NUMERI

1 UJehova wakhuluma noMosi emmangweni weSinayi,+ etendeni lokuhlangana+ ngelanga lokuthoma enyangeni yesibili emnyakeni wesibili ama-Israyeli aphuma ngawo enarheni yeGibhide.+ Wathi: 2 “Balani+ yoke ihlangano yakwa-Israyeli ngokwemindeni, ngokweenkoro zaboyise nangokuya ngokwesibalo sawo woke amadoda. 3 Wena no-Aroni kufuze nitlolise ngeenqhema woke amadoda aneminyaka ema-20 ukuya phezulu+ bona abemasotja wakwa-Israyeli.

4 Thathani indoda yinye ekorweni ngayinye, izokuba yihloko yendlu kayise.+ 5 La magama wamadoda azonisiza, ekorweni kaRubeni, ngu-Elitsuri+ indodana kaTjhedewuri, 6 ekorweni kaSimiyoni, nguTjhelumiyeli+ indodana kaTsuritjhadayi, 7 ekorweni kaJuda, nguNarhitjhoni+ indodana ka-Aminadaba, 8 ekorweni ka-Isakari, nguNetaneli+ indodana kaTsuwari, 9 ekorweni kaZebuloni, ngu-Eliyabu+ indodana kaRheloni, 10 emadodaneni kaJosefa: ku-Efrayimu,+ ngu-Elitjhama indodana ka-Amihudi, kuManase nguGamaliyeli indodana kaPedatsuri, 11 ekorweni kaBhenjamini, ngu-Abidani+ indodana kaGidiyoni, 12 ekorweni kaDani, ngu-Arhiyezeri+ indodana ka-Amitjhadayi, 13 ekorweni ka-Atjheri, nguPagiyiyeli+ indodana ka-Okirani, 14 ekorweni kaGadi, ngu-Eliyasafa+ indodana kaDewuyeli, 15 ekorweni kaNafitali, ngu-Arhira+ indodana ka-Enani. 16 Laba ngabakhethiweko ehlanganweni. Amakhosana+ weenkoro zaboyise, iinhloko zeenkulungwana zakwa-Israyeli.”+

17 Nje-ke uMosi no-Aroni bathatha amadoda la akhethwe nguZimu. 18 Ngelanga lokuthoma enyangeni yesibili babuthelela yoke ihlangano, woke amadoda aneminyaka ema-20 ukuya phezulu ukwenzela bona atloliswe ngamagama, ngokwemindeni nangokweenkoro zaboyise,+ 19 njengombana uJehova ayala uMosi. UMosi wawatlolisa emmangweni weSinayi.+

20 Amadodana kaRubeni, iinzukulwana zezibulo laka-Israyeli+ atloliswa ngamagama, ngokwemindeni nangokweenkoro zaboyise. Woke amadoda aneminyaka ema-20 ukuya phezulu ebewangakghona ukuya epini abalwa, 21 ekorweni kaRubeni abatloliswako bebazii-46 500.

22 Iinzukulwana zakaSimiyoni+ zatloliswa ngamagama, ngokwemindeni nangokweenkoro zaboyise. Woke amadoda aneminyaka ema-20 ukuya phezulu ebewangakghona ukuya epini abalwa, 23 ekorweni kaSimiyoni atloliswako bewazii-59 300.

24 Iinzukulwana zakaGadi+ zatloliswa ngokwamagama, ngokwemindeni nangokweenkoro zaboyise. Woke amadoda aneminyaka ema-20 ukuya phezulu ebewangakghona ukuya epini abalwa, 25 ekorweni kaGadi atloliswako bewazii-45 650.

26 Iinzukulwana zakwaJuda+ zatloliswa ngokwamagama, ngokwemindeni nangokweenkoro zaboyise. Woke amadoda aneminyaka ema-20 ukuya phezulu ebewangakghona ukuya epini abalwa, 27 ekorweni kaJuda atloliswako bewazii-74 600.

28 Iinzukulwana zaka-Isakari+ zatloliswa ngamagama, ngokwemindeni nangokweenkoro zaboyise. Woke amadoda aneminyaka ema-20 ukuya phezulu ebewangakghona ukuya epini abalwa, 29 ekorweni ka-Isakari atloliswako bewazii-54 400.

30 Iinzukulwana zakaZebuloni+ zatloliswa ngamagama, ngokwemindeni nangokweenkoro zaboyise. Woke amadoda aneminyaka ema-20 ukuya phezulu ebewangakghona ukuya epini abalwa, 31 ekorweni kaZebuloni atloliswako bewazii-57 400.

32 Iinzukulwana zakaJosefa ngo-Efrayimu+ zatloliswa ngamagama, ngokwemindeni nangokweenkoro zaboyise. Woke amadoda aneminyaka ema-20 ukuya phezulu ebewangakghona ukuya epini abalwa, 33 ekorweni ka-Efrayimu atloliswako bewazii-40 500.

34 Iinzukulwana zakaManase+ zatloliswa ngamagama, ngokwemindeni nangokweenkoro zaboyise. Woke amadoda aneminyaka ema-20 ukuya phezulu ebewangakghona ukuya epini abalwa, 35 ekorweni kaManase atloliswako bewazii-32 200.

36 Iinzukulwana zakaBhenjamini+ zatloliswa ngamagama, ngokwemindeni nangokweenkoro zaboyise. Woke amadoda aneminyaka ema-20 ukuya phezulu ebewangakghona ukuya epini abalwa, 37 ekorweni kaBhenjamini atloliswako bewazii-35 400.

38 Iinzukulwana zakaDani+ zatloliswa ngamagama, ngokwemindeni nangokweenkoro zaboyise. Woke amadoda aneminyaka ema-20 ukuya phezulu ebewangakghona ukuya epini abalwa, 39 ekorweni kaDani atloliswako bewazii-62 700.

40 Iinzukulwana zaka-Atjheri+ zatloliswa ngamagama, ngokwemindeni nangokweenkoro zaboyise. Woke amadoda aneminyaka ema-20 ukuya phezulu ebewangakghona ukuya epini abalwa, 41 ekorweni ka-Atjheri atloliswako bewazii- 41 500.

42 Iinzukulwana zakaNafitali+ zatloliswa ngamagama, ngokwemindeni nangokweenkoro zaboyise. Woke amadoda aneminyaka ema-20 ukuya phezulu ebewangakghona ukuya epini abalwa, 43 ekorweni kaNafitali atloliswako bewazii-53 400.

44 Laba batloliswa nguMosi no-Aroni namakhosana wakwa-Israyeli ali-12, ngayinye ijamele indlu kayise. 45 Woke ama-Israyeli angakghona ukuya epini aneminyaka kusukela kwema-20 ukuya phezulu atloliswa ngokwezindlu zaboyise, 46 inani labatloliswako belizii-603 550.+

47 Kodwana amaLevi+ bewangakatloliswa hlangana nezinye iinkoro, ngokweenkoro zaboyise.+ 48 Nje-ke uJehova wathi kuMosi: 49 “Yikoro kaLevi kwaphela okungakafuzi itloliswe begodu akukafuzi ihlanganiswe esibalweni samanye ama-Israyeli.+ 50 Kufuze ukhethe amaLevi bona atlhogomele ithaberinakeli lobuFakazi+ nezitja zalo zoke nazo zoke izinto zalo.+ Azokuthwala ithaberinakeli nezitja zalo zoke+ begodu azokulotjha kilo,+ akampe magega nalo.+ 51 Lokha ithaberinakeli nalithuthwako, amaLevi kufuze alitlhatlhamulule;+ nalihlanganiswako kufuze kube maLevi alihlanganisako; nanyana ngubani ongakavumeleki nakatjhidelako kufuze abulawe.+

52 “UmIsrayeli ngamunye kufuze ahlome itendakhe ekampeni abelwe yona, indoda ngayinye ngokuya ngokweenkoro ezintathu,+ ngokwamabuthwawo wepi. 53 AmaLevi kufuze akampe magega nethaberinakeli lobuFakazi, bona ngingasilingeki ngebanga lehlangano yakwa-Israyeli;+ amaLevi kufuze atlhogomele ithaberinakeli lobuFakazi.”+

54 Ama-Israyeli enza koke uJehova ebekakuyale uMosi. Enza njalo.

2 UJehova wakhuluma noMosi no-Aroni, wathi: 2 “Ama-Israyeli kufuze akampe lapha iinkoro zawo ezintathu zabelwe khona,+ enye nenye indoda hlanu kwetshwayo lendlu kayise. Kufuze akampe aqale itende lokuhlangana, magega nalo.

3 “Labo abazokukampa ukuya ngepumalanga, kuzokuba ziinkoro ezintathu zekampa yakwaJuda, ngokwamabuthwabo wepi. Ikosana yamadodana kaJuda nguNarhitjhoni+ indodana ka-Aminadaba. 4 Abatloliswako ebuthweni lakhe bazii-74 600.+ 5 Abazokukampa eduze naye kuzokuba yikoro yakwa-Isakari. Ikosana yamadodana ka-Isakari nguNetaneli+ indodana kaTsuwari. 6 Abatloliswako ebuthweni lakhe bazii-54 400.+ 7 Ngakwelinye ihlangothi kuzokuba yikoro yakwaZebuloni. Ikosana yamadodana kaZebuloni ngu-Eliyabu+ indodana kaRheloni. 8 Abatloliswako ebuthweni lakhe bazii-57 400.+

9 “Boke abatloliswako emabuthweni wekampa yakwaJuda bazii-186 400. Ngibo okufuze basuke qangi.+

10 “Iinkoro ezintathu zakwaRubeni zizokukampa+ ngesewula ngokwamabuthwazo. Ikosana yamadodana kaRubeni ngu-Elitsuri+ indodana kaTjhedewuri. 11 Abatloliswako ebuthweni lakhe bazii-46 500.+ 12 Abazokukampa eduze naye yikoro yakwaSimiyoni. Ikosana yamadodana kaSimiyoni nguTjhelumiyeli+ indodana kaTsuritjhadayi. 13 Abatloliswako ebuthweni lakhe bazii-59 300.+ 14 Ngakwelinye ihlangothi kuzokuba yikoro kaGadi. Ikosana yamadodana kaGadi ngu-Eliyasafa+ indodana kaRewuyeli. 15 Abatloliswako ebuthweni lakhe bazii-45 650.+

16 “Boke abatloliswako emabuthweni wekampa kaRubeni bazii-151 450, kufuze kube ngibo abasuka kwesibili.+

17 “Itende lokuhlangana nalifuduswako,+ ikampa yamaLevi kufuze ibe hlangana nezinye iinkampa.

“Kufuze akhambe ngokwendlela akampe ngayo,+ omunye nomunye endawenakhe, ngokuya ngokweenkoro zawo ezintathu.

18 “Iinkoro ezintathu zaka-Efrayimu ngokuya ngokwamabuthwazo zizokuya ngetjingalanga. Ikosana yamadodana ka-Efrayimu ngu-Elitjhama+ indodana ka-Amihudi. 19 Abatloliswako ebuthweni lakhe bazii-40 500.+ 20 Ngakwelinye ihlangothi kuzokuba yikoro kaManase.+ Ikosana yamadodana kaManase nguGamaliyeli+ indodana kaPedatsuri. 21 Abatloliswako ebuthweni lakhe bazii-32 200.+ 22 Kuzokulandela ikoro yakwaBhenjamini. Ikosana yamadodana kaBhenjamini ngu-Abidani+ indodana kaGidiyoni. 23 Abatloliswako ebuthweni lakhe bazii-35 400.+

24 “Boke labo abatloliswako emabuthweni wekampa ka-Efrayimu bazii-108 100, ngibo okufuze bakhambe kwesithathu.+

25 “Iinkoro ezintathu zekampa kaDani ngokwamabuthwazo, zizokuya ngetlhagwini. Ikosana yamadodana kaDani ngu-Arhiyezeri+ indodana ka-Amitjhadayi. 26 Abatloliswako ebuthweni lakhe bazii-62 700.+ 27 Abazokukampa eduze naye kuzokuba yikoro yakwa-Atjheri. Ikosana yamadodana ka-Atjheri nguPagiyiyeli+ indodana ka-Okirani. 28 Abatloliswako ebuthweni lakhe bazii-41 500.+ 29 Kuzokulandela ikoro yakwaNafitali. Ikosana yamadodana kaNafitali ngu-Arhira+ indodana ka-Enani. 30 Abatloliswako ebuthweni lakhe bazii-53 400.+

31 “Boke labo abatloliswako ekampeni kaDani bazii-157 600. Kufuze kube ngibo abakhamba ekugcineni,+ ngokuya ngokweenkoro zabo ezintathu.”

32 Ngilawa ama-Israyeli atloliswa ngokuya ngokweenkoro zaboyise. Inani lalabo abatloliselwa ukuya epini emakampeni belizii-603 550.+ 33 Kodwana amaLevi akhenge atloliswe+ namanye ama-Israyeli,+ njengombana uJehova ayala uMosi. 34 Ama-Israyeli enza koke uJehova akuyale uMosi. Le yindlela akampa ngayo, ngokweenkoro zawo ezintathu+ begodu yindlela ebewakhamba ngayo,+ ngokwemindenawo nangokweenkoro zaboyise.

3 Nje-ke lezi ziinzukulwana zaka-Aroni noMosi ngesikhathi uJehova akhuluma noMosi entabeni iSinayi.+ 2 Naka amagama wamadodana ka-Aroni: Izibulo nguNadabi, alandelwe ngu-Abihu,+ u-Elazara+ no-Itamara.+ 3 La magama wamadodana ka-Aroni azeswa begodu abekwa ukuthi abe baphristi.+ 4 UNadabi no-Abihu bafa phambi kwakaJehova ngesikhathi banikela ngomlilo ongakavumeleki phambi kwakaJehova+ emmangweni weSinayi bebahlongakala banganamadodana. Kodwana u-Elazara+ no-Itamara+ baraga nokuba baphristi noyise u-Aroni.

5 Nje-ke uJehova wathi kuMosi: 6 “Biza ikoro yakwaLevi+ ize ngaphambili, ijame phambi kwaka-Aroni umphristi begodu imsize.+ 7 Izokwenza imisebenzayo phambi kwetende lokuhlangana, isize u-Aroni nehlangano yoke ngokwenza imisebenzi yethaberinakeli. 8 Kufuze itlhogomele zoke izinto+ zetendeni lokuhlangana, yenze imisebenzi yawo ngokusiza ama-Israyeli ngemisebenzi yethaberinakeli.+ 9 AmaLevi kufuze uwanikele u-Aroni namadodanakhe. Akhethwe kuma-Israyeli bona amsize.+ 10 Kufuze ubeke u-Aroni namadodanakhe bona benze imisebenzi yobuphristi,+ nanyana ngubani ongakavumeleki otjhidela ethaberinakeli kufuze abulawe.”+

11 UJehova waragela phambili wakhuluma noMosi wathi: 12 “Ngikhethe amaLevi hlangana nama-Israyeli esikhundleni sawo woke amazibulo wama-Israyeli,+ amaLevi azokuba ngewami. 13 Ngombana woke amazibulo ngewami.+ Kusukela ngelanga engabulala ngalo woke amazibulo enarheni yeGibhide,+ ngazicwengisela woke amazibulo kwa-Israyeli kusukela emuntwini ukuya esilwaneni.+ Woke amazibulo azokuba ngewami. NginguJehova.”

14 UJehova waragela phambili wakhuluma noMosi emmangweni weSinayi,+ wathi: 15 “Tlolisa amadodana kaLevi ngokweenkoro zaboyise nangokwemindenawo. Kufuze utlolise woke amadodana kusukela kwanenyanga eyodwa ukuya phezulu.”+ 16 Nje-ke uMosi wawatlolisa njengombana uJehova bekamyalile. 17 Naka amagama wamadodana kaLevi: NguGeritjhoni, uKhehathi noMerari.+

18 La bekumadodana kaGeritjhoni ngokwemindenawo: BekunguLibini noTjhimeyi.+

19 Amadodana kaKhehathi ngokwemindenawo bekungu-Amramu, uJitsihari, uRhebroni no-Uziyeli.+

20 Amadodana kaMerari ngokwemindenawo bekunguMarhili+ noMutjhi.+

Le bekumindeni yamaLevi ngokweenkoro zaboyise.

21 KuGeritjhoni kwavela umndeni wamaLibini+ nomndeni wamaTjhimeyi. Le bekumindeni yamaGeritjhoni. 22 Inani lamadodana atlolisiweko anenyanga eyodwa ukuya phezulu belizii-7 500.+ 23 Imindeni yamaGeritjhoni beyikampe ngemuva kwethaberinakeli+ nca ngetjingalanga. 24 Ikosana yekoro yamaGeritjhoni bekungu-Eliyasafa indodana kaLayela. 25 Umsebenzi ebewenziwa madodana kaGeritjhoni+ etendeni lokuhlangana bekukutlhogomela ithaberinakeli, itende,+ isigubuzeso salo,+ irharideni+ elisebungenweni betende lokuhlangana, 26 amarharideni wesirhodlo,+ irharideni elisebungenweni+ besirhodlo esibhode ithaberinakeli ne-aldara, iintambo zetende nayo yoke imisebenzi ehlobene nalokhu.

27 KuKhehathi kwavela umndeni wama-Amramu, umndeni wamaJitsihari, umndeni wamaRhebroni nomndeni wama-Uziyeli. Le bekumindeni yamaKhehathi.+ 28 Inani labo boke abaduna kusukela kwabanenyanga eyodwa ukuya phezulu bebazii-8 600, umsebenzabo bekukutlhogomela indawo ecwengileko.+ 29 Imindeni yamadodana kaKhehathi beyikampe ngehlangothini elingesewula lethaberinakeli.+ 30 Ikosana yekoro yemindeni yamaKhehathi bekungu-Elitsafani indodana ka-Uziyeli.+ 31 Imisebenzayo bekukutlhogomela umfaji,+ itafula,+ ilithi lesibani,+ ama-aldara,+ izitja+ ezisetjenziswa endaweni ecwengileko, irharideni+ nayo yoke imisebenzi ehlobene nalokhu.+

32 Induna ekulu yamaLevi bekungu-Elazara+ indodana ka-Aroni umphristi, bekaphethe labo abatlhogomela indawo ecwengileko.

33 KuMerari kwavela umndeni wamaMarhili nomndeni wamaMutjhi. Le bekumindeni kaMerari.+ 34 Inani labo boke abaduna abatlolisiweko kusukela kwabanenyanga eyodwa ukuya phezulu bebazii-6 200.+ 35 Ikosana yekoro yemindeni kaMerari bekunguTsuriyeli indodana ka-Abihayili. Beyikampe ngehlangothini elingetlhagwini lethaberinakeli.+ 36 Umsebenzi wamadodana kaMerari bekukutlhogomela amafremu+ wethaberinakeli, iinqabo,+ iinsika,+ imigojana yeensekelo, zoke izitja+ nayo yoke imisebenzi ehlobene nalokhu,+ 37 kuhlanganise iinsika ebezibhode isirhodlo, imigojana yeensekelo,+ iinkhonkhwani zetende neentambo zetende.

38 Labo abakampe phambi kwethaberinakeli eduze nepumalanga phambi kwetende lokuhlangana, bekunguMosi, u-Aroni namadodanakhe. Bebatlhogomela indawo ecwengileko, lo bekumsebenzi abawenzela ama-Israyeli. Nanyana ngubani ongakavumeleki otjhidela lapho bekufuze abulawe.+

39 Boke abaduna bamaLevi kusukela kwabanenyanga eyodwa ukuya phezulu, labo uJehova ayala uMosi no-Aroni bona babatlolise ngokwemindenawo bebazii-22 000.

40 Nje-ke uJehova wathi kuMosi: “Tlolisa boke abaduna abamazibulo wama-Israyeli kusukela kwabanenyanga eyodwa ukuya phezulu,+ ubabale begodu utlole phasi amagamabo. 41 Kufuze ungithathele amaLevi esikhundleni sawo woke amazibulo wama-Israyeli+ begodu uthathe iinlwana ezifuywako zamaLevi esikhundleni sawo woke amazibulo weenlwana ezifuywako zama-Israyeli, nginguJehova.”+ 42 UMosi watlolisa woke amazibulo ahlangana nama-Israyeli njengombana uJehova amyalile. 43 Inani labo boke abaduna abamazibulo abatloliswe ngamagama kusukela kwabanenyanga eyodwa ukuya phezulu bebazii-22 273.

44 UJehova waraga wakhuluma noMosi wathi: 45 “Thatha amaLevi esikhundleni sawo woke amazibulo wama-Israyeli begodu uthathe iinlwana ezifuywako zamaLevi esikhundleni seenlwana ezifuywako zama-Israyeli, amaLevi azokuba ngewami. NginguJehova. 46 Amadodana amazibulo wama-Israyeli adlula amadodana amazibulo wamaLevi ngama-273.+ Bona uhlenge+ amadodana amazibulo wama-Israyeli, 47 umuntu ngamunye kufuze abhadelelwe amatjhekeli amahlanu+ ngokwetjhekeli lendawo ecwengileko. Itjhekeli* limagera* ama-20.+ 48 Imali le kufuze uyinikele u-Aroni namadodanakhe ibe sihlengo samazibulo wama-Israyeli adlula amaLevi.” 49 UMosi wathatha imali yesihlengo yamadodana amazibulo wama-Israyeli adlula amadodana amazibulo wamaLevi. 50 Wathatha emazibulweni amadodana wama-Israyeli amatjhekeli ayi-1 365 ngokwesilinganiso setjhekeli lendawo ecwengileko. 51 Ngemva kwalokho, uMosi wanikela u-Aroni namadodanakhe imali yesihlengo njengombana uJehova amyalile, uMosi wenza lokho uJehova amtjele khona.

4 UJehova wakhuluma noMosi no-Aroni, wathi: 2 “Kufuze kubalwe amadodana kaKhehathi+ hlangana namadodana kaLevi ngokwemindenawo nangokweenkoro zaboyise, 3 woke kusukela kaneminyaka ema-30+ kuya kwema-50+ asesiqhemeni esisebenza etendeni lokuhlangana.+

4 “Lo msebenzi wamadodana kaKhehathi etendeni lokuhlangana.+ Ucwengeke khulu: 5 U-Aroni namadodanakhe bazokuza lokha ama-Israyeli nawafudukako begodu bazokwehlisa irharideni,+ bagubuzese ngalo umfaji+ wobuFakazi. 6 Bazowugubuzesa ngesikhumba sesili, bandlale itjhila elihlaza komkayi phezu kwawo begodu bafake iingodo+ zokuwuthwala.

7 “Kufuze bandlale itjhila elihlaza komkayi phezu kwetafula loburotho bombukiso,+ babeke phezu kwayo izitja, amakomitji, iinkotlelo, namajege womnikelo oselwako;+ uburotho okunikelwa ngabo+ kufuze buhlale bukiyo. 8 Bazokundlala itjhila elibomvu be phezu kwazo, bagubuzese itafula ngesikhumba sesili* begodu bafake iingodo+ zokuyithwala. 9 Bazokuthatha itjhila elihlaza komkayi bagubuzese ilithi lesibani,+ iimbani zalo,+ iincimasibani, izinto zokuphatha umlilo+ neenkotlelo zokuphatha amafutha weembani. 10 Bazokuphuthela ilithi lesibani nazo zoke izitja zalo ngesikhumba sesili, bazolithwala ngesigodo eside. 11 Bazokundlala itjhila elihlaza komkayi phezu kwe-aldara legolide,+ baligubuzese ngesikhumba sesili, bafake neengodo zalo+ zokulithwala. 12 Bazokuthatha zoke izitja+ ezisetjenziswa endaweni ecwengileko, baziphuthele ngetjhila elihlaza komkayi nangesikhumba sesili bazithwale ngesigodo eside.

13 “Kufuze basuse umlotha e-aldareni,+ bandlale phezu kwalo itjhila elenziwe ngewulu esipiridzana. 14 Bazokubeka phezu kwalo zoke izitja abazisebenzisa e-aldareni: izinto zokuphatha umlilo, iimforogo, iinrharafu neenkotlelo nazo zoke izitja ze-aldareni;+ bazoligubuzesa ngesikhumba sesili, bafake neengodo+ zokulithwala.

15 U-Aroni namadodanakhe kufuze baqede ukugubuzesa indawo ecwengileko+ nezinto zendaweni ecwengileko ngaphambi kobana ikampa ifuduke. Amadodana kaKhehathi azokuza azozithwala+ kodwana akukafuzi athinte indawo ecwengileko ngombana azokufa.+ Lo msebenzi wamadodana kaKhehathi ebebawenza etendeni lokuhlangana.

16 U-Elazara+ indodana ka-Aroni umphristi nguye ozokutlhogomela amafutha weembani,+ ipepho enuka kamnandi,+ umnikelo weenthoro owenziwa qobe langa namafutha wokuzesa.+ Uzokutlhogomela ithaberinakeli loke nakho koke okukilo kuhlanganise nendawo ecwengileko nezitja zakhona.”

17 UJehova waragela phambili wakhuluma noMosi no-Aroni wathi: 18 “Ningavumeli ikoro yemindeni yamaKhehathi+ itjhatjalaliswe hlangana namaLevi. 19 Nakhu okufuze nikwenze ukuze ikoro yamaKhehathi ingafi ngebanga lokutjhidela ezintweni ezicwengeke khulu.+ U-Aroni namadodanakhe bazokuza banikele umuntu ngamunye umsebenzi nalokho okufuze akuthwale. 20 Akukafuzi bangene babone izinto ezicwengileko ngitjho nanyana kungokwesikhatjhana ngombana bazokufa.”+

21 UJehova wathi kuMosi: 22 “Kufuze kubalwe amadodana kaGeritjhoni+ ngokweenkoro zaboyise nangokwemindenawo. 23 Kufuze utlolise boke kusukela kwabaneminyaka ema-30 kuya kwema-50 asesiqhemeni esabelwe ukusebenza etendeni lokuhlangana. 24 Nakhu imindeni yamaGeritjhoni okufuze ikwenze beyikuthwale:+ 25 Izokuthwala amatjhila wethaberinakeli,+ itende lokuhlangana, isigubuzeso salo nesigubuzeso esenziwe ngesikhumba sesili esiphezu kwalo,+ irharideni elisebungenweni betende lokuhlangana,+ 26 amarharideni wesirhodlo,+ irharideni elisebungenweni besirhodlo+ esibhode ithaberinakeli ne-aldara, iintambo zetende, izitja zalo nakho koke okusetjenziswa ethaberinakeli. Lo msebenzawo. 27 Woke umsebenzi wamadodana wamaGeritjhoni,+ koke okufuze akuthwale kuzokunqotjhiswa ngu-Aroni namadodanakhe kufuze nibanikele imithwalo le bona ibe msebenzawo. 28 Lo msebenzi ozokwenziwa mindeni yamaGeritjhoni etendeni lokuhlangana+ begodu imisebenzayo le izokunqotjhiswa ngu-Itamara+ indodana ka-Aroni umphristi.

