Amalanga Amathathu Wokuqabuleka Ngokomoya
1. Khuyini esingalindela ukuyifumana emhlanganweni wesigodi wanonyaka?
1 Ephasini elirhabukilekweli ngokomoya okuliphasi lakaSathana, uJehova uragela phambili aqabula iinceku zakhe. (Isa. 58:11) Enye indlela uJehova asiqabula ngayo mhlangano wesigodi waqobe mnyaka. Njengombana umhlangano wanonyaka utjhidela, singazilungiselela njani ukuqabuleka nokuqabula abanye ngokomoya?—Iziy. 21:5.
2. Ngimaphi amalungiselelo okufuze uwenze?
2 Nengabe awukenzi njalo, ziphe isikhathi sokulungiselela izinto zakho mathupha nezomsebenzi wokuziphilisa bona ube khona woke amalanga amathathu la emhlanganweni. Usiqalile isikhathi ozositlhoga ukuya emhlanganweni qobe langa bona ukwazi ukufika nokufuna indawo yokuhlala ngaphambi kobana ihlelo lithome? Kwamambala angekhe sifune ukuphundwa nginanyana ngikuphi ukudla okungokomoya okuqabulakokhu uJehova asilungiselele khona! (Isa. 65:13, 14) Sewuwenzile amalungiselelo wendawo yokulala nesikhwelo?
3. Ngiziphi iimphakamiso ezizokusiza thina neemndenethu bona sizuze ngokuzeleko emhlanganweni?
3 Khuyini ezokusiza bona ingqondwakho ingazulazuli phakathi nehlelo? Nengabe kuyakghoneka, phumula ngokwaneleko ubusuku nobusuku ngesikhathi somhlangano. Qala isikhulumi. Funda umtlolo omunye nomunye eBhayibhilinakho. Tlola amaphuzu amafitjhani. Iimndeni yenza kuhle ngokuhlala ndawonye bona ababelethi bakwazi ukusiza abantwababo balalelisise. (Iziy. 29:15) Mhlamunye ningacoca ngamaphuzu womhlangano ayihloko ubusuku obunye nobunye njengomndeni. Bona umndenakho uragele phambili uvuselelekile ngitjho nangemva komhlangano, kungahlelwa isikhathi hlangana nokuKhulekela Komndeni bonyana nicabangele amaphuzu athileko umndenakho ozowasebenzisa.
4. Singabasiza njani abanye ebandleni bona bafumane ukuqabuleka ngokomoya?
4 Siza Abanye Bona Baqabuleke: Sifuna bona nabanye baqabuleke ngokomoya. Kunabantu abalupheleko namtjhana abanye abarhuweleli abatlhoga isizo bona babe khona emhlanganweni ebandleni? Ungakwazi ukubasiza? (1 Jwa. 3:17, 18) Abadala, khulukhulu ababonisi beenqhema, kufuze babone bona abarhuweleli bafumana isizo abalitlhogako.
5. Uzozikhambisa njani iimemo phakathi nomhlangano? (Qala ibhoksi elingehla.)
5 Njengesikhathini esidlulileko, iimveke eentathu ngaphambi kokuthoma komhlangano, sizokuhlanganyela ejimeni lokumemela abanye emhlanganweni. Amabandla kufuze azibekele umnqopho wokukhambisa iimemo abelwe zona ukuhlanganisa isimawo ngendlela angakghona ngayo. Iimemo umndenakho ozitjhiyileko ekupheleni kwejima kufuze kuziwe nazo emhlanganweni bona uzokwazi ukuzisebenzisa newufakaza ngokungakahlelwa. Imininingwana engeziweko ngalokhu izokunikelwa phakathi nehlelo langeLesihlanu. Iimemo umndenakho ongacabangi bona uzozisebenzisa newusemhlanganweni kufuze zinikelwe abalindi newungena etatawini lomhlangano. Sibawa uzibulungele ikhophi eyodwa, njengombana kuzokutlhogeka bona uqale kiyo ngekulumo yokugcina ngoSondarha.
6. Singayitjengisa njani imikghwa emihle emhlanganweni?
6 Imikghwa Emihle Iyaqabula: Ngesikhathi lapho abantu abanengi ‘bangabazithandako’ begodu banganandaba namazizo wabanye, qala bona kuqabula kangangani ukuba hlangana namaKrestu azimisele ukutjengisa imikghwa emihle! (2 Thi. 3:2, NW) Sitjengisa imikghwa emihle ngokungena endaweni yomhlangano ngokuthula nangokuhleleka nekuvulwako, nokubekela indawo kwaphela labo esihlala nabo ekhaya, esikhamba nabo ngekoloyi namtjhana iimfundo zeBhayibhili. Kufuze silandele isinqophiso sakasihlalo nekasibawa bona sihlale phasi silalele umbhino othula ihlelo ngalinye. Sitjengisa imikghwa emihle ngokubeka umaliledininethu namtjhana i-pager ebujamweni bokobana ingathikazisi abanye phakathi nehlelo. Godu sitjengisa imikghwa emihle ngokungakhulumi, ukungathumelani imilayezo, ukudla namtjhana ukukhambakhamba ephatjhisini ngokungatlhogekiko phakathi nehlelo.
