Ngoko wangayisogha ebikenditsemesya Yehova

1. Ni mwatsi wahi owakalire ogho itwe bosi tutolere erikola?

OBULI kiro tukayisogha oko emyatsi mbiriri-mbiriri. Ebindi bikoloba eriyisogha kubyo, ng’eriyisogha ebyo tukendirya omo tututu n’endambi y’eriyaghotsera. Ebindi bikalire eriyisogha kubyo. Byanganatula oko mubiri wetu, oko butseme bwetu, oko bandu abo twanzire, n’oko ebyo tukakolera Yehova. Twanzire tuti kumbe ebyo tukayisogha ibyatuletera endundi itwe, n’ekihanda kyetu. N’ekikulu oko byosi, twanzire eriyisogha lyetu iryatsemesya Yehova.​—Rom. 12:1, 2.

2. Ni myatsi isatu yahi yo yangakuwatikya eriyisogha n’amenge?

² Twamanza eriyisogha n’amenge tutolere (1) eriminya emyatsi yo ndeke, (2) eriminya amalengekania wa Yehova oko mwatsi ogho tukasonda eriyisoghako, ne (3) erilengekania ndeke embere sy’eriyisogha eky’omwiso. Omwatsi ono akendikania oko myatsi isatu eyo, kandi akendituwatikya erilangira ngoko twangabegherya ndeke obutoki bwetu bw’eriyiteghererya emyatsi.​—Misyo 2:11.

UMINYE EMYATSI YO NDEKE

3. Teka eky’erileberyako ekikakanganaya ngoko utolere eriminya emyatsi yo ndeke embere sy’eriyisogha.

³ Eky’erimbere ekyo utolere erikola utoke eriyisogha ndeke ry’eriminya emyatsi yo ndeke. Busanaki ni ky’omughaso? Tubughe tuti omukoni mulebe amayasungana n’omunganga kundi akwire obukoni obukalire. Omunganga oyo anganalw’inyatsuka erimuhandikira edawa nyilebe isyalyamupima n’erimubulya amabulyo malebe? Ko bite bitya. Naghu wanganayisogha ndeke wamabitsuka eriminya ndeke emyatsi eyilebirye ebyo ukasonda eriyisoghako. Neryo wangakola ekyo kyo ghuti?

4. Ngoko kiri omo Emisyo 18:13, wangaminya ghuti emyatsi yo ndeke embere sy’eriyisogha? (Ulebaye n’epitsa.)

⁴ Kangyi-kangyi twanganaminya emyatsi yo ndeke twamabibulya amabulyo. Tubughe tuti wamabirikirwa oko fete. Ukendighenda kuyo kutse iyehe? Wamabya isiwasi ndeke oyulyateghekanayayo, kutse isiwasi ebikendibyayo, utolere erimubulya amabulyo ng’ano: “Efete eyo ikendibya hayi, kandi oko ndambi syahi? Yikendihikako abandu bangahi? Nindi yukendimanirayo? Ni bahi bo bakendihika kuyo? Ni myatsi yahi yo yikendibyayo? Obwabu bunemwendibyayo?” Ebisubiryo by’oko mabulyo ayo bikendikuwatikya eriyisogha n’amenge.​—Soma Emisyo 18:13.

5. Ekindi eky’erikola enyuma w’eriminya emyatsi yo ndeke ni kyahi?

⁵ Wabiminya emyatsi yosi eyilebirye efete eyo, ekindi eky’erikola ry’erilengekania efete yosi nga yikendilaba yiti. Neryo tubughe tuti wamowa ambu efete eyo yikendibyako abandu abatekolera Yehova kandi hakendibya n’obwabu obute n’oyukendimanirabo. Wanamalangira ebyangaleka efete eyo iyituwana? (1 Pet. 4:3) N’ekindi, wangayira ghuti efete eyo yamabya iyikenditoghera omo kiro kyenyu ky’emihindano kutse ekiro kyaghu ky’eriyatulira? Omughulu ukatsopolaya emyatsi yosi eyilebirye omwatsi ogho ukasonda eriyisoghako, kyanganakwolobera eriyisogha ndeke. Aliwe, hane n’ekindi ekyo utolere erikola. Iwe wamabiminya emyatsi oko fete eyo, neryo ibwa Yehova naye akalangira ati efete eyo?​—Misyo 2:6.

