Ingcenye 1
Zoke Iinkolo Zifundisa Iqiniso?
1. Ngiziphi ezinye zeenkolelo ezijayelekileko e-Afrika?
PHEZE boke abantu e-Afrika bayavuma bonyana kuqakathekile ukukhulekela uZimu. Kodwana, kuncani abavumelana ngakho endleleni yokumkhulekela. Abanye bakhulekela endaweni yamaSulumani, kanti abanye bayaphahla. Kodwana abanye basaya ekeregeni. Kungaba kumbi ukudlumbanyana kuneenkolo eentathu kwaphela e-Afrika. Phakathi kwamaSulumani kunemithetho neenkolelo ezihlukileko. Amasiko wekolo ayahluka eendaweni ngeendawo. Phakathi kweenkerege ezizibiza bonyana ngezobuKrestu, kunokutjharagana okunengi. Ngaphandle kwalezi ezaziwako, kuneengidi zeenkerege ezizijameleko e-Afrika zombelele.
Ikolo Yethu Kufuneka Isekelwe Eqinisweni
2. (a) Ngokujayelekileko yini ekhetha ikolo yomuntu? (b) Yini engatjengisi bonyana ikolo yomuntu iyamthabisa uZimu?
2 Kubayini abantu bakhuleka ngendlela abakhuleka ngayo? Abantu abanengi bamukela ikolo yababelethi babo. Indlela abantu abenza ngayo ekolweni namhlanje ithonywe zizehlakalo zekadeni. Incwadi The Africans—A Triple Heritage ithi: “UbuSulumani barhatjheka etlhagwini yeSahara ngokuthumba, . . . nobuKrestu barhatjheka esewula yeSahara ngendlela efanako. Nangabe etlhagwini yeSahara ubuSulumani barhatjheka ngokuthuswa ngesabula, esewula yeSahara, ubuKrestu barhatjheka ngokuthuswa ngesigidi.” Namtjhana kunjalo, inengi lethu likholelwa bonyana ikolo yethu iyamthabisa uZimu. Kodwana asizukuthi ikolo ilungile ngombana ababelethi bethu bakiyo namtjhana abokhokho bethu bayikatelelwa mamandla athileko avela ngaphandle.
3-5. Ngisiphi isitjengiso esisirhelebha sibone bonyana akusizo zoke iinkolo ezifundisa iqiniso?
3 Ngesikhathi iinkolo zithi zinikela indlela engathenjwa yokukhonza uZimu, iimbono yazo iyahluka. Bafundisa izinto ezinengi ngalokho uZimu angikho nangalokho akulindele kithi. Cabanga ngalokhu: Mhlamunye ukereye umberego ekhampanini ekulu. Ngelanga lakho lokuthoma, ufumana bonyana umphathi uselifini. Ubuza iimberegi eentathu bonyana mdele wenzeni. Isiberegi sokuthoma sithi umphathi ufuna bonyana uthanyele phasi. Sesibili sithi kufuneka upende umakhiwo. Sesithathu sikutjela bonyana ukhambise iposo.
4 Ngokulandelako, ubuza iimberegi ngokuphathelene nomphathi. Isiberegi sokuthoma sithi umphathi mude, mutjha, begodu unelunya. Sesibili sithi mfitjhani, mdala, unomusa. Sesithathu sikutjela bonyana umphathi akusuye umuntu wembaji—umphathi mumuntu wengubo. Ngokulindelekileko, uphetha ngokuthi iimberegi eentathu azikhulumi iqiniso. Nangabe ufuna ukubulunga umberegwakho omutjha, mhlamunye uzokwenza iphenyisiso lokufumana lokho umphathi angikho nangalokho umphathi afuna ukwenze.
5 Kungokufanako nangekolo. Njengombana kuneembono eminengi kangaka ngalokho uZimu angikho nangalokho akufunako kithi, kufuneka kwamambala senze indlela yethu yokumkhulekela ivumelane neqiniso. Kodwana singalifunda bunjani iqiniso ngoZimu?