Sebenzisa AmaPhetjhana Bona URhatjhe IiNdaba EziMnandi
1. Abantu bakaZimu bawasebenzise njani amaphetjhana?
1 Sekusikhathi eside abantu bakaJehova basebenzisa amaphetjhana weBhayibhili bona barhatjhe iindaba ezimnandi. Ngo-1880, u-C. T. Russell nabangani bakhe bathoma ukukhiqiza ama-Bible Students’ Tracts, begodu bekenzelwe abafundi beWatch Tower bona bawarhatjhe tjhatjhalazi. Amaphetjhana bekaqalwa njengaqakathekileko kangangobana ngo-1884 lokha u-C. T. Russell atlolisa ihlangano esemthethweni engenzi inzuzo bona kuthuthukiswe iinkareko zomBuso, ibizo elithi “tract” belifakiwe ebizweni le-Zion’s Watch Tower Tract Society, kwanje ebizwa ngokobana yi-Watch Tower Bible and Tract Society of Pennsylvania. Ngo-1918, abaFundi beBhayibhili barhatjha amaphetjhana angaphezu kweengidi ezi-300. Amaphetjhana aseselithulusu eliphumelelako lokufakaza.
2. Kubayini amaphetjhana aphumelela?
2 Okwenza APhumelele: Amaphetjhana amibalabala begodu ayakarisa. Umlayezo omfitjhani awumumetheko uyakarisa begodu ulisizo. Ayathandeka kubaninimuzi okungenzeka bavilaphele ukufunda umagazini namtjhana incwadi. Amaphetjhana kulula ukuwakhambisa, ngitjho nakubarhuweleli abatjha nabantwana. Ngaphezu kwalokho, amaphetjhana mancani begodu kulula ukuwaphatha.
3. Landisa okuhlangabezanwe nakho kwakho namtjhana okutloliweko okutjengisa ukuqakatheka kwamaphetjhana.
3 Abanengi bafunda amaqiniso ngesizo lephetjhana. Ngokwesibonelo, umma othileko eHaiti wabona elinye lamaphetjhanethu endleleni. Walidobha, walifunda, begodu warhuwelela, “Ngilifumene iqiniso!” Ngokukhamba kwesikhathi waya eWolweni lomBuso, wathoma ukutaditjha iBhayibhili, begodu wabhabhadiswa—koke kwenzeka ngebanga lamandla weliZwi lakaZimu afumaneka ephetjhaneni.
4. Uyini umnqophwethu nesikhambisa amaphetjhana asisipho senyanga?
4 EmZini NoMuzi: Njengombana amaphetjhana alithulusu eliphumelelako lokunikela ubufakazi, sizokuvama ukuwakhambisa njengesipho senyanga ukusukela ngoNovemba. Umnqophwethu akusikukhambisa amaphetjhana kwaphela kodwana kusebenzisa amaphetjhana bona sithomise iingcoco. Nengabe kutjengiswe ikareko evakatjhweni lokuthoma namtjhana newubuyelako, singatjengisa bona isifundo seBhayibhili siragwa njani ngokusebenzisa incwadi ethi Okufundiswa YiBhayibhili namtjhana enye incwadi esetjenziswako. Singawakhambisa njani amaphetjhana emzini nomuzi? Iphetjhana ngalinye lihlukile, ngalokho kufuze sijayelane nalawo esiwakhambisako.