UMINYE AMALENGEKANIA WA YEHOVA

6. Ngoko kiri omo Yakobo 1:5, busanaki litolere itwasaba Yehova y’obuwatikya?

⁶ Usabe Yehova akuwatikaye eriminya ndeke amalengekania wiwe oko mwatsi ogho ukasonda eriyisoghako. Yehova akatulagha erituha amenge aw’erituwatikya eriminya eriyisogha rilebe nga rikamutsemesaya kutse iyehe. Akatuha amenge ayo “n’omutima wosi, kandi syalihayira oyukamusabagho.”​—Soma Yakobo 1:5.

7. Wangaminya ghuti amalengekania wa Yehova oko mwatsi mulebe? Teka eky’erileberyako.

⁷ Wabisaba Yehova y’obusondoli, ngambe iwayiteghererya ndeke ekisubiryo kiwe. Tuteke eky’erileberyako: Tubughe tuti unemubunga, neryo iwahera. Butsira n’eritika-tika ighukendisaba obuwatikya oko mundu w’eyo ulyaherera atoke erikuwatikya. Aliwe, wanganalola embere n’olughendo lwaghu omundu oyo isyalyakusubirya? Siwangakola ekyo! Ighukenditsuka wahulikirira ndeke obusondoli bwiwe. Kutya, enyuma w’erisaba Yehova y’amenge, uyikase eriminya ekisubiryo kiwe omw’ikwesa-kwesa omo Biblia mw’esyokanuni n’emighambo eyangakolesibwa oko mwatsi waghu. Tutasyasuba oko ky’erileberyako ekyo twabirikaniako eky’eriyisogha nga ukendighenda oko fete kutse iyehe. Ngambe iwatsuka eriminya ebyo eBiblia ikabugha oko syofete, oko bira abatuwene, n’oko mwatsi w’erihira Obwami bw’embere omo mwanya w’erikola ebyo twanzire.​—Mat. 6:33; Rom. 13:13; 1 Kor. 15:33.

8. Wangakolaki wamabya ighulaghire oko buwatikya utoke eribana emyatsi eyo ulaghireko? (Ulebaye n’epitsa.)

⁸ Nomo bine bitya, wanganalagha oko buwatikya utoke eriminya eyindi myatsi oko mwatsi ogho unemusonda eriyisoghako. Wanganasaba amahano oko mughala kutse mwali wetu oyukulire. Aliwe kandi, naghu wanganayikwesa-kwesera eyindi myatsi. Hane emyatsi mingyi eyangatuwatikya eyikabanika omo byombo byetu by’erikwesa-kweseramo, ng’ekitabu Musaada wa Kutafuta Habari kwa Ajili ya Mashahidi wa Yehova n’ekitabu Amasako w’erikolesya omo ngebe y’Omukristo. Eky’eribuka kya kino: Ekyo ukalandamirira ry’eriyisogha omo nzira eyikenditsemesya Yehova.

9. Twangaminya tuti ngoko eriyisogha lyetu rikenditsemesya Yehova? (Abanya Efeso 5:17)

⁹ Twangaminya tuti ngoko eriyisogha lyetu rikenditsemesya Yehova? Eky’erimbere, ngambe itwatsuka eriminya Yehova yo ndeke. EBiblia ikabugha yiti, “Eriminya Omubuyirire Kutsibu kyo kikaleka omundu iniabya n’obutoki bw’eryowa emyatsi yo ndeke.” (Misyo 9:10) Inga, obutoki bw’eryowa emyatsi yo ndeke bukasira omw’iminya emibere ya Yehova, erisonda liwe, ebyo anzire n’ebyo aponire. Yibulaye uti, ngoko nasi Yehova, ni yisogha lyahi eryo nangakola eryangamutsemesya?’​—Soma Abanya Efeso 5:17.