29 “Amadodana kaMerari+ uzowatlolisa ngokwemindenawo nangokweenkoro zawo. 30 Kufuze utlolise woke aneminyaka kusukela kwema-30 ukuya kwema-50, woke asesiqhemeni esabelwe ukuyokusebenza etendeni lokuhlangana. 31 Nakhu okufuze akuthwale+ malungana nomsebenzawo etendeni lokuhlangana: amafremu+ wethaberinakeli, iinqabo,+ iinsika,+ iinsekelo;+ 32 iinsika+ ezibhode isirhodlo, iinsekelo,+ iinkhonkhwani zetende,+ iintambo zetende nazo zoke izinto ezisetjenziswa emsebenzini lo. Kufuze wabele ngamunye lokho azokuthwala. 33 Le yindlela imindeni yamadodana kaMerari+ okufuze isebenze ngayo etendeni lokuhlangana inqotjhiswa ngu-Itamara indodana ka-Aroni umphristi.”+

34 UMosi no-Aroni namakhosana+ wehlangano batlolisa amadodana wamaKhehathi+ ngokwemindenawo nangokweenkoro zawo, 35 woke aneminyaka kusukela kwema-30 ukuya kwema-50 asesiqhemeni esabelwe ukusebenza etendeni lokuhlangana.+ 36 Inani lalabo abatloliswako ngokwemindenabo belizii-2 750.+ 37 Laba batloliswa emindenini yamaKhehathi, boke ebebasebenza etendeni lokuhlangana. UMosi no-Aroni babatlolisa ngendlela uJehova ayale ngayo uMosi.+

38 Amadodana kaGeritjhoni+ atloliswa ngokwemindenawo nangokweenkoro zawo, 39 woke aneminyaka kusukela kwema-30 ukuya kwema-50 asesiqhemeni esabelwe ukusebenza etendeni lokuhlangana. 40 Inani lalabo abatloliswe ngokwemindenabo nangokweenkoro zabo belizii-2 630.+ 41 Laba ngilaba abatloliswako emindenini yamadodana kaGeritjhoni, boke ebebasebenza etendeni lokuhlangana. UMosi no-Aroni babatlolisa ngendlela uJehova ayala ngayo.+

42 Amadodana kaMerari atloliswa ngokwemindenawo nangokweenkoro zawo, 43 woke aneminyaka kusukela kwema-30 ukuya kwema-50 ebewasesiqhemeni esabelwe ukusebenza etendeni lokuhlangana.+ 44 Inani lalabo abatloliswa ngokwemindenabo belizii-3 200.+ 45 Laba ngilaba abatloliswa emindenini yamadodana kaMerari, uMosi no-Aroni babatlolisa ngendlela uJehova ayale ngayo uMosi.+

46 UMosi no-Aroni namakhosana wakwa-Israyeli batlolisa woke amaLevi la ngokwemindenawo nangokweenkoro zaboyise; 47 bewaneminyaka ehlangana kwema-30 ukuya kwema-50, woke bewabelwe ukusebenza etendeni lokuhlangana nokuthwala izinto zalo.+ 48 Inani lalawo atloliswako belizii-8 580.+ 49 Atloliswa ngendlela uJehova ayale ngayo uMosi, ngamunye ngokomsebenzi abelwe wona nangalokho okufuze akuthwale; atloliswa njengombana uJehova ayale uMosi.

5 UJehova waraga wakhuluma noMosi, wathi: 2 “Tjela ama-Israyeli bona aqothe ekampeni nanyana ngubani+ onobulepheru namkha ophuma ukusilaphala,+ nanyana ngubani osilaphazwe mumuntu ohlongakeleko.+ 3 Kufuze nibakhuphele ngaphandle ngitjho nanyana kungaba yindoda namkha umfazi. Kufuze nibakhuphele ngaphandle khona bangeze basilaphaza+ amakampa walabo engihlala hlangana nabo.”+ 4 Ama-Israyeli enza njalo, abaqothela ngaphandle kwekampa. Ama-Israyeli enza lokho uJehova akuyale uMosi.

5 UJehova waraga wakhuluma noMosi, wathi: 6 “Tjela ama-Israyeli uthi, ‘Nange indoda namkha umfazi enza nanyana ngisiphi isono, one kuJehova uzokuba nomlandu.+ 7 Kufuze avume isono sakhe,+ akhuphe ihlawulo elingana nesono sakhe bekangezelele ngamaphesenthi ama-20 emalini yehlawulo,+ kufuze ayinikele amonileko. 8 Kodwana nange owoniweko anganasihlobo esingamukela ihlawulo, kufuze ibuyiselwe kuJehova, izokuba ngeyabaphristi. Kufuze alethe iramu kumphristi bona linikelwe kuZimu khona azakulitjalelwa izono.+

9 Yoke iminikelo ecwengileko+ ama-Israyeli ayinikela kumphristi kufuze ibe ngeyakhe.+ 10 Izinto ezicwengileko umuntu azinikela umphristi kuzokuba ngezomphristi.

11 UJehova waraga wakhuluma noMosi, wathi: 12 “Tjela ama-Israyeli uthi, ‘Nakhu okufuze nikwenze nange umfazi womuntu enza isono, angathembeki endodenakhe 13 atjhinge emabhayini nenye indoda+ begodu indodakhe ingayazi indaba leyo. Ngitjho nanyana azisilaphazile, kunganabufakazi begodu angakabanjwa. 14 Nakwenzeka indodakhe ibe nesikhwele namkha isole bona umkayo akakathembeki, ngitjho nanyana umkayo azisilaphazile namkha angakhenge azisilaphaze, 15 indoda le kufuze ilethe umkayo kumphristi, ilethe nomnikelo womkayo, okungokwetjhumi kwe-efa* kweflowuru yebhali. Akukafuzi ithele amafutha kiyo namkha ipepho emhlophe ngombana mnikelo weenthoro wesikhwele, mnikelo weenthoro osikhumbuzo somlandu.

16 Umphristi uzokuletha umfazi lo phambili, amjamise phambi kwakaJehova.+ 17 Umphristi uzokuthatha amanzi acwengileko angesitjeni esenziwe ngomdaka* bekanghwathe ihlabathi yethaberinakeli ayithele emanzini. 18 Umphristi uzokujamisa umfazi lo phambi kwakaJehova, alise iinhluthu zakhe zilembelele, abeke umnikelo weenthoro ezandleni zakhe, okutjho umnikelo weenthoro wesikhwele+ begodu umphristi kufuze aphathe amanzi amunyu aletha isiqalekiso.+

19 “‘Umphristi uzomenza afunge, athi kuye: “Nangabe akhenge uye emabhayini nenye indoda usatjhade nendodakho,+ akhenge uziphathe kumbi begodu uzisilaphaze amanzi la akangakuletheli isiqalekiso. 20 Kodwana nangabe uziphethe kumbi usatjhade nendodakho, wazisilaphaza, watjhinga emabhayini nenye indoda,”+ 21 umphristi uzokwenza umfazi enze isifungo esikhambisana nesiqalekiso begodu umphristi uzokuthi emfazini: “Kwanga uJehova angenza ngawe isibonelo, abantu bakhulume ngawe nabaqalekisako benza neemfungo njengombana uJehova azokubangela bona ungabi nabantwana begodu uvuvuke isibeletho. 22 Amanzi aletha isiqalekiso la azokungena emathunjini, enze isibeletho sakho sivuvuke begodu akubangele bona ungasaba nabantwana. Umfazi kufuze athi: “Amen! Amen!”

23 Umphristi kufuze atlole iinqalekiswezi encwadini begodu azisule ngamanzi amunyu. 24 Uzokwenza umfazi lo asele amanzi amunyu aletha isiqalekiso begodu amanzi aletha isiqalekiso la azokungena emzimbenakhe amenze ezwe ubuhlungu bekadane. 25 Umphristi kufuze athathe umnikelo weenthoro wesikhwele+ esandleni somfazi, awuphephezelise awuse emuva naphambili phambi kwakaJehova, ngemva kwalokho awulethe eduze ne-aldara. 26 Umphristi uzokunghwatha umnikelo weenthoro awuzalise isandla bona ube mnikelo wesikhumbuzo. Uzowutjhisa e-aldareni,+ ngemva kwalokho enze umfazi bona asele amanzi. 27 Uzokwenza umfazi asele amanzi, nange azisilaphazile bese wangathembeki endodenakhe, amanzi aletha isiqalekiso azokungena emzimbenakhe amenze ezwe ubuhlungu, isibeletho sakhe sizokuvuvuka, angekhe asaba nabantwana begodu abantu bazokukhuluma ngaye nabaqalekisako. 28 Kodwana nangabe umfazi akakazisilaphazi begodu uhlwengile, angekhe ajeziswe ngendlela le. Uzokukghona ukuba sidisi bekabe nabantwana.

29 “‘Lo mthetho wesikhwele,+ lokha umfazi nakaziphatha kumbi begodu azisilaphaze asatjhade nendodakhe, 30 namkha lokha indoda nayiba nesikhwele beyisole umkayo ngokungathembeki kufuze imjamise phambi kwakaJehova begodu umphristi enze koke okutjhiwo mthetho. 31 Indoda angekhe ibe nomlandu nange umkayo afunyanwa amlandu. Umkayo uzoziphendulela ngomlandwakhe.’”

6 UJehova waraga wakhuluma noMosi, wathi: 2 “Khuluma nama-Israyeli uthi kiwo, ‘Nange indoda namkha umfazi enza isifungo sokuphila njengomNaziri*+ kaJehova, 3 kufuze angayiseli iwayini namkha esinye isiselo esidakako. Akukafuzi asele iviniga yewayini namkha iviniga yananyana yini edakako.+ Akukafuzi asele nanyana yini eyenziwe ngamadiribe, angawadli amadiribe, kungaba ngamatjha namkha omisiweko. 4 Woke amalanga amNaziri akukafuzi adle nanyana yini eyenziwe ngamadiribe namkha eyenziwe ngamadiribe angakavuthwa namakelo wakhona.

5 “‘Woke amalanga wesifungo sakhe sokuba mNaziri akukafuzi agude ehloko.+ Kufuze ahlale acwengile, alise iinhluthu zakhe zikhule bekube kulapho amalanga wesifungo sakhe asenze kuJehova sekaphelile. 6 Akukafuzi atjhidele hlanu kwesidumbu hlangana namalanga azinikele ngawo kuJehova. 7 Ngitjho nanyana kungahlongakala uyise, unina, umfowabo namkha udadwabo akukafuzi azisilaphaze+ ngombana itshwayo lokuba mNaziri liphezu kwehlokwakhe.

8 “‘Uzokuhlala acwengile kuJehova kiwo woke amalanga wokuba mNaziri. 9 Nange kungahlongakala umuntu eduze kwakhe+ kungakalindeleki begodu asilaphaze iinhluthu ezitjengisa ukuthi uzinikele kuZimu, kufuze agude+ ngelanga azokuhlanjululwa ngalo. Kufuze azigude ngelanga lekhomba. 10 Elangeni lobunane, kufuze alethe amajuba amabili wommango namkha amajuba amancani afuywako amabili kumphristi ebungenweni betende lokuhlangana. 11 Umphristi uzokuthatha elilodwa amenzele umnikelo wesono, elinye amenzele ngalo umnikelo otjhiswako. Uzomenzela umnikelo wokulitjalelwa kwezono+ malungana nomuntu ohlongakeleko. Kufuze acwengise ihlokwakhe ngelangelo. 12 Kufuze athome phasi abe mNaziri kaJehova godu. Uzokuletha iramu elincani elinomnyaka bona libe mnikelo womlandu. Amalanga adlulileko angeze abalwe ngombana usilaphaze ubuNaziri bakhe.

13 “‘Nakhu umthetho omalungana nomNaziri: Nakaqeda amalangakhe wobuNaziri+ uzokulethwa ebungenweni betende lokuhlangana. 14 Uzokuletha umnikelwakhe kuJehova: Iramu elincani eliphile kuhle elinomnyaka bona libe mnikelo otjhiswako,+ imvana esikazi ephile kuhle enomnyaka bona ibe mnikelo wesono,+ iramu eliphile kuhle bona libe mhlatjelo wetjhebiswano,+ 15 umantji woburotho oburondo obunganasibiliso obuvuleke phakathi obenziwe ngeflowuru esefiweko bavangwa namafutha, iimphaphatha ezinganasibiliso ezitjhatjhwe ngamafutha, umnikelo weenthoro+ nomnikelo weenselo.+ 16 Umphristi uzoziletha phambi kwakaJehova, enze umnikelo wesono nomnikelo otjhiswako. 17 Uzokunikela iramu bona libe mhlatjelo wetjhebiswano kuJehova nomantji woburotho obunganasibiliso. Umphristi uzokunikela umnikelo weenthoro+ nomnikelo weenselo.

18 “‘UmNaziri uzokuguda iinhluthu ezisehlokwakhe+ ebungenweni betende lokuhlangana begodu kufuze athathe iinhluthwezo ezilitshwayo lokuba mNaziri azitjhise emlilweni womhlatjelo wetjhebiswano. 19 Umphristi kufuze athathe umkhono obilisiweko+ weramu, athathe uburotho bunye oburondo obuvuleke phakathi obunganasibiliso ngemantjini nesiphaphatha esinganasibiliso, azibeke ezandleni zomNaziri nakaqeda ukuguda iinhluthu ezilitshwayo lobuNaziri bakhe. 20 Umphristi uzoziphephezelisa azise emuva naphambili, zibe mnikelo ophephezeliswako phambi kwakaJehova.+ Isifuba somnikelo osiwa emuva naphambili nomlenze womnikelo+ zizinto ezicwengileko zomphristi. Ngemva kwalokho, umNaziri angalisela iwayini.

21 “‘Nakhu umthetho womNaziri+ owenza isifungo: Nangabe ufunga ukwenza umnikelo kuJehova odlula lokho okulindeleke kuye, kufuze enze akufungileko alandela umthetho wobuNaziri.’”

22 UJehova wathi kuMosi: 23 “Tjela u-Aroni namadodanakhe uthi, ‘Le yindlela okufuze nibusise ngayo+ abantu bakwa-Israyeli. Kufuze nithi kibo:

24 “Kwanga uJehova anganibusisa+ bekanivikele.

25 Kwanga uJehova angaba nomusa+ kini begodu anithande.

26 Kwanga uJehova angaba nomusa kini begodu aniphe ukuthula.”’+

27 Kufuze basebenzise igama lami bona babusise+ ama-Israyeli.”+

7 Ngelanga uMosi aqeda ngalo ukuhlanganisa ithaberinakeli,+ walizesa+ bewalicwengisa nazo zoke izinto ezingaphakathi kwalo, i-aldara nezitja zalo zoke.+ Lokha nakaqeda ukuzesa nokucwengisa izintwezi,+ 2 amakhosana wakwa-Israyeli,+ iinhloko zeenkoro zaboyise zenza umnikelo. Amakhosana weenkorwezo bewaphethe umsebenzi wokutlolisa 3 aletha umnikelwawo phambi kwakaJehova, iinkarana ezisithandathu neenkunzi ezili-12, amakhosana amabili aletha ikarana, ikosana ngayinye yaletha ikunzi; aziletha phambi kwethaberinakeli. 4 UJehova wathi kuMosi: 5 “Yamukela izintwezi kiwo ngombana zizokusetjenziswa etendeni lokuhlangana, kufuze uzinikele amaLevi ngokuya ngokomsebenzawo.”

6 Nje-ke uMosi wamukela iinkarana neenkomo, wazinikela amaLevi. 7 Wanikela amadodana kaGeritjhoni iinkarana ezimbili neenkunzi ezine ngokuya ngokwalokho ebewakutlhoga emsebenzinawo;+ 8 wanikela amadodana kaMerari iinkarana ezine neenkunzi ezibunane ngokuya ngokwalokho ebewakutlhoga emsebenzinawo, ngokwesinqophiso saka-Itamara indodana ka-Aroni umphristi.+ 9 Kodwana amadodana kaKhehathi akhenge awanikele litho ngombana bewasebenza endaweni ecwengileko+ begodu bewathwala izinto ezicwengileko emahlombawo.+

10 Nje-ke amakhosana aletha umnikelwawo lokha nakuvulwa bekuzeswa i-aldara.+ Amakhosana nawaletha iminikelwawo phambi kwe-aldara, 11 UJehova wathi kuMosi: “Qobe langa ikosana ngayinye izokuletha umnikelwayo wokuvulwa kwe-aldara.”

12 Owaletha umnikelwakhe ngelanga lokuthoma bekunguNarhitjhoni+ indodana ka-Aminadaba wekoro kaJuda. 13 Umnikelwakhe bekusisitja sesiliva, ubudisi baso bumatjhekeli* ali-130 nesikotlelo sesiliva ubudisi baso bumatjhekeli ama-70 ngokwesilinganiso setjhekeli lendawo ecwengileko,+ zombili bezizele iflowuru esefiweko ehlanganiswe namafutha bona ibe mnikelo weenthoro;+ 14 ikomitji yinye yegolide ubudisi bayo bebumatjhekeli ali-10 izele ipepho; 15 ikunzana eyodwa, iramu linye neemvana eduna enomnyaka munye bona zibe mnikelo otjhiswako;+ 16 imbuzana bona ibe mnikelo wesono;+ 17 iinkomo ezimbili, amaramu amahlanu, iimpongo ezihlanu neemvana ezihlanu eziduna ezinomnyaka munye bona zibe mhlatjelo wetjhebiswano.+ Lo bekumnikelo kaNarhitjhoni indodana ka-Aminadaba.+

18 Ngelanga lesibili, kwanikela uNetaneli+ indodana kaTsuwari, ikosana yakwa-Isakari. 19 Umnikelwakhe bekusisitja sesiliva, ubudisi baso bumatjhekeli ali-130 nesikotlelo sesiliva ubudisi baso bumatjhekeli ama-70 ngokwesilinganiso setjhekeli lendawo ecwengileko,+ zombili bezizele iflowuru esefiweko ehlanganiswe namafutha bona ibe mnikelo weenthoro;+ 20 ikomitji yinye yegolide ubudisi bayo bebumatjhekeli ali-10 izele ipepho; 21 ikunzana eyodwa, iramu linye neemvana eduna enomnyaka munye bona zibe mnikelo otjhiswako;+ 22 imbuzana bona ibe mnikelo wesono;+ 23 iinkomo ezimbili, amaramu amahlanu, iimpongo ezihlanu neemvana ezihlanu eziduna ezinomnyaka munye bona zibe mhlatjelo wetjhebiswano.+ Lo bekumnikelo kaNetaneli indodana kaTsuwari.

24 Ngelanga lesithathu kwaba yikosana yamadodana kaZebuloni, u-Eliyabu+ indodana kaRheloni, 25 umnikelwakhe bekusisitja sesiliva, ubudisi baso bumatjhekeli ali-130 nesikotlelo sesiliva ubudisi baso bumatjhekeli ama-70 ngokwesilinganiso setjhekeli lendawo ecwengileko,+ zombili bezizele iflowuru esefiweko ehlanganiswe namafutha bona ibe mnikelo weenthoro;+ 26 ikomitji yinye yegolide ubudisi bayo bebumatjhekeli ali-10 izele ipepho; 27 ikunzana eyodwa, iramu linye neemvana eduna enomnyaka munye bona zibe mnikelo otjhiswako;+ 28 imbuzana bona ibe mnikelo wesono;+ 29 iinkomo ezimbili, amaramu amahlanu, iimpongo ezihlanu neemvana ezihlanu eziduna ezinomnyaka munye bona zibe mhlatjelo wetjhebiswano.+ Lo bekumnikelo+ ka-Eliyabu indodana kaRheloni.

30 Ngelanga lesine kwaba yikosana yamadodana kaRubeni, u-Elitsuri+ indodana Tjhedewuri, 31 umnikelwakhe bekusisitja sesiliva, ubudisi baso bumatjhekeli ali-130 nesikotlelo sesiliva ubudisi baso bumatjhekeli ama-70 ngokwesilinganiso setjhekeli lendawo ecwengileko,+ zombili bezizele iflowuru esefiweko ehlanganiswe namafutha bona ibe mnikelo weenthoro;+ 32 ikomitji yinye yegolide ubudisi bayo bebumatjhekeli ali-10 izele ipepho; 33 ikunzana eyodwa, iramu linye neemvana eduna enomnyaka munye bona zibe mnikelo otjhiswako;+ 34 imbuzana bona ibe mnikelo wesono;+ 35 iinkomo ezimbili, amaramu amahlanu, iimpongo ezihlanu neemvana ezihlanu eziduna ezinomnyaka munye bona zibe mhlatjelo wetjhebiswano.+ Lo bekumnikelo ka-Elitsuri+ indodana kaTjhedewuri.

36 Ngelanga lesihlanu kwaba yikosana yamadodana kaSimiyoni, uTjhelumiyeli+ indodana kaTsuritjhadayi, 37 umnikelwakhe bekusisitja sesiliva, ubudisi baso bumatjhekeli ali-130 nesikotlelo sesiliva ubudisi baso bumatjhekeli ama-70 ngokwesilinganiso setjhekeli lendawo ecwengileko,+ zombili bezizele iflowuru esefiweko ehlanganiswe namafutha bona ibe mnikelo weenthoro;+ 38 ikomitji yinye yegolide ubudisi bayo bebumatjhekeli ali-10 izele ipepho; 39 ikunzana eyodwa, iramu linye neemvana eduna enomnyaka munye bona zibe mnikelo otjhiswako;+ 40 imbuzana bona ibe mnikelo wesono;+ 41 iinkomo ezimbili, amaramu amahlanu, iimpongo ezihlanu neemvana ezihlanu eziduna ezinomnyaka munye bona zibe mhlatjelo wetjhebiswano.+ Lo bekumnikelo ka-Tjhelumiyeli+ indodana kaTsuritjhadayi.

42 Ngelanga lesithandathu kwaba yikosana yamadodana kaGadi, u-Eliyasafa+ indodana kaDewuyeli, 43 umnikelwakhe bekusisitja sesiliva, ubudisi baso bumatjhekeli ali-130 nesikotlelo sesiliva ubudisi baso bumatjhekeli ama-70 ngokwesilinganiso setjhekeli lendawo ecwengileko,+ zombili bezizele iflowuru esefiweko ehlanganiswe namafutha bona ibe mnikelo weenthoro;+ 44 ikomitji yinye yegolide ubudisi bayo bebumatjhekeli ali-10 izele ipepho; 45 ikunzana eyodwa, iramu linye neemvana eduna enomnyaka munye bona zibe mnikelo otjhiswako;+ 46 imbuzana bona ibe mnikelo wesono;+ 47 iinkomo ezimbili, amaramu amahlanu, iimpongo ezihlanu neemvana ezihlanu eziduna ezinomnyaka munye bona zibe mhlatjelo wetjhebiswano.+ Lo bekumnikelo ka-Eliyasafa+ indodana kaDewuyeli.

48 Ngelanga lekhomba kwaba yikosana yamadodana ka-Efrayimu, u-Elitjhama+ indodana ka-Amihudi, 49 umnikelwakhe bekusisitja sesiliva, ubudisi baso bumatjhekeli ali-130 nesikotlelo sesiliva ubudisi baso bumatjhekeli ama-70 ngokwesilinganiso setjhekeli lendawo ecwengileko,+ zombili bezizele iflowuru esefiweko ehlanganiswe namafutha bona ibe mnikelo weenthoro;+ 50 ikomitji yinye yegolide ubudisi bayo bebumatjhekeli ali-10 izele ipepho; 51 ikunzana eyodwa, iramu linye neemvana eduna enomnyaka munye bona zibe mnikelo otjhiswako;+ 52 imbuzana bona ibe mnikelo wesono;+ 53 iinkomo ezimbili, amaramu amahlanu, iimpongo ezihlanu neemvana ezihlanu eziduna ezinomnyaka munye bona zibe mhlatjelo wetjhebiswano.+ Lo bekumnikelo ka-Elitjhama+ indodana Amihudi.

54 Ngelanga lobunane kwaba yikosana yamadodana kaManase, uGamaliyeli+ indodana kaPedatsuri, 55 umnikelwakhe bekusisitja sesiliva, ubudisi baso bumatjhekeli ali-130 nesikotlelo sesiliva ubudisi baso bumatjhekeli ama-70 ngokwesilinganiso setjhekeli lendawo ecwengileko,+ zombili bezizele iflowuru esefiweko ehlanganiswe namafutha bona ibe mnikelo weenthoro;+ 56 ikomitji yinye yegolide ubudisi bayo bebumatjhekeli ali-10 izele ipepho; 57 ikunzana eyodwa, iramu linye neemvana eduna enomnyaka munye bona zibe mnikelo otjhiswako;+ 58 imbuzana bona ibe mnikelo wesono;+ 59 iinkomo ezimbili, amaramu amahlanu, iimpongo ezihlanu neemvana ezihlanu eziduna ezinomnyaka munye bona zibe mhlatjelo wetjhebiswano.+ Lo bekumnikelo kaGamaliyeli+ indodana kaPedatsuri.

60 Ngelanga lethoba kwaba yikosana+ yamadodana kaBhenjamini, u-Abidani+ indodana kaGidiyoni, 61 umnikelwakhe bekusisitja sesiliva, ubudisi baso bumatjhekeli ali-130 nesikotlelo sesiliva ubudisi baso bumatjhekeli ama-70 ngokwesilinganiso setjhekeli lendawo ecwengileko,+ zombili bezizele iflowuru esefiweko ehlanganiswe namafutha bona ibe mnikelo weenthoro;+ 62 ikomitji yinye yegolide ubudisi bayo bebumatjhekeli ali-10 izele ipepho; 63 ikunzana eyodwa, iramu linye neemvana eduna enomnyaka munye bona zibe mnikelo otjhiswako;+ 64 imbuzana bona ibe mnikelo wesono;+ 65 iinkomo ezimbili, amaramu amahlanu, iimpongo ezihlanu neemvana ezihlanu eziduna ezinomnyaka munye bona zibe mhlatjelo wetjhebiswano.+ Lo bekumnikelo ka-Abidani+ indodana kaGidiyoni.

66 Ngelanga letjhumi kwaba yikosana yamadodana kaDani, u-Arhiyezeri+ indodana ka-Amitjhadayi, 67 umnikelwakhe bekusisitja sesiliva, ubudisi baso bumatjhekeli ali-130 nesikotlelo sesiliva ubudisi baso bumatjhekeli ama-70 ngokwesilinganiso setjhekeli lendawo ecwengileko,+ zombili bezizele iflowuru esefiweko ehlanganiswe namafutha bona ibe mnikelo weenthoro;+ 68 ikomitji yinye yegolide ubudisi bayo bebumatjhekeli ali-10 izele ipepho; 69 ikunzana eyodwa, iramu linye neemvana eduna enomnyaka munye bona zibe mnikelo otjhiswako;+ 70 imbuzana bona ibe mnikelo wesono;+ 71 iinkomo ezimbili, amaramu amahlanu, iimpongo ezihlanu neemvana ezihlanu eziduna ezinomnyaka munye bona zibe mhlatjelo wetjhebiswano.+ Lo bekumnikelo ka-Arhiyezeri+ indodana ka-Amitjhadayi.

72 Ngelanga le-11 kwaba yikosana yamadodana ka-Atjheri, uPagiyiyeli+ indodana ka-Okirani, 73 umnikelwakhe bekusisitja sesiliva, ubudisi baso bumatjhekeli ali-130 nesikotlelo sesiliva ubudisi baso bumatjhekeli ama-70 ngokwesilinganiso setjhekeli lendawo ecwengileko,+ zombili bezizele iflowuru esefiweko ehlanganiswe namafutha bona ibe mnikelo weenthoro;+ 74 ikomitji yinye yegolide ubudisi bayo bebumatjhekeli ali-10 izele ipepho; 75 ikunzana eyodwa, iramu linye neemvana eduna enomnyaka munye bona zibe mnikelo otjhiswako;+ 76 imbuzana bona ibe mnikelo wesono;+ 77 iinkomo ezimbili, amaramu amahlanu, iimpongo ezihlanu neemvana ezihlanu eziduna ezinomnyaka munye bona zibe mhlatjelo wetjhebiswano.+ Lo bekumnikelo kaPagiyiyeli+ indodana ka-Okirani.

