Iimhlangano YesiGodi—Sikhathi Esithabisako Sokukhulekela
1. Umkhosi wama-Israyeli gade ufana ngani nomhlangano wethu wesigodi wanamhlanjesi?
1 UJosefa, uMariya, nabantwababo begodu nabanye, qobe gade baya eJerusalema ukuyokuhlanganyela eemnyanyeni waqobe mnyaka. Esehlakalwenesi, bona nabanye abakhulekeli gade bazokutjhiya ngemva izinto abazenza qobe malanga batjheje izinto eziqakatheke khulu ezingokomoya zokuphila kwabo. Umkhosi bewubanikela isikhathi sokuzindla ngekulumo emalungana nokulunga kwakaJehova begodu nokucabangela imithetho yakhe. Umhlangano wethu wesigodi ozako uzosinikela amathuba afanako wesikhathi esithabisako sokukhulekela uJehova.
2. Khuyini ekufuze sikwenze bona silungiselele umhlangano wesigodi ozako?
2 Kutlhogeka Ukulungiselela: Ikhambo lokuya eNazaretha lafuna bona umndeni wekhabo lakaJesu ukhambe amakhilomitha angaba ma-200 ikhambo elinye nelinye. Ngitjho namtjhana singabazi abantwana bakhabo lakaJesu bona gade babangakhi, singacabanga ngokulungiselela nemizamo uJosefa noMariya okwetlhogeka bayenze. Sele uwenzile amalungiselelo atlhogekako wokubakhona emhlanganweni wesigodi olandelako woke amalanga amathathu? Lokhu kungafuna bona ubawe emberegweni namtjhana ukhulume nomqatjhi wakho namtjhana utjele utitjhara womntwanakho bona umntwanakho ngekhe abekhona esikolweni emalangani lawo. Usifakile isibawo sokufumana indawo yokulala eHotela nengabe lokhu kuyatlhogeka? Ungakghona ukurhelebha umuntu othileko ebandleni ngezinto azitlhogako bona abe khona emhlanganweni?—1 KaJwanisi 3:17, 18.
3. Umnyanya wama-Israyeli wawanikela njani ithuba lokuhlangana okwakhako?
3 Ukuhlangana Okwakhako: Qala bona umnyanya wamaJuda waveza ithuba elihle kangangani lokuhlangana okwakho nabanye abakhulekeli! Akunakuzaza bona umndeni kaJesu gade uqale phambili bona ube hlangana nabangani babo bekadeni. Bathabela ngitjho nethuba lokwenza abangani abatjha hlangana nesiqubuthu samaJuda begodu namaproselite egade azokuba khona namtjhana aya eJerusalema nabuya khona.
4. Singatjengisa njani bona asibuthatheli phasi ubuzalwane bethu bobuKrestu?
4 Elinye ibanga elenza inceku ethembekileko nelemukako ilungiselele bona sihlangane ndawonye sizokuzwa iinkulumo emihlanganweni yesigodi kunokobana isinikele imininingwana efanako egadangisiweko bona sikhuthazane. (Heb. 10:24, 25) Ngalokho-ke, yenza umzamo wokufika emhlanganweni ngesikhathi qobe langa bona uthabele ubuzwalane obuhle nabanye ngaphambi kobana usihlalo athule umbhino othomisa umhlangano, otjengisa bona nje sikhathi sokuhlala phasi. Kunokobana uphume ekundleni yomhlangano ngesikhathi sedina iza nokudla kwakho, sikhuthazwa bona size nokudla okuncani begodu sihlale ekundleni yomhlangano bona sikwazi ukuhlangana begodu sikhulume nabantu abahlangana nathi. Ubuzalwane bethu bobuKrestu sisipho esivela kuJehova okungafuneki sibuthathele phasi.—Mika 2:12.
5. Khuyini okuzosirhelebha bona sizuze kuhle emhlanganweni?
5 Isikhathi Sokufunda: Kusukela asesemntwana, uJesu wasebenzisa amathuba womkhosi bona afunde ngoYise wezulwini. (Luka 2:41-49) Khuyini ezokurhelebha thina neemndenethu bona sizuze kuhle eengcenyeni ezizabe zinikelelwa emhlanganweni? Phakathi neenkulumo, hlala phasi begodu lisa ukhuluma ngokungatlhogekiko. Ungavumeli umalile edininakho, i-pager, namtjhana okhunye okufana nalokhu bona kukuthikameze wena nabanye. Amehlwakho akaqale isikhulumi, begodu tlola amaphuzu. Hlalani noke njengomndeni ukuqiniseka bona umntwanakho naye ulalele. Ntambama zinikeleni isikhathi sokucoca ngamaphuzu eniwathabeleko emhlanganweni.
