Ingcenye 8
Tjhiya Ikolo Yamanga; Ngena Ekolweni Yeqiniso
1. Malungana nokukhulekela, yini abantu abaqalene nayo namhlanjesi?
UJESU wathi: “Loyo ongasingewami ngiloyo orarana nami.” (Matewu 12:30) Sisehlangothini lakaJehova namtjhana lakaSathana. Abantu abanengi badlumbanyana baberegela uZimu ngendlela ayimukelako, kodwana iBhayibhili ithi uSathana “umkhohlisi wephasi loke.” (ISambulo 12:9) Iingidi zabantu zidlumbanyana zikhulekela uZimu, kodwana kuhle kuhle ziberegela uSathana! Abantu namhlanje baqalene nokukhetha: Bangakhetha ukuberegela uJehova, “uNkulunkulu othembekayo,” namtjhana uSathana ‘onguyise lamanga.’—AmaRhalani 31:5; Jwanisi 8:44.
Zitjhaphulule Ekolweni Yamanga
2. Ngiyiphi enye indlela uSathana alinga ngayo ukuvimbela abantu ekukhulekeleni uJehova?
2 Ukwenza isiqunto sokuberegela uJehova kukuhlakanipha, okuletha ukwamukelwa nguZimu. Kodwana uSathana akathabi nganoma ngubani oberegela uZimu; ubabangela imiraro abenza njalo. Enye indlela akwenza ngakho lokhu, kubangela bonyana abanye bakuhleke namtjhana bakuphikise, kuhlanganise ngitjho abangani namalungu womndeni. UJesu wayelelisa: “Izitha zomuntu ezikulu kuzaba ngebekhabo.”—Matewu 10:36.
3. Nangabe umndeni wakho nabangani baphikisa ukukhulekela kwakho uZimu, khuyini ozokwenza?
3 Nakungenzeka kuwe lokho, ungenza njani? Abantu abanengi bayazi bonyana ukukhulekela kwabo akukalungi, kodwana bayazaza ukuzitjhaphulula kikho. Bacabanga bonyana kuzokuba ukungathembeki ebantwini bekhabo ukwenza njalo. Into ezwakalako leyo? Newungakereya bonyana omunye ekhenu uberegisa iindakamizwa eziyingozi, ungeze wamkhalima umtjele bona iindakamizwa zizamlimaza? Ungahlanganyela naye ekuberegiseni iindakamizwa?
4. UJoshuwa wathini kuma-Israyeli malungana nokukhulekela esikhathini sakhe?
4 UJoshuwa wakhuthaza ama-Israyeli bona alise yoke imikgwa emimbi yekolo namasiko waboyisemkhulu. Wathi: “Manje yesabani uJehova, nimkhonze ngobuqotho nangeqiniso, nisuse onkulunkulu ababakhonzayo oyihlo phesheya koMfula naseGibithe, nimkhonze uJehova.” (Joshuwa 24:14) UJehova wambusisa uJoshuwa ngombana gade athembekile kuye. Nathi nasithembekileko uJehova uzositjhudubaza.—2 Samuweli 22:26.
Lahla Izinto Ogade Uziberegisela Ukukhulekela Kwamanga
5. Kubayini kufuneka silahle izinto zemilingo?
5 Ukutjhaphuluka ekolweni yamanga kutjho bonyana silahle zoke izinto zemilingo okungenzeka sinazo, njengezinto esiziberegisela ukubikezela ingomuso, iingomma, idzilamnwana yokwenza imilingo, amabhengela, nezinye izinto ezinjengalezi. Lokhu kuqakathekile ngombana kutjengisa bona sithembele kuJehova ngokuzeleko.
6. AmaKrestu wokuthoma azenzani iincwadi zawo zamasilamosi?
6 Tjheja bonyana amaKrestu wokuthoma enzani lapho athatha isiqunto sokuba sekolweni yeqiniso. IBhayibhili ithi: “Abanengi abafunda amasilamosi baletha iincwadi zabo ndawonye bazitjhisa phambi kwabantu.”—IZenzo 19:19.
7. Nasitshwenywa madimoni singenzani?
7 Lapho abanye egade baloya, benza nemilingo, lapho bathoma ukufunda ngoJehova batshwenywa madimoni. Nakungenzeka kuwe lokhu, biza uJehova ngomthandazo ozwakalako, uberegise igama lakhe. Uzakurhelebha.—Iziyema 18:10; Jakobosi 4:7.