78 Ngelanga le-12 kwaba yikosana yamadodana kaNafitali,+ u-Arhira indodana ka-Enani, 79 umnikelwakhe bekusisitja sesiliva, ubudisi baso bumatjhekeli ali-130 nesikotlelo sesiliva ubudisi baso bumatjhekeli ama-70 ngokwesilinganiso setjhekeli lendawo ecwengileko,+ zombili bezizele iflowuru esefiweko ehlanganiswe namafutha bona ibe mnikelo weenthoro;+ 80 ikomitji yinye yegolide ubudisi bayo bebumatjhekeli ali-10 izele ipepho; 81 ikunzana eyodwa, iramu linye neemvana eduna enomnyaka munye bona zibe mnikelo otjhiswako;+ 82 imbuzana bona ibe mnikelo wesono;+ 83 iinkomo ezimbili, amaramu amahlanu, iimpongo ezihlanu neemvana ezihlanu eziduna ezinomnyaka munye bona zibe mhlatjelo wetjhebiswano.+ Lo bekumnikelo ka-Arhira+ indodana ka-Enani.

84 Lo bekumnikelo wokuvulwa+ kwe-aldara owalethwa makhosana wakwa-Israyeli lokha nalizeswako: Izitja zesiliva ezili-12, iinkotlelo zesiliva ezili-12, amakomitji wegolide ali-12;+ 85 isitja ngasinye sesiliva ubudisi baso bebumatjhekeli ali-130 begodu isikotlelo ngasinye ubudisi baso bebumatjhekeli ama-70, loke isiliva lezitjezi belimatjhekeli azii-2 400 ngokwesilinganiso setjhekeli lendawo ecwengileko;+ 86 amakomitji wegolide ali-12 azele ipepho, ikomitji ngayinye ubudisi bayo bebumatjhekeli ali-10 ngokwesilinganiso setjhekeli lendawo ecwengileko, loke igolide lamakomitji belilingana namatjhekeli ali-120. 87 Zoke iinkomo zomnikelo otjhiswako bekuziinkunzi ezili-12, amaramu ali-12, iimvana eziduna ezili-12 ngayinye inomnyaka munye nomnikelwawo weenthoro neembuzana ezili-12 zomnikelo wesono; 88 zoke iinkomo zomhlatjelo wetjhebiswano bekuziinkunzi ezima-24, amaramu ama-60, iimpongo ezima-60 neemvana eziduna ezima-60 ngayinye enomnyaka munye. Lo bekumnikelo wokuvulwa+ kwe-aldara ngemva kokuzeswa kwalo.+

89 Nanyana kunini lokha uMosi nakangena ngetendeni lokuhlangana bona ayokukhuluma noZimu,+ bekezwa ilizwi likhuluma naye livela ngehla kwesigubuzeso+ somfaji wobuFakazi hlangana namakherubhi amabili+ begodu uZimu bekakhuluma naye.

8 UJehova wakhuluma noMosi, wathi: 2 “Khuluma no-Aroni uthi kuye, ‘Nawukhanyisa iimbani, iimbani ezilikhomba kufuze zikhanyise indawo ephambi kwelithi lesibani.’”+ 3 Nje-ke u-Aroni wenza njalo. Wakhanyisa iimbani bona zikhanyise phambi kwelithi lesibani+ njengombana uJehova ayale uMosi. 4 Nasi indlela ilithi lesibani ebelenziwe ngayo: Belikhandwe+ ngegolide kusukela esiqwini salo ukuya emathuthumbeni, belenziwe ngendlela uJehova ayitjengise uMosi embonweni.+

5 UJehova wakhuluma godu noMosi, wathi: 6 “Thatha amaLevi hlangana nama-Israyeli uyowahlambulula.+ 7 Le yindlela okufuze uwahlambulule ngayo: Ufafaze ngamanzi wokuhlambulula isono, kufuze asuse uboya obusemzimbenawo ngotjhefana, ahlanze izambatho zawo begodu azihlambulule.+ 8 Kufuze athathe ikunzana+ nomnikelo weenthoro+ weflowuru esefiweko ehlanganiswe namafutha. Uthathe enye ikunzana bona ibe mnikelo wesono.+ 9 Kufuze ulethe amaLevi phambi kwetende lokuhlangana, uhlanganise yoke ihlangano yakwa-Israyeli.+ 10 Nawuletha amaLevi phambi kwakaJehova, ama-Israyeli kufuze abeke izandla zawo phezu kweenhloko zamaLevi.+ 11 U-Aroni kufuze anikele amaLevi phambi kwakaJehova bona abe mnikelo ophephezeliswako,+ ovela kuma-Israyeli begodu azokwenza umsebenzi kaJehova.+

12 “AmaLevi azokubeka izandla zawo phezu kweenhloko zeenkunzi.+ Ngemva kwalokho, azokunikela enye ibe mnikelo wesono, enye ibe mnikelo otjhiswako oya kuJehova bona kwenziwe umnikelo wokulitjalelwa kwezono+ zawo. 13 Ngemva kwalokho, uzokujamisa amaLevi phambi kwaka-Aroni namadodanakhe, abe mnikelo ophephezeliswako oya kuJehova. 14 Kufuze uhlukanise amaLevi hlangana nama-Israyeli, amaLevi azokuba ngewami.+ 15 Ngemva kwalokho, amaLevi azokuza azokusebenza etendeni lokuhlangana. Le yindlela okufuze uwahlanze ngayo begodu uwanikele abe mnikelo ophephezeliswako. 16 Azizipho engiziphiwe ma-Israyeli. Esikhundleni sawo woke amazibulo wakwa-Israyeli,+ ngizokuthatha wona. 17 Ngombana woke amazibulo hlangana nama-Israyeli ngewami, kokubili umuntu nesilwana.+ Ngazicwengisela wona ngelanga ngibulala woke amazibulo wenarheni yeGibhide.+ 18 Ngizokuthatha amaLevi esikhundleni sawo woke amazibulo wakwa-Israyeli. 19 Ngizokunikela amaLevi abe sisipho ku-Aroni namadodanakhe, isipho esivela kuma-Israyeli bona enzele ama-Israyeli imisebenzi etendeni lokuhlangana+ begodu awenzele umnikelo wokulitjalelwa kwezono ukwenzela bona angehlelwa yihlekelele+ lokha nawatjhidela endaweni ecwengileko.”

20 UMosi, u-Aroni nayo yoke ihlangano yakwa-Israyeli benza lokhu kumaLevi. Ama-Israyeli enza koke uJehova akuyale uMosi malungana namaLevi. 21 Nje-ke amaLevi azicwengisa, ahlanza nezambatho zawo,+ ngemva kwalokho, u-Aroni wawanikela aba mnikelo ophephezeliswako phambi kwakaJehova.+ U-Aroni wawenzela umnikelo wokulitjalelwa kwezono bona awahlambulule.+ 22 AmaLevi araga nokwenza umsebenzawo etendeni lokuhlangana phambi kwaka-Aroni namadodanakhe. Ama-Israyeli enza njengombana uJehova ayale uMosi malungana namaLevi.

23 Nje-ke uJehova wakhuluma noMosi, wathi: 24 “Lokhu kuzokusebenza kumaLevi: Indoda eneminyaka kusukela kwema-25 ukuya phezulu izokuhlanganyela nalabo abasebenza etendeni lokuhlangana, 25 kodwana nasele idlule iminyaka ema-50, angeze isasebenza khona. 26 Ingasiza abafowabo abasebenza etendeni lokuhlangana kodwana yona akukafuzi yenze umsebenzi lapho. Ngilokhu okufuze ukwenze malungana namaLevi nemisebenzawo.”+

9 UJehova wakhuluma noMosi emmangweni weSinayi enyangeni yokuthoma,+ emnyakeni wesibili ngemva kokuthi ama-Israyeli aphume eGibhide, wathi: 2 “Ama-Israyeli kufuze alungise umhlatjelo wePhasika+ ngesikhathi esibekiweko.+ 3 Ngelanga le-14 lenyanga le ngamarhwaqela, kufuze niwulungise ngesikhathi esibekiweko. Kufuze niwulungise ngokuya ngokweenqophiso zoke nangokwendlela okufuze ulungiswe ngayo.”+

4 Nje-ke uMosi watjela ama-Israyeli bona alungise umhlatjelo wePhasika. 5 Alungiselela umhlatjelo wePhasika enyangeni yokuthoma, elangeni le-14 ngamarhwaqela emmangweni weSinayi. Enza koke uJehova akuyale uMosi.

6 Nje-ke bekunamadoda azisilaphaza ngokuthinta isidumbu,+ lokho kwawenza angakghoni ukulungiselela umhlatjelo wePhasika ngelangelo. Amadoda la ayokuvela phambi kwakaMosi no-Aroni ngelangelo+ 7 athi kuye: “Sisilaphele ngebanga lokuthinta isidumbu. Kubayini sivinjelwa bona silethe umnikelo kuJehova ngesikhathi esibekiweko hlangana nama-Israyeli?”+ 8 UMosi wawaphendula wathi: “Akhe nilinde khonapho ngizwe bona uJehova uthini ngani.”+

9 UJehova wathi kuMosi: 10 “Tjela ama-Israyeli uthi, ‘Nanyana ngubani hlangana nani namkha isizukulwana senu sizisilaphaza ngokuthinta isidumbu+ namkha sithathe ikhambo elikude, kusafuze silungiselele umhlatjelo wePhasika kaJehova. 11 Kufuze siwulungiselele ngenyanga yesibili,+ elangeni le-14 ngamarhwaqela. Kufuze siwudle noburotho obunganasibiliso nemirorho engakaphekwa.+ 12 Akukafuzi siwulise bekube sekuseni,+ akukafuzi siphule ithambo lemvana.+ Kufuze siwulungiselele ngokuya ngokweenqophiso zePhasika. 13 Nange umuntu angakasilaphali namkha angakathathi ikhambo elide kodwana angalungisi umhlatjelo wePhasika, umuntu loyo kufuze abulawe+ ngombana akhenge enzele uJehova umnikelo ngesikhathi esibekiweko. Uzoziphendulela ngesono sakhe.

14 “‘Nange kunomuntu ovela kwenye inarha ohlala hlangana nani, naye kufuze alungise umhlatjelo wePhasika kaJehova.+ Kufuze awenze ngokuya ngokweenqophiso zePhasika nangendlela okufuze wenziwe ngayo.+ Kuzokusebenza umthetho munye kini nemuntwini ovela kwenye inarha ohlala hlangana nani.’”+

15 Ngelanga okwahlanganiswa ngalo ithaberinakeli,+ kwaba nelifu elagubuzesa ithaberinakeli, itende lobuFakazi. Ebusuku ilifu beliba njengomlilo phezu kwethaberinakeli bekube sekuseni.+ 16 Ngilokhu ebekuhlala kwenzeka: Emini ilifu beligubuzesa ithaberinakeli, ebusuku kube mlilo.+ 17 Bekuthi ilifu nalisukako, ama-Israyeli akhambe khonokho,+ lapho lihlala khona akampe khona.+ 18 Ama-Israyeli bewafuduka ngesinqophiso sakaJehova begodu akampe ngesinqophiso sakaJehova.+ Lokha ilifu nalisahlezi phezu kwethaberinakeli, bewahlala akampile. 19 Lokha ilifu nalihlala phezu kwethaberinakeli amalanga amanengi, ama-Israyeli bewalalela uJehova angakhambi.+ 20 Ngezinye iinkhathi ilifu belihlala phezu kwethaberinakeli amalanga ambalwa. Ama-Israyeli bewakampa ngesinqophiso sakaJehova begodu bewakhamba ngesinqophiso sakaJehova. 21 Ngezinye iinkhathi ilifu belihlala kusukela ebusuku bekube sekuseni, bekuthi lokha nalisukako ekuseni, akhambe. Nanyana kunini ilifu nalisukako, kungaba semini namkha ebusuku, bewakhamba.+ 22 Nanyana ilifu belihlala phezu kwethaberinakeli, kungaba malanga amabili, inyanga namkha isikhathi eside, ama-Israyeli bewahlala akampile angakhambi. Kodwana lokha nalisukako, bewakhamba. 23 Bewakampa ngesinqophiso sakaJehova, akhambe ngesinqophiso sakaJehova. Alalela uJehova, enza lokho uJehova akuyala ngoMosi.

10 Nje-ke uJehova wathi kuMosi: 2 “Zenzele amabhorompita+ amabili ngesiliva elikhandiweko, uwasebenzisele ukubiza ihlangano nalokha nasele kusikhathi sokufuduswa kwamakampa. 3 Lokha nawavuthelwa womabili, ihlangano yoke kufuze ize kuwe ebungenweni betende lokuhlangana.+ 4 Nakuvuthelwa yinye kufuze kuze amakhosana kwaphela, okuziinhloko zeenkulungwana zakwa-Israyeli.+

5 “Itjhada lebhorompita naliya phasi naphezulu, amakampa walabo abangepumalanga+ kufuze akhambe. 6 Itjhada lebhorompita eliya phasi naphezulu nalizwakala kwesibili, amakampa walabo abangesewula+ kufuze akhambe. Kufuze babethe ibhorompita ngendlela le qobe nakukhamba ikampa ngayinye.

7 “Nje-ke nanibizela ihlangano ndawonye, kufuze nivuthele amabhorompita+ kodwana itjhada lamabhorompita akukafuzi liye phasi naphezulu. 8 Amadodana ka-Aroni abaphristi ngiwo azokuvuthela amabhorompita+ begodu nizowasebenzisa ngendlela le kizo zoke iinzukulwana zenu.

9 Lokha nanisenarhenenu bese kuze inaba lizonisahlela, nizokuvuthela amabhorompita+ la bona kuyiwe epini, uJehova uZimenu uzonikhumbula anisindise emanabenenu.

10 Eenkhathini zenu ezithabisako,+ eminyanyenenu+ nekuthwaseni kweenyanga, kufuze nivuthele amabhorompita phezu kweminikelo etjhiswako+ naphezu kwemihlatjelo yetjhebiswano,+ izokuba sikhumbuzo kini phambi kwakaZimenu. NginguJehova uZimenu.”+

11 Ngomnyaka wesibili, ngenyanga yesibili ngelanga lama-20+ ilifu lasuka phezu kwethaberinakeli+ lobuFakazi. 12 Ama-Israyeli asuka emmangweni weSinayi ngendlela ayalwe bona azokukhamba ngayo,+ ilifu lahlala emmangweni weParana.+ 13 Bekukokuthoma afuduka alandela isinqophiso uJehova asinikela uMosi.+

14 Iinkoro ezintathu zekampa yamadodana kaJuda zakhamba kokuthoma ngokwamabuthwazo, uNarhitjhoni+ indodana ka-Aminadaba nguye obekawadosa phambili. 15 UNetaneli+ indodana kaTsuwari nguye obekadosa phambili ekorweni yamadodana ka-Isakari. 16 U-Eliyabu+ indodana kaRheloni nguye obekadosa phambili ekorweni yamadodana kaZebuloni.

17 Lokha ithaberinakeli nalitlhatlhamulwako,+ amadodana kaGeritjhoni+ namadodana kaMerari,+ ebekalithwala akhamba.

18 Iinkoro ezintathu zekampa yakwaRubeni zakhamba ngokwamabuthwazo, u-Elitsuri+ indodana kaTjhedewuri nguye obekadosa phambili. 19 UTjhelumiyeli indodana kaTsuritjhadayi+ nguye obekadosa phambili ikoro yamadodana kaSimiyoni. 20 U-Eliyasafa+ indodana kaDewuyeli nguye obekadosa phambili ikoro yamadodana kaGadi.

21 AmaKhehathi ebewathwala izinto zendaweni ecwengileko+ akhamba. Ithaberinakeli bekufuze bona selihlanganisiwe nawafikako.

22 Iinkoro ezintathu zekampa yamadodana ka-Efrayimu zakhamba ngokwamabuthwazo, u-Elitjhama+ indodana ka-Amihudi nguye obekawadosa phambili. 23 UGamaliyeli+ indodana kaPedatsuri nguye obekadosa phambili ikoro yamadodana kaManase. 24 U-Abidani+ indodana kaGidiyoni nguye obekadosa phambili ikoro yamadodana kaBhenjamini.

25 Iinkoro ezintathu zekampa yamadodana kaDani zakhamba ngokwamabuthwazo, zavikela zoke iinkampa bona kungabi nozisahlela ngemva, u-Arhiyezeri+ indodana ka-Amitjhadayi nguye obekadosa phambili. 26 UPagiyiyeli+ indodana ka-Okirani nguye obekadosa phambili ikoro yamadodana ka-Atjheri. 27 U-Arhira+ indodana ka-Enani nguye obekadosa phambili ikoro yamadodana kaNafitali. 28 Leli lihlelo ama-Israyeli namabuthwawo ebewakhamba ngalo lokha nawafudukako.+

29 UMosi wathi kuRhobabi indodana kaRewuyeli+ wakwaMidiyani umukhwe wakhe: “Siya endaweni uJehova athi ngayo, ‘Ngizoninikela yona.’+ Khamba nathi,+ sizokuphatha kuhle ngombana uJehova uthembise ama-Israyeli izinto ezihle.”+ 30 Kodwana wathi kuye: “Angeze ngikhambe nani. Ngizokubuyela enarhenekhethu neenhlobeni zami.” 31 Wamphendula wathi: “Sibawa ungasitjhiyi ngombana nguwe owaziko ukuthi kufuze sikampe kuphi emmangweni begodu nguwe ongaba mnqophisethu. 32 Nange ukhamba nathi,+ nanyana yini ehle uJehova asenzela yona sizoyihlanganyela nawe.”

33 Bakhamba amalanga amathathu basuka entabeni kaJehova,+ umfaji wesivumelwano+ kaJehova ukhamba phambi kwabo amalanga amathathu kufunwa indawo yokuphumula.+ 34 Ilifu lakaJehova+ beliba phezu kwabo nabasuka lapha bakampe khona.

35 Nanyana kunini lokha umFaji nawufuduswako, uMosi bekathi: “Silwela Jehova,+ amanabakho awasabalale, labo abakuhloyako ababaleke phambi kwakho.” 36 Lokha nawuhlalako, uMosi bekathi: “Kwanga ungaba neenkulungwana zama-Israyeli Jehova.”+

11 Nje-ke abantu bebasasolo banghonghoyila kuJehova. UJehova nakezwa lokho wasilingeka khulu. UJehova wakhupha umlilo, watjhisa abanye abasemaphethelweni wekampa. 2 Kwathi abantu nabathoma ukulilela kuMosi, wabathandazela kuJehova+ umlilo wacima. 3 Indawo leyo yabizwa ngokuthi yiTabhera* ngombana umlilo ovela kuJehova wabatjhisa.+

4 Bekunabantu ebebangasi ma-Israyeli+ hlangana nabo, bathoma ukuba marhamaru+ ngokufuna ukudla nama-Israyeli athoma ukunghonghoyila godu athi: “Ngubani ozosipha inyama?+ 5 Qala bona sizikhumbula kangangani iinhlambi ebesizidla simahla eGibhide, amakomukomu, amakhabe, ama-anyanisi namakonofula!+ 6 Kodwana kwanjesi sesiphelelwa mamandla. Akunalitho esingalidla ngaphandle kwemana le.”+

7 Imana+ beyinjengembewu yekhoriyanda,+ ifana nekghomu. 8 Abantu bebaphuma bayoyidobha, bayisile elitjeni lokusila namkha bayifake esigigweni. Ngemva kwalokho, bebayipheka ngeempoto namkha benze uburotho oburondo.+ Beyinambitheka njengekhekhe elenziwe ngamafutha. 9 Umbethe nawukhithikela ngekampeni ebusuku nemana beyikhithikela lapho.+

10 UMosi wezwa abantu balila, imindeni ngokuhlukahlukana kwayo, indoda ngayinye ijame ebungenweni betende layo. UJehova wasilingeka khulu,+ noMosi akhenge kumthabise nakancani lokho. 11 UMosi wathi kuJehova: “Kubayini ungitlhagisa kangaka? Kubayini ungangamukeli? Kubayini unginikela umsebenzi obudisi kangaka wokutlhogomela abantwaba?+ 12 Ngababeletha na abantwaba bona ungabe uthi kimi, ‘Bagone njengesisebenzi esigona umntwana omunyako,’ ubase enarheni engafunga ukuyinikela abokhokho babo?+ 13 Ngizoyithathaphi inyama engizoyinikela boke abantwaba? Ngombana bahlalele ukungililela bathi, ‘Sinikela inyama sidle!’ 14 Angikghoni ukuthwala abantwaba ngingedwa, bayangidisela.+ 15 Nangabe le yindlela ozongiphatha ngayo, ngibawa ungibulale khona nje+ kodwana nangabe uyangamukela ngibawa ungasangenzi ngibone enye ihlekelele.”

16 UJehova waphendula uMosi wathi: “Ngibuthela amadoda ama-70 hlangana nabadala bakwa-Israyeli, amadoda owaziko bona abadala neenkhulu+ ezizokukghona ukwenza umsebenzi lo, uze nawo etendeni lokuhlangana begodu ujame nawo. 17 Ngizokwehla+ ngizokukhuluma nani lapho,+ ngizokuthatha omunye ummoya kuwe+ ngiwubeke kibo. Bazokusiza ngokutlhogomela abantwaba ukwenzela bona ungasawuthwali wedwa umthwalo lo.+ 18 Kufuze uthi ebantwini, ‘Kusasa kufuze nizicwengise,+ nizokudla inyama ngombana nililele uJehova+ nathi: “Ngubani ozosipha inyama? EGibhide besiphila kamnandi.”+ UJehova uzoninikela inyama nidle.+ 19 Nizoyidla, ingasi ilanga linye, amalanga ama-2, amalanga ama-5, amalanga ali-10 namkha amalanga ama-20, 20 kodwana nizoyidla inyanga yoke bekube kulapho iphuma ngeempumulo beyininyenyise+ ngombana nale uJehova ohlangana nani, benimlilela nithi: “Kubayini saphuma eGibhide.”’”+

21 UMosi wathi: “Ngiphakathi kwamadoda wepi azii-600 000+ kodwana wena usathi, ‘Ngizobanikela inyama abazoyidla inyanga yoke!’ 22 Nange kungahlatjwa umhlambi wezimvu neweenkomo, uzabanela abantwaba na? Namkha nange kungabanjwa zoke iinhlambi zelwandle, zizabanela abantwaba na?”

23 UJehova wathi kuMosi: “Kghani isandla sakaJehova sifitjhani khulu?+ Nje uzokubona ukuthi lokho engikutjhoko kuzokwenzeka kuwe na namkha angekhe.”

24 Nje-ke uMosi wakhamba wayokutjela abantu lokho uJehova akukhulumileko. Wabuthelela amadoda ama-70 avela kubadala babantu wawajamisa magega netende.+ 25 UJehova wehla ngelifu+ wakhuluma naye,+ wathatha omunye ummoya+ ebewukuye wawunikela ngamunye wabadala abama-70. Ummoya nasele ukibo bathoma ukukhuluma* imilayezo evela kuZimu+ kodwana akhenge basayikhuluma godu.

26 Bekunamadoda amabili ekampeni, amagamabo bekungu-Elidada noMedada. Ummoya wehlela phezu kwawo ngombana nawo amagamabo bewatloliwe kodwana bewangakayi etendeni. Nje-ke athoma ukuphorofida ekampeni. 27 Isokana lagijima layokubikela uMosi lathi: “U-Elidada noMedada bayaphorofida ngekampeni!” 28 UJotjhuwa+ indodana kaNuni obekamsizi kaMosi kusukela ebutjheni bakhe wathi: “Mosi kosami, bakhandele!”+ 29 UMosi wathi kuye: “Inga-kghani utshwenyekile ngami? Ngifisa ngasuthi boke abantu bakaJehova bangaba baphorofidi begodu uJehova abeke ummoyakhe phezu kwabo!” 30 Ngokukhamba kwesikhathi, uMosi nabadala bakwa-Israyeli babuyela ekampeni.

31 Umoya ovela kuJehova wavunguza wasusa iinkwali elwandle, wazenza zawela eduze kwekampa,+ mahlangothi woke. Bekufuze ukhambe ilanga loke bona uyokufika lapha kuneenkwali khona. Bezipakelene zilingana namakhubhithi* amabili ukuphakama. 32 Abantu babutha iinkwali ilanga loke, ubusuku boke nangelanga elilandelako. Akekho owadobha ezincani ezingaphasi kwamahomere* alitjhumi begodu bebasolo bazibeka phasi magega nekampa. 33 Kwathi abantu bangakaqedi ukuyidla inyama leyo, uJehova wasilingeka khulu. UJehova wababulala ngesibetho esikhulu.+

34 Indawo leyo bayibiza ngokuthi yiKhibrothi-Hatava*+ ngombana kiyo kwabulungwa abantu ebebamarhamaru.+ 35 Abantu nabasuka eKhibrothi-Hatava baya eRhatserothi, bahlala khona.+

12 UMiriyamu no-Aroni bakhuluma kumbi ngoMosi ngebanga lokuthi uthethe umfazi omKutjhe.+ 2 Bathi: “Kghani uJehova usebenzise uMosi kwaphela bona akhulume nabantu? Thina akhenge asisebenzise na bona akhulume nabantu?”+ UJehova bekalalele.+ 3 UMosi bekathobeke ukudlula boke abantu+ ephasini.

4 Khonokho uJehova wathi kuMosi, ku-Aroni noMiriyamu: “Khambani nobathathu nje niye etendeni lokuhlangana.” Nje-ke bakhamba. 5 UJehova wehla ngesika yelifu+ wajama ebungenweni betende wabiza u-Aroni noMiriyamu. Bobabili beza ngaphambili. 6 Wathi: “Ngilalelani. Nangabe bekunomphorofidi kaJehova hlangana nani, bengizoziveza kuye embonweni+ begodu bengizokukhuluma naye ebhudangweni.+ 7 Kodwana akusinjalo ngencekwami uMosi! Yena ngimphathise yoke indlwami.*+ 8 Ngikhuluma naye bunqopha+ ingasi ngeenrarejo, uJehova ubonakala kuye. Alo, kubayini ningakhenge nisabe ukukhuluma kumbi ngencekwami uMosi?”

