INdlela YokuSebenzisa INcwajana Ethi, Bobani Abenza Intando KaJehova Namhlanjesi?
INcwajana ETja le Yenzelwe UkuNqophisa AbaFundi BeBhayibhili EHlanganweni
1. Ngimaphi amabanga amathathu wokwenziwa kwencwajana ethi, Intando KaJehova?
1 Sewuthomile na ukusebenzisa incwajana etja ethi, Bobani Abenza Intando KaJehova Namhlanjesi? Umnqophwayo (1) kujayelanisa abafundi beBhayibhili naboFakazi bakaJehova, (2) kubasiza bona bazi ngomsebenzi esiwenzako (3) nokubatjengisa indlela ihlangano esebenza ngayo. Incwajana ethi, Intando KaJehova, inesifundo esisekhasini linye okungaba bulula bona sihlanganiswe ngemizuzu emihlanu ukuya kwelitjhumi ekupheleni kwesifundo ngasinye.
2. Hlathulula indlela incwajana le eyenziwe ngayo neengceye zayo.
2 INdlela EyeNziwe Ngayo: Incwajana le ihlukaniswe ngeengcenye eentathu, ngayinye ikhuluma ngengcenye ehlukileko yehlangano kaJehova njengombana kutjengiswe ngehla. Isihloko ngasinye eemfundweni ezima-28 zimibuzo, kanti iinhlokwana ezitlolwe ngamagama abonakalako zilandelwa yipendulo yombuzo loyo. Iinthombe ezithathwe eenarheni ezingaphezu kwezima-50 zifumaneka kiyo yoke incwadi le bona kutjengiswe iphasi loke ngomsebenzethu. Iimfundo ezinengi zinebhoksi elithi, “Fumana Okungeziweko” elimumethe iimphakamiso ongakhuthaza ngazo isifundo sakho bona zizisebenzise.
3. Singayisebenzisa njani incwajana ethi, Intando KaJehova?
3 INdlela OngayiSebenzisa Ngayo: Thoma ngokumtjengisa isihloko sombuzo osesifundweneso. Ngemva kwalokho, njengombana nifunda isifundweso ndawonye, mtjengise iinhlokwana ezitlolwe ngamagama abonakalako. Ekugcineni, buyekeza imibuzo esekupheleni kwekhasi. Ningafunda soke isifundo namtjhana nicoce ngeengcenye zaso. Sebenzisa ukwahlulela ekukhetheni bona ngimiphi imitlolo enizoyifunda. Ungakhohlwa nokukhulumela iinthombe nebhoksi elithi, “Fumana Okungeziweko.” Esikhathini esinengi, isifundo kufuze siragwe ngokulandelana. Nokho, zizwe utjhaphulukile ukudlulela kesinye isifundo anekareko kiso ngesikhatheso. Ngokwesibonelo, nengabe kuzokuba nomhlangano wesifunda namtjhana wesigodi, ungadlulela esifundweni 11.
4. Kubayini ukuthabela ukufumana ithulusweli elitjha?
4 Nesifunda iBhayibhili nomunye umuntu, simsiza bona amazi uBabethu wezulwini. Nokho, godu kufuze simfundise ngehlangano kaJehova. (IzA. 6:20) Qala bona sithaba kangangani ngokufumana ithulusweli elitjha elenza kube bulula ukufundisa!