OMWATSI W’ERIGHA 15
OLWIMBO 30 Tata waghe, Mungu waghe, mwira waghe
Okw’itwe, “ni kibuya eriyitunda hakuhi n’oMungu”
“Nikwa okw’ingye, ni kibuya eriyitunda hakuhi n’oMungu.”—ESY. 73:28.
ENZUMWA NGULU
Omwatsi ono akenditukangania ngoko twangayitunda hakuhi na Yehova n’emiyisa eyo twangabana.
1-2. (a) Kikasabaki eribya mwira w’omundu? (b) Tukendikania okuki omo mwatsi ono?
UNAWITE omwira w’oko ndungu? Muwakolaki mutoke eribya bira? Kwa muhwa mwabya mukalabya endambi nene yo haghuma, neryo wamaminya emyatsi eyo abirilolako omo ngebe yiwe, wamaminya ebyo anzire n’ebyo atanzire. Muwalangira emibere yiwe mibuya neryo muwanza eribya nga ye. N’ebyo mubyaleka iwamwanza kutsibu.
2 Eribya bira, kangyi-kangyi kikasaba endambi n’akaghala. Ko bine bitya n’eribya mwira wa Yehova Mungu. Omwatsi ono akendituwatikya eriminya ngoko twangayitunda hakuhi n’oMungu, n’emiyisa eyo twangabana omw’ikola tutya. Okw’itsuka, tulangire busanaki kyuwene eriyitunda hakuhi n’omwira wetu w’oko ndungu, Yehova.
3. Busanaki litolere itwabya tukalengekania oko ndundi eyikaluira omw’iyitunda hakuhi na Yehova? Teka eky’erileberyako.
3 Butsira eritika-tika, naghu unalighire ngoko eriyitunda hakuhi na Yehova kyuwene. Aliwe, eribya tukalengekania oko bibuya ebikaluira omw’iyitunda hakuhi na Yehova kyanganatukuna erilola embere eriyitunda hakuhi naye. (Esy. 63:6-8) Ng’eky’erileberyako, tunasi ngoko eribya tukalya akalyo akatolere, eribya tukakola amazoezi, eribya tukaluhuka eritosire, n’eribya tukanywa amaghetse awatosire byuwene oko mubiri wetu. Aliwe abandu bangyi sibalitsomana emyatsi eyo, kandi sibatsomene erisugha emibiri yabo. Aliwe, omughulu tukalola embere erilengekania oko ndundi eyikaluira omo myatsi eyikawatikaya omubiri wetu, tukalola embere erikolayo. Kutya, twanganaminya ngoko eriyitunda hakuhi na Yehova kyuwene okw’itwe, aliwe eribya tukalengekania oko ndundi eyikaluira omw’ikola ekyo, ekyo kyanganatukuna erilola embere eriyitunda hakuhi n’omwira wetu Yehova.—Esy. 119:27-30.
4. Ngoko kiri omo Esyonyimbo 73:28, omuhandiki w’esyonyimbo esi mwayowa ati?
4 Soma Esyonyimbo 73:28. Omuhandiki w’ Esyonyimbo 73 abya Mulawi oyo wabya akakolera oko hekalu ya Yehova ng’omwimbi. Alinga abya iniabirikolera Yehova yo butaleghula omo myaka mingyi. Aliwe, mwaminya ngoko ni ky’omughaso eriyibukya ngoko “eriyitunda hakuhi n’oMungu” kyuwene okw’iye. Kandi abya anzire abandi ibaminya ngoko eribya n’obwira haghuma n’oMungu ni mwatsi oghuwene okw’ibo. Ni miyisa yahi yo tukabana omw’iyitunda hakuhi n’oMungu?
“ERIYITUNDA HAKUHI N’OMUNGU” KIKALETERA OBUTSEME
5. (a) Busanaki eriyitunda hakuhi na Yehova kikatuletera obutseme bw’ekwenene? (b) Amenge agho Yehova akakuha akakuteghaya ati n’erikuwatikya? (Emisyo 2:6-16)
5 Tukabya twayitunda hakuhi na Yehova, tukabana obutseme bw’ekwenene. Hane emyatsi mingyi eyikaleka itwabya n’obutseme twabiyitunda hakuhi n’oMungu. Ng’eky’erileberyako, omughulu tukasoma ebyo akatubwira omo Kinywa kiwe n’erisikyabyo tukabya n’amenge. N’amenge ayo, akatuteghaya oko myatsi eyangatuhutalya n’okw’itendikola amakosa awakalire. (Soma Emisyo 2:6-16.) Kyo kikaleka eBiblia iyabugha yiti: “Omundu oyukasunga amenge atsemire n’omundu oyukabya n’obutoki bw’eriyiteghererya atsemire.”—Misyo 3:13.
