Iinkhumbuzo Zomhlangano
Iinkhathi Zehlelo Lomhlangano: Amahege wekundla yomhlangano azokuvulwa ngabo-7:00 ekuseni. Umbhino othula umhlangano uzokuthoma ngo-9:00 ekuseni woke amalanga amathathu. Ngesikhatheso, soke kufuze sihlale eentulweni zethu bona umhlangano uthome ngendlela ehloniphekileko. Kuzokuphethwa umhlangano ngengoma nomthandazo ngabo-4:35 ngeLesihlanu nangoMgqibelo ntambama, ngoSondarha uzokuphela ngabo-3:25 ntambama.
‘Dumisani UJehova Ngengoma’: Kusukela ekadeni abantu bakaZimu bebadumisa uJehova ngeengoma, nanamhlanjesi umbhino usadlala indima eqakathekileko ekukhulekeleni kweqiniso. (Rhu. 28:7) Ingcenye ngayinye yomhlangano wesifunda ithoma ngombhino othula umhlangano. Umbhino lo othula umhlangano awusimvumo nje ongatjho litho, kodwana ulungiselelwe ukuthi sikwazi ukufunda besidumise uJehova. Yeke, usihlalo nakethula umbhino lo, lokho kuzokutjho ukuthi sekusikhathi sokuhlala phasi siwulalele ngehliziyo yethu yoke umbhino loyo. Nasenza njalo sizokutjengisa ukuthi siyayihlonipha imizamo eyenziwa malunga we-Watchtower orchestra. Kabili ngomnyaka abazalwanaba nabodade baya ePatterson, eNew York, ngeendleko zabo bona benze umbhino okarisako lo ukwenzela ukuthi sikwazi ukuwuthabela. Ngemva kokuthi sekulalelwe umbhino othula umhlangano, woke umuntu kufuze ahlanganyele ngokudumisa uJehova sivume iingoma zethu zomBuso.
Indawo Yokuphaga Iinkoloyi: Kiyo yoke ikundla yomhlangano lapho sabelwe ukuphaga khona iinkoloyi, indawo izokufumaneka simahla kilabo abafike qangi. Njengombana indawo yokuphaga ngokujayelekileko ilinganiselwe, kufuze nizalise iinkoloyi ngendlela okungakghoneka ngayo. Ngilabo kwaphela abanamakarada wabakhubazekileko abazokuvunyelwa ukuphaga eendaweni abalungiselelwe zona.
Ukubekisa Iintulo: Iindawo zomhlangano nezivulwako ekuseni, sibawa bona ningarhabeli ukuyobekisa iindawo zokuhlala lapho nithanda khona kube ngathi nibangisana nabanye abeze emhlanganweni. Sibawa nicabangele abanye, sidele izinto esizifunako ngebanga labazalwana bethu. Umoya wokuzidela ositjhukumisela bona sifunele abanye okuhle usibonakalisa simaKrestu weqiniso begodu wenza abantu abasiqalileko badumise uZimu. (Jwa. 13:34, 35; 1 Kor. 13:5; 1 Pit. 2:12) Iintulo zingabekelwa kwaphela labo ohlala nabo ekhaya nofana okhamba nabo ngekoloyi namkha iimfundo zakho zeBhayibheli. Sibawa ningabeki izinto eentulweni eningeze nihlale kizo. Lokho kuzokwenza abanye bakwazi ukubona ukuthi indawo yokuhlala isese khona. Iintulo ezikhethekileko zibekelwa abantu abalupheleko nabagulako. Njengombana iintulwezi zilinganiselwe, babantu ababili nofana munye kwaphela abazokusiza ngokunqophileko abalupheleko namkha abagulako abangahlala nabo.
Ukumbatha Ngokuhlonipheka: Izambatho zethu nasiya emhlanganweni kufuze zifaneleke begodu zihlonipheke, zingatjengisi iintayela ezeqisako zephasi. (1 Thim. 2:9) Ngitjho nalokha nesifika ehotela begodu nasiphumako ngeenkhathi zokuphumula ngaphambi nangemva kwalokho, sifuna ukubalekela ukumbatha izembatho ezingasidosela amehlo nofana ukuba madlabha. Sizozikhakhazisa ngokumbatha amabhejethu womhlangano, singabi neenhloni nakuvela ithuba lokufakaza. Ukuqaleka nokuziphatha kwethu okuhle nasiya emhlanganweni ozako angekhe kukghwathe kwaphela abantu abaneenhliziyo ezithembekileko bona bafumane umlayezo weBhayibheli osindisa ukuphila kodwana kuzokuthabisa uJehova.—Zef. 3:17.
Ukuba Nemikghwa Emihle Endabeni Yokusebenzisa Iinsetjenziswa Ze-Elektroniki: Sitjengisa imikghwa emihle phakathi komhlangano, ngokuqupha abomaliledinini bethu namkha ezinye iinsetjenziswa ze-elektroniki zibe sezingeni lokuthi zingathikazisi abanye. Nangabe sisebenzisa ikhamera, ividiyo erekhodako, nofana i-tablet nokhunye, sifuna ukuba babantu abacabangelako ngokuthi singathikazisi abanye namkha siba sithe. Sitjengisa imikghwa emihle nangokuthi singathumelani imilayezo ngokungatlhogeki hlangana nomhlangano.