9 Nje-ke uJehova wasilingeka khulu ngebanga labo, wakhamba. 10 Ilifu lasuka ngehla kwetende begodu uMiriyamu bekabethwe ngobulepheru obumhlophe njengegabhogo.+ U-Aroni wajika waqala uMiriyamu wambona abethwe ngobulepheru.+ 11 Khonokho u-Aroni wathi kuMosi: “Ngiyakuncenga kosami! Ngibawa ungasijezisi ngebanga lesono esisenzileko. Koke esikwenzileko kubudlhadlha. 12 Ngibawa ungamlisi abe njengomuntu ohlongakeleko, obelethwe ingcenye yenyamakhe seyonakele.” 13 UMosi walila kuJehova wathi: “Maye! Zimu ngiyakubawa mpholise. Ngiyakubawa.”+

14 UJehova wathi kuMosi: “Nange uyise angamkhafulela ebusweni, angekhe na ahlaziseka amalanga alikhomba? Akahlaliswe yedwa amalanga alikhomba ngaphandle kwekampa,+ ngemva kwalokho uzakubuya.” 15 Nje-ke uMiriyamu wahlaliswa yedwa ngaphandle kwekampa amalanga alikhomba,+ abantu akhenge bafuduse ikampa bekwaba kulapho uMiriyamu abuyiswa ekampeni. 16 Ngemva kwalokho, abantu basuka eRhatserothi+ bayokukampa emmangweni weParana.+

13 UJehova wakhuluma noMosi wathi: 2 “Thumela amadoda bona ayokuhlola inarha yeKanana, inarha engiyinikele ama-Israyeli. Kufuze ukhethe ikosana+ yinye kwenye nenye ikoro.”+

3 Nje-ke uMosi wawathuma asuka emmangweni weParana+ njengombana uJehova ayalile. Woke amadoda la bewaziinhloko zakwa-Israyeli. 4 La magamawo: ekorweni kaRubeni, bekunguTjhamuwa indodana kaZakuru; 5 ekorweni kaSimiyoni, nguTjhafathi indodana kaRhori; 6 ekorweni kaJuda, nguKalebi+ indodana kaJefune; 7 ekorweni ka-Isakari, nguYigali indodana kaJosefa; 8 ekorweni ka-Efrayimu, nguHotjheya+ indodana kaNuni; 9 ekorweni kaBhenjamini, nguPalithi indodana kaRafu; 10 ekorweni kaZebuloni, nguGadiyeli indodana kaSodi; 11 ekorweni kaJosefa+ okuyikoro kaManase,+ nguGadi indodana kaSusi; 12 ekorweni kaDani, ngu-Amiyeli indodana kaGemali; 13 ekorweni ka-Atjheri, nguSeturi indodana kaMikhayeli; 14 ekorweni kaNafitali, nguNarhibi indodana kaVofsi; 15 ekorweni kaGadi, nguGewuyeli indodana kaMaki. 16 La magama wamadoda uMosi awathuma bona ayokuhlola inarha. UMosi wanikela uHotjheya indodana kaNuni igama elithi Jotjhuwa.*+

17 UMosi nakawathumako bona ayokuhlola inarha yeKanana, wathi kiwo: “Iyani enarheni yeNegebhi nikhuphukele esifundeni seentaba.+ 18 Kufuze niqale ukuthi iyinarha enjani,+ niqale abantu bakhona nibone ukuthi banamandla namkha babuthakathaka, bambalwa namkha banengi, 19 niqale ukuthi inarha yakhona yihle namkha yimbi nokuthi amadorobho wakhona avikelekile namkha awanamithangala na. 20 Niqale ukuthi inarha leyo iyathela namkha ayitheli na,+ inemithi namkha ayinayo na. Kufuze nibe nesibindi,+ nithathe ezinye iinthelo zenarheni leyo.” Lesi bekusikhathi sokuvunwa kwamadiribe wokuthoma.+

21 Akhamba ayokuhlola inarha kusukela emmangweni weTsini+ ukuyokufika eRerhobu+ eduze neLebo-Rhamathi.*+ 22 Kwathi nawakhuphukela eNegebhi afika eRhebroni+ lapha bekuhlala khona iinzukulwana zaka-Anakhi,+ u-Arhimani, uTjhetjhayi, noTalimayi.+ IRhebroni yakhiwa eminyakeni elikhomba ngaphambi kokwakhiwa kweTsowani eGibhide. 23 Kwathi nawafika emRhobeni we-Etjhikolo,+ aqunta ipande enamadiribe, amadoda amabili ayithwala ngesigodo kunye namarharinada namafeyi.+ 24 Indawo leyo yabizwa ngokuthi mRhoba we-Etjhikolo*+ ngombana ama-Israyeli aqunta ipande enamadiribe kiyo.

25 Ngemva kwamalanga ama-40,+ abuya ekuhloleni inarha. 26 Nje-ke abuyela kuMosi, ku-Aroni nayo yoke ihlangano yakwa-Israyeli emmangweni weParana, eKhadetjhi.+ Abuyisa umbiko kiyo yoke ihlangano ayitjengisa iinthelo zenarheni. 27 Abikela uMosi athi: “Siyile enarheni othe siyoyihlola, yinarha egeleza ibisi neliju,+ nanzi neenthelo zakhona.+ 28 Kodwana abantu abahlala khona banamandla namadorobhabo avikelekileko makhulu. Sibone neenzukulwana zaka-Anakhi lapho.+ 29 Ama-Amalekhi+ ahlala enarheni yeNegebhi,+ amaRhiti, amaJebusi,+ nama-Amori+ ahlala esifundeni seentaba begodu amaKanana+ ahlala hlanu kwelwandle+ magega neJordani.”

30 UKalebi walinga ukwenza abantu bona behlise umoya njengombana bajame phambi kwakaMosi wathi: “Asikhambeni khona nje, inarha leya izokuba ngeyethu ngombana sizokuthumba.”+ 31 Kodwana amadoda ebewakhambe naye athi: “Angekhe sikghone ukukhuphuka siyokulwa nabantwaba, ngombana banamandla kunathi.”+ 32 Aragela phambili atjela ama-Israyeli umbiko omumbi+ ngenarha egade ayoyihlola, athi: “Inarha ebesiyoyihlola, yinarha eyingozi ngekhe sisinde, nabantu bakhona baziintsitsirimba.+ 33 Enarheni leyo sibone amaNefili, amadodana ka-Anakhi,+ aziinzukulwana zamaNefili, nasizimadanisa nawo, sizibone sinjengeentethe, nawo asiqala njalo.”

14 Ihlangano yoke yarhuwelela, abantu balila ubusuku boke.+ 2 Woke ama-Israyeli anghonghoyila ngoMosi no-Aroni,+ ihlangano yoke yabakhuluma kumbi yathi: “Ngathana safela enarheni yeGibhide namkha safela emmangweni lo! 3 Kubayini uJehova asilethe enarheni le bona sizokubulawa ngesabula?+ Abafazi bethu nabantwana bethu bazokuthunjwa.+ Kghani akusingcono sibuyele eGibhide?”+ 4 Bakhuluma bodwa bathi: “Asikhetheni umrholi sibuyeleni eGibhide!”+

5 UMosi no-Aroni nabezwa lokhu bakhothama phambi kwehlangano yoke yakwa-Israyeli. 6 UJotjhuwa+ indodana kaNuni noKalebi+ indodana kaJefune ebebahlangana nalabo ebebayokuhlola inarha badabula izambatho zabo, 7 bathi kiyo yoke ihlangano yakwa-Israyeli: “Inarha ebesiyoyihlola yihle khulu.+ 8 Nasithabisa uJehova uzosisa enarheni le begodu uzosinikela yona, inarha egeleza ibisi neliju.+ 9 Kodwana akukafuzi nivukele uJehova, ningabasabi abantu benarheni leya+ ngombana sizobatjhabalalisa. Abakavikeleki, uJehova unathi+ ningabasabi.”

10 Ihlangano yoke yafuna ukubakghadlha ngamatje+ kodwana iphazimulo kaJehova yabonakala kiwo woke ama-Israyeli phezu kwetende lokuhlangana.+

11 UJehova wathi kuMosi: “Kuzabe kube kunini abantwaba bangangihloniphi+ begodu bangakholwa kimi naphezu kwazo zoke iimbonakaliso engizenze hlangana nabo?+ 12 Ngizobabetha ngokugula okutjhabalalisako, ngibaqothe, ngenze wena ube sitjhaba esikhulu nesinamandla ukubadlula.”+

13 UMosi wathi kuJehova: “Ukhuphe abantu bakho eGibhide ngamandlakho, nje-ke nawungenza lokhu abantu beGibhide bazokuzwa ngakho,+ 14 bazokutjela abantu benarheni le ngakho. Bazwile ukuthi wena Jehova, uphakathi kwama-Israyeli+ begodu khewabonakala kiwo bunqopha.+ UnguJehova begodu ilifu lakho lijame ngehla kwawo, ukhamba phambi kwawo ngesika yelifu emini nangesika yomlilo ebusuku.+ 15 Nange ubulala abantwaba boke ngesikhathi sinye bese iintjhaba ezizwe ngawe zizokuthi: 16 ‘UJehova ubhalelwe kungenisa abantwaba enarheni afunga ukubanikela yona, nje-ke ubabulalele emmangweni.’+ 17 Ngiyakubawa Jehova batjengise amandlakho amakhulu njengombana wathembisa wathi: 18 ‘UJehova akasilingeki msinya, unethando elikhulu,*+ ulibalela imitjhapho nezono kodwana akazumlisa angamjezisi onomlandu. Uletha isijeziso semitjhapho yabobaba phezu kwamadodana, phezu kweenzukulwana naphezu kwesizukulwana sesithathu nesesine.’+ 19 Ngiyakubawa, libalela imitjhapho yabantwaba ngombana unethando elikhulu,* ubalibalele njengombana bewusolo ubalibalela kusukela eGibhide bekube nje.”+

20 Nje-ke uJehova wathi: “Ngiyabalibalela, njengombana ubawile.+ 21 Ngakwelinye ihlangothi, ngifunga ngokuphila kwami, loke iphasi lizokuzala iphazimulo kaJehova.+ 22 Woke umuntu obone iphazimulwami neembonakaliso+ engizenze eGibhide nemmangweni kodwana asolo angilinga kanengi,*+ angalaleli ilizwi lami+ 23 angeze ayibone inarha engafunga ukuyinikela aboyise, boke abangangihloniphiko angeze bayibone.+ 24 Ngombana uKalebi+ incekwami bekahlukile kwabanye begodu bekasolo angilandela ngehliziyo epheleleko. Ngizomusa enarheni ebekaye kiyo, izokuthathwa ziinzukulwana zakhe.+ 25 Ngebanga lokuthi ama-Amalekhi namaKanana+ ahlala ngemrhobeni, kufuze nibuyele emmangweni kusasa, nikhambe ngendlela eya eLwandle eliBomvu.”+

26 UJehova wathi kuMosi no-Aroni: 27 Kuzabe kube kunini ihlangano ekhohlakeleko le isolo inginghonghoyilela?+ Ngikuzwile lokho ama-Israyeli akutjhoko ngami.+ 28 Nithi kiwo, “Ngifunga ngokuphila kwami,” kutjho uJehova, “lokho engikuzwe nikukhuluma ngizokwenza kini!+ 29 Noke, kusukela kwabaneminyaka ema-20 ukuya phezulu abatlolisiweko, abanghonghoyile ngami+ nizokufela emmangwenapha.+ 30 Akekho namunye wenu ozokungena enarheni engafunga bona nihlale kiyo,+ ngaphandle kwakaKalebi indodana kaJefune noJotjhuwa indodana kaNuni.+

31 “‘“Ngizokungenisa abantwabenu enathi bazokuthunjwa,+ bazoyazi inarha enayalako nina.+ 32 Kodwana nina nizokufela emmangwenapha. 33 Amadodanenu azokuba belusi emmangweni iminyaka ema-40,+ ngiwo azokubhadalela ukungathembeki kwenu bekube kulapho noke senihlongakalele emmangwenapha.+ 34 Ngokwesibalo samalanga enahlola ngawo inarha, okumalanga ama-40,+ ilanga lizokulingana nomnyaka munye, nizokutlhaga iminyaka ema-40+ ngebanga lemitjhaphwenu, nizokuqalana nemiphumela yokungifulathela.

35 “‘“Mina Jehova ngikhulumile. Ngilokhu engizokwenza ehlanganweni ekhohlakeleko le, labo ababuthene bona bajamelane nami: Nizokutjhabalalela emmangwenapha, nifele khona.+ 36 Amadoda uMosi awathuma bona ayokuhlola inarha nabangela bona ihlangano yoke inghonghoyile ngaye lokha nawabuya nombiko ongasimuhle ngenarha,+ 37 amadoda abuya nombiko omumbi ngenarha azokutjhatjalaliswa, afe phambi kwakaJehova.+ 38 Kodwana uJotjhuwa indodana kaNuni noKalebi indodana kaJefune ebebahlangana nalabo ebebayokuhlola inarha angekhe bafe.”’”+

39 UMosi nakatjela ama-Israyeli woke amezwi lawo abantu bathoma ukulila khulu. 40 Ama-Israyeli avuka ekuseni khulu, alinga ukukhuphukela esiqongolweni sentaba, athi: “Sonile+ kodwana nje sikulungele ukukhuphukela endaweni uJehova akhuluma ngayo.” 41 UMosi wathi: “Kubayini neqa umyalo kaJehova? Enikwenzakokhu angekhe kuphumelele. 42 Ningakhuphuki ngombana uJehova akasinani, amanabenu azonihlula.+ 43 Ama-Amalekhi namaKanana anilindile, azonibulala+ ngesabula, ngombana akhenge nilalele uJehova, uJehova angeze abe nani.”+

44 Akhuphukela esiqongolweni sentaba ngekani+ kodwana umfaji wesivumelwano sakaJehova akhenge usuke hlangana nekampa,+ ngokunjalo noMosi. 45 Ama-Amalekhi namaKanana ebewahlala entabeni leyo ehla, awamadlha, aphadlhalala bewayokufika eRhorema.+

15 UJehova waraga wakhuluma noMosi wathi: 2 “Khuluma nama-Israyeli uthi kiwo, ‘Nanifika enarheni engininikela yona bona nihlale kiyo,+ 3 kufuze nilethe umnikelo kuJehova, nithathe eenkomeni zenu, ezimvwini zenu neembuzini zenu bona nenze umnikelo otjhiswako+ namkha umhlatjelo wokwenza isifungo esikhethekileko namkha umnikelo osuka ehliziyweni+ namkha umnikelo weminyanya egidingwa ngeenkhathi ezithileko zomnyaka+ bona ube liphunga elimnandi kuJehova,+ 4 oletha umnikelwakhe kufuze alethe kuJehova nomnikelo weenthoro weflowuru esefiweko,+ ingcenye yetjhumi ye-efa* okuhlanganiswe nengcenye yesine yehini* yamafutha. 5 Kufuze unikele iwayini bona libe mnikelo wesiselo, kwesine kwehini kunye nomnikelo otjhiswako+ namkha umhlatjelo wemvana eduna. 6 Emhlatjelwenakho weramu, kufuze wenze umnikelo weenthoro omakhilogremu amabili weflowuru esefiweko ohlanganiswe nokwesithathu kwehini yamafutha. 7 Kufuze unikele ngewayini libe mnikelo wesiselo, kwesithathu kwehini bona kube liphunga elimnandi kuJehova.

8 Kodwana nange unikela ngekunzana bona ibe mnikelo otjhiswako+ namkha ibe mhlatjelo wokwenza isifungo esikhethekileko+ namkha imihlatjelo yetjhebiswano kuJehova,+ 9 emhlatjelwenakho wekunzana, kufuze ulethe nomnikelo weenthoro+ omakhilogremu amathathu nesiquntu weflowuru esefiweko ehlanganiswe nesiquntu sehini yamafutha. 10 Kufuze unikele ngewayini libe mnikelo wesiselo,+ isiquntu sehini libe mnikelo kaZimu owenziwe ngomlilo bona ube liphunga elimnandi kuJehova. 11 Ngilokhu okufuze kwenziwe ngekunzana ngayinye, iramu, iimvana eziduna namkha iimbuzi. 12 Kufuze nenze lokho ngokwesibalo seenlwana enizinikelako. 13 Le yindlela umIsrayeli ngamunye okufuze anikele ngayo umnikelo owenziwe ngomlilo bona ube liphunga elimnandi kuJehova.

14 Nangabe umuntu ovela kwenye inarha ohlala hlangana nani namkha esele anesikhathi eside ahlala nani enze umnikelo ngomlilo bona ube liphunga elimnandi kuJehova, kufuze enze njengani.+ 15 Kuzokusebenza umthetho munye kuma-Israyeli nebantwini abavela kwezinye iinarha. Umthetho ozokusebenza kizo zoke iinzukulwana zenu. Abantu abavela kwezinye iinarha kufuze babe njengani phambi kwakaJehova.+ 16 Kufuze kube nomthetho munye nesahlulelo sinye esizokusebenza kini nebantwini abavela kwezinye inarha abahlala hlangana nani.’”

17 UJehova waraga wakhuluma noMosi, wathi: 18 “Khuluma nama-Israyeli uthi kiwo, ‘Nanifika enarheni enginisa kiyo 19 benidle ukudla kwakhona,+ kufuze nenzele uJehova umnikelo. 20 Kufuze nenze umnikelo woburotho oburondo obuvuleke phakathi obenziwe ngeflowuru evela esivunweni senu sokuthoma.+ Kufuze niwunikele njengomnikelo weselelweni. 21 Enye iflowuru evela esivunweni senu sokuthoma, kufuze niyinikele bona ibe mnikelo kaJehova kizo zoke iinzukulwana zenu.

22 “‘Nje-ke nange nenza umtjhapho nibhalelwe kulandela yoke imiyalo uJehova ayitjele uMosi, 23 koke uJehova aniyala ngakho asebenzisa uMosi kusukela ngelanga uJehova aniyala ngalo bekufike eenzukulwaneni zenu, 24 nange kwenzeka umtjhapho begodu ihlangano ingazi ngawo, yoke ihlangano kufuze inikele ngekunzana bona ibe mnikelo otjhiswako oliphunga elimnandi kuJehova, inikele umnikelo weenthoro nomnikelo wesiselo ngokwendlela okwenziwa ngayo+ nembuzana bona ibe mnikelo wesono.+ 25 Umphristi uzokwenzela ihlangano yoke yakwa-Israyeli umnikelo wokulitjalelwa kwezono+ begodu izokulitjalelwa ngombana kube mtjhapho, izokuletha umnikelwayo owenziwe ngomlilo kuJehova nomnikelwayo wesono phambi kwakaJehova ngebanga lomtjhaphwayo. 26 Yoke ihlangano yakwa-Israyeli izokulitjalelwa nabantu abavela kwezinye iinarha abahlala hlangana nayo ngombana bekumtjhapho owenziwe babantu boke.

27 “‘Nange umuntu enza isono angakahlosi, kufuze anikele ngembuzana esikazi enomnyaka munye bona ibe mnikelo wesono.+ 28 Umphristi uzokwenzela umuntu owenze isono phambi kwakaJehova angakahlosi umnikelo wokulitjalelwa kwezono begodu umuntu loyo uzokulitjalelwa.+ 29 Kufuze kusebenze umthetho munye kuma-Israyeli nebantwini abavela kwezinye iinarha abahlala hlangana nawo, lokha umuntu nakone angakahlosi.+

30 “‘Kodwana nange umuntu enza isono ngabomu,+ kungaba mIsrayeli namkha umuntu ovela kwenye inarha, uhlambalaza uJehova begodu kufuze abulawe. 31 Ngebanga lokuthi udelele ilizwi lakaJehova weqa umyalwakhe, umuntu loyo kufuze abulawe.+ Uzoziphendulela ngebanga lomtjhaphwakhe.’”+

32 Ngesikhathi ama-Israyeli asemmangweni, afumana umuntu atheza ngelanga leSabatha.+ 33 Labo abamfumana atheza bamusa kuMosi no-Aroni nehlangano yoke. 34 Bamvalela+ ngombana bekungakatjhiwo ukuthi kuzokwenziwani ngaye.

35 UJehova wathi kuMosi: “Umuntu loyo kufuze abulawe,+ ihlangano yoke kufuze imkghadlhe ngamatje ngaphandle kwekampa.”+ 36 Nje-ke ihlangano yoke yamkhuphela ngaphandle kwekampa, yamkghadlha ngamatje bewafa njengombana uJehova bekayale uMosi.

37 UJehova waraga wathi kuMosi: 38 “Tjela ama-Israyeli bona azenzele wona neenzukulwana zawo amatjharhatjharha emphethweni wezambatho zawo bekathungelele intambo ehlaza komkayi ngaphezudlwana komphetho wamatjharhatjharha.+ 39 ‘Kufuze nizenzele umphetho lo wamatjharhatjharha, khona nizakuthi naniwubonako nikhumbule yoke imiyalo kaJehova beniyilalele.+ Akukafuzi nilandele iinhliziyo zenu nalokho enikubonako, okuzonenza ningathembeki kimi.+ 40 Lokhu kuzonisiza nikhumbule begodu nilalele yoke imiyalwami, nicwengeke kuZimenu.+ 41 NginguJehova uZimenu, owanikhupha enarheni yeGibhide bona nginitjengise ukuthi nginguZimenu.+ NginguJehova uZimenu.’”+

16 UKhorarhi+ indodana kaJitsihari,+ indodana kaKhehathi,+ indodana kaLevi+ wahlangana noDatani no-Abiramu amadodana ka-Eliyabu+ no-Oni indodana kaPelethi weenzukulwana zakwaRubeni.+ 2 Bajamelana noMosi bakunye nama-Israyeli ama-250, amakhosana wehlangano, abajameli bebandla, amadoda adumileko. 3 Abuthana ajamelana+ noMosi no-Aroni athi: “Sidiniwe ngini. Ihlangano yoke icwengile+ begodu uJehova uhlangana nayo.+ Kubayini niziphakamisa ngaphezu kwebandla lakaJehova?”

4 UMosi nakezwa lokho, wakhothama khonokho. 5 Wathi kuKhorarhi nalabo ebebamsekela: “Ekuseni uJehova uzokutjengisa ukuthi ngubani ongewakhe,+ ocwengileko nokufuze atjhidele kuye,+ nanyana ngubani azomkhetha+ uzokutjhidela kuye. 6 Khorarhi nalabo abakusekelako+ yenzani lokhu: Thathani izinto zokuphatha umlilo,+ 7 nibeke umlilo kizo, nibeke ipepho phezu kwawo phambi kwakaJehova kusasa begodu loyo uJehova azomkhetha,+ nguye ocwengileko. Nina madodana kaLevi+ seniphambuke khulu.”

8 UMosi wathi kuKhorarhi: “Ngibawa ningilalele nina madodana kaLevi. 9 Kghani kubonakala kuyinto encani kini ukuthi uZimu wakwa-Israyeli unihlukanisile ehlanganweni yakwa-Israyeli,+ wanivumela bona nitjhidele kuye, nisebenze ethaberinakeli lakaJehova begodu nijame phambi kwehlangano beniyisebenzele,+ 10 wanivumela bona nitjhidele hlanu kwakhe nabo boke abafowenu nina madodana kaLevi? Kghani senifuna ukuba baphristi na?+ 11 Kungebangelo wena nabo boke abakusekelako nibuthene najamelana noJehova. U-Aroni yena ungubani bona ningabe ninghonghoyile ngaye?”+

12 Nje-ke uMosi wathumela bona kubizwe uDatani no-Abiramu+ amadodana ka-Eliyabu, aphendula athi: “Angekhe size. 13 Kghani yinto encani kuwe bona wasikhupha enarheni egeleza ibisi neliju wasiletha emmangwenapha bona sizokufela khona?+ Kghani sewufuna nokuzibeka bona ube mbusi phezu kwethu? 14 Iphi inarha egeleza ibisi neliju+ owasithembisa ukusisa kiyo, wasithembisa nokusinikela ilifa lamasimu namasimu wamadiribe. Kghani ufuna abantwaba bakulandele njengamadoda azimphofu? Asizi thina lapho.”

15 UMosi wasilingeka khulu wathi kuJehova: “Ungawuqali umnikelwabo weenthoro. Akhenge ngithathe nodumbana munye kibo namkha ngilimaze namunye wabo.”+

16 Nje-ke uMosi wathi kuKhorarhi: “Velani phambi kwakaJehova kusasa, wena, labo abakusekelako no-Aroni. 17 Ngamunye wenu kufuze athathe into yokuphatha umlilo abeke ipepho phezu kwayo, amadoda akusekelako azokuza nezinto zawo zokuphatha umlilo phambi kwakaJehova ezima-250 eze nawe no-Aroni niphethe izinto zenu zokuphatha umlilo.” 18 Ngamunye wathatha intwakhe yokuphatha umlilo, wafaka umlilo nepepho wajama noMosi no-Aroni ebungenweni betende lokuhlangana. 19 Kwathi uKhorarhi nasele abuthelele boke abamsekelako+ bona bajamelane nabo ebungenweni betende lokuhlangana, iphazimulo kaJehova yabonakala kiyo yoke ihlangano.+

20 UJehova wathi kuMosi no-Aroni: 21 “Sukani hlangana nabantwabo, khona ngizobatjhabalalisa msinyana.”+ 22 Bathi nabezwa lokho bakhothama bathi: “Maye Zimu! Zimu opha abantwaba boke nje ukuphila,+ kghani uzokusilingwa yihlangano yoke ngebanga lesono somuntu munye?”+

23 UJehova wathi kuMosi: 24 “Khuluma nehlangano uthi kiyo, ‘Sukani hlangana netende kaKhorarhi, kaDatani neka-Abiramu!’”+

25 UMosi wasikima waya kuDatani no-Abiramu, abadala+ bakwa-Israyeli bebakhamba naye. 26 Wathi ehlanganweni: “Ngibawa nisuke ematendeni wamadoda akhohlakeleko la, ningathinti nanyana yini ekungeyawo bona ningatjhatjalaliswa ngebanga lesono sawo.” 27 Khonokho basuka etendeni kaKhorarhi, kaDatani neka-Abiramu emahlangothini woke. UDatani no-Abiramu baphuma bajama emnyango wamatendabo nabafazi babo, amadodanabo nabantwana babo.

28 UMosi wathi: “Ngalokhu okuzokwenzeka nje, nizokwazi ukuthi ngithunywe nguJehova ukuthi ngizokwenza zoke izintwezi, akuveli kimi. 29 Nangabe abantwaba bafa ngendlela ejayelekileko begodu isijeziso sabo sifana nesabo boke abantu, uJehova akakangithumi.+ 30 Kodwana nange uJehova enza isimangaliso ngabantwaba, kuvuleke ihlabathi ibaginye nakho koke abanakho, behlele ethuneni* basaphila nizokwazi ukuthi badelele uJehova kangangani.”

31 Nakaqeda ukukhuluma amezwi la, ihlabathi yavuleka lapha ebebajame khona.+ 32 Iphasi lavuleka labaginya, laginya nemindenabo nabo boke abasekela uKhorarhi+ nezinto zabo. 33 Bona nabo boke ebebangehlangothini labo baya ethuneni baphila, iphasi labagubuzesa, batjhabalala hlangana nehlangano.+ 34 Woke ama-Israyeli ebewamagega nawo athi nawezwa barhuwelela abaleka, athi: “Sisaba ukuthi nathi iphasi lizosiginya!” 35 Kwavela umlilo obuya kuJehova,+ watjhisa amadoda ama-250 ebewanikela ipepho.+

36 UJehova wathi kuMosi: 37 “Tjela u-Elazara indodana ka-Aroni umphristi ukuthi akhuphe izinto zokuphatha umlilo+ ngemlilweni ngombana zicwengile, umtjele nokuthi alahlele amalahle kude. 38 Izinto zokuphatha umlilo zamadoda azibangele ukufa ngokwenza isono, kufuze zenziwe iinsimbi ezisipara, zinamekwe phezu kwe-aldara+ ngombana azinikele phambi kwakaJehova zicwengile, zizokuba litshwayo elisiyeleliso.”+ 39 Nje-ke u-Elazara umphristi wathatha izinto zokuphatha umlilo zekoporo labo ebatjhiswe ngomlilo ebebanikele ngazo, wazikghadlha wanameka ngazo i-aldara, 40 wenza njengombana uJehova ayale ngoMosi. Kwaba sikhumbuzo kuma-Israyeli ukuthi akunamuntu ovumeleke ukutjhisa ipepho phambi kwakaJehova ngaphandle kokuthi abe sizukulwana saka-Aroni,+ begodu akunamuntu okufuze afane noKhorarhi nalabo egade bamsekela.+

41 Ngelanga elilandelako, ihlangano yoke yakwa-Israyeli yanghonghoyila ngoMosi no-Aroni,+ yathi: “Nina nobabili nibulele abantu bakaJehova.” 42 Kwathi ihlangano nasele ibuthene ndawonye bona ijamelane noMosi no-Aroni yaqala ngetendeni lokuhlangana, yabona ilifu liligubuzesile bekwabonakala nephazimulo kaJehova.+

43 UMosi no-Aroni baya ngaphambi kwetende lokuhlangana,+ 44 uJehova wathi kuMosi: 45 “Nina madoda sukani hlangana nehlangano le khona ngizayitjhabalalisa msinyana.”+ Khonokho bakhothama.+ 46 UMosi wathi ku-Aroni: “Thatha into yokuphatha umlilo, ufake umlilo nepepho kiyo,+ khamba msinyana uye ehlanganweni uyenzele umnikelo wokulitjalelwa kwezono+ ngombana uJehova usilingekile. Isibetho sesithomile! 47 U-Aroni wayithatha msinyana njengombana uMosi atjhwile, wagijimela ebantwini. Nangambala isibetho besele sithomile, nje-ke wabeka ipepho entweni yokuphatha umlilo, wathoma ukubawela abantu ukulitjalelwa. 48 Waragela phambili ajame hlangana nabahlongakeleko nabaphilako, isibetho saphela. 49 Labo abafa ngesibetho bebazii-14 700 ngaphandle kwalabo abafa ngebanga lakaKhorarhi. 50 Kwathi u-Aroni nasele abuyele kuMosi ebungenweni betende lokuhlangana, isibetho besele siphelile.