6. Busanaki omuhandiki w’esyonyimbo mwaherya obutseme bwiwe?
6 Oko kwenene, nibya n’abira ba Yehova bakanabya bandu b’obulighe ndambi silebe. Omuhandiki w’ Esyonyimbo 73 mwaherya obutseme bwiwe abere abitsuka erilengekania oko myatsi eyituwene. Mwatsuka erilengekania ati abandu babi bawite amaisa aghuwene nomo sibatsomene oMungu, kutse erimwowa. Ekyo mukyaleka omuhandiki w’esyonyimbo iniahitana nibya mwanza eribya ngabo. Mwatsuka erilengekania ati abandu babi kandi abawite emiyiheko bakabana ebyo banzire, bali n’engebe eyuwene kandi sibatesekire. (Esy. 73:3-7, 12) Kundi omuhandiki w’esyonyimbo mwalangira obutatunganene, mwahikira erilengekania ati erikolera Yehova ni luhira busa. Omo bulighe bwiwe mwalira ati: “Oko kwenene ngaluhira busa ngayitsinga eribya n’omutima ow’erire n’eribya n’ebyala ebiteko olubanza.”—Esy. 73:13.
7. Twangayira tuti omughulu tuli omo bulighe? (Ulebaye kijalada.)
7 Nomo omuhandiki w’esyonyimbo anabya omo bulighe, mwakola omwatsi mulebe atoke eribindula amalengekania wiwe. Mwingira “ahabuyirire hakulu h’oMungu,” n’eyo Yehova mwamuwatikya eribindula amalengekania wiwe. (Esy. 73:17-19) Omughulu tuli omo bulighe, Yehova, omwira wetu w’oko ndungu akabya inyanasi ebikatuhanga-hangaya. Omughulu tuli omo bulighe twanganasaba Yehova atuwatikaye eriminya eky’erikola. Amahano awali omo Kinywa kiwe n’ebinywa eby’erisikya mutima by’abaghala n’abali betu, bikendituha akaghala k’erilola embere erimukolera nibya n’omughulu tuli omo bulighe. Nibya n’omughulu tuwite amaligho mangyi isitwasi eky’erikola, Yehova akendituwatikya eritulera.—Esy. 94:19.a
Omulawi oyo wahandika Esyonyimbo 73, animene “ahabuyirire hakulu h’oMungu” (Ulebaye enungu 7)
“ERIYITUNDA HAKUHI N’OMUNGU” KIKALEKA ITWABYA N’ENGEBE EYUWENE LINO, N’AMAHA W’OMO BIRO EBIKASA
8. Eriyitunda hakuhi n’oMungu kikatuletera eyindi ndundi yahi?
8 Eriyitunda hakuhi n’oMungu kyuwene okw’itwe omo yindi myatsi ibiri y’omughaso. Ow’erimbere, twanganabya n’engebe eyuwene twamabisombola eriyitunda hakuhi n’oMungu. N’ow’akabiri, kikaleka itwabya n’amaha w’ekwenene w’omo biro ebikasa. (Yer. 29:11) Tukanaye buli oko ndundi ibiri esyo.
9. Busanaki eriyitunda hakuhi na Yehova kikatuletera obutseme bw’ekwenene?
9 Eriyitunda hakuhi na Yehova kyanganaleka itwabya n’engebe eyuwene. Abandu bangyi munabwire bakabugha bati sihali oMungu. Neryo sibasi busanaki abandu bali hano oko kihugho, kandi bakalengekanaya bati omo biro ebikasa abandu bakendisyahwa oko kihugho. Aliwe busana n’erigha Ekinywa ky’oMungu, itwe twabirihikira erikirirya ngoko oMungu “akahemba abakamusonda-sonda n’omutima wosi.” (Ebr. 11:6) Nibya na munabwire, tuli n’engebe eyuwene kundi tunemukola ebyaleka itwahangyikwa, ni bugha ambu erikolera Tata wetu w’elubula, Yehova.—Ebih. 10:12, 13.
10. Yehova abirilaghaki abandu abayiketere iye?
10 Abandu bangyi sibawite amaha n’ahake w’omo biro ebikasa. Bakakola omubiiri, ibalunga, ibabuta abana, n’eriteghekania ebiro byabo ebikasa omughulu bakendisyabya isibakikola. Sibasi ebyo oMungu abiritulagha omo biro ebikasa. Aliwe, abaghombe ba Yehova ibo bayiketere Yehova. (Esy. 25:3-5; 1 Tim. 6:17) Tuyiketere oMungu wetu oyo tukayitunda hakuhi naye kandi tuyiketere ngoko akendisyaberererya ebyo abiritulagha. Oko myatsi mingyi mibuya eyo abiritulagha, mune n’erisyamuramya kera na kera omo Paradiso.—Soma Esyonyimbo 37:29.
