
3 Abandu babiri banganalendera haghuma isibetalaghana?
4 Esimba yanganarurumira omo musitu isiyiwite akanyama k’erihigha?
Esimba eyikine nyilere* yanganarurumira aho yibiseme isiyetahamba kindu?
5 Akanyunyu kanganahambwa omo kitegho ekiri ahisi isihali oyulyateghako?*
Ekitegho kyanganayisumba n’erilua oko kitaka isikyetahamba kindu?
6 Bamabibuhira erihembe ry’omo muyi, abandu isibendititimana?
Obuhanya bwamabihika omo muyi, Yehova iyutalyaletabo?
7 Kundi Yehova Omukama Mukulu oko Bosi syendisyakola omwatsi wosi-wosi
Atetabisulira abaghombe biwe abaminyereri ekumbo* yiwe.
8 Esimba yabiriruruma! Nindi yutendisagha?
Yehova Omukama Mukulu oko Bosi abiribugha, nindi yutendibugha obuminyereri?’
9 ‘Mutulaghanaye omwatsi oyo omo hileberyo ehyo mundu ate angahikamo bweghu-bweghu hye Ashdodi
N’omo hileberyo ehyo mundu ate angahikamo bweghu-bweghu hye Misri.
Mubughe muti: “Muhindane oko bitwa bye Samaria;
Mulebaye ebuna-buna eyiriyo
N’obulimya obuliyo.
10 Kundi sibasi erikola emyatsi eyuwene,” Yehova atya.
“Abandu abakalundika omo hileberyo hyabo ehyo mundu ate angahikamo bweghu-bweghu mw’ebindu ebyo balyasunga omo butsururu n’omw’itsandya.”’
11 Busana n’ekyo, Yehova Omukama Mukulu oko Bosi ati,
‘Enzighu ikendisyatimba oko kihugho,
Ikendisyakubughamo akaghala kaghu,
Ebindu ebiri omo hileberyo hyaghu ehyo mundu ate angahikamo bweghu-bweghu bikendisyapurwa.’
12 Yehova ati,
‘Ngoko omulisya akalusaya omo buno bw’esimba mw’amaghulu abiri w’enyama kutse akahande k’oko kutu,
Abaisraeli nabo ko bakendisyapurwa batya,
Abikere e Samaria oko syongyingo esyuwenenga n’oko bitumbi* ebyuwene.’*
13 ‘Muhulikirire n’erikunga* ab’omo kihanda kya Yakobo,’ Yehova Omukama Mukulu oko Bosi oMungu w’emilondo atya.
14 ‘Kundi ekiro ekyo, ngendisyaha Abaisraeli b’amalipizi busana n’amakosa wabo wosi,
Kandi ngendisyabaha amalipizi busana n’ebiherero bye Beteli;
Amahembe w’oko kiherero akendisyatwibwa n’eritoghera ahisi.
15 Ngendisyahimbula enyumba eyo bandu bakabyamo omughulu w’embeho nene, n’enyumba eyo bandu bakabyamo omughulu w’ekipwa.’*
‘Amanyumba awahimbire omo meno w’esyotembo ekandisyatsandibwa,’
N’amanyumba manene-manene* akendisyahwaho,’ Yehova atya.”