Thokoza UJehova NoJesu Ngalokho Abakwenzele Khona

Uzizwa njani umnganakho nakakupha isipho? Uyathaba bewufune ukumtjengisa ukuthi uyamthokoza ngesipho akuphe sona. UJehova noJesu basiphe isipho esikhulu kwamambala. Ngisiphi isiphweso begodu ungatjengisa njani bona uyathokoza ngaso?

1. Ungatjengisa njani ukuthi uyamthokoza uZimu noKrestu ngalokho abasenzele khona?

IBhayibheli lithembisa ukuthi “woke umuntu otjengisa ukukholwa [kuJesu]” uzokuphila ngokungapheliko. (Jwanisi 3:16) Kutjho ukuthini ukuba nokukholwa? Kutjho okungaphezu kokukholelwa kuJesu. Kufuze sitjengise ukuthi sinokukholwa ngalokho esikukhethako nesikwenzako. (Jakopo 2:17) Lokha nasitjengisa bona sinokukholwa ngalokho esikwenzako nesikutjhoko, siqinisa ubungani bethu noJesu noJehova uYise.—Funda uJwanisi 14:21.

2. Ngisiphi isenzakalo esikhethekileko esisisiza sitjengise ukuthi siyathokoza ngalokho uJehova noJesu abasenzele khona?

Ngobusuku bangaphambi kokuthi afe, uJesu watjela abalandeli bakhe ngenye indlela abangatjengisa ngayo ukuthi bayamthokoza ngomhlatjelwakhe. Wabatjela ukuthi bahlangane esenzakalweni esikhethekileko iBhayibheli elisibiza ngokuthi, ‘sisiDlo seKosi saNtambama,’ esaziwa nangokuthi siKhumbuzo sokufa kwakaKrestu. (1 Korinte 11:20) UJesu bekafuna abapostoli bakhe nawo woke amaKrestu weqiniso azokulandela, bakhumbule ukuthi wanikela ngokuphila kwakhe ngebanga lethu. Malungana nesenzakalwesi uJesu wathi: “Hlalani nikwenza lokhu bona ningikhumbule.” (Lukasi 22:19) Nawuya esiKhumbuzweni utjengisa bona uyamthokoza uJehova noJesu ngokuthi bayasithanda.

FUNDA NGOKUNGENELELEKO

3. Khuyini esingayenza ukutjengisa bona siyathokoza?

Akhe sithi kunomuntu okusindise ekufeni. Bewuzokulibala na lokho akwenzele khona? Namkha bewuzokufuna iindlela zokumtjengisa ukuthi uyathokoza ngalokho akwenzele khona?

Sikoloda uJehova ngokuphila kwethu. Funda yoku-1 kaJwanisi 4:8-10, bese nicoca ngemibuzo le:

• Kubayini umhlatjelo kaJesu usisipho esikhethekileko?

• Uzizwa njani ngalokho uJehova noJesu abakwenzele khona?

Singatjengisa njani ukuthi siyamthokoza uJehova noJesu ngalokho abasenzele khona? Funda yesi-2 kwebeKorinte 5:15 neyoku-1 kaJwanisi 4:11; 5:3. Ngemva kokufunda umtlolo ngamunye cocani ngombuzo lo:

• Ngokomtlolo lo, khuyini esingayenza ukutjengisa ukuthi siyathokoza?

4. Lingisa uJesu

Enye indlela esingatjengisa ngayo ukuthi siyathokoza, kulingisa uJesu. Funda yoku-1 kaPitrosi 2:21, bese nicoca ngombuzo lo:

• Ungamlingisa njani uJesu?

5. Yiba khona esiKhumbuzweni sokufa kwakaKrestu

Bona ufumane ilwazi ngalokho okwenzeka esiDlweni seKosi saNtambama sokuthoma, funda uLukasi 22:14, 19, 20. Ngemva kwalokho nicoce ngemibuzo le:

• Kwenzekani esiDlweni seKosi saNtambama?

• Uburotho newayini zifanekiselani?—Funda amavesi 19 no-20.

UJesu bekafuna abalandeli bakhe bagidinge isiKhumbuzo kanye ngomnyaka, ngelanga afa ngalo. Kungebangelo aboFakazi bakaJehova bahlangana qobe mnyaka ukuze bakhumbule ukufa kwakaKrestu ngendlela athi bakwenze ngayo. Bona ufunde okungeziweko ngomhlangano oqakathekileko lo, dlala IVIDIYO. Ngemva kwalokho nicoce ngombuzo olandelako.

IVIDIYO: Khumbula Ukufa KwakaJesu (1:41)

• Kwenzekani esiKhumbuzweni?

Uburotho newayini zifanekisela okuthileko. Uburotho bufanekisela umzimba kaJesu onganasono awunikela ngebanga lethu. Iwayini lifanekisela iingazi zakhe

ISIRHUNYEZO

Sitjengisa ukuthi siyamthokoza uJesu ngalokho asenzele khona, nasikholwa kuye besibe khona esiKhumbuzweni sokufa kwakhe.

Buyekeza

• Kutjho ukuthini ukukholwa kuJesu?

• Ungatjengisa njani bona uyamthokoza uJehova noJesu ngalokho abakwenzele khona?

• Kubayini kuqakathekile ukuba khona esiKhumbuzweni sokufa kwakaKrestu?

HLOLA OKUNGENZASI

Ukufa kwakaKrestu kusikhuthaza ukuthi senzeni?

Wasebenzisa Umzimbakhe Bona Adumise UJehova (9:28)

Funda okungeziweko ngokukholwa nokuthi singaba nakho njani.

“Zikholwe Iinthembiso ZakaJehova” (IsiThala, Oktoba 2016)

Endabeni enesihloko esithi, “Ngizizwa Ngihlwengile, Ngiphila Begodu Ngiphelele,” qala bona kwamthinta njani omunye umma ukufunda ngomhlatjelo kaKrestu.

“IBhayibheli Litjhugulula Amaphilo” (IsiThala, Arhostosi 1, 2011)