11. Ni miyisa yahi yo tukabana omughulu tukayitunda hakuhi n’oMungu, n’ekyo kikaleka oMungu inyayowa ati?
11 Hane n’ebindi ebikaleka ikyuwana okw’itwe eriyitunda hakuhi n’oMungu. Ng’eky’erileberyako, Yehova akalagha erighanyira abakola nabi abakabindula omutima wabo n’eriyitunda hakuhi naye. (Isa. 1:18) Ekyo kikaleka itwatayihirako musango busana n’amalolo agho twakola kera. (Esy. 32:1-5) Kandi omughulu tukatsemesaya Yehova, netu tukatsema. (Misyo 23:15) Eribugha ekwenene hane eyindi miyisa mingyi eyo tunemubana busana n’eribya bira b’oMungu. Muleke tukanaye oko ebyo twangakola tutoke eriyitunda hakuhi n’oMungu.
NGOKO TWANGALOLA EMBERE “ERIYITUNDA HAKUHI N’OMUNGU”
12. Litolere itwakolaki tutoke eriyitunda hakuhi n’oMungu?
12 Embere tubatisibawe mutwakola emyatsi mingyi busana n’eribya bira ba Yehova. Mutwigha emyatsi mingyi oko Yehova Mungu n’oko Yesu Kristo, mutwabindula emitima n’erilekana n’amalolo wetu wa kera, mutwakulya obwikirirya omo Mungu, n’eriyikasa erimwowa. Aliwe, eriyitunda hakuhi n’oMungu litolere itwalola embere erikola emyatsi eyo.—Kol. 2:6.
13. Ni myatsi isatu yahi eyangatuwatikya erilola embere eriyitunda hakuhi na Yehova?
13 Ni byahi ebyangatuwatikya erilola embere eriyitunda hakuhi na Yehova? (1) Litolere itwalola embere erisoma eBiblia n’erighayo. Omughulu tukasoma eBiblia tukigha emyatsi mingyi oko Mungu. Aliwe ekyo kisa sikitosire, litolere itwayikasa eriminya amalengekania w’oMungu, ebyo anzire itwakola, n’eriyighendya ngoko Yehova anzire. (Efe. 5:15-17) (2) Litolere itwawatya obwikirirya bwetu, omw’ibya tukaghanirya oko myatsi mingyi eyikakanganaya ngoko Yehova atwanzire. (3) Litolere itwalola embere eripona emyatsi eyikahitanaya Yehova n’eriyihighula oko bandu abakakola emyatsi eyiri ng’eyo.—Esy. 1:1; 101:3.
14. Ngoko kiri omo 1 Abanya Korinto 10:31, biro byosi omo ngebe yetu litolere itwakolaki eritsemesya Yehova? (Ulebaye n’esyopitsa.)
14 Soma 1 Abanya Korinto 10:31. Ni ky’omughaso munene okw’itwe erikola emyatsi eyo twasi ngoko yikenditsemesya Yehova. Aliwe eritulira n’erighenda oko mihindano sibitosire. Emyatsi mibuya eyikatsemesaya Yehova yihiriremo n’ebyo tukakola obuli kiro. Ng’eky’erileberyako, omughulu tukayighendaya ndeke omo myatsi yosi n’eriha abandi oko ebyo tuwiteko tukatsemesaya Yehova. (2 Kor. 8:21; 9:7) Kandi Yehova anzire itwakangania ngoko tusikirye kutsibu engebe eyo abirituha. Neryo, tukayiteghereraya ndeke nga tukalya akalyo kangahi, nga tukanywa kungahi, kandi tukayikasa erikola eyindi myatsi eyikaleka itwabya itunakalire. Yehova akabya abitulangira tukayikasa erikola emyatsi eyo akatusaba, akatutsemera kutsibu.—Luka 16:10.
Erighendya omutoka kutse ebindi, ighunemuteya obusalama, omundu eritsomana omubiri wiwe omw’ikola amazoezi, erirya akalyo akatolere, n’eribya tukahitya ni nzira silebe esyo twangatsemesyamo Yehova (Ulebaye enungu 14)
15. Yehova anzire itwakolera tuti abandi?
15 Yehova anzire abandu bosi, abakamukolera n’abatemukolera. (Mat. 5:45) Neryo anzire netu itwanza abandu bosi. Yehova akatuhana ati: ‘Situbye abakabugha muhanda oko mundu n’omughuma, situbye bandu abakaleta amalwa, . . . tubye bolo embere sy’abandu bosi.’ (Tito 3:2) Nomo abandu sibikirirye Yehova, silitolere tukalengekania tuti tuli b’omughaso munene kubalenga. (2 Tim. 2:23-25) Tukayitunda hakuhi na Yehova omw’ibya tukakolera abandu bosi bo ndeke.
