“Philani Ipilo Elungileko Hlangana Nabangakholwako”

1. Kubayini kuqakathekile ngathi bona siragela phambili siziphatha kuhle emhlanganweni ozako?

¹ Sidosa amehlo wabantu abasemphakathi ngeenkhathi zemihlanganwethu yesigodi eba khona qobe mnyaka, ngalokho kuqakathekile bona ngokuziphatha kwethu simjamele kuhle uZimu esimkhonzako. (Lev. 20:26) Imikghwethu emihle kuhlanganise ukumbatha nokuzilungisa kwethu kufuze kusiveze ngokukhanyako bona sibalandeli bakaKrestu beqiniso. Njengombana sizokuya emhlanganweni wesigodi nofana weentjhabatjhaba, singaphila njani ‘ipilo elungileko hlangana nabangakholwako’ begodu sinikele uBabethu wezulwini iphazimulo?—1 Pit. 2:12.

2. Ngimaphi amathuba wokutjengisa ubuntu bobuKrestu esizokuba nawo nasisemhlanganweni?

² Tjengisa Ubuntu BobuKrestu: Ithando esilitjengisa komunye nomunye nendlela esiphatha ngayo ‘abantu abatjhili’ ihluke ngokupheleleko emoyeni wephasi. (Kol. 3:10; 4:5; 2 Thim. 3:1-5) Kufuze sibe nomusa begodu sibekezele nesisebenzelana neensebenzi zehotela nezeendawo zokudlela, ngitjho nanyana kuphakama imiraro. Imikghwa emihle izosenza bona sitjhiye ithiphu kilabo abasisizako.

3. Ngiziphi iinkhumbuzo ezinikelwe ababelethi, begodu kubayini?

³ Ababelethi kufuze batlhogomele khulu abantwana babo endaweni yomhlangano, eendaweni zokudlela nemahotela. (IzA. 29:15) Omunye umphathi wehotela wathi esibilini: “Siyanithanda yazi. Imindeni nabantwabenu iziphethe kuhle begodu iyahlonipha. Zoke iinsebenzi zikhuluma ngani, begodu sifisa ngathana ningahlala la qobe ngepela veke.”

4. Nesisendaweni yomhlangano, kufuze siqaleke njani?

⁴ Ukumbatha Ngokuhlonipheka: Izambatho zethu nasiya emhlanganweni kufuze zifaneleke begodu zihlonipheke, zingatjengisi iintayela ezeqisako zephasi. (1 Thim. 2:9) Ngitjho nalokha nesifika ehotela begodu nasiphumako ngeenkhathi zokuphumula ngaphambi nengemva kwalokho, sifuna ukubalekela ukumbatha izembatho ezingasidosela amehlo nofana ukuba madlabha. Sizozikhakhazisa ngokumbatha amabhejethu womhlangano, singabi neenhloni nakuvela ithuba lokufakaza. Ukuqaleka nokuziphatha kwethu okuhle nasiya emhlanganweni ozako angekhe kukghwathe kwaphela abantu abaneenhliziyo ezithembekileko bona bafumane umlayezo weBhayibheli osindisa ukuphila kodwana kuzothabisa uJehova.—Zef. 3:17.

Iinkhumbuzo ZomHlangano Ka-2014

◼ Iinkhathi Zehlelo Lomhlangano: Umbhino othula umhlangano uzokuthoma ngo-9:00 ekuseni woke amalanga amathathu. Ngesikhatheso, soke kufuze sihlale eentulweni zethu bona umhlangano uthome ngendlela ehloniphekileko. Kuzokuphethwa umhlangano ngengoma nomthandazo ngabo-4:⁠25 ngeLesihlanu nangoMgqibelo ntambama, ngoSondarha uzokuphela ngabo-3:20 ntambama.

◼ Imihlangano Yeentjhabatjhaba: Kezinye iindawo kuzabe kunemihlangano yeentjhabatjhaba. Kufanele sikhumbule bona kunamabandla neenkhambeli ezivela kezinye iinarha ezimenywe yi-ofisi legatja ngokukhethekileko ngemva kobana libalisise iintulo, iindawo zokuphaga, namahotela afumanekako. Kungaba nesiminyaminya nengabe abarhuweleli baya emhlanganweni weentjhabatjhaba bangakamenywa kiwo. Nengabe ubujamo bakho bubizela bona uye komunye umhlangano ongakabelwa kiwo, kufuze ungayi emhlanganweni weentjhabatjhaba.

◼ Indawo Yokuphaga Iinkoloyi: Kiyo yoke ikundla yomhlangano lapho sabelwe ukuphaga khona iinkoloyi, indawo izokufumaneka simahla kilabo abafike qangi. Njengombana indawo yokuphaga ngokujayelekileko ilinganiselwe, kufuze nizalise iinkoloyi ngendlela okungakghoneka ngayo.

