Omubírí wa Yehova mwanikangirirya emyatsi mingyi eyuwene eyo sinabya niyilindirireko

Abababuti baghe mubalua e Estonia omughulu w’Amalwa w’akabiri w’ekihugho n’erihumira e Bujerumani, eyo nabutirawa. Nabere nabutwa ababuti baghe mubatsuka eriyiteghekania erihumira e Kanada. Mutwahikira hakuhi n’omuyi we Ottawa, omo nyumba nge eyabyamo esyongoko. Twabya bera kutsibu, itukabana amaya masa aw’erirya omo tututu.

Kiro kighuma Abimiri ba Yehova mubasomera mama waghe y’erisako ry’ Eribisulirwa 21:3, 4. Ebyo igha mubyamutsemesya kutsibu erihika oko kika amatoghongya emisonia. Embuto y’ekwenene muyalasa omo mutima wa mama na baba, neryo mubalubalola embere erigha eBiblia n’enyuma sy’ebiro bike mubatisibwa.

Ababuti baghe babya isibasi ndeke Ekingeresa, aliwe babya n’omuhwa munene w’erikolera Yehova. Baba waghe inakakola omubírí omo luyitsa olw’erinunirya mw’ebyuma omo muyi we Sudbury, e Kanada. Hakuhi obuli Poso, nibya n’enyuma sy’erikola omo kiro kyosi, baba inyakasyatwenda, ingye na mulere waye ye Sylvia eriyatulira haghuma naye. N’obuli yenga itukigha Akalebyo kʼOmuteya ko haghuma omo kihanda. Mama na baba waghe mubaleka inanza oMungu, neryo munaherera engebe yaghe oko Yehova oko 1956 inyiwite emyaka 10. Ngabya nalengekania ngoko ababuti baghe banzire Yehova yo kutsibu, ekyo kikaniha omuhwa w’erilola embere erikolera Yehova.

Nabere nabugha akalasi, munitasyalengekania kutsibu okw’ikolera Yehova. Munalengekania niti namabibya mupainia, isinendisyabya n’esyofranga nyingyi nitoke erihikira enzoli yaghe y’erighenda omo risu n’erilenderera omo bindi bihugho. Munabana omubírí w’obudidje [oyukaghusa omulenge] oko radio nguma y’omo muyi wetu, munanza omubírí oyo gho kutsibu. Ingakola omo righolo; neryo, kangyi-kangyi ingabula oko mihindano, neryo munatsuka eritamba n’abandu abatabya banzire oMungu. Oko nduli, obunyamutima bwaghe obwabya bubegheribwe n’eBiblia mubwanikuna erikola esyombinduka.

Munahumira omo ghundi muwi w’omo kiharo kye Ontario owakahulawamo Oshawa. Munahindana na Ray Norman kughuma na mwali wabo ye Lesli, n’abandi bapainia. Abosi mubanikokya ndeke. Erilangira ngoko babya batsemire mukyaleka inatasyatsuka erilengekania oko miradi yaghe. Mubanihiramo omuhwa w’eritsuka omubírí w’obupainia, neryo munatsuka obupainia oko Mwisi 9, 1966. Munatsema, n’engebe yaghe muyuwana. Aliwe emyatsi eyo nabya isiniyilindirireko eyendibindula engebe yaghe yabya ikisiya yahika.

YEHOVA AMABIKUSABA ERIKOLA OMWATSI MULEBE, UYIKASE ERIKOLAGHO

Inikine omo segondere, munajaza efomu y’eriya oko Beteli ye Toronto, omo Kanada. Enyuma, nabere babibya mupainia, munabirikirwa eriyakolera oko Beteli omo myaka 4. Aliwe eribugha ekwenene nabya nianzire Lesli, neryo munasagha niti namabiligha eriya oko Beteli, isinendisyasyamulangira n’ahake. Munasaba kutsibu, neryo munayisogha eriyakolera oko Beteli, aliwe munabya mundu w’obulighe tukalaghana na Lesli ngaghenda.

Oko Beteli mubamba omubírí w’erifula, n’enyuma waho munabya musekretere. Omo ndambi eyo, Lesli mwabya mupainia w’embaghane e Gatineau, omo Québec. Ingabera eribya ngamulenganiako n’eriyibulya nga munanayisogha ndeke. Neryo muhabya omwatsi w’eritsemesya kutsibu ogho nabya nitayilindirireko. Ray, mughala wabo Lesli, mwabirikirwa oko Beteli. Mubatuhira omo kyumba kighuma naye! Ekyo mukyaleka inatasyasubira obwira bwaghe na Lesli. Emyaka yaghe ini eyo banibirikirirako oko Beteli muyahwa ekiro 27 Omwisi 2, 1971, nakyo kyo kiro nalunga na Lesli.

