‘Ubuhlakani Bubonakala Buliqiniso Ngemivuzo Yabo’
1. Abanye bawuqala njani umsebenzi esiwenzako?
1 Ngezinye iinkhathi singafumana ipendulo engasiyihle kubanini zindlu abangasizwisisi kuhle, nofana labo abatjelwe okumbi ngaboFakazi bakaJehova. Mhlamunye iimbono yabo ihlohlozelwe ziimbikindaba ezikhethululako. Kezinye iindawo sibizwa bona “sisiqhema esiyingozi.” Kufuze senze njani nasiqalene nokusolwa okunjalo?
2. Khuyini okungasirhalebha bona sigegede ukuphelelwa mamandla lokha siqalene nokubonwa iimphoso?
2 Yiba Nobujamo Obuhle Bomkhumbulo: Ngekhulu lokuthoma, abantu gade bangazwisisi begodu bakhuluma kumbi ngoJesu nangezinye iinceku zakaJehova. (IZenzo 28:22) Nanyana kunjalo, akhange bavumele ukubonwa iimphoso kubenze bazizwe baneenhloni ngekonzwabo. UJesu wathi: ‘Ubuhlakani bubonakala buliqiniso ngemivuzo yabo.’ (Mat 11:18, 19) Waragela phambili ngokwenza intando kaYise ngetjisakalo, aqiniseka bona labo kwamambala abafuna iqiniso bazokubona ukuqakatheka kweendaba ezimnandi. Singakugegeda ukuphelelwa mamandla ngokukhumbula bona iNdodana kaZimu ekukuphela kwayo yaqalana nepatho efanako.
3. Kubayini iimbiko emimbi nokuphikiswa kungasirari?
3 UJesu wakutjengisa bona iphasi lizobahloya abalandeli bakhe njengombana naye lamhloya. (Jwanisi 15:18-20) Ngalokho-ke, iimbiko engasimihle nokuphikiswa kwanamhlanjesi akukafaneli kusirare. Eqinisweni, kufuze sizilindele izinto ezinjalo njengombana siphila emihleni yokuphela, kukulapho nobukhali bakaSathana budlhabhaza khona. (ISam 12:12) Singathaba ngokubona lokhu bonyana iphasi lakaSathana liphelelwa sikhathi.
4. Nasihlangana nokusabela okungasikuhle ngeendaba ezimnandi, kufuze sisabele bunjani?
4 Sabela Ngomusa: Lokha nasifumana ukusabela okungasi kuhle, kufuze ngaso soke isikhathi siphendule ngomusa nangokuzithoba. (Izi 15:1; Kho 4:5, 6) Nengabe ubujamo buyavuma, singahlathululela umninimuzi ozithobako bona kunengi khulu abantu abangakuzwisisi ngaboFakazi bakaJehova nofana simbuze bonyana kubayini azizwa ngendlela azizwa ngayo. Ukusabela kwethu ngendlela ephasi kungamenza bona abenemibuzo ngalokho akuzwa ngaboFakazi bakaJehova nokobana abalalele aboFakazi ngokukhambela okulandelako. Nanyana kunjalo, nengabe umninimuzi ukwate khulu, kungaba bhedere simtjhiye ngokuthula. Ngitjho nofana abanye basiqala njani, singaqiniseka bona UJehova uqala ikonzwethu njengeqakathekileko.—Isa 52:7.