6. Khuyini ekufuze sihlale sikukhumbula malungana nendlela esimbatha begodu sizilungisa ngayo?
6 Ukumbatha Nokuzilungisa: Abathengisi bakezinye iinarha egade basendleleni bebangawubona bulula umndeni wekhabo lakaJesu begodu nabanye abakhulekeli bamaJuda egade baya begodu babuya emkhosini ngebanga leengubo zabo ezilungiswe kuhle begodu nentambo enombala ohlaza kwesibhakabhaka ngaphezu komphetho. (Num. 15:37-41) Namtjhana amaKrestu angambathi ngendlela ekhethekileko, saziwa ngokumbatha ngesithunzi begodu kuhle nangokuhlanzekileko. Kufuze sitjhejisise indlela esibonakala ngayo nasiya begodu nalapho sibuya emhlanganweni nalokha sisedorobheni lomhlangano. Nalokha kungenzeka sitjhentjhe iimbatho zethu ngemva komhlangano, kufuze simbathe izembatho ezihlonipha ibizo lakaJehova begodu simbathe ibheji yomhlangano. Ngendlela le ngekhe sifane nabantu abangasiboFakazi begodu sizokuletha isithombe esihle ebantwini abasibukeleko.
7. Kubayini kufuze sicabangele ukuzibandakanya ngokuzithandela ekusebenzeni emhlanganweni?
7 Kutlhogeka Iinsebenzi Zokuzithandela: Kutlhogeka iinsebenzi ezingeziweko bona umhlangano ukhambe kuhle. Ungakwazi uzinikela ngokuzithandela kilokhu? (Rha. 110:3) Umberego owenziwa emihlanganweni uyingcenye yokonzo ekhethekileko begodu unikela ubufakazi obuhle. Umphathi wekundla ethileko yomhlangano kwamrara ukubona iinsebenzi zokuzithandela ezahlwengisa umakhiwo womhlangano, watlola wathi: “Ngifuna ukunithokoza ngesehlakalo esikarisako ekhe ngasithabela epilwenami. Bengihlala ngizwa bona aboFakazi bakaJehova bababantu abakhethekileko, abanedumo lesikhathi eside ebubulweni lethu ngokuthi qobe batjhiye ikundla ihlanzeke khudlwana kunalokho abayifumene ingikho. Nina nabantu behlangano yenu nenze ikundla le yaba yindawo engcono yomphakhathi, begodu nikwenze nesiqhema sabantu abanomusa omkhulu esithabele ukubazi.”
8. Ngimaphi amathuba wokufakaza azokuvela emadorobheni wemihlangano?
8 Amathuba Wokufakaza: Abanengi emadorobheni wemihlangano bazokutjheja imbatho lethu elihle, iinhluthu zabayeni ezilungiswe kuhle ezimbethe amabheji begodu lokhu kungavusa irhuluphelo labo, kusivulela amathuba wokubatjela ngomhlangano. Omunye umntwana oneminyaka emine weza nencwadi etja ekhutjhwe emhlanganweni endaweni yokudlela ngemva komhlangano begodu wayitjengisa i-waitress. Lokhu kwavulela ababelethi bomsanyana ithuba lokumemela umma loyo emhlanganweni.
9. Singakulingisa bunjani ukwazisa komndeni kaJesu izipho zakaJehova ezingokomoya?
9 Imikhosi yekadeni beyizizehlakalo ezithabisako lezo amaJuda angokomoya ebakaqale phambili kizo. (Dut. 16:15) Umndeni kaJesu wakuthabela ukwenza nanyana ngikuphi ukuzidela bona babe khona begodu bazuze ngokuzeleko. Nathi sinokwazisa okufanako ngemihlangano yethu yesigodi, siyiqale njengesipho esivela kuBabethu wezulwini onethando. (Jak. 1:17) Kwanjesi-ke sikhathi sokulungiselela ilungiselelweli laqobe mnyaka lokuthabela ukukhulekela uJehova!
[Ibhoksi elisekhasini 5, 6]
Esikhunjuzwa Khona Ngomhlangano Wesigodi
◼ Isikhathi Umhlangano Ozokuthoma Ngaso: Umhlangano uzokuthoma ngo-9:00 ekuseni amalanga amathathu woke. Nekwenziwa isaziso sokudlala umbhino othoma umhlangano, soke kufuze sihlale eentulweni zethu bona umhlangano uthome ngendlela ehloniphekileko. Umhlangano uzokuphela ngo-4:15 ntambama ngeLesihlanu, ngoMgqibelo uzokuphela ngo-4:30 ntambama, ngoSondarha uzokuphela ngo-3:20 ntambama.
◼ Indawo Yokuphaga Iinkoloyi: Kiyo yoke ikundla yomhlangano kunendawo yokuphaga iinkoloyi, indawo le izokufumaneka simahla kilabo abafike qangi. Njengombana indawo yokuphaga ngokujayekileko ilinganiselwe, kufuze nizalise iinkoloyi ngendlela ekungakghoneka ngayo.
◼ Indawo Yokulala: Abarhuweleli abatlhoga indawo yokulala bangawafumana amaforomu wokwenza isibawo sendawo athi: Isicelo Sendawo Yokulala Sezidingo Ezikhethekile (CO-5-ZU). Ikomidi Yekonzo Yebandla kufuze icabangele iimfanelo zomrhuweleli, iberegisa iinlayezo ezise foromweni kuhlanganise nencwadi kaJulayi 15, 2009, etlolelwe zoke iinhlopha zabadala. IIungiselelweli lenzelwe kwaphela abarhuweleli abaziphethe kuhle kuhlanganise nabantwababo abaziphatha kuhle.
