Utasyasyasubira obwira bwaghu na Yehova

OBULI mwaka, esyombuli nyingyi sya Yehova sinemusubibwa omo ndeko y’eKikristo. Terilengekania “obutseme bunene . . . elubula” omughulu embuli nguma yikasuba omo ndeko! (Luka 15:7, 10) Wamabya imughukasubibawa omo ndeko, uminye ngoko Yesu, abamalaika, na Yehova iyuwene-wene batsemire erikulangira ukatasyasubira ekwenene. Aliwe, ukatasyasubira obwira bwaghu haghuma na Yehova, wanganahindana ebikakiryo. Tulangire ebikakiryo bilebe ebyo wanganahindana, kandi ngoko wangakindabyo.

NI BIKAKIRYO BYAHI EBYO WANGANAHINDANA?

Abaghala n’abali betu bangyi bakanabula obutseme nibya ibabirisubibwa omo ndeko. Alinga unasi ngoko Omwami Dawidi ayowa. Nomo abya inyabirighanyirwa amalolo wiwe, mwabugha ati: “Ebibi byage byabirinyihikako.” (Esy. 40:12; 65:3) Enyuma sy’erisubira Yehova, omundu anganalola embere eriyowa ng’akineko lubanza kutse erikwa esisomi oko myaka mingyi. Isabelle, mwabugha emyaka eyilengire oko 20a inyanahighirwe omo ndeko. Mwabugha ati, “Mukyanikalako kutsibu eriligha ngoko Yehova angananighanyira.” Wamabibunika mutima, ekyo kyanganaleka iwatasyoloberera bunya-kirimu. (Emi. 24:10) Uyikase ekyo isikyakuhikira.

Abandi bakasagha bati alinga sibenditoka erikolwa ebyosi ebisabirwe erisyasyasubira obwira bwabo haghuma naYehova. Abere abisubibwa, Antoine mwabugha ati, “Nabya inabiribirirwa emyatsi mingyi eyo nabya ngakola embere inikine Mwimiri wa Yehova.” Busana n’emyatsi eyiri ngeyo, abandu balebe banganatikatikira eritasyasubira emibírí yabo y’obunya-kirimu nga kera.

Eky’erileberyako, ekihunga kyamabitsandya kutsibu enyumba y’omundu, anganabunika mutima akalengekania omo mubírí munene owasabirwe eritasyahimba enyumba yiwe. Kutya, obwira bwetu na Yehova bwamabitsanda busana n’erilolo erikalire eryo tulyakola, twanganalangira nga kikendisaba mubírí munene eritasyakokotya obwira bwetu haghuma na Yehova. Aliwe sighusabirwe erikola omwatsi oyo iwuwene.

Yehova akakubwira ati: “Mwase lino, tukanaye haguma [tukokotaye emyatsi], nwt.” (Isa. 1:18) Wabiriyikasa ‘erikokotya emyatsi.’ Yehova akwanzire kundi wabiritwa ekika ekyo. Terilengekania oko kino: Wabirikola omwatsi owangaleka Yehova inyatoka erisubirya Sitani, oyukamutsuma!—Emi. 27:11.

Omwikola ekyo, wabiritsuka eriyitunda hakuhi na Yehova, naye ati akendiyitunda hakuhi naghu. (Yak. 4:8) Kyuwene abandi erilangira ngoko wabirisuba omo ndeko. Aliwe utolere erikola n’ekindi. Utolere eriwatya obwira bwaghu haghuma na Tata waghu kandi Mwira waghu, Yehova. Wangakola ekyo kyo wuti?

YIHIRIREHO EBY’ERIKOLA EBYO WANGAHIKIRA BWEGHU-BWEGHU

Utsuke eriyihiriraho eby’erikola ebyo wangatoka. Alinga ukinibukire emyatsi oyo wigha oko Yehova, n’eparadiso ey’abiritulagha. Aliwe, utolere eritasyabusira emyatsi eyuwene eyo wabya ukakola kera, ng’eritulira kangyi-kangyi, eriya oko mihindano n’erilabya endambi haghuma n’abaghala n’abali betu. Terilengekania oko myatsi eyikwamire eyo wangakola.