17 Nje-ke uJehova wathi kuMosi: 2 “Khuluma nama-Israyeli begodu uthathe intonga ekorweni ngayinye, emakhosaneni wekoro ngayinye+ kube ziintonga ezili-12. Tlola igama lekosana ngayinye entongenayo. 3 Kufuze utlole igama laka-Aroni entongeni kaLevi ngombana ihloko yekoro ngayinye inentonga yinye. 4 Beka iintongezo etendeni lokuhlangana phambi kobuFakazi,+ lapho ngijayele ukuvela khona kuwe.+ 5 Intonga yomuntu engizomkhetha+ izokutlhurha, ngizokwenza ama-Israyeli alise ukunghonghoyila ngami+ njengombana anghonghoyila ngawe.”+

6 UMosi wakhuluma nama-Israyeli, amakhosanawo woke amnikela iintonga, intonga yekosana yekoro ngayinye. Bekuziintonga ezili-12 nentonga ka-Aroni beyihlangana nazo. 7 Ngemva kwalokho, uMosi wabeka iintonga phambi kwakaJehova etendeni lobuFakazi.

8 Ngakusasa kwakhona, uMosi nakangena etendeni lobuFakazi, intonga ka-Aroni wekoro kaLevi beyitlhurhile begodu inamathuthumbo nama-alimondi avuthiweko. 9 UMosi wakhupha iintonga zoke phambi kwakaJehova wazisa ebantwini bakwa-Israyeli. Baziqala, ikosana ngayinye yathatha intongayo.

10 UJehova wathi kuMosi: “Buyisela intonga ka-Aroni+ phambi kobuFakazi bona ibe litshwayo+ emadodaneni avukelako,+ khona azakulisa ukunghonghoyila ngami begodu angafi. 11 Khonokho uMosi wenza njengombana uJehova amyalile. Wenza njalo.

12 Nje-ke ama-Israyeli athi kuMosi: “Nje sizokufa, soke nje sizokutjhabalala! 13 Nanyana ngubani otjhidela eduze kwethaberinakeli lakaJehova uzokufa.+ Alo, soke nje kufuze sife ngendlela le?”+

18 UJehova wathi ku-Aroni: “Wena namadodanakho nekoro yekhenu nizoziphendulela ngananyana ngimuphi umtjhapho owenziwa endaweni ecwengileko+ begodu wena namadodanakho nizoziphendulela ngananyana ngimuphi umtjhapho owenziwa ebaphristini.+ 2 Tjhideza abafowenu bekoro kaLevi, okuyikoro kayihlo bona bazokusebenza nawe, basize wena+ namadodanakho phambi kwetende lobuFakazi.+ 3 Bazokwenza umsebenzi obanikela wona begodu bazokwenza yoke imisebenzi eyenziwa etendeni+ kodwana akukafuzi batjhidele eduze nezitja zendaweni ecwengileko ne-aldareni ukuthi wena nabo ningafi.+ 4 Bazokusiza, benze imisebenzabo etendeni lokuhlangana nayo yoke imisebenzi eyenziwa etendeni, akunamuntu ongakavumeleki ongatjhidela kuwe.+ 5 Kufuze nenze umsebenzenu endaweni ecwengileko+ ne-aldareni+ khona ngingeze ngisasilingeka+ ngebanga lama-Israyeli. 6 Mina ngithethe abafowenu amaLevi hlangana nama-Israyeli bona abe sisipho kini.+ Anikelwe kuJehova bona enze umsebenzi etendeni lokuhlangana.+ 7 Wena namadodanakho kufuze nenze imisebenzi yobuphristi e-aldareni nangale kwerharideni+ begodu kufuze niwenze umsebenzi lo.+ Ngininikele ubuphristi bona bube sisipho senu, nanyana ngubani ongakavumeleki otjhidelako kufuze abulawe.”+

8 UJehova waraga wathi ku-Aroni: “Ngibeke wena bona utlhogomele iminikelo engenzelwa yona.+ Nginikele wena namadodanakho ingcenye yazo zoke izinto ezicwengileko ezinikelwa ma-Israyeli. Lo mthetho ozokuhlala ukhona.+ 9 Nakhu okuzokuba ngekwenu eminikelweni ecwengeke khulu eyenziwa ngomlilo: yoke iminikelo ayenzako, kuhlanganise iminikelwawo yeenthoro,+ iminikelwawo yesono+ neminikelwawo yomlandu+ ayiletha kimi. Yinto ecwengeke khulu ekungeyakho namadodanakho. 10 Kufuze niyidlele endaweni ecwengeke khulu,+ woke amadoda angayidla begodu izokuba yinto ecwengileko kini.+ 11 Nanzi ezinye izinto ezizokuba ngezakho: izipho ama-Israyeli azinikeleko,+ kuhlanganise neminikelo ephephezeliswako.+ Ngiyinikela wena, amadodanakho namadodakazakho, yinto enizokuhlala niyifumana.+ Woke umuntu ohlwengileko ngendlinakho angayidla.+

12 “Woke amafutha asezingeni eliphezulu, iwayini elitjha elisezingeni eliphezulu neenthoro, okuziinthelo zokuthoma+ azinikela kuJehova, ngizinikela wena.+ 13 Iinthelo zokuthoma ezizokuvuthwa enarhenawo azoziletha kuJehova, zizokuba ngezenu.+ Woke umuntu ohlwengileko ngendlinakho angazidla.

14 “Zoke izinto ezinikelwe kuZimu kwa-Israyeli kufuze zibe ngezenu.+

15 “Woke amazibulo wezinto eziphilako+ azinikela kuJehova, kungaba mumuntu namkha isilwana kufuze abe ngewenu. Nanyana kunjalo, kufuze uhlenge amazibulo wabantu+ namazibulo weenlwana ezisilapheleko.+ 16 Kufuze uwahlenge ngemali yesihlengo, lokha nawanenyanga yinye ukuya phezulu, ngokwesilinganiso esibekiweko samatjhekeli*+ wesiliva amahlanu, ngokwesilinganiso setjhekeli lendawo ecwengileko, magera* ama-20. 17 Izibulo lekunzi, izibulo lemvu namkha izibulo lembuzi akukafuzi uwahlenge ngombana acwengile.+ Kufuze ufafaze iingazi zawo e-aldareni,+ amafuthawo uwatjhise abe mnikelo owenziwe ngomlilo, iphunga elimnandi kuJehova.+ 18 Inyamawo kufuze ibe ngeyakho. Isifuba somnikelo ophephezeliswako nomlenze wangesidleni kufuze zibe ngezakho.+ 19 Yoke iminikelo ecwengileko ama-Israyeli ayinikela uJehova+ ngiyinikele wena, amadodanakho namadodakazakho bona kube yinto enihlala niyithola.+ Lesi sivumelwano esingapheliko esenziwa ngetswayi* uJehova asenza nawe neenzukulwana zakho.”

20 UJehova waraga wathi ku-Aroni: “Angekhe ufumane ilifa enarhenawo begodu angekhe unikelwe ingcenye yenarha bona ibe ngeyakho,+ ngizokutlhogomela, ngikunikele okutlhogako enarheni yama-Israyeli.+

21 “Nginikele amadodana kaLevi yoke ingcenye yetjhumi+ kwa-Israyeli bona ibe lilifa lawo ngebanga lomsebenzi awenza etendeni lokuhlangana. 22 Abantu bakwa-Israyeli akukafuzi batjhidele etendeni lokuhlangana, nabangatjhidela bazozibangela isono bebafe. 23 AmaLevi ngiwo okufuze asebenze etendeni lokuhlangana begodu azoziphendulela ngebanga lemitjhapho eyenziwa babantu endaweni ecwengileko.+ Lo mthetho ozokuhlala usebenza kizo zoke iinzukulwana zenu, akukafuzi zibe nelifa hlangana nama-Israyeli.+ 24 Nginikele amaLevi kwetjhumi okunikelwe ma-Israyeli kuJehova bona kube lilifa lawo. Kungebangelo ngithe, ‘Hlangana nama-Israyeli akukafuzi afumane ilifa.’”+

25 Nje-ke uJehova wathi kuMosi: 26 “Tjela amaLevi uthi kiwo, ‘Nizokufumana ingcenye yetjhumi engininikela yona ivela kuma-Israyeli bona ibe lilifa lenu+ begodu kufuze nikhuphe ingcenye yetjhumi ninikele ngayo ibe mnikelo oya kuJehova.+ 27 Izokuthathwa njengomnikelo wenu, njengalokha ninikela ngeenthoro,+ iwayini namkha ngamafutha. 28 Nizokunikela kuJehova ngendlela le, nithathe eengcenyeni zetjhumi enizifumana kuma-Israyeli. Nizokunikela u-Aroni umphristi umnikelo kaJehova. 29 Nizokwenza yoke imihlobo yeminikelo kuJehova, nikhethe eziphweni eziphuma phambili eniphiwe zona,+ ibe ngokuthileko okucwengileko.’

30 “Kufuze uthi kiwo, ‘Nange nina maLevi ninikela ngokungcono khulu, kuzokuthathwa njengalokha naninikela ngeenthoro zenu, iwayini namkha amafutha. 31 Wena nomzakho ningayidlela nanyana kukuphi, yinto eniyifumana ngebanga lomsebenzi eniwenza etendeni lokuhlangana.+ 32 Angekhe nazibangela isono kwaphela naninikela ngokungcono khulu eniphiwe khona. Akukafuzi nisilaphaze izinto ezicwengileko zama-Israyeli ngombana nizokufa.’”+

19 UJehova wakhuluma noMosi no-Aroni godu wathi: 2 “Lo mthetho uJehova awuyalako, ‘Tjela ama-Israyeli bona kufuze akulethele ikomo ebomvu ephile kuhle, engakarholophali+ begodu engakhenge ibotjhelwe ejogini. 3 Kufuze uyinikele u-Elazara umphristi, uzoyikhuphela ngaphandle kwekampa begodu kufuze ihlatjwe phambi kwakhe. 4 U-Elazara umphristi uzokuthatha ezinye iingazi ngomunwakhe, azifafaze kalikhomba phambi kwetende lokuhlangana.+ 5 Ikomo leyo izokutjhiswa phambi kwakhe. Isikhumba sayo, inyamayo, iingazi zayo nomswanayo kuzokutjhiswa.+ 6 Umphristi uzokuthatha isigodo somsedari, ihisopi+ netjhila elibomvu be aziphosele emlilweni lapho kutjhiselwa khona ikomo. 7 Umphristi uzokuhlanza izambatho zakhe bekahlambe, ngemva kwalokho angabuya ekampeni, uzokuba ngosilapheleko bekube sentambama.

8 “‘Loyo otjhisa ikomo uzokuhlanza izambatho zakhe naye ahlambe, uzokuba ngosilapheleko bekube sentambama.

9 “‘Umuntu ohlwengileko uzokuwola umlotha wekomo,+ awubeke ngaphandle kwekampa endaweni ehlwengileko, ihlangano yakwa-Israyeli kufuze iwuthathe iwuhlanganise namanzi azokusetjenziswa nakuhlanjululwako.+ Lokhu mnikelo wesono. 10 Loyo owola umlotha wekomo uzokuhlanza izambatho zakhe abe ngosilapheleko bekube sentambama.

“‘Lo mthetho ozokuhlala usebenza kuma-Israyeli nebantwini abavela kwezinye iinarha abahlala hlangana nawo.+ 11 Nanyana ngubani othinta isidumbu uzokuba ngosilapheleko amalanga alikhomba.+ 12 Umuntu loyo kufuze azihlambulule ngamanzi elangeni lesithathu begodu elangeni lekhomba uzokuhlambuluka. Kodwana nange angazihlambululi elangeni lesithathu, angekhe ahlambuluke elangeni lekhomba. 13 Nanyana ngubani othinta isidumbu angazihlambululi usilaphaze ithaberinakeli+ lakaJehova begodu kufuze abulawe kwa-Israyeli.+ Ngebanga lokuthi akhenge afafazwe ngamanzi wokuhlanza,+ uzokuhlala asilaphele.

14 “‘Lo mthetho ozokusebenza nakunomuntu ohlongakalele ngetendeni: Nanyana ngubani ongena ngetendeni begodu nanyana ngubani obekangetendeni uzokusilaphala amalanga alikhomba. 15 Zoke izitja ezivulekileko ezinganamvalo zisilaphele.+ 16 Nanyana ngubani ongaphandle kwekampa othinta umuntu obulewe ngesabula, isidumbu, ithambo lomuntu namkha ithuna uzokusilaphala amalanga alikhomba.+ 17 Kufuze baphathele umuntu ongakahlwengeki omunye umlotha womnikelo wesono otjhisiweko begodu bathele amanzi phezu kwawo ngesitjeni. 18 Ngemva kwalokho, umuntu+ ohlwengileko uzokuthatha ihisopi+ ayifake ngemanzini, ayifafaze etendeni, ezitjeni zoke, ebantwini ebebalapho nemuntwini othinte ithambo, othinte obuleweko, isidumbu namkha ithuna. 19 Umuntu ohlwengileko uzokutjhatjha lo ongakahlwengeki ngamanzi womlotha elangeni lesithathu nelangeni lekhomba,+ uzokuhlwengeka esonweni sakhe elangeni lekhomba; ngemva kwalokho kufuze ahlanze izambatho zakhe, ahlambe begodu uzokuhlwengeka ntambama.

20 “‘Umuntu osilapheleko ongazihlambululiko, kufuze abulawe+ ngombana usilaphaze indawo ecwengileko kaJehova. Akhenge afafazwe ngamanzi wokuhlambulula, nje-ke usilaphele.

21 “‘Lo mthetho ozokuhlala usebenza ebantwini bakwa-Israyeli: Ozokufafaza amanzi wokuhlambulula,+ kufuze ahlanze izambatho zakhe, kuthi loyo ozokuthinta amanzi wokuhlambulula uzokusilaphala bekube sentambama. 22 Nanyana yini ethintwa mumuntu osilapheleko, izokusilaphala begodu umuntu ozokuthinta into leyo, uzokusilaphala bekube sentambama.’”+

20 Ngenyanga yokuthoma, yoke ihlangano yama-Israyeli yafika emmangweni weTsini, abantu bathoma ukuhlala eKhadetjhi.+ Kulapho uMiriyamu+ ahlongakalela khona bewabulungwa khona.

2 Nje-ke yoke ihlangano beyinganamanzi,+ yathoma ukujamelana noMosi no-Aroni. 3 Abantu banghonghoyila kuMosi,+ bathi: “Ngathana safa ngesikhathi abafowethu bafa phambi kwakaJehova! 4 Kubayini nilethe ihlangano kaJehova emmangweni lo bona thina nefuywethu sizokufela khona?+ 5 Nasikhuphelani eGibhide nasiletha endaweni embi kangaka?+ Endaweni le asikghoni ukutjala amafeyi, amadiribe namarharinada begodu akunamanzi wokusela.”+ 6 UMosi no-Aroni beza phambi kwehlangano ebungenweni betende lokuhlangana bakhothama, iphazimulo kaJehova yathoma ukubonakala kibo.+

7 UJehova wathi kuMosi: 8 “Thatha intonga, wena nomfowenu u-Aroni nibuthele ihlangano ndawonye, nikhulume nedwala phambi kwayo bona likhuphe amanzi. Uzokukhuphela ihlangano amanzi edwaleni bona yona nemihlambayo isele.”+

9 Nje-ke uMosi wathatha intonga ebeyiphambi kwakaJehova+ njengombana bekamyalile. 10 UMosi no-Aroni babizela yoke ihlangano ndawonye phambi kwedwala, bathi kiyo: “Akhe nisilalele nina nhlubuki ndina, kghani nifuna sinikhuphele amanzi edwaleneli?”+ 11 UMosi waphakamisa isandla sakhe, wabetha idwala kabili ngentonga kwaphuma amanzi amanengi. Ihlangano yoke nefuywayo yasela.+

12 Ngokukhamba kwesikhathi uJehova wathi kuMosi no-Aroni: “Ngebanga lokuthi akhenge nikholwe kimi beningicwengise phambi kwabantu bakwa-Israyeli, angekhe niyingenise ihlangano le enarheni engizoyinikela yona.”+ 13 La mamanzi weMeriba,*+ lapha ama-Israyeli anghonghoyila khona ngoJehova, kangangobana wawatjengisa ukuthi ucwengile.

14 UMosi wathumela iinthunywa zisuka eKhadetjhi zaya ekosini yakwa-Edomu+ ziphethe nakhu umlayezo: “Ngilokhu okutjhiwo mfowenu u-Israyeli,+ ‘Ubazi kuhle ubudisi esaqalana nabo. 15 Abokhokho bethu baya eGibhide,+ nathi sahlala eGibhide iminyaka eminengi,+ amaGibhide asiphatha kumbi njengombana aphatha kumbi abokhokho bethu.+ 16 Emaswapheleni salila kuJehova,+ wasizwa. Wathumela ingilozi+ bona izositjhaphulula eGibhide, namhlanjesi nakhu siseKhadetjhi, idorobho elisemkhawulweni wesifunda sakho. 17 Sibawa usivumele sidlule enarhenakho, angekhe siphambukele kinanyana ngiyiphi isimu namkha esimini yamadiribe. Angekhe sisele amanzi kinanyana ngimuphi umthombo, sizokukhamba eNdleleni yekosi ngaphandle kokuphambukela ngesidleni namkha ngesinceleni bekube kulapho sesidlule esifundeni sakho.’”+

18 U-Edomu wathi kizo: “Anikazukudlula esifundeni sami. Naningadlula, ngizonihlangabeza ngesabula.” 19 Ama-Israyeli athi kuye: “Sizokukhamba ngendlela ekulu, nange kwenzeka thina nefuywethu sisele amanzenu sizowabhadela.+ Sibawa ukudlula kwaphela.”+ 20 Waphendula wathi: “Anginivumeli bona nidlule.”+ U-Edomu wabuthelela abantu abanengi nebutho elinamandla wabahlangabeza. 21 U-Edomu akhenge awavumele ama-Israyeli bona adlule esifundeni sakhe. Nje-ke ama-Israyeli amlisa.+

22 Yoke ihlangano yakwa-Israyeli yasuka eKhadetjhi yaya eNtabeni iHori.+ 23 Nje-ke uJehova wathi kuMosi no-Aroni eNtabeni iHori, hlanu komkhawulo wenarha yakwa-Edomu: 24 “U-Aroni uzokuhlongakala, abulungwe naboyisemkhulu.+ Angekhe ningene enarheni engizoyinikela ama-Israyeli ngombana nobabili akhenge nilalele umthethwami omalungana namanzi weMeriba.+ 25 Thatha u-Aroni nendodanakhe u-Elazara ukhuphukele nabo eNtabeni iHori, 26 uhlubulise u-Aroni izambatho zakhe,+ uzembathise indodanakhe u-Elazara,+ u-Aroni yena uzokuhlongakalela lapho.”

27 UMosi wenza koke uJehova amyala ngakho, bakhuphuka iNtaba iHori yoke ihlangano iqalile. 28 UMosi wahlubulisa u-Aroni izambatho zakhe wazimbathisa u-Elazara indodanakhe. Ngemva kwalokho, u-Aroni wahlongakalela lapho esiqongolweni sentaba.+ UMosi no-Elazara behla entabeni. 29 Kuthe lokha ihlangano nayibona ukuthi u-Aroni uhlongakele, yamlilela amalanga ama-30.+

21 Ikosi ye-Aradi emKanana+ ebeyihlala eNegebhi, nayizwa ukuthi ama-Israyeli eza ngendlela ye-Atarimu, yawasahlela yathumba amanye wawo. 2 Nje-ke ama-Israyeli afunga kuJehova athi: “Nange unikela abantwaba esandleni sethu, sizokutjhabalalisa amadorobhabo.” 3 UJehova wawalalela ama-Israyeli wanikela amaKanana esandleni sawo, awatjhabalalisa namadorobhawo. Nje-ke athiya indawo leyo ngokuthi yiRhorema.*+

4 Njengombana araga nekhambo lawo asuka eNtabeni iHori+ akhamba ngendlela yeLwandle eliBomvu ukwenzela bona agegede inarha yakwa-Edomu,+ abantu bathoma ukudinwa. 5 Abantu bebasolo bakhuluma kumbi ngoZimu nangoMosi+ bathi: “Kubayini nisikhuphe eGibhide, nisikhuphele bona sizokufela emmangwenapha? Akunakudla namanzi+ begodu siyabunyenya uburotho obungazisikobu.”+ 6 UJehova wathumela iinyoka ezinetjhefu ebantwini zasolo zibaluma, kwafa ama-Israyeli amanengi.+

7 Nje-ke abantu baya kuMosi bathi: “Sonile ngokukhuluma kumbi ngoJehova nangawe.+ Sibawa usikhulumele noJehova bona asuse iinyokezi kithi. UMosi wabakhulumela.+ 8 UJehova wathi kuMosi: “Yenza isithombe senyoka enetjhefu usibeke esigodweni. Nanyana ngubani olunywe yinyoka, kufuze asiqale bona angafi.” 9 Khonokho uMosi wenza inyoka yekhopha,+ wayibeka esigodweni,+ bekuthi nanyana kunini umuntu nakalunywe yinyoka aqale inyoka yekhopha aphole.+

10 Ngemva kwalokho, ama-Israyeli akhamba ayokukampa e-Obhothi.+ 11 Asuka e-Obhothi ayokukampa e-Iye-Habharimu+ emmangweni oqalene nakwaMowabi, nca ngepumalanga. 12 Asuka lapho ayokukampa emRhobeni weZeredi.+ 13 Asuka lapho ayokukampa esifundeni se-Arinoni+ esisemmangweni othoma emkhawulweni wama-Amori, i-Arinoni mkhawulo wakwaMowabi ohlangana nakwaMowabi nakwa-Amori. 14 Kungebangeli incwadi yezipi zakaJehova ikhuluma ngeWahebe eseSufa, imirhoba ye-Arinoni 15 nemirhoba eyehla beyiyokufika edorobheni i-Ari, ihlangane nomkhawulo wakwaMowabi.

16 Ngemva kwalokho, baya eBheri. Bekunomthombo uJehova athi ngawo kuMosi: “Buthelela abantu ngibanikele amanzi.”

17 Khonokho ama-Israyeli avuma ingoma le:

“Sikhuphela amanzi mthombo! Ubhineleni!

Ngemva kwalokho, asuka emmangweni aya eMatana, 19 asuka eMatana aya eNarhaliyeli, asuka eNarhaliyeli aya eBhamothi.+ 20 Asuka eBhamothi aya emrhobeni osesifundeni sakwaMowabi+ esiqongolweni sePisiga+ okwenza iJetjhimoni* ibe senzasi.+

21 Nje-ke ama-Israyeli athumela iinthunywa kuSirhoni ikosi yama-Amori athi:+ 22 “Sibawa usivumele sidlule enarhenakho. Angekhe siphambukele kinanyana ngiyiphi isimu namkha esimini yamadiribe. Angekhe sisele amanzi kinanyana ngimuphi umthombo. Sizokukhamba eNdleleni yeKosi bekube kulapho sesidlule esifundeni sakho.”+ 23 Kodwana uSirhoni akhenge awavumele ama-Israyeli adlule esifundeni sakhe. Kunalokho, wabuthelela boke abantu bakhe, wayokulwa nama-Israyeli emmangweni, wafika eJahatsi walwa nawo.+ 24 Kodwana ama-Israyeli amhlula ngesabula+ athatha inarhakhe+ kusukela e-Arinoni+ ukuya eJabokhi,+ eduze nama-Amoni ngombana imikhawulo yeJazeri+ isesifundeni sama-Amori.+

25 Nje-ke ama-Israyeli athatha woke amadorobho la athoma ukuhlala kiwo woke amadorobho wama-Amori+ kuhlanganise neRhetjhibhoni namadorobho ayibhodileko. 26 IRhetjhibhoni bekulidorobho lakaSirhoni ikosi yama-Amori, eyalwa nekosi yakwaMowabi yayithathela inarhayo ukuyokufika e-Arinoni. 27 Kungebangelo abantu bahlekisa ngabo bathi:

“Yenize eRhetjhibhoni.

Idorobho lakaSirhoni, alakhiwe beliqiniswe.

28 Umlilo uphume eRhetjhibhoni, ilangabi liphume edorobheni lakaSirhoni.

Utjhise i-Ari yakwaMowabi, ababusi beendawo eziphakamileko ze-Arinoni.

29 Maye Mowabi! Nina bantu bakaKemotjhi nizokutjhatjalaliswa!+

Amadodana kaKemotjhi azokurhatjheka enarheni, amadodakazakhe athunjwe nguSirhoni ikosi yama-Amori.

31 Nje-ke ama-Israyeli ahlala enarheni yama-Amori. 32 UMosi wathumela amadoda athileko bona ayokuhlola iJazeri.+ Ama-Israyeli athumba amadorobho ayibhodileko, aqotha ama-Amori ebewalapho. 33 Ngemva kwalokho, akhamba ngendlela yeBhatjhani. U-Ogi+ ikosi yeBhatjhani waphuma nabantu bakhe boke wayokuhlangabeza ama-Israyeli epini e-Edreyi.+ 34 UJehova wathi kuMosi: “Ungamsabi,+ ngizomnikela esandleni sakho,+ abantu bakhe boke nayo yoke inarhakhe begodu uzomhlula njengombana wahlula uSirhoni ikosi yama-Amori, ebeyihlala eRhetjhibhoni.”+ 35 Ammadlha, yena, amadodanakhe nabo boke abantu bakhe, akhenge kusinde namunye,+ athatha inarhakhe.+

22 Ama-Israyeli asuka ayokukampa emmangweni othabaleleko wakwaMowabi ngepumalanga yeJordani ukusuka eJerikho.+ 2 UBhalaki+ indodana kaTsipori wabona indlela ama-Israyeli ahlula ngayo ama-Amori, 3 bakwaMowabi bathukwa khulu ngombana ama-Israyeli bewamanengi, bangenwa mamanzi emadolweni ngebanga lokusaba ama-Israyeli.+ 4 Nje-ke uMowabi wathi ebadaleni bakwaMidiyani:+ “Ihlangano le izosidla soke nje njengekunzi nayidla utjani.”

UBhalaki indodana kaTsipori bekayikosi yakwaMowabi ngesikhatheso. 5 Wathumela iinthunywa kuBhalami indodana kaBhewori obekahlala neenhlobo zakhe ePetora,+ ebeyihlanu koMlambo.* Wambiza wathi kuye: “Qala abantwaba baphuma eGibhide. Basabalele iphasi loke+ begodu bahlala eduze nami. 6 Ngibawa uze uzongiqalekisela abantwaba+ ngombana banamandla kunami. Mhlamunye ngingabahlula bengibaqothe enarheni ngombana ngazi kuhle ukuthi ombusisako uyabusiseka nomqalekisako uyaqalekiswa.”