◼ Ukubulunga Iintulo: Iintulo zingabekelwa labo kwaphela okhamba nabo ngekoloyi namtjhana ohlala nabo ekhaya, kuhlanganise nalabo ofunda nabo iBhayibhili.—1 Kor. 13:5.
◼ Ukudla Kwedina: Sibawa uziphathele ukudla kwakho kunokobana uphume ekundleni yomhlangano bona uyokuthenga ukudla ngesikhathi sedina. Ungaphatha isikhwama siqandisi esincani ongakghona ukusifaka ngaphasi kwesitulo. Iinkhwama nqandisi ezikulu kufuze zibekwe ngokulandela isinqophiso sabalindi. Izinto eziphukako namabhodlela wotjwala azikavunyelwa endaweni yomhlangano.
◼ Iimnikelo: Singatjengisa ukuthokoza kwethu ngamalungiselelo womhlangano ngokunikela ngokuzithandela umsebenzi wephasi loke eWolweni lethu loMbuso namtjhana eemhlanganweni. Nengabe ufuna ukunikela ngetjhege, sibawa uqinisekise i-akhawunti yakho neKomidi Yomhlangano. Iimtjhini yokusebenzisa amakarada webhanga izokufumaneka eendaweni ezikhethiweko zomhlangano bona unikele ngelinye nelinye ikarada lebhanga. Sibawa uthinte iKomidi Yomhlangano bona ufumane bonyana umtjhini loyo ubekwe kuphi.
◼ Iingozi Nobujamo Oburhabako: Nengabe kuvela ubujamo oburhabako endaweni yomhlangano, sibawa nithinte umlindi oseduze, msinyana uzokwazisa beRhelebho Lokuthoma bona iimsebenzi ezibandulweko zerhelebho lokuthoma zingakghona ukuhlola ubujamo begodu zinikele ngerhelebho.
◼ Amanyethelo: Qobe mnyaka abantu abanengi bayalimala ngebanga lamanyathelo. Kuhle ukukhetha amanyethelo afaneleko, akulingana kuhle lawo azokwenza bona ukhambe kuhle eentepisini, ezikweni leensimbi nezinye iindawo ezingaba yingozi.
◼ Ukurekhoda: Imitjhini yokugadangisa akukafaneli ifakwe egezini yekundla yomhlangano nofana erhelweni lomdumo begodu imitjhini le ingasetjenziswa kwaphela ngendlela engekhe ithikameze abanye.
◼ Ikoloyana Yomntwana (Ipremu): Iinkoloyana zabantwana akafuzi zingeniswe endaweni yomhlangano. Nokho, iintulo zabantwana zokuphepha ezingabekwa esitulweni hlanu kwababelethi zamukelekile.
◼ Amafutha Anuka Kamnandi: Iimhlangano eemnengi ibanjwelwa eendaweni ezivalekileko lapho kuneemtjhini engenisa umoya. Ngalokho-ke, sizabe sitjengisa umusa kwabanye ngokuberegisa amafutha anuka kamnandi anamandla ngokulingeneko bona singalimazi abanye abaneemraro yokuphefumula.—1 Kor. 10:24.
◼ Amaforomu Wokulandelela: Iforomu elithi Siza Ulandelele (S-43) kufuze liberegiselwe ukutlola imininingwana malungana nanyana ngubani otjengise ikareko nasibatjhumayela hlangana nomhlangano. Abarhuweleli kufuze baphathe iforomu linye namtjhana mabilii emhlanganweni. Amaforomu azalisiweko kufuze asiwe endaweni yeencwadi nofana anikelwe unobhala webandla langekhenu.—Qala INkonzo Yethu YoMbuso kaNovemba 2009, k.4.
◼ Iindawo Zokudlela: Dumisa ibizo lakaJehova ngokuziphatha kuhle eendaweni zokudlela. Kuyikambiso ukutjhiya i-thiphu ethoma ku-10 kuyaku-15 phesenthi.
◼ Ikonzo Yokuzithandela: Ithabo esilifumana ngokuba khona emhlanganweni liba likhulu nengabe sizinikela ngokuzithandela ekurhelebheni ngomberego obandakanyekileko. (IZenzo. 20:35) Nanyana ngubani othanda ukurhelebha kufuze aye eMnyangweni Wekonzo Yokuzithandela emhlanganweni. Abantwana abangaphasi kweemnyaka eli-16 nabo bangarhelebha ngokusebenza nababelethi namtjhana abanye abantu abadala abagunyezwe babelethi babo.
◼ Iingoma: Amabandla angathanda ukuphrathiksa iingoma zomhlangano kusesenesikhathi. Iingoma zangeLesihlanu: 118, 18, 113, 91, 88, no-75. Iingoma zangoMgqibelo: 92, 85, 60, 65, 69, no-48. Iingoma zangoSondarha: 51, 63, 106, 16, 49, no-2.