Ingye na Lesli mutwasabwa eriyakolera omo ndeko y’Ekifarasa omo Québec. Enyuma sy’emyaka milebe, munasweka erilangira ngoko namasabwa eribya mulebya w’omutimbo iniwite emyaka 28. Munalangira nga nikine mulwana kutsibu kandi nga sinyasi bingyi, aliwe ebinywa ebiri omo Yeremia 1:7, 8 mubyanisikya mutima. Aliwe, Lesli mwakola ebisida bilebe omo mutoka kandi isyalibana obughotseri. Neryo mutwalengekania tuti sitwenditoka omubírí w’obulebya b’omutimbo. Aliwe, Lesli mwabugha ati, “Yehova amatusaba erikola omwatsi mulebe, sitwangayikasa erikolagho kwe?” Mutwaligha omubírí oyo neryo mutwakola omubírí w’omutimbo oyo omo myaka 17.

Nabya n’ebingyi by’erikola omo mutimbo, kandi sinabya n’endambi nene ey’eriyitsemesya haghuma na Lesli. Nabya nitolere inigha eyindi somo. Kiro kighuma omo Kwanza, omo tututu, omundu mwakongota oko mulango. Nabere nayalebya isihali mundu, aliwe muneyaho akatiri akaghambire ikanemo ekitambara n’amatunda, n’efromaje, n’emikati, n’etsupa y’ebinyu, n’esyovere, n’ebaruha eyiteko rina eyihandikireko yiti, “Uyayitsemesaye n’omukali waghu.” Ekiro ekyo obutuku mubwakya ndeke. Aliwe, munabwira Lesli niti siniwite endambi kundi ninemuteghekania emikania. Mwaligha, aliwe mwatatsema. Inyinikere oko mesa yaghe, obunya-mutima bwaghe mubwatsuka erinikenderya. Munalengekania oko erihano erikabanika omo Abanya Efeso 5:25, 28, erikanisaba eribya ngatsomana ngoko mukali waghe akayowa. Munasaba, neryo namabwira Lesli niti, “Tukayayitsemesaya!” Lesli mwatsema kutsibu. Mutwaghendya omutoka wetu, twamayimana ahuwene ahabya hakuhi n’olusi, twamasesa ekitambara ky’ahisi, neryo mutwayitsemesya ndeke kughuma. Kandi nibya munabana n’endambi y’eyiteghekania emikania yaghe.

Ekiharo ky’omutimbo wetu kyabya kinene, aliwe itukatsemerakyo. Ikitsukire omo kiharo kye Colombie-Britannique erihika omo kiharo kye Terre-Neuve. Enzoli yaghe y’erighenda omo risu muyabererera. Munalengekania eriyasoma oko Kalasi ke Gileadi, aliwe sinabya nanzire eriyabya mumisionere omo kindi kihugho. Iningalengekanaya niti abamisionere ni bandu b’embaghane, neryo munalangira ingye nga isinitolere. Kandi, nabya ngasagha niti bangananituma omo Afrika eyiri amakoni n’amalwa. Nabya inabiritsemera eyo niri.

BAMATUSABA ERIYA E ESTONIA N’OMO LUHANDE LW’ENDATA LW’EBULAYA

Omo 1992, omubírí wetu wahamulirwa omo bihugho bilebe ebyabya kera omo Bughuma bw’Abasovieti. Neryo, abaghala betu mubatusaba nga twangananza erihumira e Estonia n’eribya ba misionere. Mutwasisira kutsibu, aliwe mutwasaba busana n’omwatsi oyo. Kandi mutwayibwira tuti, ‘Yehova amatusaba erikola omwatsi mulebe, sitwangayikasa erikolagho kwe?’ Mutwaligha, neryo munayibwira niti, ‘Kyuwene kundi situliya omo Afrika.’

Mutwalutwatsuka erigha omubughe we Estonia. Twabere twabugha emisi ini omo kihugho ekyo, mutwasabwa erikola omubírí w’obulebya b’omutimbo. Lyabya litolere itwalenderera esyondeko 46 n’ebikuto by’omo bihugho bisatu eby’omo luhande lw’endata lwe Bulaya erihirako n’ekihugho kye Kaliningrad, n’eBurusi. Ekyo mukyatusaba erigha hake omubughe we Latvian, n’owe Lituani, n’Ekirusi. Ekyo si kyabya kyolo. Aliwe abaghala n’abali betu mubatsema erilangira ngoko tunemuyikasa erigha omubughe wabo, nabo mubatuwatikya. Omo mwaka we 1999, eBeteli muyakingulwa e Estonia, munasabwa erikolera omo katunga k’eBeteli haghuma na Toomas Edur, Lembit Reile, na Tommi Kauko.