7 Nje-ke abadala bakwaMowabi nabadala bakwaMidiyani baya kuBhalami+ baphethe imali yokuthukula bamtjela umlayezo ovela kuBhalaki. 8 Wabaphendula wathi: “Lalani lapha, ngizanitjela nanyana yini uJehova angitjela yona.” Amakhosana wakwaMowabi ahlala noBhalami.

9 UZimu weza kuBhalami wathi:+ “Bobani amadoda anawe la?” 10 UBhalami wathi kuZimu weqiniso: “UBhalaki indodana kaTsipori, ikosi yakwaMowabi ungithumele umlayezo wathi, 11 ‘Qala, kunabantu abavela eGibhide basabalele iphasi loke. Nje-ke yewize uzongiqalekisela bona.+ Mhlamunye ngingalwa nabo, ngibahlule bengibaqothe.’” 12 UZimu wathi kuBhalami: “Akukafuzi ukhambe nawo. Ungabaqalekisi nabantwabo ngombana babusisiwe.”+

13 UBhalami wavuka ekuseni wathi emakhosaneni kaBhalaki: “Buyelani enarhenenu, uJehova walile bona ngikhambe nani.” 14 Amakhosana wakwaMowabi akhamba abuyela kuBhalaki athi: “UBhalami walile ukuza nathi.”

15 UBhalaki wabuye wathumela amakhosana amanengi nahlonipheke khulu ukudlula wokuthoma. 16 Afika kuBhalami athi: “Nakhu uBhalaki indodana kaTsipori akutjhoko, ‘Ngibawa ungavumeli litho likwenze bona ungezi uzongibona, 17 ngizokuhlonipha khulu begodu ngizokwenza nanyana yini othi ngiyenze. Nje-ke ngiyakubawa, yiza uzongiqalekisela abantwaba.’” 18 UBhalami waphendula iinsebenzi zakaBhalaki wathi: “Ngitjho nanyana uBhalaki angangipha indlwakhe izele isiliva negolide, angekhe ngenze nanyana yini bona ngeqe umyalo kaJehova uZimami, kungaba yinto encani namkha ekulu.+ 19 Kodwana ngibawa nilale la godu, ngizwe ukuthi khuyini enye uJehova azongitjela yona.”+

20 UZimu weza kuBhalami ebusuku wathi: “Nangabe amadoda la azokubiza, khamba nawo. Kodwana uzokukhuluma kwaphela engizokutjela khona.”+ 21 Nje-ke uBhalami wavuka ekuseni walungisa udumbanakhe, wakhamba namakhosana wakwaMowabi.+

22 UZimu wasilingeka ngebanga lokuthi uBhalami bekakhamba, ingilozi kaJehova yajama endleleni yamkhandela. UBhalami bekakhamba ngodumbanakhe aneensebenzi zakhe ezimbili. 23 Udumbana nakabona ingilozi kaJehova ijame endleleni iphethe isabula, walinga ukuphuma endleleni aye emmangweni. Kodwana uBhalami wambetha alinga ukumbuyisela endleleni. 24 Ingilozi kaJehova yajama endleleni encani ehlangana namasimu amabili wamadiribe anemithangala eyakhiwe ngamatje emahlangothini womabili. 25 Udumbana nakabona ingilozi kaJehova, wasama emthangaleni bewaminyezela inyawo lakaBhalami emthangaleni, uBhalami wambetha godu.

26 Ingilozi kaJehova yadlula godu yajama endaweni encani lapho kungakghoneki ukujikela ngesidleni namkha ngesinceleni. 27 Udumbana nakabona ingilozi kaJehova wahlala phasi, uBhalami wasilingeka khulu wasolo ambetha ngentongakhe. 28 Ekugcineni uJehova wenza udumbana bona akhulume,+ wathi kuBhalami: “Ngikwenzeni kangaka bona ungabe ungibethe kathathu?”+ 29 UBhalami waphendula udumbana wathi: “Kungombana ungenze isidlhadlha. Ngathana bengiphethe isabula, ngabe ngiyakubulala!” 30 Udumbana wathi kuBhalami: “Kghani angisingudumbanakho ebewusolo umkhwela ukuphila kwakho koke? Ngakhe ngakuphatha ngendlela le na?” Wathi: “Awa!” 31 Nje-ke uJehova wavula amehlo kaBhalami,+ wabona ingilozi kaJehova ijame endleleni iphethe isabula. Khonokho wakhothama.

32 Ingilozi kaJehova yathi kuye: “Kubayini ubethe udumbanakho kathathu? Ngizele ukukukhandela ngombana ikhambo lakho alikhambisani nentandwami.+ 33 Udumbana ungibonile walinga ukuphambuka kathathu phambi kwami.+ Ngathana akhenge aphambuke, ngabe ngikubulele ngalisa udumbana waphila.” 34 UBhalami wathi engilozini kaJehova: “Ngonile, ngombana bengingazi ukuthi nguwe ojame endleleni uzongihlangabeza. Nangabe ikhambweli limbi kuwe, ngizokubuyela emuva.” 35 Ingilozi kaJehova yathi kuBhalami: “Khamba nawo amadoda la kodwana uzokukhuluma kwaphela lokho engizokutjela khona.” UBhalami waraga wakhamba namakhosana kaBhalaki.

36 UBhalaki nakezwa ukuthi uBhalami ufikile, msinyana waphuma wayomhlangabeza edorobheni lakwaMowabi, elimagega ne-Arinoni emkhawulweni wesifunda. 37 UBhalaki wathi kuBhalami: “Kanti khenge ngikubize na? Manje kubayini ungakhenge uze kimi? Kghani bewungacabangi bona ngingakuhlonipha khulu?”+ 38 UBhalami waphendula uBhalaki wathi: “Sengifikile. Ngivumelekile ukukhuluma? Ngizokukhuluma kwaphela lokho uZimu athe ngikukhulume.”+

39 UBhalami wakhamba noBhalaki bayokufika eKhiriyathi-Rhutsothi. 40 UBhalaki wenza umhlatjelo ngeenkomo nangezimvu, wathumela ezinye kuBhalami nemakhosaneni ebewanaye. 41 Ekuseni uBhalaki wathatha uBhalami wamusa eBhamothi-Bhali; nakalapho bekakghona ukubona boke abantu bakwa-Israyeli.+

23 UBhalami wathi kuBhalaki: “Ngakhela ama-aldara alikhomba,+ ungihlabele iinkunzi ezilikhomba namaramu alikhomba endaweni le.” 2 Khonokho uBhalaki wenza njengombana uBhalami amtjelile. UBhalaki noBhalami banikela ikunzi neramu e-aldareni ngalinye.+ 3 UBhalami wathi kuBhalaki: “Hlala lapha hlanu komnikelwakho otjhiswako, mina ngisakhamba. Mhlamunye uJehova angakhuluma nami. Nanyana yini angitjela yona ngizokutjela.” Nje-ke wakhamba waya esiqongolweni sentaba.

4 UZimu wakhuluma noBhalami+ owathi kuye: “Ngibeke ama-aldara alikhomba ngokulandelana, nganikela ikunzi neramu e-aldareni ngalinye.” 5 UJehova watjela uBhalami ekufuze akutjho, wathi kuye:+ “Buyela kuBhalaki umtjele engizokutjela khona.” 6 Wabuyela wabona uBhalaki nawo woke amakhosana wakwaMowabi bajame hlanu komnikelwakhe otjhiswako. 7 Wakhuluma amezwi asakondlo la, wathi:+

‘Yewize uzongiqalekisela uJakopo.

Yewize uqalekise ama-Israyeli.’+

 8 Ngingabaqalekisa njani labo uZimu angakabaqalekisi?

Ngingabajezisa njani labo uJehova angakabajezisi?+

11 UBhalaki wathi kuBhalami: “Khuyini le ongenze yona? Ngikulethe lapha bona uzongiqalekisela amanabami kodwana akhenge wenze litho ngaphandle kokuwabusisa.”+ 12 Wamphendula wathi: “Kghani akukafuzi ngikhulume nanyana yini uJehova athe ngiyikhulume?”+

13 UBhalaki wathi kuye: “Yewize ukhambe nami kwenye indawo lapha uzowabona khona. Uzokubona amanye wawo, angekhe uwabone woke. Ngibawa ungiqalekisele wona ulapho.+ 14 Wamthatha wakhamba naye emmangweni weTsofimu esiqongolweni sePisiga+ begodu wakha ama-aldara alikhomba, wanikela ngekunzi neramu e-aldareni ngalinye.+ 15 UBhalami wathi kuBhalaki: “Hlala lapha eduze nomnikelwakho otjhiswako mina nangisayokukhuluma noZimu lapha.” 16 UJehova wakhuluma noBhalami wamtjela okufuze akutjho, wathi:+ “Buyela kuBhalaki utjho engikutjele khona.” 17 Waya kuye wambona ajame hlanu komnikelwakhe otjhiswako namakhosana wakwaMowabi. UBhalaki wambuza wathi: “Utheni uJehova?” 18 Wakhuluma amezwi asakondlo la, wathi:+

“Sikima Bhalaki ungilalele.

Yewizwe ndodana kaTsipori.

Akukhulumileko akazukwenza na?

Akuthembisileko angeze akwenza na?+

22 UZimu uwakhupha eGibhide.+

Unjengeempondo zekunzi yommango kiwo.+

Nje-ke kuzokuthiwa ngoJakopo no-Israyeli:

‘Qala lokho uZimu akwenzileko!’

25 UBhalaki wathi kuBhalami: “Nangabe awukghoni ukubaqalekisa, ungababusisi.” 26 UBhalami waphendula uBhalaki wathi: “Ngitheni kuwe, akhenge ngikutjele na bona ngizokwenza lokho uJehova akutjhoko’?”+

27 UBhalaki wathi kuBhalami: “Ngibawa ukhambe nami ngikuse kwenye indawo. Mhlamunye uZimu weqiniso uzakuvumela ukuthi ungiqalekisele bona nawulapho.”+ 28 UBhalaki wathatha uBhalami watjhinga naye esiqongolweni sePewori esiqale eJetjhimoni.*+ 29 UBhalami wathi kuBhalaki: “Ngakhela ama-aldara alikhomba endaweni le, ungihlabele neenkunzi ezilikhomba namaramu alikhomba.”+ 30 UBhalaki wenza njengombana uBhalami atjhwile, wanikela ikunzi neramu e-aldareni ngalinye.

24 UBhalami nakabona ukuthi kuyamthabisa uJehova ukubusisa ama-Israyeli akhenge asayokufuna eminye imilingo+ kodwana waqala emmangweni. 2 UBhalami nakabona ama-Israyeli akampe ngokweenkoro zawo,+ ummoya kaZimu waba phezu kwakhe.+ 3 Nje-ke wakhuluma amezwi asakondlo la, wathi:+

10 UBhalaki wasilingeka khulu ngebanga lakaBhalami. UBhalaki asilingekile, wawahla izandla wathi kuBhalami: “Ngikubizele bona uzokuqalekisa+ amanabami kodwana wena uwabusise kathathu. 11 Khamba khona nje, ubuyele kwakho.+ Benginqophe ukukuhlonipha khulu kodwana uJehova wenze bona ungayifumani ihlonipho leyo.”

12 UBhalami waphendula uBhalaki, wathi: “Kghani akhenge ngitjho na eenthunyweni zakho ukuthi, 13 ‘Ngitjho nanyana uBhalaki angangipha indlwakhe izele isiliva negolide, angekhe ngizenzele okufunwa ngimi bona ngeqe umyalo kaJehova, kungaba yinto ehle namkha into embi. Ngizokukhuluma kwaphela lokho uJehova azokuthi ngikutjho’?+ 14 Nje, ngiyakhamba ngiya ebantwini bekhethu. Yiza ngizokutjela ukuthi khuyini abantwaba abazoyenza ebantwini bakho esikhathini esizako.” 15 Nje-ke wakhuluma amezwi asakondlo la, wathi:+

20 Nakabona ama-Amalekhi waraga namezwakhe asakondlo, wathi:

21 Nakabona amaKheni+ waraga namezwakhe asakondlo, wathi:

“Indawo ohlala kiyo ivikelekile begodu yakhelwe edwaleni.

22 Kodwana omunye umuntu uzokutjhisa iKhayini.

Sekusele isikhathi esingangani bona i-Asiriya ikuthumbe?”

23 Waraga namezwakhe asakondlo, wathi:

“Maye! Ngubani ozokusinda lokha uZimu nakenza lokhu?

Kodwana nayo izokutjhabalala.”

25 Nje-ke uBhalami+ wakhamba wabuyela lapha ahlala khona. UBhalaki naye wakhamba.

25 Lokha ama-Israyeli nawahlala eTjhitimu,+ athoma ukuziphatha kumbi ngokomseme namadodakazi wakwaMowabi.+ 2 Abafazaba bamema abantu bona bakhambe nabo lokha nabayokwenzela abozimu babo imihlatjelo.+ Abantwaba bathoma ukudla, bakhothamela nabozimu babo.+ 3 Nje-ke ama-Israyeli ahlanganyela ekulotjheni uBhali wePewori,+ uJehova wasilingeka khulu ngebanga lama-Israyeli. 4 UJehova wathi kuMosi: “Thatha boke abarholi babantwaba ubaphanyeke esigodweni emini ekulu phambi kwakaJehova bona ilaka lakaJehova lisuke kuma-Israyeli. 5 UMosi wathi ebahlulelini bakwa-Israyeli:+ “Ngamunye wenu kufuze abulale umrholakhe ohlanganyele ekulotjheni uBhali wePewori.”+

6 Khonokho omunye umIsrayeli waletha umfazi wakwaMidiyani+ ngekampeni phambi kwakaMosi naphambi kwayo yoke ihlangano yama-Israyeli, ngesikhatheso bebasalila ebungenweni betende lokuhlangana. 7 Lokha uFiniyasi+ indodana ka-Elazara indodana ka-Aroni umphristi nakabona lokhu, wasikima khonokho hlangana nehlangano wathatha umkhonto. 8 Walandela indoda yomIsrayeli ngetendeni wabahlaba bobabili ngomkhonto indoda yomIsrayeli nomfazi loyo, umkhonto, waphumela ngale kwezitho zobulili zomfazi. Ngemva kwalokho, isibetho sasuka kuma-Israyeli.+ 9 Labo abafa ngesibetho bebazii-24 000.+

10 UJehova wathi kuMosi: 11 “UFiniyasi+ indodana ka-Elazara indodana ka-Aroni umphristi wehlise ilaka ebenginalo ngabantu bakwa-Israyeli, ngombana akhenge abekezelele nanyana ngikuphi ukungathembeki okwenziwe kimi.+ Kungebangelo ngingakhenge ngitjhabalalise ama-Israyeli ngitjho nanyana ngifuna alotjhe mina kwaphela.+ 12 Nje-ke mtjele ukuthi, ‘Ngenza naye isivumelwano sokuthula. 13 Ngebanga lesivumelwanesi, yena neenzukulwana zakhe+ bazokuba baphristi isikhathi eside. Ngombana akhenge abekezelele ukungathembeki okwenziwe kuZimakhe+ begodu ubawele abantu bakwa-Israyeli ukulitjalelwa.’”

14 Igama lendoda emIsrayeli eyabulawa nomfazi wakwaMidiyani bekunguZimri indodana kaSalu, ikosana yekoro yakwaSimiyoni. 15 Igama lomfazi wakwaMidiyani owabulawako bekunguKozibi indodakazi kaTsuri+ umrholi womndeni wekoro yakwaMidiyani.+

16 UJehova wathi kuMosi: 17 “Tshwenyani bakwaMidiyani benibabulale,+ 18 ngebanga lokuthi nani banitshwenya, ngobukirikitjani baniyenga ngoKozibi indodakazi yekosana yakwaMidiyani bona nilotjhe uPewori,+ udadwabo owabulawa+ ngelanga ekwafika ngalo isibetho phezu kwenu ngebanga lokulotjha uPewori.”+

26 Ngemva kwesibetho,+ uJehova wathi kuMosi no-Elazara indodana ka-Aroni umphristi: 2 “Balani yoke ihlangano yakwa-Israyeli kusukela kwabaneminyaka ema-20 ukuya phezulu ngokweenkoro zaboyise, nibale boke abangakghona ukuya epini kwa-Israyeli.”+ 3 Nje-ke uMosi no-Elazara+ umphristi bakhuluma nabantu emmangweni othabaleleko wakwaMowabi+ hlanu kweJordani eJerikho,+ bathi: 4 “Balani kusukela kwabaneminyaka ema-20 ukuya phezulu njengombana uJehova ayale uMosi.”+

Amadodana ka-Israyeli aphuma enarheni yeGibhide bekungu: 5 Rubeni+ izibulo laka-Israyeli; amadodana kaRubeni:+ KuRhanoki kwavela umndeni wamaRhanoki; kuPalu umndeni wamaPalu; 6 kuRhetsironi kwavela umndeni wamaRhetsironi; kuKarimi kwavela umndeni wamaKarimi. 7 Le bekumindeni yabakwaRubeni, abatloliswako bebazii-43 730.+

8 Indodana kaPalu bekungu-Eliyabu. 9 Amadodana ka-Eliyabu bekunguNemuweli, uDatani no-Abiramu. UDatani no-Abiramu bebabajameli behlangano abalwa noMosi+ no-Aroni basekela isiqhema sakaKhorarhi+ lokha nasilwa noJehova.+

10 Iphasi lavuleka labaginya. UKhorarhi yena wafa nabasekeli bakhe lokha umlilo nawutjhisa amadoda ama-250.+ Okwenzeka kibo kwaba siyeleliso kwabanye.+ 11 Kodwana amadodana kaKhorarhi akhenge afe.+

12 Amadodana kaSimiyoni+ ngokwemindenawo: KuNemuweli kwavela umndeni wamaNemuweli; kuJamini kwavela umndeni wamaJamini; kuJakini kwavela umndeni wamaJakini; 13 kuZerarhi kwavela umndeni wamaZerarhi; kuSawula kwavela umndeni wamaSawula. 14 Laba ngabatloliswako emindenini yamaSimiyoni: 22 200.+

15 Amadodana kaGadi+ ngokwemindenawo: KuTsefoni kwavela umndeni wamaTsefoni; kuRhagi kwavela umndeni wamaRhagi; kuTjhuni kwavela umndeni wamaTjhuni; 16 ku-Ozini kwavela umndeni wama-Ozini; ku-Eri kwavela umndeni wama-Eri; 17 ku-Arodi kwavela umndeni wama-Areli; ku-Areli kwavela umndeni wama-Areli. 18 Le bekumindeni yamadodana wakwaGadi, atloliswako bewazii-40 500.+

19 Amadodana kaJuda+ bekungu-Eri no-Onani.+ Kodwana u-Eri no-Onani bahlongakalela enarheni yeKanana.+ 20 Amadodana kaJuda ngokwemindenawo: KuTjhela+ kwavela umndeni wamaTjhela; kuPeretsi+ kwavela umndeni wamaPeretsi;+ kuZerarhi kwavela umndeni wamaZerarhi. 21 Amadodana kaPeretsi: KuRhetsironi+ kwavela umndeni wamaRhetsironi; kuRhamulu+ kwavela umndeni wamaRhamulu. 22 Le bekumindeni yabakwaJuda, abatloliswako bebazii-76 500.+

23 Amadodana ka-Isakari+ ngokwemindenawo: KuTola+ kwavela umndeni wamaTola; kuPuva kwavela umndeni wamaPuva; 24 kuJatjhubi kwavela umndeni wamaJatjhubi; kuTjhimroni kwavela umndeni wamaTjhimroni. 25 Le bekumindeni yakwa-Isakari, abatloliswako bebazii-64 300.+

26 Amadodana kaZebuloni+ ngokwemindenawo: KuSeredi kwavela umndeni wamaSeredi; ku-Eloni kwavela umndeni wama-Eloni; kuJarhiliyeli kwavela umndeni wamaJarhiliyeli. 27 Le bekumindeni yakwa-Zebuloni, abatloliswako bebazii-60 500.+

28 Amadodana kaJosefa+ ngokwemindenawo bekunguManase no-Efrayimu.+ 29 Amadodana kaManase:+ KuMakiri+ kwavela umndeni wamaMakiri; uMakiri waba nguyise kaGiliyadi,+ kuGiliyadi kwavela umndeni wamaGiliyadi. 30 La bekumadodana kaGiliyadi, ku-Iyezeri kwavela umndeni wama-Iyezeri; kuRhelekhi kwavela umndeni wamaRhelekhi; 31 ku-Asriyeli kwavela umndeni wama-Asriyeli; kuTjhekemu kwavela umndeni wamaTjhekemu; 32 kuTjhemida kwavela umndeni wamaTjhemida; kuRheferi kwavela umndeni wamaRheferi. 33 UTselofirhadi indodana kaRheferi beyinganawo amadodana, beyinamadodakazi kwaphela.+ Amagama wamadodakazi kaTselofirhadi+ bekunguMarhila, uNowa, uRhogila, uMilika noTiritsa. 34 Le bekumindeni kaManase, abatloliswako bebazii-52 700.+

35 La bekumadodana ka-Efrayimu+ ngokwemindenawo: KuTjhuthelarhi+ kwavela umndeni wamaTjhuthelarhi; kuBhekeri kwavela umndeni wamaBhekeri; kuTarhani kwavela umndeni wamaTarhani. 36 La bekumadodana kaTjhuthelarhi: Ku-Erani kwavela umndeni wama-Erani. 37 Le bekumindeni yamadodana ka-Efrayimu, abatloliswako bebazii-32 500.+ La bekumadodana kaJosefa ngokwemindenawo.

38 Amadodana kaBhenjamini+ ngokwemindenawo: KuBhela+ kwavela umndeni wamaBhela; ku-Atjhibeli kwavela umndeni wama-Atjhibeli; ku-Arhiramu kwavela umndeni wama-Arhiramu; 39 kuTjhefufani kwavela umndeni wamaTjhefufani; kuRhufamu kwavela umndeni wamaRhufamu. 40 Amadodana kaBhela bekungu-Aridi noNamani;+ ku-Aridi kwavela umndeni wama-Aridi; kuNamani kwavela umndeni wamaNamani. 41 La bekumadodana kaBhenjamini ngokwemindenawo, abatloliswako bebazii-45 600.+

42 La bekumadodana kaDani+ ngokwemindenawo: KuTjhurhamu kwavela umndeni wamaTjhurhamu. Le bekumindeni kaDani ngokwemindenawo. 43 Yoke imindeni yamaTjhurhamu, abatloliswako bebazii-64 400.+

44 Amadodana ka-Atjheri+ ngokwemindenawo: KuJimna kwavela umndeni wamaJimna; kuYitjhivi kwavela umndeni wamaYitjhivi; kuBheriya kwavela umndeni wamaBheriya; 45 emadodaneni kaBheriya: KuRhebheri kwavela umndeni wamaRhebheri; kuMalikiyeli kwavela umndeni wamaMalikiyeli. 46 Igama lendodakazi ka-Atjheri bekunguSerarhi. 47 Le bekumindeni yamadodana ka-Atjheri, abatloliswako bebazii-53 400.+

48 Amadodana kaNafitali+ ngokwemindenawo: KuJarhitsiyeli kwavela umndeni wamaJarhitsiyeli; kuGuni kwavela umndeni wamaGuni; 49 kuJetseri kwavela umndeni wamaJetseri; kuTjhilemu kwavela umndeni wamaTjhilemu. 50 Le bekumindeni kaNafitali ngokwemindenawo, abatloliswako bebazii-45 400.+

51 Leli linani lama-Israyeli atloliswako: Zii-601 730.+

52 Ngemva kwalokho, uJehova wakhuluma noMosi wathi: 53 “Hlukanisa inarha ngokwesibalo samadodana ka-Israyeli ekorweni ngayinye bona ibe lilifa lawo.+ 54 Nangabe basiqhema esikhulu kufuze wandise ilifa lawo, nangabe basiqhema esincani kufuze uphungule ilifa labo.+ Ilifa lesiqhema ngasinye kufuze labiwe ngokwenani lalabo abatlolisiweko. 55 Inarha kufuze ihlukaniswe ngefumbe.+ Kufuze bafumane ilifa labo ngokwamagama weenkoro zaboyise. 56 Ilifa ngalinye lizokuhlukaniswa labelwe iinqhema ezikulu nezincani.”

57 Laba ngabatloliswako kumaLevi+ ngokwemindenawo: KuGeritjhoni kwavela umndeni wamaGeritjhoni; kuKhehathi+ kwavela umndeni wamaKhehathi; kuMerari kwavela umndeni wamaMerari. 58 Le mindeni yamaLevi: Umndeni wamaLibini,+ umndeni wamaRhebroni,+ umndeni wamaMarhili,+ umndeni wamaMutjhi,+ umndeni wamaKhorarhi.+

UKhehathi waba nguyise ka-Amramu.+ 59 Igama lomka-Amramu bekunguJokobedi+ indodakazi kaLevi, loyo ambelethela uLevi eGibhide. UJokobedi wabelethela u-Amramu u-Aroni, uMosi nodadwabo uMiriyamu.+ 60 U-Aroni wabelethelwa uNadabi, u-Abihu, u-Elazara no-Itamara.+ 61 UNadabi no-Abihu bahlongakala ngebanga lokunikela ngomlilo ongakavumeleki phambi kwakaJehova.+

62 Inani lalabo abatloliswako belizii-23 000 boke abaduna kusukela kwabanenyanga yinye ukuya phezulu.+ Akhenge batloliswe hlangana nama-Israyeli+ ngombana akunalifa abazokunikelwa lona hlangana nama-Israyeli.+

63 Laba ngabatloliswa nguMosi no-Elazara umphristi lokha nabatlolisa ama-Israyeli emmangweni othabaleleko wakwaMowabi eduze neJordani eJerikho. 64 Kodwana hlangana nabo, akekho owatloliswa nguMosi no-Aroni umphristi lokha nababala ama-Israyeli emmangweni weSinayi.+ 65 UJehova wathi ngabo: “Bazokufela emmangweni.”+ Nje-ke akhenge kusale namunye ngaphandle kwakaKalebi indodana kaJefune noJotjhuwa indodana kaNuni.+

27 Amadodakazi kaTselofirhadi+ oyindodana kaRheferi, indodana kaGiliyadi, indodana kaMakiri oyindodana kaManase. Amadodakazi kaTselofirhadi obekavela emindenini kaManase indodana kaJosefa eza kuMosi. Amagama wamadodakazi kaTselofirhadi bekunguMarhila, uNowa, uRhogila, uMilika noTiritsa. 2 Ajama phambi kwakaMosi, u-Elazara umphristi, amakhosana+ nayo yoke ihlangano ebungenweni betende lokuhlangana, athi: 3 “Ubaba wahlongakalela emmangweni kodwana bekangasihlangana nesiqhema sabasekeli bakaKhorarhi, esavukela uJehova.+ Wahlongakala ngebanga lesono sakhe, wahlongakala anganawo amadodana. 4 Kubayini igama lakababa kufuze lingasakhunjulwa emndeninakhe ngebanga lokuthi akanandodana? Sinikelani ilifa njengabafowabo bakababa.” 5 UMosi wathatha indaba le wayiletha phambi kwakaJehova.+

6 UJehova wathi kuMosi: 7 “Amadodakazi kaTselofirhadi akhuluma iqiniso. Kufuze uwanikele ilifa njengabafowabo bakayise. Kufuze udlulisele ilifa lakayise kiwo.+ 8 Tjela ama-Israyeli uthi: “Nange indoda ihlongakala inganandodana, kufuze nidlulisele ilifa layo endodakazinayo. 9 Nangabe ayinandodakazi, kufuze nidlulisele ilifa layo kubafowabo. 10 Nangabe ayinabafowabo, ilifa layo kufuze nilidlulisele kubafowabo bakayise. 11 Nange uyise anganabafowabo, kufuze ninikele isihlobo sakhe ilifelo. Isiquntwesi sizokuba mthetho wama-Israyeli njengombana uJehova ayale uMosi.’”

