Bamukeleni!
1. Ngisiphi isenzakalo esisinikela ithuba elihle khulu lokufakaza, begodu kubayini?
1 Asikho isenzakalo esisinikela ithuba eligcono lokufakaza njengesiKhumbuzo saqobe mnyaka. Akhu cabange: Umnyaka lo kulindeleke iimvakatjhi ezingaphezu kweengidi ezilitjhumi bona zibe khona esiKhumbuzweni zizokuzwa ngeendlela eembili ezabonakaliswa lithando ngesihlengo. (Jwa. 3:16; 15:13) Bazokufunda ngeembusiso abangazifumana ngebanga lesipho sakaJehova. (Isa. 65:21-23) Nokho, angekhe kube sikhulumi kwaphela esizokunikela ubufakazi esenzakalwenesi. Boke abakhona bazokuba nethuba lokunikela ubufakazi obunamandla ngokwamukela iimvakatjhi ngethando.—Rom. 15:7.
2. Singazamukela njani iimvakatjhi ngendlela enethando?
2 Kunokobana ufumane indawo yokuhlala begodu uthule ulindele bona kuthome ihlelo, kubayini ungathathi igadango uzithule kilabo ohlezi hlanu kwabo? Iimvakatjhi zingathukwa njengombana zingazi bona zilindeleni. Ukumomotheka nokulotjhisa kwethu ngobungani kungazisiza khulu kwamambala kuzenze zizizwe zitjhaphulukile begodu zamukelekile. Ukufumana bona othileko uze ngombana athole isimemo, ungambuza bonyana kukokuthoma eza komunye wemihlanganwethu namtjhana ukhona amaziko ebandleni. Mhlamunye ungambawa bona ahlale nawe nisebenzise iBhayibhili neculo lakho. Nengabe kusetjenziswa iWolo lomBuso, kungaba kuhle ukumtjengisa indawo kancani. Ngemva kwekulumo, zenze ufumaneke ukuphendula imibuzwakhe. Nengabe ibandla lenu kufuze likhambe msinyana ukwenzela bona litjhidele elinye, ungathi: “Ngingathabela ukuzwa bona ulizwe njani ihlelweli. Ikhona indlela engingakuthinta ngayo?” Ngemva kwalokho, yenza amalungiselelo wokulandelela ikareko. Abadala bazokufuna ukutjheja ngokukhethekileko abarhuweleli abapholileko ebebakhona.
3. Kubayini kuqakathekile bona sithathe amagadango wokwamukela iimvakatjhi esiKhumbuzweni?
3 Iimvakatjhi ezinengi zizabe zithoma ukubona ithabo, ukuthula nobunye beparadeyisi elingokomoya esilithabelako sibabantu bakaJehova. (Rha. 29:11; Isa. 11:6-9; 65:13, 14) Khuyini iimvakatjhi ezizoyikhumbula ngemva kokuba khona esikhumbuzweni? Okunengi kuzokuyama kilokho esikwenzako bona sisize iimvakatjhi zethu.