Ingcenye 6
UJobhi Ubulunga Ukudzimelela Kwakhe KuZimu
USathana uthi uJobhi ngeze adzimelela kuZimu, kodwana uJobhi uhlala athembekile kuJehova
UKHONA umuntu ongahlala athembekile kuZimu na, namtjhana alingwa kangangani nakungukuthi, ukuthembeka kwakhe ngeze kwamtjhudubaza ngoburego? Umbuzo lo, wabuzwa malungana nendoda enguJobhi begodu waphendulwa.
UJobhi isihlobo saka-Abrahama, bekahlala endaweni nje ebizwa bona yi-Arabia, kanti ama-Israyeli gade asese seGibhide. Ngesikhatheso, iingilozi ezulwini zahlangana phambi kwakaZimu, begodu noSathana ohlubukako gade akhona. Aphambi kwazo zoke iingilozi zakhe, uJehova watjengisa indlela ayithemba ngayo incekwakhe ethembekileko uJobhi. UJehova wathi akekho umuntu ogade athembeke njengoJobhi. Kodwana uSathana wathi uJobhi bekarabhela uZimu kwaphela ngombana amtjhudubaza begodu amvikela. USathana wathi uJobhi nekangathathelwa koke anakho uzokutjhiya uZimu.
UZimu wavumela bona uSathana athathe uburego bakaJobhi, abantwabakhe, begodu wambangela bona agule. Njengombana uJobhi gade angazi bona nguSathana obangela ukulingwa kwakhe, akhenge azwisise bonyana kubayini uZimu amvumela bona aqalane nokulingokhu. Namtjhana kunjalo, uJobhi khenge amtjhiye uZimu.
UJobhi wakweriyelwa bangani abathathu bamala. Iindaba ezinengi ezalandela ezitlolwe encwadini kaJobhi zitjengisa bona, amadoda la, ngendlela engakalungi alinga ukwenza uJobhi acabange bona uZimu umbethela izono zakhe azenze ngerhorhomejeni. Begodu bathi uZimu ayikho into emthabisako eencekwini zakhe begodu akazithembi. UJobhi khenge awalalele amangabo. Ngesibindi, uJobhi wathi uzokuthembeka bekube sekufeni!
Kodwana uJobhi wenza iphoso ngokuzibona alunge khulu. Isokana elingu-Elihu ngemva kokulalela yoke into egadebayitjho, lathoma ukukhuluma. U-Elihu wasola uJobhi ngokubhalelwa ukutjengisa bonyana ukulwelwa kobukhosi bakaJehova uZimu kuqakatheke khulu ukudlula ukulwela nanyana ngimuphi umuntu. Ngamandla godu u-Elihu wakhalimela abangani bakaJobhi bamala.
UJehova uZimu walungisa ukucabanga kwakaJobhi. Akhomba endalweni yakhe ehle, uJehova wafundisa uJobhi bona umuntu mncani kangangani nakamadaniswa nobukhulu bakaZimu. Ngokuzithoba uJobhi wakwamukela ukulungiswa okuvela kuZimu. Ngombana uJehova “unesisa nesirhawu,” wamphilisa godu uJobhi, wambuyisela uburego bakhe ngokuphindwe kabili, begodu wamtjhudubaza yena nabantwabakhe abalitjhumi. (Jakobosi 5:11) Ngokudzimelela kuJehova, naqalene nokulingwa okukhulu, uJobhi waphumelela ukuphendula iselele eyabekwa nguSathana yokobana, abantu ngeze bahlala bathembekile kuZimu nebalingwako.
—Isekelwe encwadini kaJobhi.
◼ Ngiyiphi iselele uSathana ayiphakamisa malungana noJobhi?
◼ Ukudzimelela kwakaJobhi kuJehova kwaba namiphi iimphumela?
[Ibhoksi elisekhasini 9]
INDABA EKULU
Namtjhana uJobhi bekayindoda engasolekiko nesaba uZimu ephasini ngesikhatheso—uSathana wathi ukhonza uJehova uZimu ngombana amarhamaru. Ngokutjho njalo, uSathana bekatjho bona boke abantu neengilozi bakhonza uZimu ngombana bamarhamaru. Ngalokho waphakamisa umbuzo wokobana umuntu ngeze adzimelela kuJehova. Umbuzo lo, ukhambisana naloyo owaphakamiswa nguSathana e-Edeni, indaba yokobana uJehova akabusi ngendlela ehle nelungileko. Incwadi kaJobhi itjengisa bona abantu neengilozi, bangahlanganyela ekulweleni ubukhosi bakaJehova ngokubulunga ukudzimelela kwabo Kuye.
[Itjhadi ekhasini 9]
Genesisi
Eksodosi
Lefitikosi
Numeri
Duteronomi
Joshuwa
Abahluleli
Rude
1 Samuweli
2 Samuweli
1 Amakhosi
2 Amakhosi
1 Imilando
2 Imilando
Ezra
Nehemiya
Esta
Jobhi ●
AmaRhalani
Iziyema
Umtjhumayeli
Irhubo lamarhubo
Isaya
Jeremiya
Isililo
Ezekiyeli
Danyela
Hosiya
Juweli
Amosi
Obadiya
Jona
Mika
Nahumi
Habakuki
Zefaniya
Hagayi
Zakariya
Malaki
Matewu
Markosi
Luka
Jwanisi
IZenzo
KwebeRoma
1 KwebeKorinte
2 KwebeKorinte
KwebeGalatiya
Kwebe-Efesu
KwebeFilipi
KwebeKholose
1 KwebeTesalonika
2 KwebeTesalonika
1 kuThimothi
2 kuThimothi
KuTitosi
KuFilimoni
KumaHebheru
KaJakobosi
1 KaPitrosi
2 KaPitrosi
1 KaJwanisi
2 KaJwanisi
3 KaJwanisi
KaJuda
ISambulo