12 Nje-ke uJehova wathi kuMosi: “Khuphukela entabeni ye-Abarimu,+ ubone inarha engizoyinikela ama-Israyeli.+ 13 Nasele uyibonile uzokuhlongakala+ njengo-Aroni umfowenu,+ 14 ngombana lokha ihlangano nayinghonghoyila ngami emmangweni weTsini navukela umthethwami, akhenge ningicwengise phambi kwayo hlanu kwamanzi.+ La mamanzi weMeriba+ eKhadetjhi+ emmangweni weTsini.”+

15 UMosi wathi kuJehova: 16 “Jehova, Zimu onikela abantu boke ukuphila, beka indoda phezu kwehlangano le, 17 ezobanqophisa kikho koke okwenziwako, khona ihlangano kaJehova ingeze yaba njengezimvu ezinganamalusi.” 18 UJehova wathi kuMosi: “Thatha uJotjhuwa indodana kaNuni, uyindoda ekghonako ukurhola abantu.* Ubeke izandla zakho phezu kwakhe.+ 19 Umjamise phambi kwaka-Elazara umphristi naphambi kwayo yoke ihlangano, umbeke abe mdosiphambili phambi kwabo,+ 20 mnikele ezinye izinto ozilawulako, zilawulwe nguye,+ khona yoke ihlangano yakwa-Israyeli izamlalela.+ 21 Uzokujama phambi kwaka-Elazara umphristi, uzombuzela kuJehova asebenzisa i-Urimi+ bona azi isiqunto sakhe. Yena, woke ama-Israyeli anaye nayo yoke ihlangano bazokuphuma bebangene balandela isinqophiso.”

22 UMosi wenza njengombana uJehova amyalile. Wathatha uJotjhuwa wamjamisa phambi kwaka-Elazara umphristi naphambi kwehlangano yoke. 23 Wabeka izandla zakhe phezu kwakhe,+ wambeka bona abe mdosiphambili njengombana uJehova akhuluma ngoMosi.+

28 Godu uJehova wathi kuMosi: 2 “Khuluma nama-Israyeli uthi, ‘Kufuze niqiniseke bona ningenzela umnikelwami, uburotho bami. Iminikelwami eyenziwe ngomlilo bona ibe liphunga elimnandi, kufuze niyenze ngeenkhathi ezibekiweko.’+

3 “Uthi kiwo, ‘Lo mnikelo owenziwa ngomlilo enizowuletha kuJehova, ngelanga nizokuletha iimvana ezimbili eziduna, eziphile kuhle ezinomnyaka bona zibe mnikelo otjhiswa qobe.+ 4 Imvana yinye nizokunikela ngayo ekuseni, kuthi enye niyinikele ngamarhwaqela,+ 5 izokukhambisana nekhilogremu leflowuru esefiweko ehlanganiswe nengcenye yesine yehini* yamafutha asezingeni eliphezulu bona kube mnikelo weenthoro.+ 6 Mnikelo otjhiswako owenziwa qobe,+ owathonywa ukunikelwa eNtabeni iSinayi bona ube liphunga elimnandi, umnikelo owenziwa ngomlilo oya kuJehova, 7 nomnikelwawo oselwako, ingcenye yesine yehini yemvana eduna ngayinye.+ Thela utjwala endaweni ecwengileko bube mnikelo oselwako oya kuJehova. 8 Uzokunikela enye imvana ngamarhwaqela. Unikele nomnikelo weenthoro ofana naloyo onikelwe ekuseni nomnikelo wesiselo ofana naloyo onikelwe ekuseni. Uzowuletha bona ube mnikelo owenziwa ngomlilo oliphunga elimnandi eliya kuJehova.+

9 “‘Ngelanga leSabatha,+ kufuze kunikelwe ngeemvana ezimbili eziduna, ezinomnyaka eziphile kuhle neflowuru esefiweko emakhilogremu amabili ehlanganiswe namafutha bona ibe mnikelo weenthoro nomnikelo wesiselo. 10 Lo mnikelo otjhiswako weSabatha kunye nomnikelo otjhiswako owenziwa qobe nomnikelwawo wesiselo.+

11 “‘Ekuthomeni kwenyanga ngayinye, kufuze ninikele ngeenkunzana ezimbili, iramu linye neemvana eziduna ezilikhomba, ezinomnyaka munye eziphile kuhle bona kube mnikelo otjhiswako oya kuJehova,+ 12 amakhilogremu amathathu nesiquntu weflowuru esefiweko ehlanganiswe namafutha bona ibe mnikelo weenthoro+ wekunzi ngayinye, iflowuru esefiweko ehlanganiswe namafutha emakhilogremu amabili bona ibe mnikelo weenthoro weramu linye+ 13 nekhilogremu leflowuru esefiweko ehlanganiswe namafutha bona ibe mnikelo weenthoro wemvana eduna ngayinye bona kube mnikelo otjhiswako oliphunga elimnandi,+ umnikelo owenziwe ngomlilo oya kuJehova. 14 Iminikelwawo eselwako yekunzi+ kufuze kube siquntu sehini sewayini, weramu+ kufuze kube yingcenye yesithathu yehini, wemvana+ kufuze kube yingcenye yesine yehini. Le minikelo etjhiswako okufuze ilethwe qobe nyanga, umnyaka woke. 15 Imbuzana kufuze inikelwe bona ibe mnikelo wesono oya kuJehova, kungezelelwe emnikelweni otjhiswako owenziwa qobe nemnikelwenawo oselwako.

16 “‘Elangeni le-14 enyangeni yokuthoma, kuzokuba liPhasika lakaJehova.+ 17 Ngelanga le-15 lenyanga le kuzokuba nomnyanya. Uburotho obunganasibiliso buzokudliwa amalanga alikhomba.+ 18 Elangeni lokuthoma kuzokuba nomhlangano ocwengileko. Akukafuzi nenze nanyana ngimuphi umsebenzi obudisi. 19 Kufuze nilethe iinkunzana ezimbili, iramu linye neemvana eziduna ezilikhomba, ngayinye enomnyaka bona zibe mnikelo otjhiswako owenziwa ngomlilo oya kuJehova. Kufuze nilethe iinlwana eziphilileko.+ 20 Kufuze nizinikele neminikelwazo yeenthoro, iflowuru esefiweko yahlanganiswa namafutha,+ amakhilogremu amathathu nesiquntu wekunzi namakhilogremu amabili weramu. 21 Kufuze unikele ikhilogremu yemvana eduna ngayinye eemvaneni ezilikhomba 22 nembuzi bona ibe mnikelo wesono, nenze umnikelo wokulitjalelwa kwezono. 23 Ngaphandle komnikelo otjhiswako wekuseni owenziwa qobe, nizokunikela nalokhu. 24 Nizokunikela lokhu ngendlela efanako, qobe langa amalanga alikhomba bona kube kukudla, umnikelo owenziwe ngomlilo oliphunga elimnandi eliya kuJehova. Kufuze unikelwe nomnikelo waqobe otjhiswako nomnikelwawo wesiselo. 25 Elangeni lekhomba, kufuze nibe nomhlangano ocwengileko.+ Akukafuzi nenze nanyana ngimuphi umsebenzi obudisi.+

26 “‘Ngelanga lokuthoma leenthelo ezivuthiweko,+ naniletha umnikelo weenthoro+ kuJehova, kufuze nibe nomhlangano ocwengileko emnyanyenenu wesivuno.+ Akukafuzi nenze nanyana ngimuphi umsebenzi obudisi.+ 27 Kufuze nilethe iinkunzana ezimbili, iramu linye neemvana eziduna ezilikhomba, ezinomnyaka bona zibe mnikelo otjhiswako oliphunga elimnandi eliya kuJehova+ 28 nomnikelwazo weenthoro weflowuru esefiweko ehlanganiswe namafutha, amakhilogremu amathathu nesiquntu wekunzi ngayinye namakhilogremu amabili weramu, 29 kufuze unikele ikhilogremu yemvana eduna ngayinye eemvaneni ezilikhomba, 30 nembuzana bona ibe mnikelo wokulitjalelwa kwezono.+ 31 Kufuze ninikele ngazo, ningezelele emnikelweni otjhiswako owenziwa qobe neminikelwenawo weenthoro. Kufuze kube ziinlwana eziphile kuhle,+ zikhambisane nomnikelwazo wesiselo.

29 “‘Ngelanga lokuthoma lenyanga yekhomba, kufuze nibe nomhlangano ocwengileko. Akukafuzi nenze nanyana ngimuphi umsebenzi obudisi.+ Lilanga okufuze nivuthele ngalo ibhorompita.+ 2 Nizokwenza umnikelo otjhiswako ube liphunga elimnandi eliya kuJehova, nizowenza ngekunzana, iramu neemvana ezilikhomba eziduna ezinomnyaka munye, zoke kufuze kube ngeziphile kuhle, 3 neminikelo yeenthoro ebeyinikelwa neenlwanezi yeflowuru esefiweko ehlanganiswe namafutha, amakhilogremu amathathu nesiquntu wekunzi, amakhilogremu amabili weramu, 4 ikhilogremu linye lemvana ngayinye eduna kezilikhomba, 5 nembuzana eduna bona ibe mnikelo wesono nenze umnikelo wokulitjalelwa kwezono. 6 Lokhu kungezelelwa emnikelweni otjhiswako owenziwa qobe nyanga, umnikelwawo weenthoro,+ umnikelo otjhiswako owenziwa qobe nomnikelo wakhona weenthoro+ kuhlanganise neminikelo yakhona yesiselo,+ kuzokwenziwa ngendlela okujayelwe ukwenziwa ngayo bona kube liphunga elimnandi, umnikelo owenziwe ngomlilo oya kuJehova.

7 “‘Ngelanga letjhumi enyangeni yekhomba, kufuze nibe nomhlangano ocwengileko,+ kufuze nidane* ngebanga lezono zenu. Akukafuzi nisebenze.+ 8 Nizokwenza umnikelo otjhiswako ube liphunga elimnandi eliya kuJehova, nizowenza ngekunzana, ngeramu nangeemvana ezilikhomba eziduna ezinomnyaka munye, zoke kufuze kube ngeziphile kuhle.+ 9 Neminikelo yeenthoro ebeyinikelwa neenlwanezi yeflowuru esefiweko ehlanganiswe namafutha, amakhilogremu amathathu nesiquntu wekunzi, amakhilogremu amabili weramu, 10 ikhilogremu lemvana eduna ngayinye kezilikhomba, 11 nembuzana bona ibe mnikelo wesono ngaphandle komnikelo wesono owenziwa ngelanga lokulitjalelwa kwezono,+ umnikelo otjhiswako owenziwa qobe nomnikelo wakhona weenthoro kuhlanganise neminikelo yakhona yesiselo.

12 “‘Ngelanga le-15 enyangeni yekhomba, kufuze nibe nomhlangano ocwengileko. Akukafuzi nenze nanyana ngimuphi umsebenzi obudisi, kufuze nigidinge umnyanya kaJehova amalanga alikhomba.+ 13 Kufuze nilethe umnikelo otjhiswako,+ umnikelo owenziwe ngomlilo bona ube liphunga elimnandi eliya kuJehova, iinkunzana ezili-13, amaramu amabili neemvana eziduna ezili-14 ngayinye ibe nomnyaka munye, zoke kufuze kube ngeziphile kuhle.+ 14 Neminikelo yeenthoro ebeyinikelwa neenlwanezi yeflowuru esefiweko ehlanganiswe namafutha, amakhilogremu amathathu nesiquntu wekunzi ngayinye kezili-13, amakhilogremu amabili weramu ngayinye kezimbili, 15 nekhilogremu lemvana ngayinye eduna kezili-14, 16 nembuzana bona ibe mnikelo wesono ngaphandle komnikelo otjhiswako owenziwa qobe, umnikelo wakhona weenthoro nomnikelo wakhona wesiselo.+

17 “‘Ngelanga lesibili, kufuze nilethe iinkunzana ezili-12, amaramu amabili neemvana eziduna ezili-14 ngayinye ibe nomnyaka munye, zoke kufuze zibe ngeziphile kuhle,+ 18 nizokuletha umnikelo weenthoro, iminikelo yesiselo kuhlanganise iinkunzi, amaramu neemvana eziduna ngokwesibalo sazo, nikwenze ngendlela enijayele ukwenza ngayo, 19 nembuzana bona ibe mnikelo wesono ngaphandle komnikelo otjhiswako owenziwa qobe nomnikelo wakhona weenthoro kuhlanganise neminikelo yakhona yesiselo.+

20 “‘Ngelanga lesithathu, nizokuletha iinkunzi ezili-11, amaramu amabili neemvana eziduna ezili-14 ngayinye ibe nomnyaka munye, zoke kufuze kube ngeziphile kuhle,+ 21 nomnikelo weenthoro, iminikelo yesiselo kuhlanganise iinkunzi, amaramu neemvana eziduna ngokwesibalo sazo, nikwenze ngendlela enijayele ukwenza ngayo, 22 nembuzi bona ibe mnikelo wesono ngaphandle komnikelo otjhiswako owenziwa qobe nomnikelo wakhona weenthoro kuhlanganise nomnikelo wakhona wesiselo.+

23 “‘Ngelanga lesine nizokuletha iinkunzi ezili-10, amaramu amabili neemvana eziduna ezili-14 ngayinye ibe nomnyaka munye, zoke kufuze kube ngeziphile kuhle,+ 24 nomnikelo weenthoro, iminikelo yesiselo kuhlanganise iinkunzi, amaramu neemvana eziduna ngokwesibalo sazo, nikwenze ngendlela enijayele ukwenza ngayo, 25 nembuzana bona ibe mnikelo wesono ngaphandle komnikelo otjhiswako owenziwa qobe nomnikelo wakhona weenthoro kuhlanganise nomnikelo wakhona wesiselo.+

26 “‘Ngelanga lesihlanu, nizokuletha iinkunzi ezilithoba, amaramu amabili neemvana eziduna ezili-14 ngayinye ibe nomnyaka munye, zoke kufuze kube ngeziphile kuhle,+ 27 nomnikelo weenthoro, iminikelo yesiselo kuhlanganise iinkunzi, amaramu neemvana eziduna ngokwesibalo sazo, nikwenze ngendlela enijayele ukwenza ngayo, 28 nembuzi bona ibe mnikelo wesono ngaphandle komnikelo otjhiswako owenziwa qobe nomnikelo wakhona weenthoro kuhlanganise nomnikelo wakhona wesiselo.+

29 “‘Ngelanga lesithandathu, nizokuletha iinkunzi ezibunane, amaramu amabili neemvana eziduna ezili-14 ngayinye ibe nomnyaka munye, zoke kufuze kube ngeziphile kuhle,+ 30 nomnikelo weenthoro, iminikelo yesiselo kuhlanganise iinkunzi, amaramu neemvana eziduna ngokwesibalo sazo, nikwenze ngendlela enijayele ukwenza ngayo, 31 nembuzi bona ibe mnikelo wesono ngaphandle komnikelo otjhiswako owenziwa qobe nomnikelo wakhona weenthoro kuhlanganise neminikelo yakhona yesiselo.+

32 “‘Ngelanga lekhomba, nizokuletha iinkunzi ezilikhomba, amaramu amabili neemvana eziduna ezili-14 ngayinye ibe nomnyaka munye, zoke kufuze kube ngeziphile kuhle,+ 33 nomnikelo weenthoro, iminikelo yesiselo kuhlanganise iinkunzi, amaramu neemvana eziduna ngokwesibalo sazo, nikwenze ngendlela enijayele ukwenza ngayo, 34 nembuzi bona ibe mnikelo wesono ngaphandle komnikelo otjhiswako owenziwa qobe nomnikelo wakhona weenthoro kuhlanganise nomnikelo wakhona wesiselo.+

35 “‘Ngelanga lobunane, kufuze nibe nomhlangano okhethekileko. Akukafuzi nenze nanyana ngimuphi umsebenzi obudisi.+ 36 Nizokwenza umnikelo otjhiswako, umnikelo owenziwe ngomlilo ube liphunga elimnandi eliya kuJehova, nizowenza ngekunzi, ngeramu nangeemvana ezilikhomba eziduna ezinomnyaka munye, zoke kufuze kube ngeziphile kuhle,+ 37 nomnikelo weenthoro, iminikelo yesiselo kuhlanganise iinkunzi, amaramu neemvana eziduna ngokwesibalo sazo, nikwenze ngendlela enijayele ukwenza ngayo, 38 nembuzi bona ibe mnikelo wesono ngaphandle komnikelo otjhiswako owenziwa qobe nomnikelo wakhona weenthoro kuhlanganise nomnikelo wakhona wesiselo.+

39 “‘Ngilokhu enizokunikela kuJehova eminyanyenenu egidingwa ngeenkhathi ezithileko zomnyaka,+ ukungezelela eminikelwenenu yesifungo,+ eminikelwenenu esuka ehliziyweni+ bona ibe minikelo etjhiswako,+ iminikelwenu yeenthoro,+ iminikelwenu yesiselo+ nemihlatjelwenu yetjhebiswano.’”+ 40 UMosi watjela ama-Israyeli koke uJehova amyale ngakho.

30 Nje-ke uMosi wakhuluma neenhloko+ zeenkoro zakwa-Israyeli wathi, “Nakhu uJehova akutjhwileko: 2 Nange umuntu enza isifungo+ kuJehova namkha afunge+ ukuthi angekhe enze okuthileko, kufuze angasiphuli isithembisweso.+ Kufuze enze koke athembise bona uzokwenza.+

3 “Nange umfazi enza isifungo kuJehova namkha afunge bona angekhe enze okuthileko asesemutjha begodu asahlala ngendlini kayise, 4 uyise ezwe ngeemfungo azenzileko begodu angamphikisi, koke akufungileko kuzombopha nazo zoke iimfungo azenzileko zokungenzi okuthileko zizombopha. 5 Kodwana nange uyise amphikisa lokha nakezwa ngalokho akufungileko namkha iimfungo zokungenzi okuthileko, angekhe abopheke ukuzenza. UJehova uzomlibalela ngebanga lokuphikiswa nguyise.+

6 “Nange atjhada asesengaphasi kwesifungo sakhe namkha enze isithembiso arhabile, 7 indodakhe izwe ngesifungo sakhe begodu ingamphikisi, koke akufungileko kuzombopha nazo zoke iimfungo azenzileko zokungenzi okuthileko zizombopha. 8 Kodwana nange indodakhe imphikisa ngelanga izwa ngalo ngesifungwesi, ingasiphelisa isifungweso namkha isithembiso asenze arhabile,+ uJehova uzomlibalela.

9 “Nange umhlolokazi namkha umfazi otlhalene nendodakhe enza isifungo, koke akufungileko kuzombopha.

10 “Nange umfazi enza isifungo namkha afunge bona angekhe enze okuthileko asatjhadile 11 indodakhe izwe ngaso begodu ingasiphikisi, zoke iimfungo zakhe namkha isifungo sokungenzi okuthileko zizombopha. 12 Ngelanga indodakhe emuzwe ngalo enza iimfungo namkha afunga ukungenzi okuthileko begodu ingavumelani nalokho, akufungileko angekhe kumbophe.+ Ngebanga lokuthi indodakhe akhenge ivumelane nakho, uJehova uzomlibalela. 13 Malungana nananyana ngisiphi isifungo namkha isithembiso sokungenzi okuthileko, indodakhe ngiyo ekufuze iqunte bona iyasivumela isifungweso namkha iyasiphikisa. 14 Nange indodakhe ingaphikisani nalokho njengombana amalanga akhamba kutjho ukuthi imvumele bona enze zoke iimfungo zakhe namkha koke athembise ukungakwenzi. Imvumele ngombana akhenge imphikise ngelanga emuzwe enza ngalo iimfungwezo. 15 Kodwana nange iphikisa isifungweso sekudlule amalangana izwile ngaso, izokuthwala umlandu womkakhe.+

16 “Lezi ziinqophiso uJehova ayala ngazo uMosi ezimalungana nendoda nomkayo, nobaba nendodakazakhe encani esahlala ngendlinakhe.”

31 UJehova wathi kuMosi: 2 “Jezisa+ abantu bakwaMidiyani+ ngebanga lalokho abakwenze kuma-Israyeli. Ngemva kwalokho, uzokuhlongakala.”+

3 Nje-ke uMosi wakhuluma nabantu wathi: “Hlomisani amadoda bona aye epini ayokulwa nabakwaMidiyani, alethe isijeziso sakaJehova phezu kwamaMidiyani. 4 Kizo zoke iinkoro zakwa-Israyeli kufuze uthumele amadoda ayi-1 000 ekorweni ngayinye bona aye epini. 5 Eenkulungwaneni zama-Israyeli+ kwakhethwa amadoda ayi-1 000 ekorweni ngayinye, abazii-12 000 bahlonyiselwa ukuya epini.

6 Ekorweni ngayinye uMosi wathumela amadoda ayi-1 000 bona aye epini akhamba noFiniyasi+ indodana ka-Elazara umphristi webutho, obekaphethe izitja ezicwengileko namabhorompita wepi.+ 7 Alwa nabakwaMidiyani njengombana uJehova bekayale uMosi, abulala woke amadoda. 8 Hlangana nababuleweko, kwabulawa amakhosi wakwaMidiyani u-Evi, uRekhemu, uTsuri, uRhuri noReba amakhosi amahlanu wakwaMidiyani. Abulala noBhalami+ indodana kaBhewori ngesabula. 9 Ama-Israyeli athumba abafazi nabantwana bakwaMidiyani. Adlelezela ifuywabo yoke nazo zoke izinto zabo. 10 Atjhisa zoke iindawo ebebahlala kizo namakampabo. 11 Athatha koke abantwaba egade banakho, athatha iinlwana zabo athumba nabantwabo. 12 Athatha abantu abathumbileko, izinto ababathathele zona aziletha kuMosi, ku-Elazara umphristi nehlanganweni yakwa-Israyeli, ekampeni esemmangweni othabaleleko wakwaMowabi+ eduze neJordani eJerikho.

13 UMosi, u-Elazara umphristi nawo woke amakhosana wehlangano baphuma bayobahlangabeza ngaphandle kwekampa. 14 UMosi wasilingeka khulu ngebanga lamadoda akhethiweko bona adose phambili amabutho, iinduna zeenkulungwana neenduna zamakhulu ebeziza zibuya epini. 15 UMosi wathi kizo: “Kubayini ningakhenge nibulale abafazaba? 16 Ngibo abatjelwa nguBhalami bona bazokuganukeja ama-Israyeli bona afulathele+ uJehova, alotjhe abozimu bamala bePewori,+ ngebangelo isibetho sehlela ihlangano kaJehova.+ 17 Nje-ke kufuze nibulale boke abantwana babesana nabo boke abafazi ekhe batjhinga emabhayini. 18 Kodwana ningababulali abantazana abangakhenge batjhinge emabhayini.+ 19 Kufuze nikampe ngaphandle kwekampa amalanga alikhomba. Nanyana ngubani obulele umuntu nothinte umuntu obulewe ngesabula,+ kufuze azihlambulule+ elangeni lesithathu nelekhomba, nina nenibathumbileko. 20 Kufuze uhlambulule zoke izambatho, zoke izinto ezenziwe ngesikhumba, koke okwenziwe ngoboya bembuzi nakho koke okwenziwe ngesigodo.”

21 U-Elazara umphristi wathi emadodeni webutho egade aye epini: “Lo mthetho uJehova awunikela uMosi, 22 ‘Igolide, isiliva, ikhopha, isimbi, ibhlege nomthofi, 23 yoke into engadluliswa emlilweni kufuze idluliswe kiwo, izokuhlwengeka. Nanyana kunjalo, kufuze ihlanjululwe nangamanzi.+ Koke okungekhe kwadlula emlilweni, kufuze kudluliswe emanzini. 24 Kufuze nihlanze izambatho zenu ngelanga lekhomba, nizokuhlwengeka ngemva kwalokho-ke ningeza ekampeni.’”+

25 UJehova watjho lokhu kuMosi: 26 “Yenza irhelo lezinto ezithethwe epini, ubale abantu neenlwana ezithethwe epini, wenze lokhu no-Elazara umphristi neenhloko zeenkoro zaboyise zehlangano. 27 Hlukanisa okuthunjiweko kabili kunikelwe labo egade baye epini nayo yoke ihlangano.+ 28 Emabuthweni egade aye epini, thatha umuntu munye kabama-500 nesilwana sinye eenlwaneni ezilandelako, eenkomeni, kibodumbana, ezimvwini neembuzini, bona kube mthelo kaJehova. 29 Kufuze uthathe ingcenye yomthelwawo uyinikele u-Elazara umphristi bona ibe mnikelo kaJehova.+ 30 Engcenyeni enikelwe ama-Israyeli, thatha umuntu munye kabama-50 nesilwana sinye kezima-50 eenlwaneni ezilandelako; eenkomeni, kibodumbana, ezimvwini neembuzini nakizo zoke iinlwana ezifuywako uzinikele amaLevi+ ngebanga lomsebenzi awenzela uJehova ethaberinakeli.”+

31 UMosi no-Elazara umphristi benza njengombana uJehova ayale uMosi. 32 Iinlwana abantu ebebaye epini abazithathako bekuzizimvu neembuzi ezizii-675 000, 33 iinkomo ezizii-72 000, 34 nabodumbana abazii-61 000. 35 Abafazi abangakhenge baye emabhayini+ bebazii-32 000. 36 Ingcenye eyafunyanwa ngilabo abaya epini kwaba zizimvu neembuzi ezizii-337 500. 37 Umthelo kaJehova owathathwa ezimvwini neembuzini waba ma-675. 38 Bekuneenkomo ezizii-36 000, ezima-72 bezimthelo kaJehova. 39 Kunabodumbana abama-30 500, abama-61 bekumthelo kaJehova. 40 Bekunabantu abazii-16 000, abama-32 baba mthelo kaJehova. 41 Nje-ke uMosi wathatha umthelo wawunikela u-Elazara umphristi+ bona ube mnikelo kaJehova njengombana uJehova ayale uMosi.

42 Engcenyeni yama-Israyeli, le uMosi ayihlukanisa neyamadoda ebewaye epini, 43 ingcenye leyo beyinezimvu neembuzi ezizii-337 500, 44 iinkomo bezizii-36 000, 45 abodumbana bazii-30 500, 46 nabantu abazii-16 000. 47 UMosi wathatha engcenyeni ebeyinikelwe ama-Israyeli, umuntu munye kabama-50 nesilwana sinye kezima-50, wazinikela amaLevi+ ngebanga lomsebenzi awenzela uJehova ethaberinakeli,+ njengombana uJehova ayale uMosi.

48 Amadoda akhethiweko ebewasebuthweni leenkulungwana,+ iinduna zeenkulungwana neenduna zamakhulu, batjhidela kuMosi, 49 bathi kuye: “Iinsebenzi zakho zibale amadoda wepi alawulwa ngithi begodu ayikho nayinye elahlekileko.+ 50 Ngamunye wethu uzokuletha akufumeneko bona kube mnikelo kaJehova, izinto zegolide, amaketani wokuzikghabisa wengogoriyaneni, amabhengela, iindzilamunwana ezinetshwayo, amacici nezinye izinto zokuzikghabisa bona sizenzele umnikelo wokulitjalelwa kwezono phambi kwakaJehova.”

