ISITHASISELO C
Ukuraga Isifundo SeBhayibheli Usebenzisa Incwadi Ethi, Thabela Ukuphila Ngokungapheliko!
Abafowethu bathandaze khulu bebacabangisisa ngalokho ekufuze kufakwe encwadini ethi, Thabela Ukuphila Ngokungapheliko! Nawuzayisebenzisa kuhle incwadi le, sebenzisa iindlela ezilandelako lokha nawuraga isifundo seBhayibheli.
Ngaphambi kokobana nifunde
1. Lungiselela kuhle. Njengombana ulungiselela, cabangisisa ngalokho okutlhogwa mumuntu ofunda naye, ubujamo bakhe nalokho akukholelwako. Linga ukucabanga ngamaphuzu angaba budisi ukuthi awazwisise namkha awasebenzise. Cabanga ngendlela imininingwana efumaneka ngaphasi kwesithi, “Hlola okungenzasi” engasiza ngayo umuntu ofunda naye begodu hlala ukulungele ukuyisebenzisa nakutlhogekako hlangana nesifundo.
Nanifundako
2. Thandaza ngaphambi nangemva kwesifundo, nange umfundi avuma.
3. Tjheja ungakhulumi khulu. Dzimelela kilokho okusencwadini begodu uvumele umuntu ofunda naye aveze indlela azizwa ngayo.
4. Lokha nanithoma ingcenye etja, fundani lokho okuzokudzinyelelwa kikho bese nifunda neenhloko ezimbalwa ngaphasi kwengcenye leyo.
5. Naniqeda ingcenye ngayinye sebenzisani ingcenye yokubuyekeza ukusiza umuntu ofunda naye akhumbule amaqiniso awafundileko.
6. Njengombana ufunda isifundo ngasinye nomuntu ofunda naye:
Funda okutloliweko.
Funda yoke imitlolo etshwaywe ukuthi “Funda.”
Funda eminye imitlolo edzujuliweko nakutlhogekako.
Dlala woke amavidiyo atshwaywe ukuthi “Dlala” (nange afumaneka).
Buza umfundi umbuzo ngamunye.
Bawa umuntu ofunda naye aqale iinthombe ezifumaneka ngaphasi kwengcenye ethi, “Funda Ngokungeneleleko” umbawe azihlathulule.
Sebenzisa ibhoksi elithi, “Uzimisele Ukwenzani” ukusiza umuntu ofunda naye ukuthi abone ituthukwakhe. Ungamkhuthaza ukuthi asebenzise umnqopho abekelwe wona ukuzibekela omunye umnqopho namkha azibekele yomibili.
Buza umuntu ofunda naye ukuthi khuyini ayithandileko kezinye iinhloko namkha emavidiyweni angaphasi kwengcenye ethi, “Hlola Okungenzasi” lokha nakalungiselela.
Linga ukuqeda isifundo ngasinye qobe nanifundako.
Ngemva kwesifundo
7. Cabanga ngomuntu ofunda naye. Thandaza kuJehova umbawe bona abusise indlela umuntu ofunda naye athuthuka ngayo nokuthi akuphe ukuhlakanipha wazi ukuthi ungamsiza njani.