7. Singakufumana begodu sikudlulisele njani ukuqabuleka nesizihlanganisa nabanakwethu?
7 Ubudlelwana Obuqabulako: Umhlangano usinikela amathuba angeziweko wokuthabela ubunye bethu bobuKrestu obuqabulako nobuzalwana. (Rha. 133:1-3) Kubayini ungathathi amagadango wokuthoma ‘wokukhulisa ithando’ nokuzihlanganisa nabanakwenu nabodadwenu abavela kwamanye amabandla? (2 Kor. 6:13, NW) Ungazenzela umnqopho wokwazi umuntu oyedwa namtjhana umndeni qobe langa. Isikhathi sedina sikunikela ithuba elihle lokwenza lokho. Ngalokho yiza nokudla okulula begodu uthabela ukudla nobudlelwana nabanye endaweni yomhlangano kunokuphuma uyokuthenga ukudla namtjhana ukuyokudlela endaweni yokudlela. Lokhu kungenza sibe nabangani abatjha nabahlalako.
8. Kubayini kufuze sikhethe ukusiza ngomsebenzi emhlanganweni, begodu singakwenza njani lokho?
8 Qala bona kuqabula kangangani ukusebenza ndawonye nesikhulekela nabo ekonzweni ecwengileko! Ungasiza ngokuzithandela emhlanganweni namtjhana usize ibandla langekhenu esabelweni sokuhlanza? (Rha. 110:3) Nengabe akukho lapho osele wabelwe ukusebenza khona, sibawa uthinte uMnyango Wekonzo Yokuzithandela emhlanganweni. Izandla ezinengi zenza umsebenzi uthabise begodu ube lula.
9. Kubayini kufuze sitjheje indlela esiziphatha nesibonakala ngayo emhlanganweni?
9 Ukuziphatha Kwethu Kuyaqabula Kwabasiqalileko: Siziimvakatjhi zomhlangano phakathi kwawo woke amalanga amathathu womhlangano, ingasi kwaphela ngesikhathi sehlelo. Abasiqalileko nesisemhlanganweni kufuze babone umahluko oqabulako phakathi kwethu nalabo abangasibo aboFakazi. (1 Pit. 2:12) Indlela esimbatha nesiziphatha ngayo emhlanganweni, endaweni yokulala neendaweni zokudlela kufuze idumise uJehova. (1 Thi. 2:9, 10) Nesifake amabhejethu, abasiqalileko bazokwazi ukusibona bona siboFakazi BakaJehova. Lokhu kuzosinikela ithuba lokubatjela ngomhlanganwethu nokunikela ubufakazi obungeziweko.
10. Khuyini esingayenza ukuqinisekisa bona abasebenza ehotela, endaweni yokudlela babe nombono omuhle ngomhlanganwethu?
10 Singabambisana njani nabantu behotela, endlini yeemvakatjhi nendaweni yokudlela? Ngokungabeki indawo enengi kunaleyo esizoyisebenzisa, njengombana lokhu kuzokuvimbela ezinye iimvakatjhi ekufumaneni amakamura. Nengabe ehotela namtjhana endlini yeemvakatjhi kuyatinazela ngesikhathi okufuze singene nofana siphume ngaso, kufuze sibekezele begodu sibe nomusa. (Khol. 4:6) Kufuze sinikele abasebenza endaweni yokudlela, ehotela namtjhana abasiphathela iinkhwama endlini yeemvakatjhi, abasihlanzela izindlu nabenza ezinye iinkonzo ithiphu ejayelekileko endaweni.
11. Ngikuphi okuhlangabezanwe nakho okutjengisa ubufakazi obuhle okumphumela wokuziphatha kwethu kobuKrestu?
11 Ngiwuphi umphumela ukuziphatha kwethu okuhle emhlanganweni okuba nawo kwabanye? Ngokwesihloko sephephandaba, umphathi wendawo ebeyisetjenziselwa umhlangano wathi: “Abantu bakhona banemikghwa emihle. Siyakuthabela ukuba nabo qobe mnyaka.” Nyakenye umuntu ongasuye uFakazi walahlekelwa sikhwama sakhe ehotela egade isetjenziswa ngegade beze emhlanganweni. Lapho isikhwama sibuyiselwa kumphathi wehotela sisesenakho koke okugade kungaphakathi, umphathi watjela umnikazi wesikhwama: “Ube netjhudu bona aboFakazi BakaJehova bebanomhlangano eduze kwalapha, begodu ihotela beyizele bona. Ngaphandle kwalokho bengekhe usifumane isikhwama sakho.”