◼ Indawo Yokulala: Abarhuweleli abatlhoga indawo yokulala bangafumana amaforomo wokwenza isibawo sendawo athi: Isicelo Sendawo Yokulala (CO-5a-ZU). IKomidi yeKonzo yeBandla kufuze icabangele ukufaneleka komrhuweleli, isebenzisa iinlayezo eziseforomweni kuhlanganise nencwadi ka-Oktoba 27, 2013, etlolelwe zoke iinhlopha zabadala. IIungiselelweli lenzelwe kwaphela abarhuweleli abaziphethe kuhle kuhlanganise nabantwababo abaziphatha kuhle.

◼ Ukubekisa Iintulo: Iindawo zomhlangano nezivulwako ekuseni, sibawa bona ningarhabeli ukuyobekisa iindawo zokuhlala lapho nithanda khona kube ngathi nibangisana nabanye abeze emhlanganweni. Umoya wokuzidela ositjhukumisela bona sifunele abanye okuhle usibonakalisa simaKrestu weqiniso begodu wenza abantu abasiqalileko badumise uZimu. (Jwa. 13:34, 35; 1 Kor. 13:4, 5; 1 Pit. 2:12) Iintulo zingabekelwa kwaphela labo ohlala nabo ekhaya nofana okhamba nabo ngekoloyi namkha iimfundo zakho zeBhayibheli. Iintulo ezikhethekileko zibekelwa abantu abalupheleko nabagulako. Njengombana iintulwezi zilinganiselwe, babantu ababili nofana munye kwaphela abazokusiza ngokunqophileko abalupheleko namkha abagulako abangahlala nabo.

◼ Ukudla Kwedina: Sibawa uziphathele ukudla kunokobana uphume ekundleni yomhlangano bona uyokuthenga ukudla ngesikhathi sedina. Ungaphatha isikhwama siqandisi esincani ongakghona ukusifaka ngaphasi kwesitulo. Iinkhwama nqandisi ezikulu kufuze zibekwe ngokulandela isinqophiso sabalindi. Izinto eziphadlhekako notjwala abukavunyelwa endaweni yomhlangano.

◼ Iimnikelo: Singatjengisa ukuthokoza kwethu ngamalungiselelo womhlangano ngokunikela ngokuzithandela emsebenzini wephasi loke emhlanganweni. Nanyana ngimaphi amatjhege kufuze abhadelwe “ku-Christian Congregation of Jehovah’s Witnesses of South Africa.” Ezinye iindawo zemihlangano zizokuba neemtjhini yebhanga engasetjenziselwa ukwenza umnikelo ngamakarada webhanga ngaphandle kokunikela ngokunqophileko ngemali nangamatjhege.

◼ Iinhlahla: Nengabe kuneenhlahla ozisebenzisako, sibawa uze nezaneleko ngombana azizokuba khona emhlanganweni. Amanjektjheni neenalidi zabantu abanobulwelwe beswigiri kufuze zilahlwe endaweni efaneleko yeenzibi eziyingozi ingasi emgqomini weenzibi eendaweni zomhlangano nemahotela.

◼ Zokuphepha: Sibawa nitjheje khulu ekuvikeleni ukulimala ngebanga lokutjhelela nokukhutjwa. Qobe mnyaka abantu abanengi bayalimala ngebanga lamanyathelo, khulukhulu amanyathelo aphakamileko. Kuhle ukukhetha amanyathelo afaneleko, akulingana kuhle nazokwenza ukhambe kuhle eentepisini, ezikweni leensimbi nezinye iindawo ezingaba yingozi.

◼ Iinkoloyana Zabantwana (Ipremu): Iinkoloyana zabantwana akukafuzi zingeniswe endaweni yomhlangano. Nokho, iintulo zabantwana zokuphepha ezingabekwa esitulweni hlanu kwababelethi zamukelekile.

◼ Amaphefumu: Imihlangano eemnengi ibanjelwa eendaweni ezivalekileko lapho kuneemtjhini engenisa umoya. Ngalokho-ke, sizabe sitjengisa umusa kwabanye ngokusebenzisa amaphefumu anamandla ngokulingeneko bona singalimazi abantu abaneemraro yokuphefumula.—1 Kor. 10:24.

◼ Amaforomo Athi Siza Ulandelele (S-43-ZU): Iforomo elithi Siza Ulandelele kufuze lisetjenziselwe ukutlola imininingwana malungana nanyana ngubani otjengise ikareko nesitjhumayela ngokungakahlelwa emhlanganweni. Amaforomo azalisiweko kufuze asiwe eNdaweni yeeNcwadi nofana anikelwe unobhala webandla langekhenu.

◼ Iindawo Zokudlela: Dumisa ibizo lakaJehova ngokuziphatha kuhle eendaweni zokudlela. Mbatha ngendlela efanele isikhonzi esimKrestu. Tjhiya ithiphu efaneleko nengabe kuyikambiso ukwenza njalo.

◼ Ikonzo Yokuzithandela: Nanyana ngubani othanda ukusiza kufuze aye eMnyangweni weKonzo yokuziThandela emhlanganweni. Abantwana abangaphasi kweminyaka eli-16 nabo bangasiza ngokusebenza nababelethi namtjhana abanye abantu abadala abavunyelwe babelethi babo.