51 UMosi no-Elazara umphristi bathatha igolide kibo nazo zoke izinto zokuzikghabisa. 52 Loke igolide alinikela kuJehova laba matjhekeli* azii-16 750, libuya eenduneni zeenkulungwana neenduneni zamakhulu. 53 Enye nenye indoda esebuthweni yafumana ingcenye eentweni ezathunjwako. 54 UMosi no-Elazara umphristi bathatha igolide eenduneni zeenkulungwana nezamakhulu, aliletha etendeni lokuhlangana bona libe sikhumbuzo ebantwini bakwa-Israyeli naphambi kwakaJehova.

32 Nje-ke amadodana kaRubeni+ namadodana kaGadi+ bewanefuyo enengi khulu begodu abona ukuthi indawo yeJazeri+ nendawo yeGiliyadi ziindawo ezihle khulu zokufuya. 2 Amadodana kaGadi namadodana kaRubeni aya kuMosi, u-Elazara umphristi nemakhosaneni wehlangano, athi: 3 “I-Atharothi, iDiboni, iJazeri, iNimra, iRhetjhibhoni,+ i-Eliyale, iSebhama, iNebo+ neBhewoni,+ 4 ziindawo uJehova azihlula phambi kwehlangano yakwa-Israyeli,+ ziindawo ezihle zokufuya begodu iinsebenzi zakho zinefuyo enengi khulu.”+ 5 Araga athi: “Nasifumene imvumo kuwe, sinikela iindawezi bona zibe lilifa leenceku zakho. Ungasivumeli siyame iJordani.”

6 UMosi wathi emadodaneni kaGadi nemadodaneni kaRubeni: “Abafowenu bazokuya epini nina nisolo nihlezi lapha? 7 Kubayini niqeda ama-Israyeli amandla, niwenze angayameli enarheni uJehova azowanikela yona? 8 Ngilokhu okwenziwa boyihlo nangibathuma basuka eKhadetjhi-Bharineya bona bayokuhlola inarha.+ 9 Lokha nabakhuphukela emRhobeni we-Etjhikolo+ begodu babona inarha, baqeda abantu bakwa-Israyeli amandla, babenza bangasafuni ukuya enarheni uJehova ebakazobanikela yona.+ 10 UJehova wasilingeka khulu ngelangelo, wafunga wathi:+ 11 ‘Amadoda aphuma eGibhide kusukela kaneminyaka ema-20 ukuya phezulu angekhe ayibona inarha+ engafunga ngayo ku-Abrahama, u-Isaka noJakopo+ ngombana akhenge angilandele ngehliziyo epheleleko, 12 Ngaphandle kwakaKalebi+ indodana kaJefune umKhenizi noJotjhuwa+ indodana kaNuni ngombana balandela uJehova ngehliziyo epheleleko.’+ 13 UJehova wasilingeka khulu ngebanga lama-Israyeli, wawenza ajikajika emmangweni iminyaka ema-40+ bekwaba kulapho soke isizukulwana ebesenze okumbi kuJehova siphela.+ 14 Nina madoda anesono nenza okwenziwa boyihlo ebebasizukulwana esinesono, abenza uJehova wasilingeka khulu ngebanga lama-Israyeli. 15 Nange nilisa ukumlandela, uzokutjhiya abantwaba emmangwenapha godu, nizokulethela abantwaba ihlekelele.”

16 Ngokukhamba kwesikhathi atjhidela kuye, athi: “Sivumela sakhele ifuywethu iimbaya zamatje, sakhele nabantwabethu amadorobho. 17 Sizokuhlala sihlomile+ begodu sizokukhamba phambi kwama-Israyeli bekube kulapho afika endawenawo, kube ngesikhatheso abantwana bethu bahlala emadorobheni avikelekileko, bavikelekile kubahlali benarha le. 18 Angekhe sibuyele emizinethu bekube kulapho woke ama-Israyeli sewafumene inarha bona ibe lilifa lawo.+ 19 Angekhe sifumane ilifa nawo ngakwelinye ihlangothi leJordani namkha ngale kwayo ngombana sifumene ilifa lethu ngehlangothini elingepumalanga leJordani.”+

20 UMosi wawaphendula wathi: “Nakhu enizokwenza: Hlomani niyokulwa ipi njengombana uJehova atjhwile,+ 21 nange omunye nomunye wenu ahloma alungele ipi, niyame iJordani phambi kwakaJehova njengombana aqotha amanabakhe phambi kwakhe+ 22 bekube kulapho inarha ihlulwa phambi kwakaJehova.+ Ngemva kwalokho, ningabuya+ begodu angekhe nibe mlandu phambi kwakaJehova nama-Israyeli. Inarha le izokuba lilifa lenu phambi kwakaJehova.+ 23 Kodwana nange ningakwenzi lokhu, nizabe nonile kuJehova begodu kufuze nazi bona nizoziphendulela ngesono senu. 24 Nje-ke ningabakhela abantwabenu amadorobho begodu ningayakhela ifuywenu iimbaya+ kodwana kufuze nikwenze enikuthembisileko.”

25 Amadodana kaGadi namadodana kaRubeni athi kuMosi: “Iinsebenzi zakho zizokwenza njengombana ikosethu itjhwile. 26 Abantwabethu, abafazi bethu, imihlambethu nayo yoke ifuywethu kuzokuhlala emadorobheni weGiliyadi+ 27 kodwana iinsebenzi zakho zizokuyama, woke amadoda ahlomele ipi azokulwela uJehova+ njengombana kutjho ikosethu.”

28 UMosi wakhupha umyalo, wawutjela u-Elazara umphristi, uJotjhuwa indodana kaNuni neenhloko zeenkoro zakwa-Israyeli. 29 UMosi wathi kibo: “Nange amadodana kaGadi namadodana kaRubeni ayama iJordani nani, woke amadoda ahlomele ipi phambi kwakaJehova begodu inarha ihlulwe, nizowanikela inarha yeGiliyadi bona ibe lilifa lawo.+ 30 Kodwana nange angahlomi, ayame nani azokuhlala hlangana nani enarheni yeKanana.”

31 Amadodana kaGadi namadodana kaRubeni aphendula, athi: “Koke uJehova akukhulume eensebenzini zakho sizokwenza. 32 Sizokuhlomela ukuya epini, siyamele enarheni yeKanana+ phambi kwakaJehova kodwana ilifa esizolifumana lizokuba sehlangothineli leJordani.” 33 UMosi wanikela amadodana kaGadi, amadodana kaRubeni+ nengcenye yekoro kaManase+ indodana kaJosefa umbuso wekosi yama-Amori uSirhoni+ nombuso ka-Ogi+ ikosi yeBhatjhani. Wawanikela yoke inarha namadorobho ayibhodileko.

34 Amadodana kaGadi akha iDiboni,+ i-Atharothi,+ i-Aroweri,+ 35 i-Athirothi-Tjhofani, iJazeri,+ iJogibhoha,+ 36 iBhethe-Nimra+ neBhethe-Harana+ amadorobho avikelekileko. Akha neembaya zefuyo. 37 Amadodana kaRubeni akha iRhetjhibhoni,+ i-Eliyale,+ iKhiriyatayimu,+ 38 iNebo+ neBhali-Mewoni.+ Amagamawo atjhugululwa. Akha neSibhima. Athoma ukuthiya kabutjha amadorobho ebewawavuselele.

39 Amadodana kaMakiri+ indodana kaManase asahlela iGiliyadi ayithumba, aqotha nama-Amori ebewahlala kiyo. 40 UMosi wanikela uMakiri indodana kaManase iGiliyadi, wathoma ukuhlala kiyo.+ 41 UJayire indodana kaManase walwa nawo, wathumba imizi yamatende yama-Amori, asesifundeni seGiliyadi, wawabiza ngokuthi yiRhavothi-Jayire.*+ 42 UNobarhi wasahlela iKhenathi wayithumba, wathumba namadorobho ayibhodileko, wayibiza ngegama lakhe wathi yiNobarhi.

33 Nasi indlela abantu bakwa-Israyeli abakhamba ngayo nabaphuma enarheni yeGibhide+ ngamabuthwabo+ banqotjhiswa nguMosi no-Aroni.+ 2 UMosi alayelwe nguJehova watlola zoke iindawo abadlula kizo, nanzi iindawo abadlula kizo:+ 3 Ngelanga le-15 lenyanga yokuthoma,+ asuka eRamasese.+ Ngelangelo ngemva kwePhasika+ ama-Israyeli adlula ngesibindi phambi kwamaGibhide woke. 4 Ngesikhatheso, amaGibhide bewabulunga amazibulo woke uJehova awabulale hlangana nawo,+ uJehova bekajezisa abozimu babo.+

5 Ama-Israyeli asuka eRamasese ayokukampa eSukothi.+ 6 Asuka eSukothi ayokukampa e-Ethamu,+ esemaphethelweni wommango. 7 Asuka e-Ethamu abuyela nca ngePi-Harhirothi, eqalene neBhali-Tsefoni+ akampa phambi kweMigidoli.+ 8 Ngemva kwalokho, asuka ePi-Harhirothi ayama ilwandle+ adlulela emmangweni+ asolo akhamba amalanga amathathu emmangweni we-Ethamu+ ayokukampa eMara.+

9 Asuka eMara ayokukampa e-Elimu. E-Elimu bekunemithombo yamanzi eli-12 nemithi yesundu ema-70, akampa lapho.+ 10 Asuka e-Elimu ayokukampa hlanu kweLwandle eliBomvu. 11 Ngemva kwalokho, asuka eLwandle eliBomvu, ayokukampa emmangweni weSini.+ 12 Asuka emmangweni weSini ayokukampa eDofikha. 13 Asuka eDofikha ayokukampa e-Alutjha. 14 Ngemva kwalokho, asuka e-Alutjha ayokukampa eRefidimu,+ lapho bekunganamanzi wokusela. 15 Asuka eRefidimu ayokukampa emmangweni weSinayi.+

16 Asuka emmangweni weSinayi ayokukampa eKhibrothi-Hatava.+ 17 Asuka eKhibrothi-Hatava ayokukampa eRhatserothi.+ 18 Ngemva kwalokho, asuka eRhatserothi ayokukampa eRitima. 19 Asuka eRitima ayokukampa eRimoni-Peretsi. 20 Asuka eRimoni-Peretsi ayokukampa eLibhina. 21 Asuka eLibhina ayokukampa eRisa. 22 Asuka eRisa ayokukampa eKhehelata. 23 Asuka eKhehelata ayokukampa eNtabeni iTjheferi.

24 Asuka eNtabeni iTjheferi ayokukampa eRharada. 25 Asuka eRharada ayokukampa eMakhehelothi. 26 Asuka+ eMakhehelothi ayokukampa eTarhathi. 27 Ngemva kwalokho, asuka eTarhathi ayokukampa eTerarhi. 28 Asuka eTerarhi ayokukampa eMitikha. 29 Ngokukhamba kwesikhathi asuka eMitikha ayokukampa eRhatjhimona. 30 Asuka eRhatjhimona ayokukampa eMosera. 31 Asuka eMosera ayokukampa eBheni-Jakhani.+ 32 Asuka eBheni-Jakhani ayokukampa eRhori-Hagidigadi. 33 Asuka eRhori-Hagidigadi ayokukampa eJothibata.+ 34 Asuka eJothibata ayokukampa e-Abrona. 35 Asuka e-Abrona ayokukampa e-Etsiyoni-Gebere.+ 36 Asuka e-Etsiyoni-Gebere ayokukampa emmangweni weTsini,+ okuyiKhadetjhi.

37 Asuka eKhadetjhi ayokukampa eNtabeni iHori+ esemkhawulweni wenarha yakwa-Edomu. 38 U-Aroni umphristi wakhuphukela eNtabeni iHori ayalwe nguJehova, wahlongakalela lapho ngomnyaka wama-40 ngemva kobana ama-Israyeli asuke eGibhide, ngelanga lokuthoma enyangeni yesihlanu.+ 39 U-Aroni bekaneminyaka eli-123 nakahlongakalako eNtabeni iHori.

40 Ikosi ye-Aradi,+ emKanana ebeyihlala eNegebhi enarheni yeKanana, yezwa ukuthi ama-Israyeli ayeza.

41 Ngokukhamba kwesikhathi asuka entabeni iHori+ ayokukampa eTsalimona. 42 Ngemva kwalokho, asuka eTsalimona ayokukampa ePunoni. 43 Asuka ePunoni ayokukampa e-Obhothi.+ 44 Asuka e-Obhothi ayokukampa e-Iye-Habharimu emkhawulweni wakwaMowabi.+ 45 Ngokukhamba kwesikhathi asuka e-Iye ayokukampa eDibhoni-Gadi.+ 46 Asuka eDibhoni-Gadi ayokukampa e-Alimoni-Dibilatayimu. 47 Asuka e-Alimoni-Dibilatayimu ayokukampa eentabeni ze-Abarimu+ phambi kweNebo.+ 48 Ekugcineni, asuka eentabeni ze-Abarimu ayokukampa emmangweni othabaleleko wakwaMowabi hlanu kweJordani, eJerikho.+ 49 Araga nokukampa magega neJordani, kusukela eBhethe-Jetjhimothi bekuyokufika e-Abela-Hatjhithimu,+ emmangweni othabaleleko wakwaMowabi.

50 UJehova wakhuluma noMosi emmangweni othabaleleko wakwaMowabi hlanu kweJordani eJerikho, wathi: 51 “Khuluma nama-Israyeli uthi kiwo, ‘Niyama iJordani niya enarheni yeKanana.+ 52 Kufuze niqothe boke abantu abahlala enarheni le begodu nitjhabalalise woke amatjabo abaziweko,+ nazo zoke iinthombe zabo ezenziwe ngesimbi,+ nitjhabalalise neendawo zabo zoke eziphakamileko ezicwengileko.+ 53 Nizokuthatha inarha ibe lilifa lenu nihlale kiyo ngombana ngizoninikela yona ibe ngeyenu.+ 54 Kufuze nabe inarha ibe lilifa+ lemindenenu nisebenzisa ifumbe. Isiqhema esikhulu, kufuze nisandisele ilifa laso, esincani kufuze niphungule ilifa laso.+ Umuntu ngamunye uzokufumana ilifa lakhe lapho ifumbakhe iwele khona. Nizokufumana inarha bona ibe lilifa lenu ngokuya ngokweenkoro zaboyihlo.+

55 “‘Nange ningabaqothi abantu abasenarheni,+ labo enibavumela bona basale bazokuba njengento eniphandla emehlweni nanjengameva anihlaba eembanjeni zenu, bazonitshwenya enarheni enizokuhlala kiyo.+ 56 Lokho enginqophe ukukwenza kibo ngizokwenza kini.”’+

34 UJehova waraga wakhuluma noMosi wathi: 2 “Nikela ama-Israyeli iinqophiswezi: ‘Naningena enarheni yeKanana,+ imikhawulo yakhona elandelako izokuba lilifa lenu.+

3 “‘Umkhawulwenu ongesewula uzokusuka emmangweni weTsini hlanu kwe-Edomu, nomkhawulwenu ongesewula ongehlangothini elingepumalanga uzokusuka eLwandle leTswayi.*+ 4 Umkhawulwenu uzokudlula umkhuphukelo ongesewula we-Akhirabhimu+ urage uye eTsini, uyokuphelela esewula yeKhadetjhi-Bharineya.+ Ngemva kwalokho, uzokutjhinga eRhatsari-Adari uye e-Atsimoni.+ 5 Umkhawulo lo uzokutjhinga emRhobeni weGibhide bewuyokufika eLwandle eliKhulu.*+

6 “‘Umkhawulwenu ongetjingalanga kuzokuba liLwandle eliKhulu* nendawo emagega nelwandle. Lo kuzokuba mkhawulwenu wangetjingalanga.+

7 “‘Lo kuzokuba mkhawulwenu wangetlhagwini: Nizokutshwaya umkhawulwenu kusukela eLwandle eliKhulu ukuyokufika eNtabeni iHori. 8 Nizokutshwaya umkhawulo ukusuka eNtabeni iHori uyokufika eLebo-Rhamathi*+ umkhawulo lo uzokuphelela eTsedadi.+ 9 Umkhawulo lo uzokufika eZifroni uphelele eRhatseri-Enani.+ Lo kuzokuba mkhawulwenu wangetlhagwini.

10 “‘Nizokutshwaya umkhawulwenu ngepumalanga kusukela eRhatseri-Enani ukuyokufika eTjhefamu. 11 Umkhawulo uzokusuka eTjhefamu uye eRibhila epumalanga ye-Ayini begodu uzokwehla uyame umkhuphukelo ongepumalanga welwandle leKinerethi.*+ 12 Umkhawulo uzokuya eJordani uphelele eLwandle leTswayi.+ Le kuzokuba yinarhenu+ nemikhawulo eyibhodileko.’”

13 UMosi wayala ama-Israyeli wathi: “Le yinarha enizoyifumana ngefumbe bona ibe lilifa lenu+ njengombana uJehova ayala bona inikelwe iinkoro ezilithoba nesiquntu. 14 Ikoro yakwaRubeni, ikoro yakwaGadi nengcenye yekoro yakwaManase besele ziwathethe amafazo.+ 15 Iinkoro ezimbili nengcenye seziwathethe amafazo okuyindawo esesifundeni esingakwelinye ihlangothi leJordani hlanu kweJerikho nca ngepumalanga.”+

16 UJehova waraga wakhuluma noMosi, wathi: 17 Naka amagama wamadoda azonihlukanisela inarha bona ibe ngeyenu: U-Elazara+ umphristi noJotjhuwa+ indodana kaNuni. 18 Nizokuthatha ikosana yinye kwenye nenye ikoro bona inihlukanisele inarha ibe lilifa lenu.+ 19 Naka amagama wamakhosana lawo: ekorweni kaJuda+ nguKalebi+ indodana kaJefune; 20 ekorweni yamadodana kaSimiyoni+ nguTjhemuyeli indodana ka-Amihudi; 21 ekorweni kaBhenjamini+ ngu-Elidadi indodana kaKisiloni; 22 ekorweni yamadodana kaDani+ nguBhukhi indodana kaJogili; 23 emadodaneni kaJosefa,+ ekorweni yamadodana kaManase+ nguRhaniyeli indodana ka-Efodi; 24 ekorweni yamadodana ka-Efrayimu+ nguKhemuyeli indodana kaTjhifithani; 25 ekorweni yamadodana kaZebuloni+ ngu-Elitsafani, indodana kaParinakhi; 26 ekorweni yamadodana ka-Isakari+ nguPalithiyeli indodana ka-Azani; 27 ekorweni yamadodana ka-Atjheri+ ngu-Arhihudi indodana kaTjhelomi; 28 ekorweni yamadodana kaNafitali+ nguPedayeli indodana ka-Amihudi.” 29 Labo ngibo uJehova abayala bona bahlukanisele ama-Israyeli inarha, enarheni yeKanana.+

35 UJehova waraga wakhuluma noMosi emmangweni othabaleleko wakwaMowabi hlanu kweJordani+ eJerikho, wathi: 2 “Tjela ama-Israyeli bona kufuze anikele amaLevi amadorobho azowafumana elifeni lawo+ begodu awanikele namadlelo wefuywawo magega namadorobho.+ 3 AmaLevi azokuhlala emadorobheni lawo begodu ifuywawo izokudla emadlelweni lawo nezinye iinlwana zawo zizokuba lapho. 4 Amadlelo wedorobho enizowanikela amaLevi kufuze abe makhubhithi* ayi-1 000 ukusuka ebodeni, mahlangothi woke wedorobho. 5 Kufuze nimede ngaphandle kwedorobho amakhubhithi azii-2 000 ehlangothini elingepumalanga, amakhubhithi azii-2 000 ehlangothini elingesewula, amakhubhithi azii-2 000 ehlangothini elingetjingalanga namakhubhithi azii-2 000 ehlangothini langetlhagwini, idorobho libe phakathi. La madlelo wamadorobhawo.

6 “Amadorobho enizowanikela amaLevi kuzokuba madorobho asithandathu wobuphephelo,+ lapha umuntu obulele omunye angakahlosi azokubalekela khona,+ nizowanikela namanye amadorobho ama-42. 7 Nizokunikela amaLevi amadorobho ama-48 namadlelo wakhona.+ 8 Amadorobho enizowanikela wona avela elifeni lama-Israyeli.+ Esiqhemeni esikhulu nizokuthatha amanengi, esiqhemeni esincani nizokuthatha ambalwa.+ Isiqhema ngasinye sizokunikela amaLevi amanye wamadorobhawo ngokuya ngokwelifa elisifumeneko.”

9 UJehova waraga wakhuluma noMosi, wathi: 10 “Khuluma nama-Israyeli uthi kiwo, ‘Seniyama iJordani niya enarheni yeKanana.+ 11 Kufuze nikhethe amadorobho aseduze bona abe madorobho wobuphephelo, umuntu obulele omunye angakahlosi kufuze abalekele kiwo.+ 12 Amadorobho la azokuba ngewobuphephelo lokha umuntu nakabaleka umbuyiseleli weengazi+ ukuthi obulele angakahlosi angahlongakali bekube kulapho ahlulelwa phambi kwehlangano.+ 13 Amadorobho asithandathu enizowanikela wona azokusetjenziselwa lokho. 14 Nizowanikela amadorobho amathathu ngehlangothini leJordani+ namadorobho amathathu enarheni yeKanana+ bona abe madorobho wobuphephelo. 15 Amadorobho asithandathu la azokuba madorobho wobuphephelo kuma-Israyeli nebantwini abavela kwezinye iinarha+ abahlala hlangana nawo, bona nanyana ngubani obulele omunye angakahlosi abalekele kiwo.+

16 “‘Kodwana nange aphethe into eyenziwe ngesimbi ambethe ngayo ahlongakale, umbulali. Loyo obuleleko kufuze abulawe.+ 17 Nange aphethe ilitje elingabulala umuntu, amphose ngalo afe, umbulali. Obuleleko loyo naye kufuze abulawe. 18 Nange aphethe into eyenziwe ngesigodo engabulala umuntu, ambethe ngayo afe, umbulali. Obuleleko kufuze naye abulawe.

19 “‘Umbuyiseleli weengazi nguye ozokubulala umuntu obuleleko, nakahlangana naye uzombulala. 20 Nange asunduza umuntu ngebanga lokumhloya bekafe namkha amphose ngento anqophe ukumlimaza,+ 21 namkha ngebanga lokumhloya ambethe ngeguduva bekahlongakale, ombethileko uzokubulawa, umbulali. Lokha umbuyiseleli weengazi nakahlangana nombulali uzombulala.

22 “‘Nangabe lokhu kwenzeke ngokungakalindeleki, amsunduze ingasi ngebanga lokuthi uyamhloya namkha amphose ngento angakahlosi ukumlimaza,+ 23 namkha aphose ilitje angamboni limbethe belimbulale kodwana ingasi ngebanga lokuthi bekamhloya namkha bekafuna ukumlimaza, 24 ihlangano kufuze yahlulele hlangana nobethileko nombuyiseleli weengazi, ngokuvumelana nemithetho le.+ 25 Ihlangano kufuze iphephise umbulali kumbuyiseleli weengazi begodu imbuyisele edorobheni lobuphephelo abalekele kilo, kufuze ahlale lapho bekuhlongakale umphristi ophakemeko owazeswa ngamafutha acwengileko.+

26 “‘Kodwana nange umbulali aphuma emkhawulweni wedorobho lobuphephelo abalekele kilo 27 begodu umbuyiseleli weengazi amthole ngaphandle komkhawulo wedorobho lobuphephelo ambulale, umbuyiseleli weengazi angeze abe nomlandu. 28 Kufuze ahlale edorobheni lobuphephelo bekuhlongakale umphristi ophakemeko. Ngemva kokuhlongakala komphristi ophakemeko, obuleleko angabuyela enarheni yekhabo.+ 29 Le mithetho yokwahlulela ezokusebenza kizo zoke iinzukulwana eendaweni zoke enizokuhlala kizo.

30 “‘Nanyana ngubani obulala umuntu kufuze abulawe+ nange kunabofakazi ababonileko kodwana akukafuzi abulawe nange kunofakazi+ oyedwa. 31 Akukafuzi nithathe imali yokuhlenga umuntu obuleleko ofanelwe kukufa, ngombana kufuze abulawe.+ 32 Akukafuzi nithathe imali yokuhlenga umuntu obalekele edorobheni lobuphephelo, bona nimvumele abuyele enarhenakhe ngaphambi kokuhlongakala komphristi ophakemeko.

33 “‘Akukafuzi nisilaphaze inarha enihlala kiyo ngombana iingazi ziyayisilaphaza inarha,+ inarha angekhe yahlanjululwa* eengazini eziphalakele kiyo ngaphandle kokuhlanjululwa ngeengazi zaloyo oziphalazileko.+ 34 Ningasilaphazi inarha enihlala kiyo, okuyinarha nami engihlala kiyo; ngombana mina, Jehova, ngihlala hlangana nama-Israyeli.’”+

36 Iinhloko zemindeni yeenzukulwana zakaGiliyadi indodana kaMakiri+ indodana kaManase wemindeni yamadodana kaJosefa zatjhidela zakhuluma phambi kwakaMosi, amakhosana, iinhloko zemindeni yama-Israyeli. 2 Zathi: “UJehova uyale ikosethu ukuthi ihlukanise inarha ngefumbe+ bona ibe lilifa kuma-Israyeli. UJehova uyale ikosethu bona ithathe ilifa lakamfowethu uTselofirhadi linikelwe amadodakazakhe.+ 3 Nange atjhada namadoda wakwenye ikoro yama-Israyeli, ilifa labafazabo lizokuthathwa elifeni labobaba lingezelelwe ekorweni abazokwendela kiyo, okutjho bona lizokususwa elifeni lethu esilifumene ngefumbe. 4 Nakufika umnyaka weJubili+ wabantu bakwa-Israyeli, ilifa labafazelo lizokungezelelwa elifeni lekoro abazokwendela kiyo, lokho kutjho bona ilifa labo lizokuthathwa elifeni lekoro yabobaba.”

5 Nje-ke uMosi wayala ama-Israyeli ngesinqophiso sakaJehova, wathi: “Lokho okutjhiwo yikoro yamadodana kaJosefa kuliqiniso. 6 Lokhu ngilokho uJehova akutjhoko malungana namadodakazi kaTselofirhadi: ‘Angatjhada nananyana ngubani afuna ukutjhada naye. Kodwana kufuze atjhade nomuntu wekoro kayise. 7 Akunalifa lama-Israyeli okufuze lisuke kwenye ikoro liye kwenye, ama-Israyeli kufuze abambelele elifeni lekoro yabokhokho bawo. 8 Indodakazi enye nenye enelifa eenkorweni zama-Israyeli kufuze itjhade nesizukulwana esisekorweni kayise+ bona ama-Israyeli ahlale anelifa labokhokho bawo. 9 Akunalifa okufuze lisuke kwenye ikoro liye kwenye, iinkoro zama-Israyeli kufuze zibambelele elifeni lazo.’”

10 Amadodakazi kaTselofirhadi enza njengombana uJehova ayale uMosi.+ 11 Amadodakazi kaTselofirhadi, uMarhila, uTiritsa, uRhogila, uMilika noNowa+ atjhada namadodana wabafowabo bakayise. 12 Aba bafazi bamadoda avela emndenini kaManase indodana kaJosefa khona ilifa lawo lizokuhlala ekorweni kayise.

13 Le miyalo nemithetho uJehova ayinikela ama-Israyeli ngoMosi emmangweni othabaleleko wakwaMowabi hlanu kweJordani eJerikho.+