Wanganabana obuholo omo mughulu w’obuhanya

1. “Obuholo bw’oMungu,” niki kandi bukatuha endundi yahi? (Abanya Filipi 4:6, 7)

HANE obuholo obo abandu b’ekihugho kino batasi. ‘Bw’obuholo bw’oMungu,’ n’ibughambu eritekana erikasira omwibya n’obwira obuwene haghuma na Tata wetu w’elubula. Tukayowa ndeke omughulu tukabya n’obuholo bw’oMungu. (Soma Abanya Filipi 4:6, 7.) Tukabya n’obwira obuwene haghuma n’abandi bandu abamwanzire. Kandi tukabya n’obwira obunokire haghuma ‘n’oMungu oyukaha obuholo.’ (1 Tes. 5:23) Twamaminya Tata wetu, tukamuyiketera, n’erimwowa, obuholo bw’oMungu ibwanganatulerya emitima yetu twamabya itunemulaba omo mwatsi owangaleka itwahangya-hangya.

2. Busanaki twanganikirirya ngoko kinatokekene eribya n’obuholo bw’oMungu?

² Kinatokekene eribana obuholo bw’oMungu omughulu tukahikirawa n’emyatsi eyikalire ng’amalwere, ebitsinduli, amalwa, kutse eryendereribwa? Emyatsi yosi eno yanganaleka itwasagha. Kandi, Yesu mwabwira abakwenda biwe ati: “Simuhanga-hangaye emitima yenyu, kandi simubahe.” (Yoa 14:27) Ekikatsemesya ry’eribya abaghala n’abali betu babirikwama amahano wa Yesu. Yehova abiribawatikya, babiribana obuholo kandi nibya ibanemulaba omo maligho awakalire.

NGOKO TWANGABYA ITUNATULERE OMO MUGHULU W’EKIHUNZO

3. Ekihunzo ekiri omo kiharo kilebe kutse ekiri omo kihugho kyosi byanganatsambya-tsambya biti obuholo bwetu?

³ Ekihunzo kyanganaleka engebe y’omundu iyabinduka kutsibu, mbuli kiri omo kihugho kyosi kutse omo kiharo kilebe. Ng’eky’erileberyako Ekorona moyalekire engebe y’abangyi iyabinduka. Omo ripoti nguma, abandu abalabire oko nusu y’ababulibawa amabulyo mobabughire bati omughulu w’ekihunzo ekyo ibakabula otughotseri. Ekihunzo ekyo mokyakanyirye erihanga-hangya, eribunika mutima, etamiro n’erikolesya muhanda esyodawa esikatamiraya, erikolerwa muhanda omo bihanda, n’amalengekania w’eriyita. Eyo wikere yamabya ekitsinduli, wangakolaki utoke eritendihanga-hangya kutsibu n’eribana obuholo obukalua oko Mungu?

4. Busanaki eriminya obuminyereri obo Yesu abugha oko biro by’enduli rikatuletera obuholo?

⁴ Yesu mwabugha embere ati omo biro by’enduli “hasyabya esyondwala ehosi.” (Luka 21:11) Eriminya ekyo likatuwatikaya liti eribya omo buholo? Situlisweka tukalangira ebihunzo bikabya. Tukalangira ngoko emyatsi yinemubya ngoko Yesu abugha ati ikendisyabya. Busana n’ekyo, litolere itwakwama erihano eryo Yesu aha abandu abangabereho oko biro by’enduli: “Mulebaye, simubahe.”​—Mat. 24:6.

5. (a) Ngoko kikanganibwe omo Abanya Filipi 4:8, 9, ni myatsi yahi eyo tutolere itwahira omo misabe omo mughulu w’ekihunzo? (b) Erihulikirira obusomi bw’eBiblia obwabirihambwa, lyangatuletera endundi yahi?

