UkuziPhatha OkuPhazimulisa UZimu
1. Kubayini kulula ukubona aboFakazi bakaJehova nebasemihlanganweni yesigodi?
1 Nasisemihlanganweni yesigodi, kulula bona abantu basibone. Emadorobheni amanengi lakuzobanjelwa khona imihlangano, iimbikindaba zazisa umphakathi ngokuba khona kwethu. Amahotela neendawo zokudlela ngokujayelekileko zizala iinkhambeli zomhlangano, nabantu abahlala endaweni leyo babona iimvakatjhi ezinengi zimbethe amabheji womhlangano. Okulandelako ngezinye zeenkhumbuzo ezizosisiza bona siphazimulise uZimu ngokuziphatha kwethu okuhle nasisedorobheni lomhlangano.—1 Pt. 2:12.
2. SingamPhazimulisa njani uZimu ngokumbatha ngesizotha nesisedorobheni lomhlangano?
2 UkuMbatha NgesiZotha: Ukumbatha kwethu ngesizotha nasisemhlanganweni kanengi kukara abasiqalileko. Nokho, indlela esimbatha ngayo ngezinye iinkhathi—nasisehotela, eendaweni zokudlela, nesiyokuthenga begodu nokhunye—kungenza litho likhulu endleleni abasiqala ngayo. Nanyana singakutlhogi ukumbatha ngendlela efanako nasiya kezinye iindawo, kodwana esikumbathako kufuze kube nesizotha, kuhlonipheke begodu kungasidoseli amehlo khulu. Abasiqalileko kufuze bakghone ukubona umehluko hlangana nathi nabantu abangakholwako. (Rom. 12:2) Ngaphezu kwalokho, kufuze simbathe amabhejethu womhlangano, lokhu kuzokhangisa umhlangano, kuvule amathuba wokufakaza, begodu kwenze ezinye iinkhambeli zikghone ukusibona.
3. Singakutjengisa njani ukubekezela nokuziphatha ngehlonipho?
3 UkuBekezela NokuziPhatha NgeHlonipho: Esikhathini lapho abantu abanengi ephasini bangabazicabangelako nabangathokoziko, qala bona kuqabula kangangani ukubekezela nokuziphatha kwethu ngehlonipho ebantwini abasiqalileko, njengenseebenzi zehotela neendaweni zokudlela! (2 Tm. 3:1-5) Nesibekela abanye iintulo nofana nesijame umjeje wokufumana okutjhatjhaluliweko emhlanganweni, akukafuzi sizicabangele thina kwaphela kodwana kufuze sicabangele nabanye. (1 Ko. 10:23, 24) Ngemva kokuya kokuthoma emhlanganweni, enye indoda enekareko yathi, “ayikho nayinye yeenkulumo engizikhumbulako ezanikelwa ngelangelo, kodwana engikukhumbulako kuziphatha okuhle kwaboFakazi.”
4. Kubayini kufuze sikucabangele ukusebenza ngokuzithandela emhlanganweni nengabe ubujamo buyasivumela?
4 Iinsebenzi ZokuziThandela EziziniKeleko: Ukusebenza ngokuzithandela litshwayo lamaKrestu weqiniso. (Rhu. 110:3) Ungasiza na ngokuzithandela emhlanganweni? Komunye umhlangano, abanye abazalwana nabodade abama-600 bakhamba bayokuhlanza indawo ngaphambi komhlangano. Abantu abasebenza lapho bathi: “Siyathoma ukubona into enjenga le! Kubudisi ukukholwa bona boke abantu laba ziinsebenzi zokuzithandela.” Siqale phambili emihlanganweni yesigodi ka-2013 nethuba esizokuba nalo, ingasi lokulalela nokufunda kwaphela ngoZimu kodwana nelokumphazimulisa.
[Ibhoksi elisekhasini 3-6]
IinKhumbuzo ZomHlangano WesiGodi Ka-2013
◼ IsiKhathi UmHlangano OzokuThoma Ngaso: Umbhino othula umhlangano uzokuthoma ngo-9:00 ekuseni woke amalanga amathathu. Ngesikhatheso, soke kufuze sihlale eentulweni zethu bona umhlangano uthome ngendlela ehloniphekileko. Kuzokuphethwa umhlangano ngengoma nomthandazo ngo-4: 30 ngeLesihlanu nangoMgqibelo ntambama, ngoSondarha uzokuphela ngo-3:15 ntambama.
◼ Indawo Yokuphaga Iinkoloyi: Kiyo yoke ikundla yomhlangano lapho sabelwe ukuphaga khona iinkoloyi, indawo izokufumaneka simahla kilabo abafike qangi. Njengombana indawo yokuphaga ngokujayelekileko ilinganiselwe, kufuze nizalise iinkoloyi ngendlela okungakghoneka ngayo.