10. Busanaki esyokanuni sy’eBiblia ni sy’omughaso munene kulenga emibere y’ewetu n’abatunga betu?

¹⁰ Ndambi silebe, kyanganatusaba erikola omwatsi mulebe owakatsemesaya Yehova, aliwe omwatsi oyo inyahitania abatunga betu. Ng’eky’erileberyako, ababuti balebe banganabya isibanzire mwali wabo akateseka, neryo ibamuhatikana eritahibwa n’omulume oyuwite oko franga nene, kutse oyo angabaha omutahyo ow’asikire nomo banasi ngoko si mundu w’obunya-kirimu. Oko kwenene, banzire obumbesa wabo inyabya ndeke kinya-mubiri, aliwe nindi yukendimuwatikya erilola embere bunya-kirimu? Yehova akalangira ati omwatsi oyo? Ekisubiryo kikabanika omo Matayo 6:33. Omo mulondo oyo, Yesu mwahana Abakristo ati balole embere erihira “Obwami bw’oMungu bw’embere.” Nomo tukakenga ababuti betu n’erisikya abatunga betu, eky’omughaso munene okw’itwe ry’eritsemesya Yehova.

ULENGEKANAYE KUTSIBU EMBERE SY’ERIYISOGHA EKY’OMWISO

11. Ni mubere wahi ow’akanibweko omo Abanya Filipi 1:9, 10 owangakuwatikya erilengekania ndeke embere sy’eriyisogha eky’omwiso?

¹¹ Wabiminya ekyo eBiblia ikabugha oko mwatsi mulebe ogho ukasonda eriyisoghako, ngambe iwatsuka erilengekania ndeke embere sy’eriyisogha eky’omwiso. (Soma Abanya Filipi 1:9, 10.) Obuyiteghererya bwanganakuwatikya eriminya ebyo wanzire eriyisogha nga byangalwiramoki. Kyanganoloba eriyisogha oko myatsi milebe, aliwe kandi kyanganakala oko yindi. Obuyiteghererya bukendikuwatikya eriyisogha n’amenge, nibya nomo myatsi eyikalire.

12-13. Obuyiteghererya bukakuwatikaya buti eriyisogha n’amenge omughulu ukasonda omubiiri w’ekinya-mubiri?

¹² Terilengekania oko mwatsi ono. Unemusondya omubiiri owangawatikya ekihanda kyaghu, neryo iwabana emibiiri ibiri. Iwalengekania oko myatsi yosi eyilebirya emibiiri eyo, ng’omuhanda wayo, eprograme yayo, endambi eyo wangabugha omo nzira ukaya oko mibiiri eyo, n’ebindi. Iwalangira emibiiri yosi ibiri eyo iyinatolere oko Mukristo. Kwa muhwa, wamasombolako omubiiri mughuma kundi gho wanzire erikola kandi gho bakendibya bakakuliha ndeke. Aliwe, hane ebindi eby’erilengekaniako embere sy’eriyisogha eky’omwiso.

¹³ Nga bino: Emibiiri eyo yinemwendihambana n’eprograme yaghu y’emihindano? Emibiiri eyo yinemwendilya endambi yaghu eyeriwatikya ekihanda kyaghu kitoke eribya buholo, eribya n’obutseme n’eriyitunda hakuhi na Yehova? Eriyibulya amabulyo awali ng’ayo likendikuwatikya erihira “emyatsi y’omughaso munene” embere, ni bugha ambu, eriramya lyaghu n’ebiyitawa by’ekihanda kyaghu, omo mwanya w’erironda esyofranga nene. Wamakola ebyo, ighukendiyisogha omo nzira eyo Yehova akenditsumula.