5. Singawakhambisa njani amaphetjhana emzini nomuzi?
5 Itjumayelo yethu kufuze ifanelane nesimu namaphetjhana esiwasebenzisako. Singathoma ingcoco ngokunikela umninimuzi iphetjhana. Isigubuzeso salo esikarisako singavusa ikarekwakhe. Namtjhana singamtjengisa amaphetjhana ambalwa begodu silindele umninimuzi akhethe elimkarako. Nesisebenza esimini lapho abantu bazaza ukuvula iminyangwabo, singabamba iphetjhana la umninimuzi angakghona ukubona khona isigubuzeso, namtjhana singambawa bona sitjhovele okuthileko ngaphasi komnyango nokobana singathanda ukuzwa umbonwakhe ngakho. Nengabe isihloko sephetjhana simbuzo, singambawa bona aveze umbonwakhe ngawo. Namtjhana singazenzela umbuzo ozokuvusa ikareko begodu utjhukumise ingcoco. Singafunda nomninimuzi ingcenye engaphakathi kwephetjhana, sijame kancani embuzweni osendabeni begodu sibawe umninimuzi atjho umbonwakhe. Imitlolo eyihloko ingafundwa eBhayibhilini. Ngemva kokufunda okuthileko ephetjhaneni, singaphetha ingcoco begodu senze amalungiselelo wokubuya. Nengabe ngokujayelekileko ibandla litjhiya iincwadi emakhaya lapho kunganamuntu, singatjhiya iphetjhana la lingeze labonwa babanye abantu nengabe umninimuzi akekho ekhaya.
6. Angasetjenziswa njani amaphetjhana newufakaza endleleni?
6 UkuFakaza ENdleleni: Wakhe wawasebenzisa amaphetjhana newufakaza endleleni? Abanye abantu abadlulako bajarhile begodu abakazimiseli ukujama bona bacoce nathi. Kungaba budisi ukufumana bona umuntu unekareko kwamambala. Kunokobana sibanikele abomagazini bamva ngaphandle kokwazi bona bazobafunda, kubayini singabanikeli iphetjhana esikhundleni sakamagazini? Ngombana isigubuzeso siyakarisa nomlayezo mfitjhani, ukufuna ukwazi kungatjhukumisela abantu bona bafunde iphetjhana nebanemizuzu embalwa. Kwamambala, nebangakajarhi, singacoca nabo ngokhunye okungaphakathi kwephetjhana.
7. Landisa okuhlangabezanwe nakho okutjengisa indlela yokusebenzisa amaphetjhana nesifakaza ngokungakahlelwa.
7 UkuFakaza NgokungakaHlelwa: Kulula ukufakaza ngokungakahlelwa ngamaphetjhana. Omunye umzalwana ufaka ambalwa ngesikhwameni sakhe nanyana kunini nekaphuma ekhaya. Nekahlangana nomuntu othengisako esitolo, ubawa ukumnikela okuthileko kokufunda bese ukhipha iphetjhana. Lokha esinye isibili siya eNew York City ukuyokubona indawo, salemuka bona sizokuhlangana nabantu abavela eendaweni ezihlukahlukeneko. Ngalokho sakhamba siphethe incwajana ethi Good News for People of All Nations namaphetjhana amanengi ngeenlimi ezihlukahlukeneko. Nebezwa umuntu akhuluma ilimi lakenye inarha athengisa izinto ngeqadi kwendlela namtjhana ogade ahleli hlanu kwabo ephageni namtjhana endaweni yokudlela, bamnikela iphetjhana ngelimi lakhe.
8. Kungayiphi indlela amaphetjhana afaniswa nembewu?
8 “Tjala Imbewu Yakho”: Amaphetjhana angafaniswa nembewu. Umlimi ngokutjhaphulukileko utjala imbewu ayihlukanise ngombana akazi bona ngiyiphi ezokumila begodu ikhule. UmTjhumayeli 11:6 uthi, “Tjala imbewu yakho ekuseni bekube ntambama ungasivumeli isandla sakho siphumule; ngombana awazi bona izokuphumelela kuphi, kungaba kulapha nofana lapha, nofana bona zombili zizokuba zihle ngokufanako.” Ngalokho, kwanga ‘singarhatjha ilwazi’ ngethulusu lokufakaza eliphumelela khulweli.—IzA. 15:7.
[Umkhangiso osekhasini 3]
Njengombana amaphetjhana alithulusu eliphumelelako lokunikela ubufakazi, sizokuvama ukuwakhambisa njengesipho senyanga ukusukela ngoNovemba.