Ingcenye 2
Ungalifunda Bunjani Iqiniso NgoZimu?
1, 2. Ngisiphi isitjengiso esitjengisa ukutlhogeka kokukhetha endabeni yekolo?
SINGAMAZI bunjani uZimu? Kuyatlhogeka na bonyana sihlahlube zoke iimfundiso zeenkolo? Lokho ngeze kwenzeka. Namtjhana singakwenza lokho, sizakwazi njani bonyana ngiyiphi ifundiso elungileko?
2 Kwamambala, ekuqaleni yoke iimbono ehlukahlukeneko ngoZimu, kutlhogeka indlela yokwazi bonyana yini iqiniso, abantu abangavumelana ngalo. Ukutjengisa: Khesithi kunokuphikisana emakhethe ngobude betjhila. Umthengisi uthi itjhila limajarida amathathu. Kodwana umthengi ucabanga bonyana lingaphasi kwalokho. Ingararululwa njani indaba le? Ngokulinganisa itjhila ngetheyibhu.
3. Latlolelwani iBhayibhili?
3 Ikhona itheyibhu, izinga, lokukhetha eendabeni zekolo? Iye, yiBhayibhili. UZimu wenza kutlolwe iBhayibhili bonyana abantu kizo zoke iindawo bakwazi ukufunda iqiniso ngaye. Iingidi zeemBhayibhili zagadangiswa. Liloke, namtjhana ingcenye yalo yatjhugululwa ngeenlimi ezingaphezu kwezingu-2 100. Pheze boke abantu bangakwazi ukufunda iqiniso ngoZimu ngeenlimi zabo.
4. Ngikuphi ukwaziswa okuseBhayibhilini?
4 IBhayibhili sisipho esiqakathekileko esivela kuZimu. Ihlathulula izinto ebesingeze sazazi. Isitjela ngalabo abaphila endaweni yomoya. Imbula imicabango kaZimu, ubuntu, neminqopho yakhe. Isitjela ngendlela aberegelana ngayo nabantu eminyakeni engaphezu kweyikulungwana. Ikhuluma ngezinto ezizokwenzeka kwingomuso. Itjengisa indlela esingafumana ngayo ukuphila okungapheliko.
Okusenza Sikholelwe IBhayibhili
5. Ngisiphi isibonelo esitjengisa bonyana iBhayibhili iyavumelana nesayensi?
5 Kunamabanga amanengi angenza sikholelwe bonyana iBhayibhili kwamambala Lilizwi lakaZimu. Elinye ibanga kukobanyana iBhayibhili ivumelana nesayensi. Ekadeni abantu ephasini zombelele bebacabanga bonyana iphasi liyame entweni ethileko. Ngokwesibonelo, eTjhingalanga ye-Afrika abantu bakhe bakholelwa bonyana inyoka ifake iphasi hlangana nayo, ngaphezulu izisonge kayi-3 500 ngaphasi izisonge kayi-3 500. Nokho, ngokuvumelana nesayensi, umtloli weBhayibhili watlola eminyakeni engaphezu kwe-3 500 edlulileko bonyana uZimu “uphanyeke umhlaba phezu kweze.”—Jobhi 26:7.
6. Ngibuphi ubufakazi obukhulu khulu bokubanyana iBhayibhili ivela kuZimu?
6 Ubufakazi obukhulu khulu bokobanyana iBhayibhili kwamambala ivela kuZimu kunemba kwemininingwana yalo ekubikezeleni ingomuso. Ngokungafani nababikezeli betjhudu, uZimu wazi kwamambala ngengomuso; koke akutjhoko kuba liqiniso.