14. Obuyiteghererya n’olwanzo bikatuwatikaya biti eritenditwikalya abandi?

¹⁴ Kandi obuyiteghererya bukaleka itwalengekania ngoko eriyisogha lyetu lyanganatula oko bandi, neryo itwayiteya “n’eritenditwikalya abandi.” (Filip. 1:10) Ekyo ni ky’omughaso, kutsibu-tsibu omughulu tukayisogha oko myatsi eyitulebirye, ng’eriyipamba n’emyambalo. Kwa muhwa, iwe wanzire eriyipamba kutse eryambala omo nzira nyilebe, aliwe ekyo kyanganatwikalia abandi omo ndeko n’ehihya w’endeko. Obuyiteghererya bukendikuwatikya erisikya amalengekania wabo. Olwanzo lukenditukuna erisondya “endundi y’abandi” kandi lukenditukuna eritendilabyaho kateho. (1 Kor. 10:23, 24, 32; 1 Tim. 2:9, 10) Neryo itukendiyisogha omo nzira eyikakanganaya ngoko twanzire abandi kandi tukasikayabo.

15. Ni myatsi yahi yo litolere erikola embere sy’eriyisogha omwatsi mulebe ow’omughaso?

¹⁵ Wamabya ighukayisogha oko mwatsi w’omughaso munene, lengekanaya oko ebyo kikendikusaba erikola utoke eriberererya eriyisogha lyaghu. Yesu mwatukangirirya “erikola emighanzo.” (Luka 14:28) Kwesi, ni ky’omughaso erilengekania oko ndambi, oko bindu, n’oko kaghala ako ukendilaghako utoke eriberererya eriyisogha lyaghu. Ndambi silebe, wanganalangira ikyamatolera erikania n’obuli mughuma w’omo kihanda kyaghu erilangira ebyo atolere erikola eriyisogha lyaghu eryo litokekane. Busanaki ni ky’omughaso eripanga emyatsi yo mutya? Ni kundi, ekyo kyanganakuwatikya erilangira eriyisogha ryaghu nga ryamatolera eritasyasubwamo, kutse iwafumbula ngoko litolere eritasyayisogha omo yindi nzira. Wamabikania n’ab’omo kihanda kyaghu n’erihulikirira amalengekania wabo, ekyo kyanganaleka ibaligha erisighika eriyisogha lyaghu.​—Misyo 15:22.

UYISOGHE EBYUWENE

16. Ni myatsi yahi yo yangakuwatikya eriyisogha ndeke? (Ulebaye n’akasanduku “Wangayisogha ghuti n’amenge?”)

¹⁶ Wamabya iwabirikola emyatsi eyo twamabikaniako, ighukendiyisogha n’amenge. Wabiriminya emyatsi yosi eyilebirye eriyisogha lyaghu, kandi wabiritsopolya n’esyokanuni esikendikuwatikya eriyisogha ngoko Yehova anzire. Neryo ekikisiya ry’erisaba Yehova akuwatikaye eriyisogha lyaghu ribye eriyisogha eryuwene.

17. Ekikulu oko byosi ekyangakuwatikya erisogha ndeke ni kyahi?

¹⁷ Nomo ubeghere eriyisogha ndeke, wibuke ngoko eky’omughaso munene ekyangakuwatikya eriyisogha ndeke ry’eriyiketera amenge aw’akalua oko Yehova omo mwanya w’eriyiketera obwenge bwaghu n’ebyo wabirilabamo. N’iye musa yo angakuha eriminya ry’ekwenene, obutoki bw’eryowa emyatsi yo ndeke, n’obuyiteghererya, ebyangaleka iwabya n’amenge. (Misyo 2:1-5) Yehova anganakuwatikya eriyisogha ebikendimutsemesya.​—Esy. 23:2, 3.