⁵ Ekitisinduli kyanganaleka itwahangya-hangya n’erikwa obuba. Ekyo mokyahikira mwali wetu Desi.b So-mulere wiwe, mughala wa so-mukulu wiwe, n’omunganga wiwe abosi mobahola omo Korona. Mwasagha ati naye obukoni obo bwanganamuhamba neryo inyasighaliryabo mama wiwe omukekulu. Kandi mokyaleka iniasagha ati omubírí wiwe anganahwa neryo amasagha ng’inakendibya akabana akalyo k’ati n’esyofranga sy’eriliha enyumba. Mwahangya-hangya kutsibu, amabya akabula n’ehighotseri. Aliwe enyuma w’aho, Desi mwaswabya omo buholo. Ati? Mwasaba Yehova ati amuwatikaye eritulera n’eribya n’amalengekania awatolere. (Soma Abanya Filipi 4:8, 9.) Mwabya akahulikirira Yehova “akakania” naye erilabira obusomi bw’eBiblia obwabirihambwa. Akabugha ati, “Emilenge y’abasomi eyihehere moyaleka inatulera kandi moyanyibukya ngoko Yehova anyitsomene”.​—Esy. 94:19.

6. Eriyighisya n’emihindano byangakuwatikya biti?

⁶ Ekihunzo kyanganaleka iwataluka erikola emyatsi eyo ulue ubeghere erikola, aliwe ekyo isikyaleka ukaleka eriyighisya n’emihindano. Emyatsi eyiri omo bitabu byetu n’omo syovideo eyikakanganaya ebyo balikyetu bakalabamo iyikendikwibukya ngoko ni bataleghula nomo banemuhikirwa n’amaligho awali ng’ayo. (1 Pet. 5:9) Emihindano iyikendileka iwalengekania oko myatsi eyikasubaya mutima eyiri omo Biblia. Kandi iyikendikuha akanya k’erisubya abandu b’omutima naghu iwasubibwa mutima. (Rom. 1:11, 12) Ukendibya ukaghanirya ngoko Yehova abiriwatikya abaramya biwe ababya balwere, ababya omo buba, kutse omo mbwera, obwikirirya bwaghu ibukendiwata akandi iwayiketera ndeke ngoko naghu akendikuwatikya.

7. Eky’erileberyako ky’omukwenda Yoane kyangakwighisyaki?

⁷ Uyikase erikania n’abaghala n’abali benyu. Omo mughulu w’ekihunzo twanganasabwa eritendisegheranako nibya n’omughulu tuli n’abalikyetu. Oko mighulu ng’eyo itwanganayowa ng’omukwenda Yoane. Abya anzire erilola oko mwira wiwe ye Gayo busu oko busu. (3 Yoa 13, 14) Nomo bine, Yoane mwalangira ngoko syenditoka erilola oko Gayo. Neryo mwakola ekyo angatoka; mwamuhandikira ebaruha. Kyamabya isikyenditokekana mughulu wosi erisungana n’abaghala benyu busu oko busu, iwanganababirikirako kutse iwabahandikira. Wamabya ighunemukania n’abalikyenyu isiwendibya omo mbwera nene kandi ighukenditulera. Wanganabirikira abasyakulu kutsibu-tsibu wamahangya-hangya, kandi ngambe iwakwama amahano agho balyakuha.​—Isa. 32:1, 2.

NGOKO WANGABANA OBUHOLO WAMAHIKIRWA N’EKITSINDULI

8. Ekitsinduli kyangatsambya-tsambya kiti obuholo bwaghu?

⁸ Hanganalaba mughulu muli ighunemuhangya-hangya omo kiharo kyenyu mwamabya ekitsinduli ng’eribwagha ly’amaghetse, omusiki, kutse oluhindi. Iwanganabya omo bulighe, iwahandabuka, kutse iwanganabula omutima omo nda kutsibu-tsibu ekitsinduli ekyo kyamabya imukik’ita omutunga waghu, imukikatsandaya enyumba yaghu kutse ebindu byaghu. Eriyowa utya sikyekanganaya kiti wanzire ebindu byo kutsibu kutse sighuwite obwikirirya. Ukayowa utya kundi ukabya iwabirilaba omo maligho awakalire, neryo abandu isibangakuswekera. (Yobu 1:11) Aliwe wanganatulera nomo wangabya ighunemuhikirwa n’emyatsi eyikita obulighe. Uti?