Ukudla Kwedina: Sibawa uziphathele ukudla kunokobana uphume ekundleni yomhlangano bona uyokuthenga ukudla ngesikhathi sedina. Ungaphatha isikhwama siqandisi esincani ongakghona ukusifaka ngaphasi kwesitulo. Iinkhwama nqandisi ezikulu zepikinigi nezinto zokuphatha ezimarhalasi azikavunyelwa endaweni yomhlangano.
Iimnikelo: Singatjengisa ukuthokoza kwethu ngamalungiselelo womhlangano ngokunikela ngokuzithandela emsebenzini wephasi loke emhlanganweni. Nanyana ngimaphi amatjhege kufuze abhadelwe “ku-Christian Congregation of Jehovah’s Witnesses of South Africa.” Kungenziwa neminikelo ngokusebenzisa amakarada webhanga nofana wokuthenga ngesikolodo.
Iinhlahla: Nengabe kuneenhlahla ozisebenzisako, sibawa uze nezaneleko ngombana azizokuba khona emhlanganweni. Amanjektjheni neenalidi zabantu abanobulwelwe beswigiri kufuze zilahlwe endaweni efaneleko yeenzibi eziyingozi ingasi emgqomini weenzibi eendaweni zomhlangano nemahotela.
Zokuphepha: Sibawa nitjheje khulu ekuvikeleni ukulimala ngebanga lokutjhelela nokukhutjwa. Qobe mnyaka abantu abanengi bayalimala ngebanga lamanyathelo, khulukhulu amanyathelo aphakamileko. Kuhle ukukhetha amanyathelo afaneleko, akulingana kuhle nazokwenza ukhambe kuhle eentepisini, ezikweni leensimbi nezinye iindawo ezingaba yingozi.
Iinkoloyana Zabantwana (Ipremu): Iinkoloyana zabantwana akukafuzi zingeniswe endaweni yomhlangano. Nokho, iintulo zabantwana zokuphepha ezingabekwa esitulweni hlanu kwababelethi zamukelekile.
Amaphefumu: Imihlangano eemnengi ibanjelwa eendaweni ezivalekileko lapho kuneemtjhini engenisa umoya. Ngalokho-ke, sizabe sitjengisa umusa kwabanye ngokusebenzisa amaphefumu anamandla ngokulingeneko bona singalimazi abantu abanemiraro yokuphefumula.—1 Kor. 10:24.
Iindawo Zokudlela: Dumisa ibizo lakaJehova ngokuziphatha kuhle eendaweni zokudlela. Mbatha ngendlela efanele isikhonzi esimKrestu. Tjhiya ithiphu efaneleko nengabe kuyikambiso ukwenza njalo.
Indawo Yokuhlala: Nangabe uhlele ukuyokuhlala ehotela, enendawo yokulala nokudla kwekuseni namkha ezinye iindawo, sibawa ukhumbule naku:
Ungabekisi amakamaro ongeze uwasebenzise, begodu akukafuzi uhlale nabantu abanengi ngekamurweni abadlula isibalo esivumelekileko.
Ungatshwilisi amalungiselelo ebesele uwenzile ngokungatlhogeki, ngaphandle kwalokha nakunobujamo oburhabako ungatjela abaPhathi beNdawo leyo msinyana nawuzokukhamba, ukwenzela ukuthi nangabe kukhona abafuna indawo yokuhlala bakwazi ukuyisebenzisa. (Mat. 5:37)
Sibawa utjheje nangabe usebenzisa ikarada lebhanga nofana lokuthenga ngesikolodo nawuyokutlolisa endaweni yokuhlala. Kezinye iindawo bazokubamba imali esekaradeni lakho, imali leyo izokusetjenziselwa iindleko zekamaro oliqatjhileko kuhlanganise nokuthi nakhe kwenzeka umonakalo othileko nawusese sekamurweni oliqatjhileko. Okhunye godu angeze ukwazi ukusebenzisa imali edosiweko leyo bekube kulapho sowubhadele ngemva kwamalangana sewukhambile.
Nangabe kulisiko enarheni yangekhenu, ungazipha imadlana iinsebenzi zehotela nazikuthwalisa umthwalwakho, nabahlwengisa amakamaro ungabatjhiyela imadlana.
Kufuze uphekele emakamurweni alungiselelwe ukupheka nendaweni eyenzelwe ukupheka.
Akukafuzi ulisebenzise kumbi ilungiselelo lasimahla lokudla kwekuseni, ikofi namkha irhwaba, ilungiselelweli lenzelwe iimvakatjhi eziqatjhe indawo yokuhlala.
Ngeenkhathi zoke, tjengisa iinthelo zomoya nawusebenzelana neensebenzi zendawo. Batlhogomela abantu abanengi abavakatjhileko,
Ababelethi kufuze batlhogomele abantwababo koke lapho bayakhona endaweni yokuhlala, kuhlanganise namalifti wangaphakathi, indawo yokududa, emasangweni wendawo, endaweni yokuzibandula nakenzinye indawo.
Nangabe kuvela umraro endaweni oqatjhe kiyo, bikela abaPhathi beNdawo leyo usese semhlanganweni ukwenzela bona bakwazi ukukusiza.
Ikonzo Yokuzithandela: Nanyana ngubani othanda ukusiza kufuze aye eMnyangweni weKonzo yokuziThandela emhlanganweni. Abantwana abangaphasi kweminyaka eli-16 bangasiza ngokusebenza nababelethi namtjhana abanye abantu abadala abavunyelwe babelethi babo.