Iinkhombiso Zencwajana Ethi IPilo NomSebenzi WobuKrestu IHlelo LomHlangano WeBandla

NOVEMBA 5-11

AMAGUGU ASELIZWINI LAKAZIMU | JWANISI 20-21

“Ungithanda Ukudlula Lokhu?”

(Jwanisi 21:1-3) Ngemva kwalokhu uJesu waziveza godu ebafundini, eLwandle leThibheriyasi. Waziveza nganasi indlela. ² Bekuhlangene uSimoni Pitrosi, uTomasi (obekuthiwa liWele), uNathaniyeli weKana yeGalile, amadodana kaZebediya nabanye babafundi bakhe ababili. ³ USimoni Pitrosi wathi kibo: “Ngisayokuthiya iinhlambi.” Bathi kuye: “Sikhamba nawe.” Baphuma bangena ngesikepeni, kodwana phakathi nobusukobo akhenge babambe litho.

(Jwanisi 21:4-14) Nanyana kunjalo, kuthe nakusako, uJesu wajama eligwini, kodwana abafundi akhenge balemuke ukuthi nguJesu. ⁵ UJesu wathi kibo: “Bantwana, aninakho okudliwako na?” Baphendula bathi: “Awa!” ⁶ Wathi kibo: “Phoselani inede ngesidleni sesikepe, nizokufumana okuthileko.” Bayiphosa, kodwana babhalelwa kuyidosa ngebanga leenhlambi ezinengi abazibambileko. ⁷ Umfundi obekathandwa nguJesu wathi kuPitrosi: “YiKosi!” USimoni Pitrosi, nakezwa ukuthi yiKosi, wambatha isambatho sakhe sangaphandle, ngombana bekangakambathi ngokupheleleko, waziphosa ngelwandle. ⁸ Kodwana abanye abafundi beza ngesikepe esincani, badosa inede ezele iinhlambi, ngombana bebangasikude neligu, bekungaba mamitha ama-90. ⁹ Nabaphumela eligwini, babona umlilo wamalahle kukhona phezu kwawo iinhlambi nesikwa. ¹⁰ UJesu wathi kibo: “Lethani ezinye zeenhlambi eniqeda ukuzibamba.” ¹¹ USimoni Pitrosi wakhwela esikepeni, wadosela inede elizele iinhlambi ezikulu eligwini, bezili-153. Nanyana bezizinengi, inede akhenge idabuke. ¹² UJesu wathi kibo: “Yenize nizokudla.” Akakho namunye ebafundini owaba nesibindi sokumbuza ukuthi: “Ungubani?” Ngombana bebazi ukuthi yiKosi. ¹³ UJesu weza wathatha isikwa, wabanikela sona, wenza okufanako nangeenhlambi. ¹⁴ Leli besekulihlandla lesithathu uJesu abonakala ebafundini ngemva kokuthi avuswe kwabafileko.

(Jwanisi 21:15-19) Nasebaqede ukudla, uJesu wathi kuSimoni Pitrosi: “Simoni ndodana kaJwanisi, ungithanda ukudlula lokhu?” Wamphendula wathi: “Iye Kosi, uyazi ukuthi ngiyakuthanda.” UJesu wathi kuye: “Yondla izimvana zami.” ¹⁶ Godu wathi kuye ihlandla lesibili: “Simoni ndodana kaJwanisi, uyangithanda na?” Waphendula wathi: “Iye Kosi, uyazi ukuthi ngiyakuthanda.” UJesu wathi kuye: “Lusa izimvana zami.” ¹⁷ Wathi kuye ihlandla lesithathu: “Simoni ndodana kaJwanisi, uyangithanda na?” UPitrosi wabalisizi nakezwa ukuthi sekambuze ihlandla lesithathu ukuthi: “Uyangithanda na?” Ngalokho wathi kuye: “Kosi, wazi zoke izinto; uyazi ukuthi ngiyakuthanda.” UJesu wathi kuye: “Yondla izimvana zami. ¹⁸ Ngiqinisile ngithi kuwe, nawusesemutjha, bewuthanda ukuzimbathisa, ukhambe uye lapho bewufuna ukuya khona. Kodwana nasele uluphele, uzokuthabulula izandla zakho begodu omunye umuntu uzokumbathisa, akuse lapho ungafuni khona.” ¹⁹ UJesu watjho lokhu ukutjengisa indlela uPitrosi azokufa ngayo aphazimulise uZimu. Ngemva kokutjho lokho, wathi kuye: “Ragela phambili nokungilandela.”

nwtsty okuzokufundwa ngakho kuJwa 21:15, 17

UJesu wathi kuPitrosi: Indaba le hlangana kwakaPitrosi noJesu yenzeka msinyana ngemva kokobana uPitrosi aphike uJesu kathathu. UJesu wabuza imibuzo emithathu etjhukumisako kangangokuthi “uPitrosi waba lisizi.” (Jwa 21:​17) Ukulandisa okusemtlolweni kaJwanisi 21:​15-17 kusebenzise amabizo amabili wesiGirigi: a·ga·paʹo, elibizwa ngokuthi lithando, nePhi leʹo, elibizwa ngokuthi ukuba nethando. UJesu wabuza uPitrosi kabili wathi: “Uyangithanda na?” UPitrosi watjho iinkhathi ezimbili wathi ‘uyamthanda’ uJesu. Ngemva kwalokho, uJesu wambuza wathi: “Uyangithanda na?” Godu, uPitrosi wamqinisekisa ukuthi uyamthanda. Isikhathi ngasinye uPitrosi nakathi uyamthanda, uJesu bekathi ithando lakhe kufuze limtjhukumisele bona ondle begodu ‘aluse’ abafundi bakaJesu. Endabeni le uzibiza ngokuthi izimvana zakhe namkha ‘umhlambi omncani.’ (Jwa 21:16, 17; 1Pt 5:1-3) UJesu wanikela uPitrosi ithuba lokumqinisekisa kathathu bona uyamthanda, ngemva kwalokho wamphathisa umsebenzi wokutlhogomela izimvu zakhe. Ngesenzwesi, uJesu waphelisa nanyana ngikuphi ukungabaza uPitrosi ebekanakho malungana nokumlibalela kwakhe ngemva kokumphika iinkhathi ezintathu.

