Fundisa Ngencwajana Ethi, Iindaba Ezimnandi
1. Yenziwe njani incwajana ethi, Iindaba Ezimnandi?
1 Njengombana kwacocwa ngakho eKonzwenethu YomBuso, kaJulayi, elinye ithulusi eliqakathekileko lokufundisa yincwajana ethi, Iindaba Ezimnandi Ezivela KuZimu! Imitlolo eveziweko ayikadzujulwa ukwenzela ukuthi abaninimuzi bakuthabela ukuyifunda ngokunqophileko eBhayibhelini. Nanyana kunjalo, iincwadi zethu ezinengi zitlolwe ngendlela yokuthi umuntu oyifundako angazifundela yona ngokwakhe, incwajana le yenzelwe ukuthi ofundisako acoce nomfundi. Yeke, nasiyikhambisako, kufuze silinge ukutjengisa indlela isifundo seBhayibheli esiragwa ngayo ukwenzela ukuthi umninimuzi abone ukuthi kuthabisa kangangani ukufunda iindaba ezimnandi ezivela eBhayibheli.—Mat. 13:44.
2. Singayisebenzisa njani incwajana ethi, Iindaba Ezimnandi ekukhambeleni kokuthoma?
2 Ekukhambeleni Kokuthoma: Mhlamunye ungathi: “Ngikuvakatjhele ngombana abantu batshwenyekile ngengomuso. Ucabanga ukuthi ubujamo bezinto buzakhe butjhentjhe? [Lindela ipendulo.] IBhayibheli lisiphethele iindaba ezimnandi ezingasinikela ithemba. Nasi eminye yemibuzo iBhayibheli eliyiphendulako.” Nikela umninimuzi incwajana, bese umbawa ukuthi akhethe umbuzo ongemva kwesigubuzeso. Ngemva kwalokho, mtjengise indlela isifundo seBhayibheli esiragwa ngayo usebenzisa isigaba sokuthoma sesifundweso. Enye indlela ongayisebenzisa kubuza umninimuzi umbuzo okarisako osekelwe esifundweni osikhethileko, bese umtjengisa indlela incwajana le engamsiza ngayo ukuthi afumane iimpendulo zeBhayibheli. Nangabe isifundweso sikhambelana nevidiyo eku-jw.org, abanye abarhuweleli bayayidlala phakathi nengcocwabo.
3. Hlathulula indlela isifundo seBhayibheli esiragwa ngayo usebenzisa incwajana ethi, Iindaba Ezimnandi.
3 Indlela Isifundo SeBhayibheli Esiragwa Ngayo: (1) Funda umbuzo otlolwe ngamagama abonakalako ukusiza umninimuzi ukuthi adzimelele ephuzwini eliyihloko. (2) Funda isigaba esilandelako. (3) Funda imitlolo etlolwe ngokutjhigamileko, begodu usebenzise imibuzo ngokuhlakanipha ukusiza umninimuzi ukubona indlela imitlolo ephendula ngayo umbuzo onomboriweko. (4) Nangabe kunesigaba esinye ngaphasi kombuzo, buyelela amaphuzu 2 no-3. Nangabe ividiyo ikhambelana nombuzo begodu uwukayidlaleli umninimuzi, ungayidlala phakathi nengcoco. (5) Ekugcineni, buza umninimuzi umbuzo onomboriweko ukufumana ukuthi uyazwisisa na.
4. Yini ezosisiza silisebenzise ngekghono ithulusi eliqakathekilekweli?
4 Jayelana nethulusi eliqakathekilekweli. Lisebenzise nanyana kunini nakufanelekako. Ngaphambi kwesifundo ngasinye, cabanga ngendlela ephumelelako ongabonisana ngayo nofunda naye, usebenzisa imitlolo esesifundweneso. (IzA. 15:28; IzE. 17:2, 3) Njengombana ufumana ilemuko nekghono, uzokuthabela khulu ukuyisebenzisa incwajana le bona ufundise abantu iqiniso!