12. Njengombana umhlangano utjhidela, khuyini okufuze sizimisele ukuyenza, begodu kubayini?
12 Iimhlangano yanonyaka itjhidela msinyana khulu. Kwenziwa iimzamo eemkhulu bona ihlelo nomhlangano kuqabule. Kwenze umnqophakho ukuba khona woke amalanga amathathu la, begodu zilungiselele lokho uJehova nehlanganwakhe abakubekele khona. Zimisele ukuqabula abanye ngemikghwakho emihle, ubudlelwana bethabo nangokuziphatha kwakho okuhle. Ngalokho wena nabanye nizozizwa ngendlela omunye obekakhona emhlanganweni wanyakenye azizwa ngayo, watlola, “Akukho okhunye engikukhumbulako okwanelisa njengomhlangano lo!”
[Umkhangiso osekhasini 4]
Njengesikhathini esidlulileko, iimveke eentathu ngaphambi kokuthoma komhlangano, sizokuhlanganyela ejimeni lokumemela abanye emhlanganweni
[Umkhangiso osekhasini 6]
Indlela esimbatha nesiziphatha ngayo emhlanganweni, endaweni yokulala neendaweni zokudlela kufuze idumise uJehova
[Umkhangiso osekhasini 7]
Zimisele ukuqabula abanye ngemikghwakho emihle, ubudlelwana bethabo nangokuziphatha kwakho okuhle
[Ibhoksi emakhasini 4-7]
Esikukhunjuzwa Ngomhlangano Wesigodi Ka-2011
◼ Isikhathi Umhlangano Ozokuthoma Ngaso: Umhlangano uzokuthoma ngo-9:00 ekuseni woke amalanga amathathu la. Nekwenziwa isaziso sokudlala umbhino othoma umhlangano, soke kufuze sihlale eentulweni zethu bona umhlangano uthome ngendlela ehloniphekileko. Umhlangano uzokuphela ngo-4:15 ntambama ngeLesihlanu, ngoMgqibelo uzokuphela ngo-4:30 ntambama, ngoSondarha uzokuphela ngo-3:05 ntambama.
◼ Indawo Yokuphaga Iinkoloyi: Kiyo yoke ikundla yomhlangano lapho sabelwe ukuphaga khona iinkoloyi, indawo izokufumaneka simahla kilabo abafike qangi. Njengombana indawo yokuphaga ngokujayelekileko ilinganiselwe, kufuze nizalise iinkoloyi ngendlela okungakghoneka ngayo.
◼ Indawo Yokulala: Abarhuweleli abatlhoga indawo yokulala bangafumana amaforomo wokwenza isibawo sendawo athi: Isicelo Sendawo Yokulala (CO-5-ZU). IKomidi Yekonzo Yebandla kufuze icabangele ukufaneleka komrhuweleli, isebenzisa iinlayezo ezise foromweni kuhlanganise nencwadini kaDisemba 14, 2010, etlolelwe zoke iinhlopha zabadala. IIungiselelweli lenzelwe kwaphela abarhuweleli abaziphethe kuhle kuhlanganise nabantwababo abaziphatha kuhle.
◼ Ukubulunga Iintulo: Iintulo zingabekelwa kwaphela labo okhamba nabo ngekoloyi namtjhana ohlala nabo ekhaya, kuhlanganise nalabo ofunda nabo iBhayibhili.—1 Kor. 13:5.
◼ Ukudla Kwedina: Sibawa uziphathele ukudla kwakho kunokobana uphume ekundleni yomhlangano bona uyokuthenga ukudla ngesikhathi sedina. Ungaphatha isikhwama siqandisi esincani ongakghona ukusifaka ngaphasi kwesitulo. Iinkhwama qandisi ezikulu kufuze zibekwe ngokulandela isinqophiso sabalindi. Izinto eziphadlhekako namabhodlelo wotjwala azikavunyelwa endaweni yomhlangano.
