Ingcenye 3

Kusukela Ekutjhaphululweni EGibhide Ukuyokufika EKosini Yokuthoma Yama-Israyeli

UMosisi wakhupha ama-Israyeli eGibhide wawayisa eNtabeni iSinayi, lapho uZimu abanikela khona imithetho yakhe. Ngokukhamba kwesikhathi, uMosisi wathuma amadoda ayi-12 bona ayokuhlola inarha yeKanana. Kodwana ayi-10 abuya nombiko omumbi. Enza bona abantu bafune ukubuyela eGibhide. Ngokutlhoga kwawo ikholo, uZimu wenza bona ama-Israyeli azulazule emangweni iimnyaka eyi-40.

Emaswapheleni, uJoshuwa wakhethwa bonyana adose ama-Israyeli phambili awase enarheni yeKanana. Ukuwarhelebha bonyana athumbe inarha le, uJehova wenza iimangaliso. Wajamisa amanzi agelezako woMlambo iJordani, wabangela amaboda weJeriko bona agirike begodu nelanga bona lijame ilanga loke. Ngemva kweemnyaka emithandathu, bayithatha inarha yamaKanana.

Ama-Israyeli abuswa bahluleli iimnyaka eyi-356, ukuthoma ngoJoshuwa. Sifunda ngabanengi babo, kuhlanganise, uBharaki, uGidiyoni, uJafta, uSamsoni noSamuweli. Godu sifunda nangabafazi abanjengoRarhabi, uDibhora, uJayeli, uRude, uNawomi noDelila. Sekukoke, INGCENYE YESITHATHU ihlanganisa umlando weemnyaka eyi-396.