9. Ebinywa bya Yesu bikatuwatikaya biti eriyiteghekania oko bitsinduli?

⁹ Litolere itwibuka ebyo Yesu abugha. Abandi bakalengekanaya bati ekitsinduli sikyangabahikira. Aliwe itwe tunasi ngoko oko mughulu wetu ebitsinduli bikendikanyirira kandi ngoko ebighuma bya kubyo byanganatuhikira. Yesu mwabugha ati hasyabya “emisiki eminene-minene” n’ebindi bitsinduli embere enduli yihike. (Luka 21:11) Kandi mwabugha ati “ebibi byasyakanya.” Ekyo tunemukilangira. Ng’eky’erileberyako omo kihugho moswire obwiti, n’awandi mategheko awakubahisaya. (Mat. 24:12) Yesu mwatabugha ati emyatsi eyi yikendisyahikira abandu abatekolera Yehova basa. Abaghombe ba Yehova bangyi abataleghula banemuhikirwa n’ebitsinduli. (Isa. 57:1; 2 Kor. 11:25) Yehova syangakola ekitiko-tiko eritukakirya oko bitsinduli byosi. Aliwe anganatuha ebyosi ebyo tulaghireko ebyangaleka itwabya itunatulere.

10. Busanaki eriyitegheka lino busana n’ekitsinduli n’ikangania ko tuyiketere Yehova? (Emisyo 22:3)

¹⁰ Ikyanganoloba eribya itunatulere omughulu ekitsinduli kyamatuhikira twamabya itwabiriyiteghekania. Mbino omundu amayiteghekania, ekyo n’ibugha ambu syaliyiketera Yehova? Ko bite bitya. Eriteghekania emyatsi eyo wangakola ekitsinduli kyamakuhikira kikakanganaya ko uyiketere ngoko Yehova iniakendikuwatikya omo mughulu w’ekitsinduli. Liti? Ekinywa ky’oMungu kikatuhana kiti ngambe itwabya itunateghekenie emyatsi eyo twangakola ekitsinduli kyamatuhikira. (Soma Emisyo 22:3.) Endondeka yabiritubwira kangyi-kangyi eribya itunayiteghekire hamabya ekitsinduli. Yikakola eki erilabira amagezeti, emihindano y’endeko, n’emilaghe.c Tunayiketere Yehova? Twamabya itunamuyiketere itukendiyitegheka embere ekitsinduli kituhikire.

11. Ekyo Margaret alabamo, kyamakwighisyaki?

¹¹ Tukanaye oko byahikira Margaret. Omughulu oluhindi lwabya omo kiharo kyabo, abatabali mobamubwira ambu alue omo nyumba. Emitoka yabya mingyi omo ndaki kundi abandu mobatibitira ighuma, neryo sihabya ah’erilaba. Omuki mwosula omo kyanya, neryo Margaret abya isyangatoka erilua omo mutoka wiwe. Aliwe, mwalama kundi abya inyabiriyiteghekania. Abya inyanabikire omo ngunza yiwe mw’akarte akangamuwatikya eribana enzira eyangamuwatikya erilua omo kiharo ekyo. Abya inyabirilaba omo nzira eyo mw’embere atoke erisyalaba muyo mo bweghu-bweghu hamabibya obuhanya. Eriyiteghekania molyawatikya Margaret erilama oko buhanya obo.