Erikania na Yehova obuli kiro. Tata waghu anasi ngoko eriyowa muhanda busana n’ebyo wakola lyanganaleka ikyakukalako erisyamusaba. (Rom. 8:26) Aliwe, ‘uyitsingirire omwʼisaba,’ ukabwira Yehova ngoko wanzire kutsibu obwira bwiwe. (Rom. 12:12) Andrej akibuka ati: “Munabya ngayowa nga nikineko lubanza n’erikwa esisoni. Aliwe iningabya nasaba inayowa ndeke n’eritekana omo mutima.” Wamabya isiwasi nga wangasaba wuti, lebaya emisabe y’Omwami Dawidi ey’erisaba obughayiri eyikabanika omo Esyonyimbo 51 ne 65.

Erigha eBiblia obuli kiro. Ekyo kikendikuwatikya eribya n’obwikirirya obuwatire n’erikulya olwanzo lwaghu oko Yehova. (Esy. 19:7-11) Felipe akabugha ati: “Busana n’eritendibya n’eprograme y’eriyighisya n’erisoma eBiblia ebiro byosi, munasuba enyuma bunya-kirimu n’erikosera Yehova. Sinianzire ekyo ikyatasyanihikira, neryo nabiriyisogha eriyiteya omwiyighisya eBiblia.” Naghu wanganayira wutya. Wamanza eriminya emyatsi eyo wangayighisya, wanganasaba obuwatikya omwira waghu mughuma oyuwite obwira obuwatire haghuma na Yehova.

Eritasyasubya obwira haghuma n’abaghala n’abali betu. Abandu balebe abakasuba omo ndeko bakahangahangaya bati alinga abandi sibendighanyirabo. Larissa mwabugha ati: “Munabugha emyaka mingyi ininakwire esisoni syo kutsibu, ngayowa nga nabirihemula abaghala n’abali betu.” Uminye ngoko, abasyakulu b’endeko n’abandi baghala balikyetu banzire erikuwatikya eritasyasubira obwira bwaghu haghuma na Yehova. (Lebaya akasanduku “Abasyakulu b’endeko bangawatikya bati?”) Batsemire kutsibu erilangira ukasubira Yehova, kandi banzire iwabya n’obutseme!—Emi. 17:17.

Niki kyo kyangakuwatikya eriyitunda hakuhi n’endeko? Ubye ukahindana oko mihindano yosi y’endeko haghuma n’abaghala n’abali betu n’eriyatulira haghuma n’abo. Ekyo kyanganakuwatikya kiti? Felix mwabugha ati: “Abaghala n’abali betu babya bakalindirira n’omuhwa erisubibwa lyaghe. Munalangira ngoko banianzire. Mubaniwatikya erilangira ngoko nikine mughuma w’oko b’omo ndeko kandi Yehova abirinyighanyira kandi ngoko nanganatasyamukolera.”—Lebaya akasanduku “Wangakolaki?”

UYITSINGE!

Sitani akendilola embere erikuletera ebikakiryo akasonda erikubuna mutima uleke erisubya obwira bwaghu haghuma na Yehova. (Luka 4:13) Ubye iwunayiteghekenirye eritasyasubya obwira bwaghu na Yehova lino.

Akakania oko syombuli siwe, Yehova mwalagha ati: “Nasyasondasondya esitere, nʼerisubulya esyapanzapanzawa, nʼerisenga esyabunika, nʼerisikya esyabya silwere.” (Ezek. 34:16) Yehova abiriwatikya abandi bandu bangyi erisubya obwira bwabo haghuma naye.

Abasyakulu b’endeko bangawatikya bati?

