Yeremia
49 Bino byo Yehova akabugha oko Baamoni:
“Israeli syawite abaghala?
Syawite oyo wangalya omwandu?
Busanaki Malkamu abirimya ekiharo kye Gadi?
Kandi busanaki abandu biwe bikere omo miyi ye Israeli?”
2 “‘Busana n’ekyo, muhulikirire, ebiro binemwasa,’ Yehova atya,
‘Omo biro ebyo, ngendisyowisya abandu b’omulenge w’erikangania ngoko hakendibya amalwa* omo muyi w’Abaamoni we Raba.
Omuyi oyo akendibya kilundo ky’ebisambukalirya ekitikeremo mundu,
N’emiyi eyitimbire kugho yikendisyahisibwa.’
‘Na Israeli akendisyimya ekiharo ky’abandu abamupurako ekiharo kiwe,’ Yehova atya.
3 ‘Usimbe, Heshboni, kundi Ai abiritoghotibwa!
Mulake, inywe miyi eyitimbire oko Raba.
Mwambale olukimba lw’esaki.*
Mulire, n’eritimba-timba omo maluba w’amabwe,*
Kundi Malkamu akendisyaya omo bunyewa,
Haghuma n’abahereri biwe n’abakulu abakamukolera.
4 Kundiki ukayihalamba busana n’emisya?*
Busana n’eribanda ryaghu erikasendamo amaghetse, iwe mumbesa oyukaleghula,
Iwe ukayiketera ebindu byaghu by’obughuli
N’eribugha uti: “Nindi yo wangalwa naghe?”’”
5 “‘Ngendikuletera omwatsi owakita obuba,’ Omukama Mukulu oko Bosi, Yehova w’emilondo atya,
‘Obuhanya obo bukendisyalua oko bosi abakutimbireko
Mukendisyapanzwa-panzirwa oko syombande syosi.
Sihendisyabya oyukakuma-kuma abakatibita.’”
6 “‘Aliwe enyuma sy’aho, ngendisyakuma-kuma Abaamoni abanyeghawa,’ Yehova atya.”
7 Bino byo Yehova w’emilondo akabugha oko Edomu:
“Amenge syakiri e Temani?
N’abalume abawite obwenge sibakiwite amahano awuwene ogho bangateka?
Amenge wabo abirihonda kwe?
8 Mutibite, mubinduke!
Muyayibise omo mitobero, inywe bikalani be Dedani!
Kundi ngendiletera Esau y’obuhanya
Endambi y’ingye erimuha amalipizi yikendibya yahika.
9 Abakoha emizabibu bamabyasa ewaghu,
Isibendisigha emizabibu milebe y’eribota-bota?
Abibi bamabyasa omo kiro,
Ibakendiheka ebyo banzire bisa.
10 Aliwe ingye, ngendisigha Esau yo ndumbu.
Ngendisukula ehibisamo hiwe,
Neryo syenditoka eriyibisa.
Abana biwe, abaghala babo, n’abahimbani biwe, abosi bakenditoghotibwa,
Naye syendisyasyabyaho.
11 Usighe abana baghu abatawite baba,
Ngenditeya engebe yabo,
N’abakwa-kali baghu bakendiyiketera ingye.”
12 Kundi Yehova ati: “Hulikirira! Abatalyatswerawa erinywa ekikombe babirikaswa erinywakyo, neryo ukalengekanaya uti n’iwe utendihabwa amalipizi wosi-wosi? Iyehe, siwendibula erihabwa amalipizi, naghu ukendinywakyo.”
13 “Kundi nabirilapa omo rina ryaghe,” Yehova atya, “ngoko Bozra akendibya kindu ekikita obuba, omwanya owakita esisoni, amatongo, n’omwanya ogho bandu bakendibya bakahula bakatakira; n’emiyi yosi eyitimbire kugho yikendibya bisambukalirya bya kera na kera.”
14 Nabiryowa engulu eyikalua oko Yehova,
Omutula-ngulu abiritumwa omo bihanda ayabughe ati:
“Muhindane haghuma, mwase mulwe nagho;
Muyiteghekanaye oko malwa.”
15 “Kundi, nabirikuyira mo muke kutsibu omo kati-kati k’ebihanda,
Omundu oyupokibwe omo bandu.
16 Obuba obo wabya ukahira omo bandi bwabirikuteba,
Eriyilabirirya ry’omutima waghu ryabirikuteba,
Iwe wikere omo mighenye y’olukuka,*
Iwe wikere oko katwa kali-kali.
Nomo wabirihimba oluto lwaghu omo mwanya w’endata ng’erisamba,
Ngendikukimyayo,” Yehova atya.
17 “E Edomu ikendisyabya kindu ekikita obuba. Abosi abakendisyalaba hakuhi naye bakendisyamusamalira n’erikwa obuba, kandi bakendisyasughunda busana n’ebihunzo byosi ebiryamuhikira. 18 Emyatsi ikendisyabya ng’omughulu Sodomo, Gomora, n’emiyi eyitimbire kuyo yatsandibawa,” Yehova atya, “sihali oyukendisyasikala eyo, n’omundu wosi-wosi syendisyikala eyo.