◼ Iimnikelo: Singatjengisa ukuthokoza kwethu ngamalungiselelo womhlangano ngokunikela ngokuzithandela emsebenzini wephasi loke eWolweni lethu LoMbuso namtjhana emhlanganweni. Nengabe ufuna ukunikela ngetjhege, sibawa uqinisekise i-akhawunti yakho neKomidi Yomhlangano. Iimtjhini yokusebenzisa amakarada webhanga izokufumaneka eendaweni ezikhethiweko zomhlangano bona unikele ngelinye nelinye ikarada lebhanga. Sibawa uthinte iKomidi Yomhlangano ukufumana bonyana umtjhini loyo ukuphi.
◼ Iingozi Nobujamo Oburhabako: Nengabe kuvela ubujamo oburhabako endaweni yomhlangano, sibawa nithinte umlindi oseduze, msinyana uzokwazisa beSizo Lokuthoma bona iinsebenzi ezibanduliweko zesizo lokuthoma zikghone ukuhlola ubujamo begodu zinikele ngesizo.
◼ Iinhlahla: Nengabe kuneenhlahla ozisebenzisako, sibawa uze nezaneleko ngombana azizokuba khona emhlanganweni.
◼ Amanyathelo: Qobe mnyaka abantu abanengi bayalimala ngebanga lamanyathelo. Kuhle ukukhetha amanyathelo afaneleko, akulingana kuhle nazokwenza ukhambe kuhle eentepisini, ezikweni leensimbi nezinye iindawo ezingaba yingozi.
◼ Ukurekhoda: Imitjhini yokugadangisa akukafaneli ifakwe egezini yekundla yomhlangano nofana erhelweni lomdumo begodu imitjhini le ingasetjenziswa kwaphela ngendlela engekhe ithikazise abanye.
◼ Iinkoloyana Zabantwana (Ipremu): Iinkoloyana zabantwana akukafuzi zingeniswe endaweni yomhlangano. Nokho, iintulo zabantwana zokuphepha ezingabekwa esitulweni hlanu kwababelethi zamukelekile.
◼ Amafutha Anuka Kamnandi: Iimhlangano eemnengi ibanjelwa eendaweni ezivalekileko lapho kuneemtjhini engenisa umoya. Ngalokho-ke, sizabe sitjengisa umusa kwabanye ngokusebenzisa amafutha anuka kamnandi anamandla ngokulingeneko bona singalimazi abantu abaneemraro yokuphefumula.—1 Kor. 10:24.
◼ Siza Ulandelele (S-43-ZU): Iforomo elithi Siza Ulandelele (S-43-ZU) kufuze lisetjenziselwe ukutlola imininingwana malungana nanyana ngubani otjengise ikareko nesitjhumayela ngokungakahlelwa emhlanganweni. Abarhuweleli kufuze baphathe iforomo elilodwa namtjhana amabili emhlanganweni. Amaforomo azalisiweko kufuze asiwe endaweni yeencwadi nofana anikelwe unobhala webandla langekhenu.—Qala INkonzo Yethu YoMbuso kaNovemba 2009, k. 4.
◼ Iindawo Zokudlela: Dumisa ibizo lakaJehova ngokuziphatha kuhle eendaweni zokudlela. Kuyikambiso ukutjhiya ithiphu ethoma ku-10 kuyaku-15 phesende.
◼ Ikonzo Yokuzithandela: Ithabo esilifumana ngokuba khona emhlanganweni liba likhulu nengabe sizinikela ngokuzithandela ekusizeni ngomsebenzi obandakanyekileko. (IZe. 20:35) Nanyana ngubani othanda ukusiza kufuze aye eMnyangweni Wekonzo Yokuzithandela emhlanganweni. Abantwana abangaphasi kweemnyaka eli-16 nabo bangasiza ngokusebenza nababelethi namtjhana abanye abantu abadala abavunyelwe babelethi babo.
◼ Iingoma: Amabandla angathanda ukuphrakthisa iingoma zomhlangano kusesenesikhathi. Iingoma zangeLesihlanu: 5, 18, 31, 30, 86, no-19. Iingoma zangoMgqibelo: 93, 40, 59, 24, 89, no-134. Iingoma zangoSondarha: 109, 99, 133, 69, 64, no-2.
[Ibhoksi elisekhasini 5]
Sizozikhambisa Njani Iimemo?
Bona sihlanganise isimethu, kufuze sibe bafitjhani. Singatjho into efana nale: “Lotjhani. Sihlanganyela emsebenzini wephasi mazombe wokukhambisa isimemo nasi. Nasi sakho. Uzokufumana imininingwana engeziweko esimemwenesi.” Ingaphambili lesimemwesi livusa ikareko, ngalokho sinikele umninimuzi bona akwazi ukusibona ngaphambili. Tjhiseka. Newuhlanganyela ekukhambiseni iimemo ngeempelaveke, ungakhambisa nabomagazini nekufanelekako.