ISIHLOKO ESINGAPHANDLE: IPHASI ELINGANALO IBANDLULULO—NINI?

Ibandlululo—Umraro Wephasi Loke

UJONATHAN, omKoriya wabelethelwa e-Amerika waba ngungazimbi wokubandlululwa ngokobutjhaba asesemncani. Njengombana akhula, wafuna indawo lapho abantu bangeze bamahlulela ngebanga lokuqaleka kwakhe kwangaphandle nofana ngokobutjhaba. Waba ngudorhodere edorobheni letlhagwini ye-Alaska, e-U.S.A., lapho ukuqaleka kwakhe bekufana nekweengulani zakhe ezinengi. Bekanethemba lokobana mhlamunye ngokuba lapho emakhazeni we-Arctic Circle, bekawabalekele amakhaza amakhulu webandlululo.

Nanyana ngiliphi ithemba ebekanalo laphela nya nekalapha umfazi oneminyaka ema-25. Njengombana umfazi lo aphaphama, waqala uJonathan wamutjho ngehlamba, aveza ihloyo anayo ngabantu beKoriya. Isenzakalwesi saba buhlungu kuJonathan, samkhumbuza bona imizamakhe yoke yokuthutha bonyana afane nabanye abantu akhenge imenze akwazi ukubalekela ibandlululo.

Okwenzeka kuJonathan kukhanyisa iqiniso lokuphila elibuhlungu. Ibandlululo likhona ephasini loke. Kubonakala ngasuthi nanyana kukuphi la kunabantu khona kunebandlululo.

Nokho, naphezu kokwanda kwebandlululo, abantu abanengi barhabela ukulinyefula. Kwamambala lokhu kuyarara. Kungenzeka njani bona into engathandwa ngesikhathi esifanako yande kangaka? Ngokukhanyako, abanengi abanyefula ibandlululo babhalelwa kulibona kibo. Kghani unjalo nawe? Ungawuphendula njani umbuzo lo?

UMRARO USEMNTWINI

Kungakhathaliseki bona siyakutjheja lokho nofana awa, kubudisi ngathi ukubona bonyana sinalo ibandlululo eenhliziyweni zethu. IBhayibheli ihlathulula isizathu salokho neyithi: “Ihliziyo imkhohlisi ngaphezu kwakho koke.” (Joromiya 17:9, Holman Christian Standard Bible) Nokho, singazikhohlisa sikholelwe bona asibandlululi yoke imihlobo yabantu. Nofana singazithethelela ngokobana sinebanga elizwakalako lokungathandi iintjhaba ezithileko.

Ukubona bonyana sinawo na umraro wokubandlulula, cabanga ngobujamo napu: Akhe sithi ukhamba wedwa endleleni ebusuku. Uhlangana namasokana amabili ongakhange uwabone ngaphambili. Aqaleka anamandla, begodu omunye wabo ubonakala aphethe okuthileko esandleni sakhe.

Ungaphetha ngokobana amasokana la azimisele ukukulimaza? Liqiniso, okwenzeka kuwe esikhathini esidlulileko kungakutjela bona kufuze utjheje, kodwana lokho okwenzeka kukwenza uzithethelele ngokobana amasokana amabili la ayingozi? Naku omunye umbuzo ongakusiza bona uzihlolisise, ucabanga bona amasokana la ngewasiphi isitjhaba? Ipendulwakho yombuzo lo ingaveza indlela ozizwa ngayo. Ingatjengisa bona ngezinga elithileko, unalo ibandlululo.

Nengabe sithembekile ngokwethu, sizokuvuma bona soke ngaphakathi sinalo ibandlululo ngezinga elithileko ngendlela ehlukileko kwenye. Ngitjho neBhayibheli iveza elinye ihlobo lebandlululo elijayelekileko neyithi: “Abantu batjheja ijamo lomuntu.” (1 Samyela 16:7, Contemporary English Version) Njengombana soke sinomraro lo—kanengi kuba nemiphumela ebuhlungu—likhona ithemba lokobana singahlula nofana sisuse ibandlululo ekuphileni kwethu? Sizakhe sibe khona na isikhathi lapho iphasi loke lingekhe lisaba nebandlululo?

IBANDLULULO LIZELE IPHASI LOKE

ECanada: “Nanyana [inarha le] yamukela iintjhaba ezihlukahlukeneko begodu ibeka nemithetho eminengi evikela amalungelo wemiphakathi ehlukahlukeneko, ukunyefula ngokobutjhaba kuragela phambili kumraro omkhulu emalungelweni wabantu.”—Umbiko ka-2012 ngeCanada, we-Amnesty International.

EYurobhu: “Abantu beYurobhu abamaphesende [ama-48] bakholelwa bona kuncani khulu okwenziweko bona kulwisane nebandlululo enarhenabo.”—Umbiko ka-2011 ngeYurobhu we-Intolerance, Prejudice and Discrimination.

E-Afrika: “Inturhu nebandlululo kibomma beyisolo yandile eenarheni ezinengi.”—Umbiko ka-2012 we-Amnesty International.

ENepal: “Abantu ababizwa ngokuthi maDalit (“abatlhagako”) ngokuvamileko bayabandlululwa, khulukhulu kwezomnotho, emphakathini, nakwezamasiko.”—Umbiko ka-2012, we-Human Rights Watch World.

EPumalanga Yurobhu: “Abantu beRoma ePumalanga yeYurobhu bathweswa umlandu ziinarha ezinye begodu babongazimbi bokubandlululwa enarheni yabo, umraro abasopolotiki abangafuni ukuwurarulula.”—The Economist, September 4, 2010.