◼ Indawo Yokulala: Abarhuweleli abatlhoga indawo yokulala bangafumana amaforomo wokwenza isibawo sendawo athi: Isicelo Sendawo Yokulala (CO-5-ZU). IKomidi YeKonzo YeBandla kufuze icabangele ukufaneleka komrhuweleli, isebenzisa iinlayezo eziseforomweni kuhlanganise nencwadi kaDisemba14, 2010, etlolelwe zoke iinhlopha zabadala. IIungiselelweli lenzelwe kwaphela abarhuweleli abaziphethe kuhle kuhlanganise nabantwababo abaziphatha kuhle.
◼ Ukubulunga Iintulo: Iintulo zingabekelwa kwaphela labo okhamba nabo ngekoloyi namtjhana ohlala nabo ekhaya, kuhlanganise nalabo ofunda nabo iBhayibhili. Iintulo zalabo abalupheleko nabagulako zilinganiselwe, ngalokho angeze kwakghoneka bahlale namalunga woke womndeni. Sibawa nibekele labo abalupheleko, abagulako nalabo ababatlhogomeleko iintulo.—1 Kor. 13:5.
◼ Ukudla Kwedina: Sibawa uziphathele ukudla kwakho kunokobana uphume ekundleni yomhlangano bona uyokuthenga ukudla ngesikhathi sedina. Ungaphatha isikhwama siqandisi esincani ongakghona ukusifaka ngaphasi kwesitulo. Iinkhwama qandisi ezikulu kufuze zibekwe ngokulandela isinqophiso sabalindi. Izinto eziphadlhekako namabhodlelo wotjwala azikavunyelwa endaweni yomhlangano.
◼ Iimnikelo: Singatjengisa ukuthokoza kwethu ngamalungiselelo womhlangano ngokunikela ngokuzithandela emsebenzini wephasi loke emhlanganweni. Nanyana ngimaphi amatjhege kufuze abhadelwe “kuChristian Congregation of Jehovah’s Witnesses of South Africa.” Ezinye iindawo zemihlangano zizokuba neemtjhini yebhanga engasetjenziselwa ukwenza umnikelo ngamakarada webhanga ngaphandle kokunikela ngemali ngokunqophileko nangamatjhege.
◼ Iinhlahla: Nengabe kuneenhlahla ozisebenzisako, sibawa uze nezaneleko ngombana azizokuba khona emhlanganweni. Amanjektjheni wabantu abanobulwelwe beswigiri neenalidi kufuze zilahlwe endaweni efaneleko njengeenzibi eziyingozi ingasi emgqomini weenzibi eendaweni zomhlangano nemahotela.
◼ Amanyathelo: Qobe mnyaka abantu abanengi bayalimala ngebanga lamanyathelo, khulukhulu amanyathelo aphakamileko. Kuhle ukukhetha amanyathelo afaneleko, akulingana kuhle nazokwenza ukhambe kuhle eentepisini, ezikweni leensimbi nezinye iindawo ezingaba yingozi.
◼ Iinkoloyana Zabantwana (Ipremu): Iinkoloyana zabantwana akukafuzi zingeniswe endaweni yomhlangano. Nokho, iintulo zabantwana zokuphepha ezingabekwa esitulweni hlanu kwababelethi zamukelekile.
◼ Amafutha Anuka Kamnandi: Imihlangano eemnengi ibanjelwa eendaweni ezivalekileko lapho kuneemtjhini engenisa umoya. Ngalokho-ke, sizabe sitjengisa umusa kwabanye ngokusebenzisa amafutha anuka kamnandi anamandla ngokulingeneko bona singalimazi abantu abaneemraro yokuphefumula.—1 Kor. 10:24.
◼ Amaforomo Athi Siza Ulandelele (S-43-ZU): Iforomo elithi Siza Ulandelele (S-43-ZU) kufuze lisetjenziselwe ukutlola imininingwana malungana nanyana ngubani otjengise ikareko nesitjhumayela ngokungakahlelwa emhlanganweni. Amaforomo azalisiweko kufuze asiwe endaweni yeencwadi nofana anikelwe unobhala webandla langekhenu.
◼ Iindawo Zokudlela: Dumisa ibizo lakaJehova ngokuziphatha kuhle eendaweni zokudlela. Mbatha ngendlela efanele isikhonzi esimKrestu. Kuyikambiso ukutjhiya ithiphu ethoma ku-10 kuyaku-15 phesende.
◼ IKonzo Yokuzithandela: Nanyana ngubani othanda ukusiza kufuze aye eMnyangweni weKonzo yokuziThandela emhlanganweni. Abantwana abangaphasi kweminyaka eli-16 nabo bangasiza ngokusebenza nababelethi namtjhana abanye abantu abadala abavunyelwe babelethi babo.