12. Ekikaleka itwakwama obusondoli obulebirye obuteya niki?

¹² Abatabali banganabugha bati tusikaye esyondambi silebe sy’erilua eka kutse esy’erisubayo, kutse ibabugha bati tuseghere, kutse ibatuha obundi busondoli bw’erituteya, kutse eriteya abandi. Abandi bandu sibalibya bangu erisikya obusondoli obo. Bakayitimba-timbaya busana n’eryanza eryamakirira ebindu ebyo babiritunda. Abakristo ibo bakayira bati? EBiblia yikatubwira yiti: “Mowe abatabali ba munakihugho busana n’Omukama kutse ni mwami oyuwite ehamuli, kutse abatabali bakulu buwe abakatumawa.” (1 Pet. 2:13, 14) Endondeka ya Yehova yikatuha obusondoli obukatuteghaya. Bakabya ibanemutwibukya ngoko litolere itwabwira abasyakulu enimero yetu n’ahotwikere lino batoke eritubana omughulu hamabya obuhanya. Wanabirikola utya? Kandi twanganabana n’obusondoli obukatubwira buti tubisame, kutse buti tuseghere, n’obukakanganaya ngoko twangabana obuwatikya kutse obukakanganaya nga twangawatikya abandi bo tuti kandi mughulu wahi. Twamatendiowa, itwanganahira engebe yetu kutse ey’abasyakulu y’omo bwiko. Wibuke ngoko abalume bataleghula aba baliho busana n’erituteya. (Ebr. 13:17) Margaret mwabugha ati, “Nyikirirye kundu ngoko erikwama obusondoli bw’abasyakulu n’obw’endondeka molyasabula engebe yaghe.”

13. Ekyabiriwatikya Abakristo balebe ababiritibita eribya ibanatsemire kandi ibanatekene niki?

¹³ Abaghala n’abali betu bangyi ababiritibita busana n’ekitsinduli kilebe kutse busana n’amalwa babiriyikasa eribeghera emibere yabo mihya-mihya n’erikola bingyi omo mubírí wa Yehova. Ng’Abakristo b’oko karne k’erimbere abapanzalikana busana n’eryendereribwa, abaghala betu abo bakayitsinga “eritula engulu yowene.” (Emib. 8:4) Eritulira likaleka ibahira amalengekania wabo w’oko Bwami omo mwanya w’erihiragho oko mibere eyo balimo. Ekyo kikaleka ibabya ibanatsemire kandi ibanatekene.

NGOKO TWANGABYA ITUNATEKENE TUKENDERERIBWA

14. Eryendereribwa lyangatsambya-tsambya liti obuholo bwetu?

¹⁴ Eryendereribwa lyanganaleka itwaherya emyatsi mingyi eyikatuletera obuholo. Tukatsema omughulu tukabya n’obwiranda bw’erihindana, eritulira, n’erikola emibírí yetu ey’obuli kiro butsira eryubaha. Twamabya isitukiwite obwiranda bw’erikola emyatsi eyo, itwanganahangya-hangya, itwayibulya emyatsi nga yikendighenda yiti enyuma syaho. Aho isitutakola ekibi. Nomo bine, litolere itwayiteya. Yesu mwakangania ngoko eryendereribwa lyanganaleka abigha biwe ibahahukya emitima. (Yoa. 16:1, 2) Niki kyo kyangatuwatikya eribya itunatekene omughulu tukendereribawa?