19 “Muhulikirire! Omundu anemusyalwa n’emyanya y’erilisiryamo eyitulere. Ali ng’esimba eyikalua omo hisaka ehihatatene ehiri oko musike we Yordani. Aliwe omo katambi kake, ngendimutibitako alue omo kihugho kyabo. Kandi ngendiyira oyulyasombolawa mo musondoli wiwe. Kundi nindi yuli nga ngye, kandi nindi yukendisyayihanda okw’ingye? Hane omulisya oyo wanganisinga? 20 Busana n’ekyo, inywe balume, muhulikirire ebyo Yehova abiriyisogha* busana na Edomu, n’ebyo abirilengekania busana n’abikalani be Temani.
Oko kwenene, ebyana by’esyonyama bikendikurubanirwa hali.
Obwikalo bwabo bukendiyirwa mo matongo busana nabo.
21 Omughulu bakendisyatera, hakendisyabya efuyo eyikendisyaleka ekihugho ikyalabamo musiki.
Hali efuyo!
Efuyo eyo ikendisyowika eriyahika oko Ngetse y’Engula.
22 Muhulikirire! Ng’erisamba, akendisyaghuluka omo kyanya n’erindaghalira oko kitaka,
Akendisyasanza ebipupa biwe endata oko Bozra.
Ekiro ekyo, omutima w’abasuda be Edomu
Akendisyabya ng’ow’omukali oyunemubuta.”
23 Ebinywa ebilebirye Damasko:
“Hamati ne Arpadi yabirihemuka,
Kundi muyikowa engulu eyituwene.
Yabirihwerekerera* busana n’obuba.
Omo ngetse muli erihangya-hangya eriteryangabonderibwa.
24 Damasko abiribunika mutima.
Abiribinduka n’eritibita, aliwe erihandabuka ryabirimuhamba.
Abirihangya-hangya n’eryowa obulumi
Ng’omukali oyunemubuta.
25 Omuyi oghuwene nga,
Omuyi owalimo obutseme syetabya matongo ati?
26 Kundi abalwana bamo bakendisyawa omo myanya yamo y’abandu bosi,
N’abasuda bosi bakendisyahola omo kiro ekyo,” Yehova w’emilondo atya.
27 “Ngendihisya oluhimbo lwe Damasko lw’omo muliro,
N’omuliro oyo akendihisya ehileberyo hya Ben-hadadi ehyo mundu ate angahikamo bweghu-bweghu.”
28 Bino by’ebinywa ebyo Yehova akabugha oko Kedari, n’oko mami we Hazori, ogho mwami Nebukadneza* we Babiloni asinga:
“Muhangane, muhetukire e Kedari,
Mwite abandu abikere oko luhande lw’eyo ryuba rikasira.
29 Esyohema n’esyonyama syabo sikendihambwa,
Esyohema syabo n’ebindu byabo byosi.
Esyongamia syabo sikendihekwa,
Abandu bakendibugha nabo omo mulenge muli bati, ‘Ehosi-hosi yiri obuba.’”
30 “Mutibite, muye ehali-hali!
Muyikale omo mitobero, inywe bikalani be Hazori,” Yehova atya.
“Kundi omwami Nebukadneza* we Babiloni abiribasohera
Abiripanga ngoko akendilwa nenyu.”
31 “Muhangane, muyalwe n’ekihanda ekikere buholo,
Ekikere mbolere!” Yehova atya.
“Sikiwite emilango kutse ehikale; kikere hali oko bindi.
32 Esyongamia syabo sikendipurwa,
N’esyonyama syabo nene sikendihekwa.
Ngendipanza-panzirabyo ehosi-hosi,
Abakatwa esyonzwiri syabo oko mitwana,*
Kandi obuhanya obo ngendisyabaletera, bukendisyalua oko syombande syosi,” Yehova atya.
33 “Na Hazori akendibya bwikalo bw’emyondo,*
Akendibya matongo wa kera na kera.
Omundu syendisyasyikalayo,
Kandi sihali n’omundu oyukendisyikala mugho.”
34 Bino byo Yehova abwira omuminyereri Yeremia oko Elamu oko mwanzo w’obutabali bw’omwami Zedekia we Yuda: 35 “Yehova w’emilondo ati, ‘Ngenditwa obuta* bwa Elamu, obukamuha akaghala.* 36 Ngendileta e Elamu y’amahunga ani awakalua oko mipaka ini y’olubula. Kandi ngendipanza-panza abikalani bamo oko mahunga ayo. Sihali ekihanda n’ekighuma ekyo bandu be Elamu batendisyayamo.’”
37 “Ngenditsutsanga Abaelamu embere w’esyonzighu syabo n’embere sy’abandu abakasonda eriitabo;* kandi ngendibaletera obuhanya n’erihitana ryaghe rinene,” Yehova atya. “Ngendituma omuyali enyuma syabo erihika omughulu ngendibabughaho.”
38 “Ngendihira e Elamu y’ekitumbi kyaghe ky’obwami, kandi ngenditoghotya omwami n’abakulu be Elamu,” Yehova atya.
39 “Aliwe omo biro by’enduli, ngesyakuma-kuma Abaelamu abanyeghawa,” Yehova atya.