Yeremia
25 Omo mwaka w’akani w’obutabali bwa Yehoyakimu mughala wa Yosia, omwami we Yuda, ni bugha ambu omo mwaka w’erimbere w’obutabali b’omwami Nebukadneza* we Babiloni, oMungu mwakania na Yeremia oko emyatsi eyilebirye abandu bosi be Yuda. 2 Bino by’ebinywa ebyo omuminyereri Yeremia abugha oko bandu bosi be Yuda n’abikalani bosi be Yerusalema:
3 “Eritsuka oko mwaka we 13 w’obutabali bwa Yosia mughala wa Amoni, omwami we Yuda, erihika na munabwire, hamabilaba emyaka 23 Yehova iniabirikania naghe. Naghe ingakanaya nenyu kangyi-kangyi,* aliwe isimulyanza erihulikirira. 4 Yehova naye mwabatumako abaghombe biwe abaminyereri, mwatumabo kangyi-kangyi,* aliwe mumwatanza erihulikirira kutse eritegha okutu mutoke eryowa. 5 Mubabya bakabugha bati: ‘Kisi, inywe bosi muleke emighendere yenyu eyituwene n’emikolere yenyu mibi. Mwamabikola mutya, imukendisyikala mughulu muli omo kihugho ekyo Yehova abaha kera, inywe n’abotata-kulu wenyu. 6 Isimwaramaya eyindi miungu, isimwakolerayo, n’erikukamirayo, kundi mukanihitanaya omw’ikokotya esyosanamu. Mwamatendikola ebyo ngababwira, ingendibaletera obuhanya.’
7 “‘Aliwe mumwatanza erinihulikirira,’ Yehova atya. ‘Nikwa mumwanihitania omw’ikokotya esyosanamu, n’ekyo mukyaleka imwahikirwa n’obuhanya.’
8 “Busana n’ekyo, Yehova w’emilondo ati, ‘“Kundi mumwatanza erisikya ebinywa byaghe, 9 ngendibirikira ebihanda byosi by’oko luhande lw’endata,” Yehova atya, “ngendibirikira n’omwami Nebukadneza* we Babiloni, omughombe waghe. Ngendiletabo basyalwe n’ekihugho kino, abikalani bamo, n’erilwa n’ebihanda byosi ebibatimbireko. Ngenditoghotya ekihugho eki n’ebihanda ebyo. Ngenditoghotyabyo n’eriyirabyo mo kindu ekikita obuba, ekindu ky’erisughundira, n’eriyirabyo mo matongo wa kera na kera. 10 Ngendibughamo emilenge y’obutseme n’ey’eriyisyandira, omulenge w’omulunga mulume n’ow’omulunga mukali, omulenge w’oluso, n’ekyakala ky’etala. 11 Ekihugho kyosi kikendisyabya matongo kandi kikendisyabya kindu ekikita obuba. N’ebihanda ebyo bikendisyakolera omwami we Babiloni omo myaka 70.”’
12 “‘Aliwe emyaka 70 eyo ikendisyabya yabihwa, ngendisyaha amalipizi omwami we Babiloni n’ekihanda ekyo busana n’ekosa yabo,’ Yehova atya. ‘Kandi ngendisyayira ekihugho ky’Abakaldayo mo matongo wa kera na kera. 13 Ngendisyaberererya oko kihugho kino kw’ebinywa byaghe byosi ebyo nabugha niti bikendisyabererera kukyo, ni bugha ambu ebinywa byosi ebihandikire omo kitabu eki, ebyo Yeremia abugha ati bikendisyahikira ebihanda byosi ebi. 14 Kundi ebihanda bingyi n’abami bakulu-bakulu bakendisyabayira mo bakobe babo, kandi ngendisyalihabo erikwamana n’emikolere yabo n’emyatsi eyo bakola.’”
15 Kundi Yehova, oMungu we Israeli, mwakanibwira ati: “Imaya omo byala byaghe mw’ekikombe ky’edivai y’erihitana ryaghe, unywisayeyo ebihanda byosi ebyo ngakutuma niti uyanywisayebyo. 16 Bikendinywa, bikenditsinga-tsinga, n’eriyiwata ng’abasire busana n’omuyali ogho ngendibitumako.”