Mutwaminya Abimiri bangyi abatwalawa eSiberia kera. Nomo banakolerawa muhanda omo ngomo n’erihekwa hali oko bihanda byabo, mubatahitana kutse eribika ekinigha. Mubalola embere eribya ibanatsemire n’eribya n’omuhwa omo mubiri w’eritulira. Eky’erileberyako kyabo mukyatwighisya ngoko litolere itwayiyinia omughulu twamahikirwa n’emyatsi eyikalire.

Mutwakola kutsibu omo myaka mingyi butsira eriluhuka, neryo Lesli mwatsuka eribya n’enduhi nene. Mututaminya luba ngoko abirikwa obukoni obukahulawa mo fibromyalgie. Neryo mutwalengekania kutsibu okwisuba e Kanada. Twabere twabirikirwa oko kalasi k’eBeteli e Patterson, New York, sinabya niasi nga tunemwendiyayo. Aliwe, enyuma sy’erisaba kutsibu, mutwaligha. Yehova mwatsumula eriyisogha eryo. Itune musoma Lesli mwabana obubalya obo abya alaghireko. Okw’ekyo mutwatoka erisubira emibírí yetu y’obuli kiro.

OGHUNDI MWATSI OWAKASWEKAYA​—TWAMATUMWA OMO AFRIKA

Omo righolo lighuma omo mwaka we 2008, itwabirisuba e Estonia, munabirikirwa oko telefone erilua oko bwikalo bukulu erinibulya nga tunemwendiligha eriyakolera omo Congo. Munakukubala! Kutsibutsibu kundi mubanisaba eribaha ekisubiryo ekiro ekikwamire. Munalunabwira Lesli kundi munaminya ngoko isyendiyato omo kiro ekyo. Omo mwanya w’iye eritendiyato, n’ingye natayato kundi nabya ngasaba Yehova busana n’ebyabya bikaleka inasagha eriya omo Afrika.

Nabere nabwira Lesli ekiro ekikwamire, mutwalengekania tuti, “Yehova akatusaba eriya omo Afrika. “Yehova amatusaba eriyakolera omo Afika, sitwangayikasa eriyayo kwe?” Neryo enyuma sy’eribugha emyaka 16 omo Estonia, mutwaya e Kinshasa, omo Congo. EBiro y’eBeteli yabya yiwite akalima akasuiremo amawa awuwene kandi akatulere. Ekighuma ky’oko bindu by’erimbere-mbere ebyo Lesli ahira omo kyumba kyetu k’akarte ako twabya nako erilua e Kanada. Kabyako ebinywa bino: “Mubye n’obutseme eyo muli.” Twabere twahindana n’abaghala n’abali betu, tukasondola amafunzo w’eBiblia, n’eritsemera omubírí ow’obumisionere oyo, obutseme bwetu omo mubírí wa Yehova mubwakanya. Oko mughulu oyo, mutwabana olusunzo lw’erilenderera esyobeteli 13 esy’omo Afrika. Ekyo mukyaleka itwalangira abandu mbiriri-mbiriri kandi abatsemesirye. Obuba obo nabya nabo oko Afrika ibwabirihwa.

Omo Congo, ibakatuha emihanda mbiriri-mbiriri y’akalyo, ng’ebihuka, ebyo nabya isiniasi nga twanganalya. Aliwe omughulu twabya tukalangira abaghala n’abali betu bakatsemera akalyo ako, netu mutwapima erilya kubyo neryo mutwatsemerabyo.

Mutwaghenda ematanga lyuba w’ekihugho ekyo eriyasikya-mutima abaghala n’abali betu n’eribatwalira ebindu ebyo babya balaghireko. Omo biharo ebyo mwabya emilele eyabya ikabambira emiyi n’erikolera abakali n’abana bo muhanda. Abaghala betu bangyi babya bera. Aliwe, amaha wabo omwilubuka ly’abaholi abya awatire. Olwanzo lwabo oko Yehova n’obutaleghula bwabo oko ndondeka mubyatula oko mutima wetu. Eky’erileberyako kyabo mukyaleka itwalengekania kutsibu oko ekikaleka itwakolera Yehova n’eriwatya obwikirya bwetu okw’iye. Abaghuma b’oko baghala betu mubaherya amanyumba wabo n’akalyo akabya omo malima wabo. Ekyo mukyanibukya ngoko ebindu by’ekinyamu-biri byanganahwa kitsubukirania kandi ngoko obwira bwetu haghuma na Yehova bo b’omughaso munene kutsibu. Nomo banabya omo mibere eyituwene, abaghala betu isibabeghere eriyilungumula. Emibere yabo muyatuwatikya erilwa n’amakoni n’amaligho wetu omo butubaha.