8. AmaKrestu akuqala njani ukuberegisa abosingazimu, imilingo, neenthombe ekukhulekeleni kwabo?
8 Labo abafuna ukuberegela uJehova akufuneki babulunge namtjhana baberegise abosingazimu, imifanekiso, iinthombe, ngombana lokho yingcenye yokukhulekela kwamala. AmaKrestu weqiniso ‘aphila ngokukholwa, ingasi ngokubona.’ (2 kwebeKorinte 5:7) Ahlonipha umthetho kaZimu obakhandela ekuberegiseni imifanekiso ekukhulekeleni kwabo.—Eksodosi 20:4, 5.
Hlanganyela Nabantu BakaJehova
9. IBhayibhili inikela siphi isiluleko ngokuba ngabahlakaniphileko?
9 IBhayibhili ithi: “Ohamba nabahlakaniphileyo uyakuhlakanipha.” (Iziyema 13:20) Nangabe sifuna ukuhlakanipha, kutlhogeka sikhambe namtjhana sizihlanganise naBofakazi bakaJehova. Bababantu abakhamba endleleni eyisa ekuphileni.—Matewu 7:14.
10. ABofakazi bakaJehova bangakurhelebha bunjani bonyana uberegele uZimu?
10 ABofakazi babatjheja kwamambala abantu. Umberegwabo kurhelebha abaneenhliziyo ezithembekileko bonyana bazwisise iqiniso leBhayibhili begodu bafumane ukuphila okungapheliko. Bangakurhelebha ngokufunda nawe iBhayibhili simahla. Bangaphendula iimbuzo yakho bebakutjengise bonyana ungaliberegisa bunjani ilwazi leBhayibhili ekuphileni kwakho.—Jwanisi 17:3.
11. Izakurhelebha njani imihlangano yobuKrestu?
11 Emihlanganweni yabo, kanengi eba seWolo loMbuso, ungafunda okunengi ngeendlela zakaJehova. Itjhisakalo yakho yokuragelisela phambili ikolo yeqiniso izokuqiniswa. Nawe bazakubandula ukwazi ukurhelebha abanye bafunde iqiniso leBhayibhili.—KumaHebheru 10:24, 25.
12. Umthandazo ungakurhelebha njani ukhulekele uZimu?
12 Njengombana ufunda okungezelelekileko ngentando kaJehova neenhloso zakhe, uzozithabela khulu iindlela zakhe zethando. Itjhisakalelo yakho yokwenza okumthabisako izokukhula ukwazi nokubalekela lokho okungamthabisiko. Khumbula bonyana ungatjhidela kuZimu ngomthandazo umbawe bona akurhelebhe wenze okulungileko ubalekele okungakalungi.—1 kwebeKorinte 6:9, 10; KwebeFilipi 4:6.
13. Ungayithabisa njani ihliziyo kaJehova?
13 Ngokukhamba kwesikhathi, njengombana ukhula emoyeni, ngokungangabazeki uzokubona kutlhogeka bonyana ube nguFakazi kaJehova ozinikezeleko. Ngokuzihlanganisa nabantu bakaJehova, uzokuthabisa ihliziywakhe. (Iziyema 27:11) Uzokuba hlangana nabantu abathabileko uZimu athi ngabo: “Ngohlala nabo ngikhambe hlangana nabo ngibe nguZimu wabo, bona babe sitjhaba sami.”—2 kwebeKorinte 6:16.
[Ibhoksi/Isithombe ekhasini 25]
Iimfundiso Zekolo—Iqiniso Namanga
● UZiquntathu: Iinkolo ezinengi zifundisa bona uZimu nguZiquntathu. Zithi “uBaba nguZimu, iNdodana [uJesu] nguZimu, uMoya Ocwengekileko nguZimu, kodwana akusibo aboZimu abathathu nguZimu oyedwa.”
IBhayibhili ayiliphathi nokuliphatha laka “Ziquntathu,” namtjhana ifundise bonyana uJehova ubabantu abathathu koyedwa. UJehova yedwa nguZimu. Yokuthoma kwebeKorinte 8:6 ithi: “Kodwana thina sinoZimu oyedwa, uBaba.” UJehova nguye Yedwa Ophakamileko. UJesu, akasuye uZimu, kodwana “yiNdodana kaZimu.” (1 Jwanisi 4:15) Ngokufanako, umoya ocwengekileko awusuye uZimu. Abewusuye ngitjho nomuntu. Mamandla kaZimu aberegako.—IZenzo 1:8; Kwebe-Efesu 5:18.