17 Neryo munimya ekikombe ky’omo byala bya Yehova, namanywisyakyo ebihanda byosi ebyo Yehova anituma ati niyanywisayebyo. 18 Munatsukira oko Yerusalema n’emiyi ye Yuda, abami bayo n’abakulu bayo, nitoke eriyirayo mo matongo, mo kindu ekikita obuba, mo kindu ky’erisughundira, n’eky’eritakira, ngoko biri munabwire. 19 Enyuma sy’aho, munanywisyakyo omwami Farao we Misri, abaghombe biwe, abakulu b’omo butabali bwiwe, n’abandu biwe bosi, 20 n’abandu b’omo bindi bihugho ababya bikere omo kihugho kye Misri, abami bosi b’omo kihugho kye Uzi, abami bosi b’omo kihugho ky’Abafilistini, Ashkeloni, Gaza, Ekroni, n’abandu abasaka be Ashdodi; 21 Edomu, Moabu, n’Abaamoni; 22 abami bosi be Tiro, abami bosi be Sidoni, n’abami bosi b’omo kisanga* ekiri omo ngetse; 23 Dedani, Tema, Buzi, n’abosi abo esyonzwiri syabo syatwibawa oko mutwana;* 24 abami bosi b’Abaarabu, n’abami bosi b’abandu b’omo bindi bihugho abikere omo mbwarara; 25 abami bosi be Zimri, abami bosi be Elamu, n’abami bosi b’Abamedi; 26 abami bosi b’oko luhande lw’endata, bangabya b’ahakuhi kutse b’ehali, mughuma-mughuma, n’awandi mami wosi w’ekihugho awali oko kitaka; n’omwami Sheshaki* akendinywa enyuma syabo.
27 “Kandi litolere iwababwira uti, ‘Yehova w’emilondo, oMungu we Israeli, ati: “Munywe, mutamire, n’erisala, kandi muwe ahisi isimwangasyatoka erihangana, busana n’omuyali ogho ngendibatumako.”’ 28 Bamabighana erimya ekikombe ekiri omo byala byaghu batoke erinywakyo, ubabwire uti, ‘Yehova w’emilondo ati: “Munywekyo, butsira buhaka! 29 Kundi namabitsuka naleta obuhanya b’omo muyi owaliko erina ryaghe, mukalenganaya muti n’inywe ngendibula eriha amalipizi?”’
“‘Simwendibula erihabwa amalipizi, kundi ngabirikira omuyali asyite abikalani bosi b’oko kihugho,’ Yehova w’emilondo atya.
30 “Ukendibugha ebinywa byosi by’obuminyereri n’eribabwira uti,
‘Yehova akendirurumira endata,
Akendyowisya omulenge wiwe iniane omo bwikalo bubuyirire.
Akendirurumira kutsibu omo mwanya wiwe ogho ikeremo.
Akendibungya ng’abakalyatangira emizabibu y’omo kikamiro,
Akendimba olwimbo lw’erikinda abikinda abikalani bosi b’oko kihugho.’
31 ‘Efuyo ikendisyowika oko mipaka y’ekihugho,
Kundi Yehova ali n’olubanza n’abandu b’ebihanda.
Iyuwene-wene akenditswera abandu bosi.*
Kandi akendiita ababi b’omo muyali,’ Yehova atya.
32 Yehova w’emilondo ati:
‘Muhulikire! Obuhanya bunemuyitsa-tsanga erilua omo kihanda kighuma eriya omo kindi,
Ekihunga kinene kinemwasira omo biharo by’ehali-hali by’ekihugho.
33 “‘Abandu abo Yehova akendisyita omo kiro ekyo bakendisyabya eritsuka oko mupaka ono w’ekihugho eriyahika oko ghundi mupaka w’ekihugho. Sihendisyabya oyukalirabo, sihendisyabya oyukakuma-kuma ebinda byabo, kutse oyukatabo. Bakendisyabya ng’embolewa oko kitaka.’
34 Inywe balisya, musimbe, n’erilaka!
Muyikumbaghalaye ahisi, inywe balume b’olukengerwa b’omo kihyo,
Kundi endambi y’eribakera n’eribapanza-panza yamabihika,
Mukendiwa ahisi ng’ekindu ky’obughuli!
35 Abalisya sibawite ah’eritibita,
N’abalume b’olukengerwa b’ekihyo sibawite ah’eribisama.
36 Muhulikirire! Abalisya banemulaka
N’abalume b’olukengerwa b’ekihyo banemusimba,
Kundi Yehova anemutsandya obulisiryo bwabo.
37 N’emyanya eyirimo buholo eyo bandu babya bikeremo siyikirimo bandu
Busana n’erihitana rinene rya Yehova.
38 Abirilua aho akabisama ngoko esimba eyikine nyilere* ikalua aho ikaghotsera
Kundi ekihugho kyabo kyabirya kindu ekikita obuba
Busana n’omuyali owatekwa obulighe
Kandi busana n’erihitana riwe rinene.”