OMUBÍRÍ MUHYA OMO AZIA

Kandi muhabya oghundi mwatsi ogho tutabya tuyilindireko. Mutwasabwa erihumira oko Beteli ye Hong Kong. Twabya isitulitwatalengekania tuti twanganasyikala omo Azia! Aliwe kundi itwakayilangirira ebyala by’olwanzo bya Yehova omo mibírí yosi eyo twabya tukahabwa, mutwaligha eriyayo. Omo 2013, emisonia ikatoghonga omo meso, mutwasighania abira betu banzwa n’emyatsi eyuwene y’omo Afrika, isitwasi ebitulindirire.

Yabya mbinduka nene erikala omo muyi we Hong Kong kundi abya muyi owalimo abandu banene kutsibu abakasira omo bihugho mbiriri-mbiriri. Kyabya kikalire erigha omubughe we Kishinwa. Nomo byanabya bitya, abaghala n’abali betu mubatukokya n’obutseme, kandi mutwatsemera akalyo kayo. Omubírí mwakanya luba-luba, aliwe oko ndambi ngumerera eyo ebeyi y’ebindu muyapanda. Neryo Ekyaghanda Ekikasondola mukyayisogha n’amenge erighulya ebindu bingyi bye Beteli. Katambi kake, omo 2015, mubatutuma eriyakolera e Korea y’Endina eyo tukakolera lino. Tunemwigha oghundi mubughe owakalire, aliwe nomo sitwangabughagho ndeke, abaghala n’abali betu bakatusikaya-mutima omwitubwira bati tunemuyikasa eribugha Ekikorea.

ESYOSOMO ESYO TWIGHA

Eribya n’abira bahya si kyolo mughulu wosi, aliwe twabirilangira ngoko eribya b’erimbere erikokya abandi erisyatubana, kyanganaleka itwaminya abandu bo luba. Mutwalangira ngoko nomo abaghala betu basighene oko myatsi milebe, aliwe basosene oko myatsi mingyi kandi ngoko Yehova mwatuhangyika n’obutoki bw’erikingula omutima wetu n’erikangania abira betu bangyi b’olwanzo.​—2 Kor. 6:11.

Twabirilangira omughaso w’eryanza abandu ngoko Yehova anzirebo n’eribya tukalangira olwanzo lwa Yehova okw’ite n’obusondoli bwiwe. Omughulu twamabunika-mutima kutse twamalengekania tuti alinga abaghala n’abali betu sibatwanzire, tukatasyasoma esyokarte kutse esyobaruha esyo batuhandikira. Yehova abirisubirya oko misabe yetu, abiritukangania ngoko atwanzire kandi abirituha akaghala.

Omo myaka mingyi, ingye na Lesli twabiriyilangirira ngoko ni ky’omughaso eribya tukasondya akatambi k’eribya kughuma nomo twangabya n’ebingyi by’erikola. Kandi twabiriminya ngoko ni ky’omughaso eriyiseka omughulu twamakola amakosa, kutsibu-tsibu omughulu tukigha omubughe muhya. Neryo omo buli righolo, tukayikasa erisondekania omwatsi mulebe ogho tulyatsemera ogho twangasimako Yehova.

Oko kwenene, nabya ngalengekania niti sinangabya mumisionere kutse niti sinangayikala omo bindi bihugho. Aliwe, nabiriyilangirira ngoko obuli mwatsi akatokekana omo obuwatikya bwa Yehova. Ngibuka ebinywa by’omuminyereri Yeremia, ebikabugha biti: “Uwe [Yehova], wabirinyiteba.” (Yer. 20:7) Inga, Yehova abirituha ebingyi ebyuwene ebyo sitwabya tuyilindirireko n’eyindi miyisa mingyi, nibya n’eriberererya engumbu yaghe y’erighenda omo risu. Twabirilenderera esyobeteli omo syokontina itano. Twabirighenda omo risu omo biharo bingyi kulenga ebyo nangalengekenie inikine mulwana mulere. Omo mibírí yosi eyo twabirihabwa, Lesli akaniwatikaya kutsibu.

Tukabya itunemuyibukya ngoko ebyosi tukakola, tukakolabyo kundi twanzire Yehova. Emiyisa eyo tuli nayo lino yikakanganaya ngoko kyasuwana kundu eribyaho kera na kera omughulu Yehova asyakingula ebyala biwe n’eriha abandu bosi ebiri oko mitima yabo.​—Esy. 145:16.