● Umphefumulo: Iinkolo ezinengi zifundisa bonyana umphefumulo yinto engaphakathi emntwini engeze yafa. IBhayibhili ifundisa bonyana umphefumulo mumuntu, aloke umuntu uyahlongakala.—Genesisi 2:7; Ezekiyeli 18:4.
● Isirhogo somlilo: Iinkolo zifundisa bona imiphefumulo yabambi itshwenywa unomphelo esirhogweni. IBhayibhili ithi abahlongakeleko “abazi-lutho.” (Umtjhumayeli 9:5) IBhayibhili godu ifundisa bonyana “uZimu ulithando.” (1 Jwanisi 4:8) UJehova, uZimu onethando, ngeze atjhisa abanye ngomlilo.
[Umbuzo Yesifundo]
Ibhoksi: IBhayibhili ifundisani malungana noZiquntathu, umphefumulo, nesirhogo somlilo?
Ngatjhaphuluka Emadimonini
Ngobunye ubusuku sisalele, ngezwa ilizwi libiza ibizo lami kathathu. Ngabona isilinghi ihlukana phakathi, ngabona umlilo onjengebholo uwela emathunjenami. Nokho, umyenami khenge azibone iintwezi. Kodwana mina ngezwa ukutjhisa okwahlala iinyanga ezimbalwa.
Ngemva kweenyanga ezisithandathu, langibiza godu ilizwi. Msinyana, kwaba ngasuthi indlu itjhingele ngemanzini. Inyoka ekulu yaphuma ngemanzini ikhamba kabuthaka yazitantela esandleni sami. Ngalinga ukuyithintitha kodwana kwabhala. Ngathukwa ngahlengezela. Ngemva kwalokho inyoka namanzi kwanyamalala, ngaphoselwa phasi kabuhlungu. Ngatsirimezeka ama-awa ambalwa. Ilizwi langitjela bonyana ngibuyele etempeleni lendawo lomoya opholisako. Nengiwubuza ibizo lawo umoya lo, wangipha ibizo elitjho “ukurega kodwana ungabi namntwana.” Wangithembisa ukungenza ngirege ngamandla wokupholisa.
Abantu abagulako beza kimi bavela eduze nakude. Ngaphambi kokufika emzinami, gade ngibabona esibonibonini sami esikhethekileko. Nafika kimi, gade ngibethanisa intende yesandla sakhe neyesami, khonokho ngimbulelwe ubulwelwe namtjhana umraro wakhe kuhlanganise nepengu. Umoya lo gade ungitjela nokobanyana ngibabhadelise malini abantwaba.
Imali nezipho gade kuthuluka njengombana abantu gade balatjhwa ngokuphumelelako. Ngaba “yinjinga,” kodwana ngafunda nokuthi gade kutjho ukuthini “ukungabi namntwana.” Soke isikhathi nengibeletha umntwana, amlamako gade ahlongakala. Bekungibangela amatlhuwo. Phakathi neminyaka eyi 12 egade ngiberegela ngawo umoya lo, ngahlongakalelwa bantwana abathandathu.
Ngathoma ukuthandazela irhelebho lakaZimu. Ngathandaza ngetjisakalo. Langelinye aBofakazi bakaJehova bakokoda kwami. Namtjhana ngokujayelekileko gade ngibaqotha, mhlokho ngabalalela. Ekulumiswaneni eyalandela, ngafunda bona gade ngikhulekela amadimoni! Ngazitjela bonyana ngiyawalisa amadimoni.
Nengiwutjela lokho umoya lo, wangikhalimela ngesiqunto sami. Namtjhana kunjalo, ngathi: “Ngiqedile ngawe.”
Ngatjhisa zoke izinto ebengiziberegisela ukuraya. Ngafunda iBhayibhili naBofakazi, ngaba inceku kaJehova, ngabhabhadiswa ngo-1973. Nje, nginabantwana abahlanu abaphilileko. Umyenami naye wabhabhadiswa.—Njengoba ilandiswa nguJosephine Ikezu.
[Umbuzo Yesifundo]
Ibhoksi: Omunye umfazi watjhaphuluka njani emadimonini?
[Iinthombe ekhasini 26]
Ungakuragekisela bunjani phambili ukukhulekela kweqiniso?