Yeremia
35 Omo biro by’obutabali bwa Yehoyakimu mughala wa Yosia, omwami we Yuda, Yehova mwakania na Yeremia, amamubwira ati: 2 “Ghenda, uyasungane n’ekihanda ky’Abarekabu, ukanaye nabo n’eribaleta omo nyumba ya Yehova, omo kyumba kighuma ky’eriliramo,* neryo ubahe edivai.”
3 Neryo munatwala Yaazania mughala wa Yeremia, mughala wa Habazinia, abaghala babo Yaazania, abaghala biwe bosi, n’ekihanda kyosi ky’Abarekabu, 4 omo nyumba ya Yehova. Muningiryabo omo kyumba ky’eriliramo ky’abaghala ba Hanani mughala wa Igdalia, omundu w’oMungu w’ekwenene, ekyabya hakuhi n’ekyumba ky’eriliramo ky’abakulu ekyabya endata w’ekyumba ky’eriliramo kya Maaseya mughala wa Shalumu, omuteya oyukabya oko mulango. 5 Neryo munahira ebikombe n’esyokopo esiswiremo edivai embere sy’abandu b’omo kihanda ky’Abarekabu, namababwira niti: “Munywe edivai.”
6 Aliwe mubanibwira bati: “Sitwendinywa edivai, kundi tata-kulu wetu, ye Yehonadabu mughala wa Rekabu, mwatuha ekyalayiro kino: ‘Isimwasyanywa edivai n’ahake, inywe kutse abaghala benyu. 7 Kandi siritolere mukahimba amanyumba, erihera embuto, erihera eririma ry’emizabibu kutse eribya naryo. Aliwe mughulu wosi mukendisyabya mukikala omo mahema, mutoke erisyabugha mughulu muli omo kihugho ekyo mwikeremo ng’abagheni.’ 8 Neryo tukinakwama ebyosi ebyo Yehonadabu mughala wa tata-kulu wetu Rekabu atubwira ati tukole: Situlinywa edivai yosi-yosi, itwe, abakali betu, abana betu b’obulume, n’abana betu b’obukali. 9 Kandi situlihimba amanyumba w’erikalamo, situwite n’oko malima w’emizabibu, ebitaka, kutse embuto. 10 Tukinikala omo mahema kandi tukinasikaya ebyosi ebyo Yehonadabu* tata-kulu wetu atubwira ati tukole. 11 Aliwe omughulu omwami Nebukadneza* we Babiloni asyalwa n’ekihugho, mutwabugha tuti, ‘Mwase, tughende e Yerusalema abasuda Bakaldayo n’Abasiria isibatwita.’ Ko twikere e Yerusalema yo tutya.”
12 Neryo Yehova mwakania na Yeremia, amamubwira ati: 13 “Yehova w’emilondo, oMungu we Israeli, ati, ‘Ghenda, uyabwire abandu be Yuda n’abikilani be Yerusalema uti: “Ninetaleka eribalemba-lemba niti mukwame ebinywa byaghe?” Yehova atya. 14 “Yehonadabu mughala wa Rekabu mwabwira abitsikulu biwe ati isibasyanywa edivai. Bakinakwama ebinywa biwe: Sibalinywa edivai erihika na munabwire. Omw’ikola batya, banemukwama ekyalayiro kya tata-kulu wabo. Aliwe inywe, ngabya ininemubawira kangyi-kangyi, aliwe simulyowa. 15 Kandi nabya ingabatumira abaghombe baghe abaminyereri, ingabatuma kangyi-kangyi,* niti bababwire bati, ‘Kisi, muyisubeko, obuli mundu aleke emikolere yiwe mibi, neryo akole ebyuwene! Isimwaramaya eyindi miungu n’erikolerayo. Mwamabikola mutya, isimwendisyalua omo kihugho ekyo nabaha, inywe n’abotata-kulu wenyu.’ Aliwe mumutategha amatwi wenyu kutse erinihulikirira. 16 Abitsikulu ba Yehonadabu mughala wa Rekabu babirisikya ekyalayiro ekyo tata-kulu wabo abaha, aliwe abandu aba mubataniowa.”’”
17 “Busana n’ekyo, Yehova, oMungu w’emilondo, oMungu we Israeli, ati, ‘Ngendiletera abandu be Yuda n’abikalani bosi be Yerusalema obuhanya bosi obo nabya inabiribabwira niti bukendisyasa, kundi munababwira, aliwe mubatowa; kandi munabya ngababirikira, aliwe mubatanisubirya.’”
18 Neryo Yeremia mwabwira ekihanda ky’Abarekabu ati: “Yehova w’emilondo, oMungu we Israeli, ati, ‘Kundi mumwasikya ekyalayiro kya tata-kulu wenyu Yehonadabu kandi mukinasikaya ebyalayiro biwe byosiz omw’ikola ekyo anabasa erikola, 19 Yehova w’emilondo, oMungu we Israeli, ati: “Omo bitsikulu ba Yehonadabu* mughala wa Rekabu simwendisyabya mukabula omundu oyukanikolera.”’”