Abasyakulu b’endeko banganawatikya kutsibu abatuliri abakasubira Yehova eritaswabya n’obwira obuwene naye. Tulebaye ebyo bakakolera abakasubira Yehova.

Bakasikayabo mutima. Omukwenda Paulo abya inyanasi ngoko omundu oyo wamasubira Yehova anganakindwa “n’obulige bunene.” (2 Kor. 2:7) Anganabya akakwa esisoni n’eribunika mutima. Paulo mwahana endeko ati: “Mutolere erimubuyira n’erimukirania.” Abakasubira Yehova batolere erisikibwa mutima ngoko Yehova n’abaramya balikyabo babanzire kutsibu. Abasyakulu b’endeko bamabya bakabasima kangyi-kangyi n’eribawatikya, ekyo kyanganaleka ibatabunika mutima.

Bakasaba haghuma nabo. “Erisaba ly’omundu mutunganene likatoka omwatsi munene.” (Yak. 5:16) Larissa, oyo tulyakanayako omo mwatsi w’erigha akabugha ati: “Munakania n’abasyakulu oko myatsi eyikanyiletera engitsi n’erinyihangya-hangya. Mubasaba haghuma naghe. Neryo munaminya ngoko abasyakulu sibanyibikireko kinigha. Babya banzire erinyiwatikya eritaswabya n’obwira obuwene na Yehova.” Mughala wetu Theo akabugha ati: “Emisabe y’abasyakulu moyanyikangania ndeke-ndeke ngoko Yehova anyanzire kwenene kandi ngoko, akalangira ebibuya ebyo ngakola, butsira amakosa masa.”

Bakabya bira babo. Abakasubira Yehova balaghire oko bira omo ndeko. Omusyakulu w’endeko oyukahulawa mo Justin akabugha ati: “Ubye ukayatulira haghuma nabo kangyi-kangyi, kandi uyikase eribya ukayababana. Ni ky’omughaso munene eribya mwira wabo!” Oghundi musyakulu w’endeko oyukahulawa mo Henry, akabugha ati, “Abandi baghala n’abali betu omo ndeko bamabilangira abasyakulu bakakola obwira haghuma n’abakasubira Yehova, nabo ibakendiyikasa erikola batya.”

Bakawatikayabo erigha. Omwira oyukulire bunya-kirimu anganawatikya oyulyasubira Yehova eribya n’eprograme y’erigha iyuwene. Omusyakulu w’endeko oyukahulawa mo Darko akabugha ati: “Nganza eribakanirya oko myatsi mibuya eyo nabiribana omw’iyighisya ingyuwene-wene n’eribakangania ngoko nanzire erigha eBiblia yo kundu. Kandi ngakola emipango tutoke erigha emyatsi milebe haghuma nabo.” Oghundi musyakulu, yo Clayton, akabugha ati: “Ngabahira m’omuhwa w’erisondya omo Biblia mw’emyatsi eyilebirye abandu abalaba omo mibere eyiri ng’eyo balimo n’erilebya nga bang’ighaki okw’ibo.”

Bakabya balisya babuya. Abakasubira Yehova babirilangira ngoko abasyakulu bawite omubírí w’eritswera. Nikwa lino, banzire kutsibu-tsibu eribalangira mo balisya. (Yer. 23:4) Ubye ukabahulikirira n’eribasima. Ubye ukakania nabo kangyi-kangyi. Lebaya ekyo omusyakulu w’endeko oyukahulawa mo Marcus akakola omughulu akalenderera abaghala n’abali betu: “Tukakanaya oko mwatsi owakalua omo Masako, tukasimabo, n’eribakangania ngoko Yehova netu kutya tukabatsemera kutsibu busana n’erisuba omo ndeko. Oko mwiso w’obuli mukania, tukabugha ekiro tukasyaswasa.”

a Omo mwatsi ono, amena w’abandu mwakabindulawa.