7. Ngiziphi ezinye iimporofido zeBhayibhili ezazaliseka esikhathini esidlulileko?
7 Amakhulu weemporofido zeBhayibhili zekadeni zazaliseka. Isibonelo, iBhayibhili latjho ngokunembileko kusasele iminyaka eyi-700, bonyana uJesu bekazokubelethelwa eBhetlehema, kwamambala kwabanjalo. (Mika 5:2; Matewu 2:3-9) Ukungezelela eemporofidweni ezikhuluma ngoJesu, iBhayibhili latjho bonyana uzakubelethwa litlawana begodu akghatjhelwe ngeensiliva eziyi-30. Nazo iimporofidwezi zaba liqiniso. Kwamambala akekho umuntu obengabikezela iintwezi!—Isaya 7:14; Zakariya 11:12, 13; Matewu 1:22, 23; 27:3-5.
8. Ngiziphi ezinye iimporofido zeBhayibhili ezizalisekako namhlanjesi, begodu zitjengisani?
8 Iimporofido ezinengi zeBhayibhili ziyazaliseka esikhathini sethu. Nanzi ezinye zazo:
● ‘Isitjhaba esinye sizakuvukela esinye, imibuso izakuvukelana; kuzakuba khona ukuzamazama kwephasi okusabekako, indlala nokugula kizo zoke iindawo.’—Luka 21:10, 11.
● Kuzaba “kukwanda kokukhohlakala.”—Matewu 24:12.
● “Ngemihla yokuphela . . . abantu bayorhubhela ngeenkhwanyeni zabo, bayorhuluphalela imali, . . . banyaze abazali babo, . . . nabangakgoni ukuzibamba, nabawalazelako, bangabi nandaba nalokho okucwengekileko, . . . nabazikganisako, nabathanda iinjabulo kunobanyana bathande uZimu.”—2 kuThimothi 3:1-5.
Awuvumi bonyana iintwezi zenzeka nje? Ukuba liqiniso nokunemba kweemporofido zeBhayibhili kutjengisa bonyana iBhayibhili akusiyo incwadi ejayelekileko. Lilizwi lakaZimu eliphefumulelweko!—2 kuThimothi 3:16.
Kheyatjhuguluka IBhayibhili?
9, 10. Yini etjengisa bonyana uZimu khenge avumele abantu batjhugulule iBhayibhili?
9 Mhlamunye gade umnikazi wefekthri begodu wenza irhelo lemilayo leemberegi zakho. Nangabe inaba latjhugulula lokho ogade ukutlolile, gade ungenza njani? Ubungeze walungisa okutjhugululiweko? Ngendlela efanako, uZimu akhenge avumele bonyana abantu batjhugulule iqiniso leLizwi lakhe, iBhayibhili.
10 Labo abalinga ukutjhugulula iimfundiso zeLizwi lakaZimu akhenge baphumelele. Nesimadanisa iBhayibhili esinayo namhlanje neyekadeni, ziyafana. Lokhu kutjengisa bonyana iBhayibhili khenge itjhuguluke ngokukhamba kweminyaka.
Amasiko Adluliselwa Ngomlomo Athembekile Na?
Amasiko wekolo ye-Afrika awanazo iincwadi ezicwengekileko zekadeni. Amasiko neembono ngoZimu adluliselwa ngomlomo kusuka kwesinye isizukulwana kuya kwesinye. Incwadi i-West African Traditional Religion ithi: “Ukwaziswa okudluliswa ngomlomo ngeze sathi kunembile. Eenkhathini ezinengi, endabeni leyo edluliswa ngomlomo kungase kungezelelwe okuthileko namtjhana kukhitjhwe, ingatjhintjhwa, namtjhana ihlanakelwe, yenziwe irhwala begodu ibe ngerarako, ngokujayelekileko kuba budisi ukuhlukanisa amala neqiniso.”
[Umbuzo Yesifundo]
Ibhoksi: Ithini enye incwadi ngokuthembeka kwamasiko adluliselwa ngomlomo?
[Imithombo yesithombe ekhasini 6]
Drought victims: UN PHOTO 164671/JOHN ISAAC; soldier: United Nations/Photo by Yutaka Nagata