Ingcenye 4

UZimu Wenza Isivumelwano No-Abrahama

Ngekholo, u-Abrahama ulalela uZimu, begodu uJehova uthembisa ukumtjhudubaza andise inzalo yakhe

SELE kudlule iminyaka eyi-350 kusukela kuKhukhulamungu wesikhathi sakaNowa. U-Abrahama wekadeni bekaphila edorobheni eliregileko le-Uri, namhlanjesi elaziwa bona yi-Iraq. U-Abrahama bekayindoda enekholo elikhulu. Kodwana nje ikholo lakhe liyalingwa.

UJehova watjela u-Abrahama bona atjhiye inarha abelethelwe kiyo begodu aye enarhani angayaziko, eyaba yiKanana. U-Abrahama walalela ngaphandle kokuzaza. Wathatha koke kwakhe, kuhlanganisa umkakhe uSara, nomzukulwanakhe uLoti, begodu ngemva kwekhambo elide bahlala ematendeni eKanana. Esivumelwaneni Asenza no-Abrahama, uJehova wathembisa bona Uzokuveza istjhaba esikhulu ngaye, bona yoke imindeni yephasi izokutjhudubazwa ngaye, begodu nokuthi inzalo yakhe izokuhlala enarheni yeKanana.

U-Abrahama noLoti baphumelela, baba nomhlambi omkhulu wezimvu neenkomo. Angasimarhamaru, u-Abrahama wavumela uLoti bona akhethe indawo ayifunako. ULoti wakhetha isifunda esinothileko seMlanjeni weJordani begodu wahlala hlanu kwedorobha leSodoma. Kodwana amadoda weSodoma, gade anemikghwa emimbi—azizoni ezimbi khulu kuJehova.

Ngokukhamba kwesikhathi uJehova uZimu waqinisekisa u-Abrahama bona inzalo yakhe beyizokuba yinengi njengeenkwekwezi zezulwini. U-Abrahama waba nekholo esithembisweneso. Kodwana, umfazi ka-Abrahama othandekako uSara gade ayinyumba. Lokha u-Abrahama aneminyaka eyi-99 ubudala begodu uSara abandamela eminyakeni eyi-90, uZimu watjela u-Abrahama bona yena noSara bazokuba nendodana. Njengombana uZimu atjho, uSara wabeletha u-Isaka. U-Abrahama waba nabanye abantwana, kodwana uMtjhaphululi owathenjiswa e-Edeni bekazokuvela ngo-Isaka.

Ngesikhatheso, uLoti nomndenakhe bebahlala hlanu kweSodoma, kodwana uLoti olungileko khenge afane nabantu bedorobheni leSodoma abaziphatha kumbi. Ngesikhathi uJehova enza isiqunto sokwahlulela iSodoma, wathumela iingilozi zakhe bona ziyokuyelelisa uLoti ngokutjhatjalaliswa kwalo okuzokufika msinyana. Iingilozi zabawa uLoti nomndenakhe bona babaleke eSodoma begodu bangaqali emva. UZimu watjhabalalisa iSodoma begodu nedorobha elizele ubumbi elingumakhelwane iGomora, nabo boke abantu bakhona. ULoti namadodakazi wakhe amabili babaleka. Kodwana umkaLoti waqalemva, mhlomunye akhanukela izinto azitjhiye ngemva. Ngokungalaleli kwakho-khu, wafa.

—Isekelwe kuGenesisi 11:10–19:38.

◼ Kubayini u-Abrahama afudukela eKanana?

◼ Ngisiphi isivumelwano uJehova asenza no-Abrahama?

◼ Kubayini uJehova atjhabalalisa iSodoma neGomora?

[Ibhoksi elisekhasini 7]

UZIMU OWENZA IIMVUMELWANO

Ngeenkathi zeBhayibhili, isivumelwano gade kusibopho esingokomthetho. Ngerhelo leemvumelwano, ezaba ziinthembiso eziqinisekisiweko, kancani kancani uJehova waveza indlela umqopho wakhe ozokuzaliseka ngayo malungana uMtjhaphululi owathenjiswa e-Edeni. Isivumelwano esenziwa no-Abrahama satjengisa bona Loyo owathenjiswako bekazokuvela enzalweni ka-Abrahama. Ngokukhamba kwesikhathi iimvumelwanezi zizosirhelebha ukuveza bona ngubani Loyo othenjesiweko.

[Itjhadi ekhasini 7]

Genesisi ●

Eksodosi

Lefitikosi

Numeri

Duteronomi

Joshuwa

Abahluleli

Rude

1 Samuweli

2 Samuweli

1 Amakhosi

2 Amakhosi

1 Imilando

2 Imilando

Ezra

Nehemiya

Esta

Jobhi

AmaRhalani

Iziyema

Umtjhumayeli

Irhubo lamarhubo

Isaya

Jeremiya

Isililo

Ezekiyeli

Danyela

Hosiya

Juweli

Amosi

Obadiya

Jona

Mika

Nahumi

Habakuki

Zefaniya

Hagayi

Zakariya

Malaki

Matewu

Markosi

Luka

Jwanisi

IZenzo

KwebeRoma

1 KwebeKorinte

2 KwebeKorinte

KwebeGalatiya

Kwebe-Efesu

KwebeFilipi

KwebeKholose

1 KwebeTesalonika

2 KwebeTesalonika

1 kuThimothi

2 kuThimothi

KuTitosi

KuFilimoni

KumaHebheru

KaJakobosi

1 KaPitrosi

2 KaPitrosi

1 KaJwanisi

2 KaJwanisi

3 KaJwanisi

KaJuda

ISambulo