Ingcenye 7

UZimu Utjhaphulula Abantwana Bakwa-Israyeli

UJehova ubetha iGibhide ngeembetho ezilitjhumi, begodu abantwana bakwa-Israyeli bayaphuma enarheni yeGibhide, badoswa nguMosisi. UZimu unikela ama-Israyeli uMlayo ngoMosisi

ABANTWANA bakwa-Israyeli bahlala eGibhide iminyaka eminengi, izinto bezibakhambela kuhle begodu banda. Kodwana kwaba neKosi etja. Umbusi lo gade angamazi uJosefa. Umgandeleli okhohlakeleko lo, bekanevalo lokobana ama-Israyeli ayanda, wawenza iingqila begodu walayela bona boke abantwana babesana ababelethwako baphoswe ngeMlanjeni iNayile. Kodwana omunye umma onesibindi wavikela isana lakhe lomsana, walifihla emantjini walifaka hlangana nomhlanga. Indodakazi kaFaro yafumana umntwana lo, yamthiya bona nguMosisi, begodu yamkhulisela ebukhosini beGibhide.

Lokha uMosisi aneminyaka eyi-40 ubudala, wangena emrarweni avikela isigqila esim-Israyeli enduneni yomberego emGibhide. UMosisi wabalekela enarheni ekude, lapho aphila khona abhacile. Nasele uMosisi aneminyaka eyi-80, uJehova wamkhetha bona akhiphe ama-Israyeli ebugqileni. UJehova wabuyisela uMosisi eGibhide bona ayokuvela phambi kwakaFaro begodu ayomtjela bona atjhaphulule abantwana bakaZimu.

UFaro ngekani wabhala. UZimu watshwenya iGibhide ngeembetho ezilitjhumi. Isikhathi esinye nesinye lokha uMosisi nakaya kuFaro amnikela ithuba lokuzivikela esibethweni esilandelako, uFaro wabanekani angafuni ukwenza lokho egade kutjhiwo nguMosisi noZimakhe uJehova. Emaswapheleni, isibetho setjhumi sabulala woke amazibulo weGibhide—ngaphandle kwemindeni eyalalela uJehova ngokokobana batjhatjhe amagoseni wabo ngeengazi zomhlatjelo wewundlu. Ingilozi kaZimu ebezokutjhabalalisa yayidlula imizi leyo. Ngemva kwalokho ama-Israyeli agidinga ukutjhaphululwa kwawo okurarako ngokwenza umnyanya waqobe mnyaka obizwa bonyana yiPhasika.

Ngemva kokufa kwezibulo lakhe lomsana, uFaro watjela uMosisi nawo woke ama-Israyeli bona bakhambe eGibhide. Msinyana balungiselelela ukukhamba ngaso sona isikhatheso. Kodwana ngaphambi kokobana ama-Israyeli sele akhambe ibanga elide, uFaro watjhugulula umkhumbulwakhe. Wawagijimisa ama-Israyeli anamabutho wakhe nenkoloyana zepi. Ama-Israyeli abonakala avimbeke eLwandle eliBomvu. Bekubonakala kwanga ilanga besele libatjhingele, kodwana uJehova wabatjhaphulula. UJehova wahlukanisa iLwandle eliBomvu, avumela ama-Israyeli bona adlule ehlabathini yelwandle eyomileko, hlangana namanzi ajame saboda ngapha nangapha! Lokha amaGibhide angena emva kwabo ngokurhaba, uZimu wavumela amanzi bona abuye godu abulala uFaro nebutho lakhe.

Ngokukhamba kwesikhathi, ama-Israyeli asahlala ngeNtabeni yeSinayi, uJehova wenza nawo isivumelwano. Aberegisa uMosisi njengoMlamuleli, uZimu wanikela ama-Israyeli imithetho, bona ibadose phambili begodu ibavikele pheze kizo zoke iingcenye zokuphila. Ama-Israyeli nakazokuragela phambili amukela ukubusa kwakaZimu ngokuthembeka, uJehova bekazokuba nawo begodu bekazowenza bona abesibusiso kwabanye.

Kodwana kizo zoke izinto uZimu abenzele zona, ama-Israyeli amanengi khenge abonise ikholo kuye. Ngalokho-ke, uJehova wenza bona isizukulwaneso sizulazule emangweni iminyaka eyi-40. Ngaphambi kokufa kwakhe, uMosisi wabeka indoda elungileko uJoshuwa bona kube ngiyo ezokudosa u-Israyeli phambili. Emaswapheleni, u-Israyeli wakulungela ukungena enarheni uZimu ayithembisa u-Abrahama esikhathini eside esadlulako.

—Isekelwe ku-Eksodosi; Lefitikosi; Numeri; Duteronomi; AmaRhalani 136:10-15; IZenzo 7:17-36.

◼ Kwenzeka bunjani bona uZimu aberegise uMosisi atjhaphulule ama-Israyeli?

◼ Gade liyini ibanga lokugidinga iPhasika?

◼ UJehova wawatjhaphulula bunjani ama-Israyeli ebugqilini beGibhide?

[Ibhoksi elisekhasini 10]

UMTHETHO OQAKATHEKE KINAYOYOKE

IMilayo eliTjhumi, etlolwe ku-Eksodosi 20:1-17, kungaba milayo eyaziwa khulu nayilinganiswa neyi-600 eyadluliselwa ngoMosisi. Kodwana, ngesikhathi uJesu Krestu abuzwa bona ngimuphi umlayo oqakatheke kinayo yoke, wakhetha lo: “Kufanele uthande iKosi uZimakho ngehliziyo yakho yoke, nangomphefumulo wakho woke, nangomkhumbulo wakho woke, nangamandla wakho woke.”—Markosi 12:28-30; Duteronomi 6:5.

[Itjhadi ekhasini 10]

Genesisi

● Eksodosi

● Lefitikosi

● Numeri

● Duteronomi

Joshuwa

Abahluleli

Rude

1 Samuweli

2 Samuweli

1 Amakhosi

2 Amakhosi

1 Imilando

2 Imilando

Ezra

Nehemiya

Esta

Jobhi

AmaRhalani

Iziyema

Umtjhumayeli

Irhubo lamarhubo

Isaya

Jeremiya

Isililo

Ezekiyeli

Danyela

Hosiya

Juweli

Amosi

Obadiya

Jona

Mika

Nahumi

Habakuki

Zefaniya

Hagayi

Zakariya

Malaki

Matewu

Markosi

Luka

Jwanisi

IZenzo

KwebeRoma

1 KwebeKorinte

2 KwebeKorinte

KwebeGalatiya

Kwebe-Efesu

KwebeFilipi

KwebeKholose

1 KwebeTesalonika

2 KwebeTesalonika

1 kuThimothi