15. Busanaki siritolere tukasagha eryendereribwa? (Yoane 15:20; 16:33)

¹⁵ Ekinywa ky’oMungu kikatubwira kiti: “Abosi abanzire erikwama engebe y’erikenga oMungu n’erimatikana na Kristo Yesu, basyendereribwa.” (2 Tim. 3:12) Omubírí wetu abere abighanisibwa omo kihugho ekyo mughala wetu Andrei abya ikeremo, mokyamukalako eriligha ngoko Abimiri ba Yehova abosi banganendereribwa. Mwayibwira ati: ‘Hano hali Bimiri bangyi. Bangatoka bati erihamba abosi kwe?’ Amalengekania ayo mwaleka Andrei inyabya akahangya-hangya mughulu wosi omo mwanya w’eritulera. Abandi baghala betu ibo mobayiketera Yehova kandi mobatabya bakalengekania bati sibangahambwa. Babya ibanasi ngoko banganahambwa, aliwe mobatahangya-hangya nga Andrei. Andrei mwayisogha erilengekania ng’ibo n’eriyiketera oMungu. Mwalu inyatulera. Na lino anatsemire nomo amaligho akine. Netu twanganabya nga Andrei. Ni kwenene Yesu mwatubwira ati tukendisyendereribwa, aliwe kandi mwatubwira ati twanganabya bataleghula.​—Soma Yoane 15:20; 16:33.

16. Litolere itwakwama obusondoli bwahi omughulu tukendereribawa?

¹⁶ Twanganabana obusondoli erilua oko beteli kutse oko basyakulu omughulu omubírí wetu amaghanisibwa kutse omughulu amahirwako ebikakiryo ebikalire. Obusondoli obu bukahirawaho busana n’erituteya, tutoke eribana akalyo k’obunya-kirimu, n’erituwatikya erilola embere eritulira ngoko twangatoka. Ngambe iwayikasa erikwama ndeke obusondoli obo ukahabawa nomo wangabya isiwasi ekiryaleka ibwahirwaho. (Yak. 3:17) Kandi isiwabisula emyatsi eyilebirye abaghala n’abali betu kutse eyilebirye endeko oko bandu abatatolere eriminyayo.​—Omug. 3:7.

17. Ng’abakwenda b’oko karne k’erimbere tuyisoghire erikolaki?

¹⁷ Omughuma w’oko myatsi mikulu eyikaleka Sitani inyalwa n’abandu b’oMungu ni kusangwa bali n’omubírí “ow’eriheka eritulagho lya Yesu.” (Erib. 12:17) Sitani n’ekihugho kiwe isibakubahisaya. Omughulu tukatulira n’erikangirirya nomo twangabya itunemwendereribwa, likaleka itwatsema n’eritekana. Oko karne k’erimbere omughulu abasondoli Abayahudi balayira abakwenda bati isibatulira, abalume bataleghula aba mobayisogha eryowa oMungu. Mobataleka eritulira, n’omubírí oyo mwaleka ibatsema. (Emib. 5:27-29, 41, 42) Litolere itwabya b’amenge tukatulira omo mughulu omubírí wetu aliko ebikakiryo. (Mat. 10:16) Aliwe, twamabikola ekyosi-kyosi ekyo twangatoka, itukendibya n’obuholo obo tukabana busana n’erikola emyatsi eyikatsemesaya Yehova n’erikola oko mubírí owakasabula engebe.

“OMUNGU OMWINYE OBUHOLO ASYABYA NENYU”

18. Nindi yukatuha obuholo bw’ekwenene?

¹⁸ Uminye ngoko twanganabya n’obuholo nibya n’omo mighulu eyikalire. Omo mighulu ng’eyo, litolere itwibuka ngoko obuholo obo tulaghireko bw’obuholo bw’oMungu, n’ibughambu obuholo obo Yehova musa yo wangatuha. Uyiketere Yehova omo mughulu w’ekihunzo, omughulu ukahikirawa n’ekitsinduli, kutse omughulu ukendereribawa. Isiwayihighula oko ndondeka yiwe. Ubye ukalengekania oko myatsi eyuwene eyo ukendisyabana omo biro ebikasa. Wamabikola utya, “oMungu omwinye obuholo asyabya [naghu].” (Fil. 4:9) Omo mwatsi owakwamire, tukendisyalebya ngoko twangawatikya Abakristo balikyetu abali omo maligho eribya n’obuholo bw’oMungu.