TWANGANAYITUNDA “HAKUHI N’OMUNGU” NIBYA N’OMUGHULU TWAMAKOLA AMAKOSA
16. Omuhandiki w’ Esyonyimbo 73 mwatsuka eriyowa ati enyuma sy’erikolera oMungu oko mughulu mulebe?
16 Hanganabya omughulu iwatsuka erilengekania Yehova nga syakiri hakuhi naghu busana n’amakosa agho wakola kera. Aliwe, wanganibuka eky’erileberyako ky’omuhandiki w’ Esyonyimbo 73. Mwabugha ati: “Ebisando byaghe byabya ibikisiya ibyahera; ebisando byaghe byabya ibikisiya ibyatendera.” (Esy. 73:2) Mwaligha iyuwene-wene ati “mwakaliha” n’eribya “mukiru” “ng’enyama eyitawite amenge” embere sya Yehova. (Esy. 73:21, 22) Neryo mwanalengekania ati busana n’amakosa wiwe Yehova syakimwanzire n’ahake kandi syangamughanyira?
17. (a) Nibya n’omughulu abya abunikire mutima kutsibu, omuhandiki w’esyonyimbo mwakolaki? (b) Twangigha esomo yahi oko eky’erileberyako kiwe? (Ulebaye n’esyopitsa.)
17 Omuhandiki w’esyonyimbo amabya imwalengekania ati Yehova abirimulekerania, alinga amalengekania ayo abya w’omo katambi kake. Nibya n’omughulu ayowa muhanda kutsibu mwalangira ngoko atolere eriyitunda hakuhi na Yehova. Mwahandika ati: “Nikwa lino niri haghuma [na Yehova] ebiro byosi; wabiriniwatirira oko byala byaghe by’amali. Ukanisondola omo rihano ryaghu, n’enyuma sy’aho, ukendinitwala oko lukengerwa.” (Esy. 73:23, 24) Netu kutya, litolere itwabya tukasaba Yehova y’akaghala omughulu twamatsuka erilangira obwikirirya bwetu nga bwabiriloberera kutse itwabiribunika mutima busana n’amakosa agho twakola kera. (Esy. 73:26; 94:18) Nomo twanganakola amakosa awakalire, twanganasuba oko Yehova itunayiketere ngoko ‘anayiteghekire erighanyira.’ (Esy. 86:5) Ni ky’omughaso eriyitunda hakuhi na Yehova kutsibu-tsibu omughulu twabiribunika mutima.—Esy. 103:13, 14.
Twamalangira itulaghire okw’itasyawatya obwikirirya bwetu, litolere itwayitunda hakuhi na Yehova omw’isaba kutsibu n’eribya tukaya oko mihindano (Ulebaye enungu 17)
“ERIYITUNDA HAKUHI N’OMUNGU” KERA NA KERA
18. Busanaki twanganalola embere eriyitunda hakuhi na Yehova kera na kera?
18 Twanganalola embere eriyitunda hakuhi n’oMungu kera na kera. Sitwendisyaleka erigha emyatsi okw’iye. EBiblia ikabugha yiti, “sitwangowa ndeke-ndeke” esyonzira sya Yehova, amenge wiwe n’eriminya liwe.—Rom. 11:33.
19. Esyonyimbo sikatubwiraki oko biro ebikasa?
19 Esyonyimbo 79:13 sikabugha siti: “Itwe bandu baghu kandi kihangulo ky’olulisiryo lwaghu tukendisyakuha ewasingya kera na kera; kandi tukendisyatulaghania eripipa lyaghu erilua oko kizazi erihika oko kindi.” Ukalola embere eriyitunda hakuhi n’oMungu, naghu wanganayiketera kundu ngoko wasyabana emiyisa ya kera na kera n’eribugha uti: “OMungu ni lukuka lw’omutima waghe n’erighabo ryaghe kera na kera.”—Esy. 73:26.
OLWIMBO 32 Ubye oko luhande lwa Yehova!
a Abandu balebe abakalola embere erihangya-hangya kutsibu kutse eriyowa omo bulighe, batolere eriyasungana n’omunganga batoke eriwatikibwa. Eriminya bingyi, ulebaye Akaleberyo k’Omuteya, Na. 1, 2023.