ungithanda ukudlula lokhu?: Ngokwendlela yokutlola, amezwi athi “ungithanda ukudlula lezi” singawazwisisa ngeendlela ezingaphezu kweyodwa. Ezinye izazi zithanda ihlathululo ethi, “ungithanda ukudlula indlela othanda ngayo abanye abafundi?” namkha “ungithanda ukudlula indlela abafundaba abangithanda ngayo?” Nanyana kunjalo, ihlathululo ekungiyo ithi, “ungithanda ukudlula izintwezi?” izintwezi bekuyifesi ebebasand’ ukuyibamba namkha ibhizinisi labo lokuthiya iimfesi. Yeke, umqondo opheleleko weveseli uthi: ‘Ungithanda ukudlula izinto eziqalekako? Nakunjalo, yondla izimvu zami.’ Umbuzo lo uyafaneleka, khulukhulu nasiqala umlando kaPitrosi wangaphambilini. Nanyana uPitrosi bekangomunye wabafundi bakaJesu bokuthoma (Jwa 1:35-42), akhenge abe mlandeli kaJesu zisuka nje. Kunalokho, wabuyela ebhizinisinakhe lokuthiya iimfesi. Ngemva kweenyanga ezithileko, uJesu wabiza uPitrosi, wathi alise ibhizinisakhe ‘abemthiyi wabantu.’ (Mat 4:18-20; Luk 5:1-11) Ngemva kokufa kwakaJesu, uPitrosi wakhamba wayokuthiya, nabanye abapostoli bamlandela. (Jwa 21:2, 3) Kubonakala ngasuthi uJesu bekaveza iphuzu eliqakathekileko kuPitrosi lokuthi kufuze enze isiqunto ahlale kiso: Kghani bekazokuragela phambili abeke qangi ibhizinisakhe yeemfesi ezisiqubuthu eziphambikwabezi, namkha bekazokubeka qangi umsebenzi wokondla izimvu zakaJesu namkha abalandeli bakhe?—Jwa 21:4-8.

ihlandla lesithathu: UPitrosi bekaphike iKosi kathathu; nje-ke uJesu wamnikela ithuba lokumqinisekisa amahlandla amathathu bona uyamthanda. Ngemva kobana uPitrosi akwenzile lokho, uJesu wathi kuPitrosi kufuze athande umsebenzi ocwengileko ukudlula nanyana yini. Anabafowabo, uPitrosi bekazokukghona ukwenza neminye imisebenzi ehlanganisa ukuqinisa, ukondla nokulusa umhlambi kaKrestu okubalandeli bakaJesu abathembekileko. Abalandelaba bebazesiwe kodwana bebasatlhoga ukondliwa ngeliZwi lakaZimu.—Luk 22:32.

Rhubhulula Ngezinto ZakaZimu Eziligugu

(Jwanisi 20:17) UJesu wathi kuye: “Lisa ukungibamba, ngombana angikakhuphukeli kuBaba. Kodwana khamba uye kubafowethu uthi kibo, ‘Ngikhuphukela kuBaba, uYihlo, kuZimami, uZimenu.’”

nwtsty okuzokufundwa ngakho kuJwa 20:17

Lisa ukungibamba: Ibizo lesiGirigi elithi, haʹpto·mai lingatjho “ukuthinta” namkha “ukubamba.” Amanye amatjhugululo weBhayibheli abeke amezwi kaJesu bunjesi: “Lisa ukungibamba.” Lokho akutjho bona uJesu bekangafuni ukuthi uMariya Marhdalina amthinte njengombana angazange ale lokha abanye abomma abambona ngemva kokuvuswa “babamba iinyawo zakhe.” (Mat 28:⁠9) Kubonakala ngasuthi uMariya Marhdalina bekasaba ukuthi uJesu besele azokukhuphukela ezulwini. Wambamba wamkakarela, akhenge amlise ngombana bekafuna ukuba neKosakhe. Bona amqinisekise ukuthi bekangakakhambi, uJesu wayala uMariya bona alise ukumbamba, kunalokho, aye ebafundini bakhe ayobatjela ngokuvuswa kwakhe.

(Jwanisi 20:28) UTomasi wathi kuye: “Kosami, Zimami!”

nwtsty okuzokufundwa ngakho kuJwa 20:⁠28

Kosami, Zimami!: NgesiGirigi litjho ukuthi “Kosami noZimami [ho the·osʹ]!” Ezinye izazi zithi amezwi wokubabaza la ebewaqaliswe kuJesu, kuhlekuhle anqotjhiswe kuZimu, uYise. Ezinye zithi amezwi wokuthoma wesiGirigi bewaqalwa njenganqotjhiswe kuJesu. Nanyana kunjalo, umnqopho wamezwi athi, “Kosami, Zimami” uzwisiseka kuhle ngokomongo wemiTlolo ephefumulelweko. Njengombana umlando utjengisa ukuthi wakhe wathumela umlayezo ebafundini bakhe wathi, “Ngikhuphukela kuBaba, uYihlo, kuZimami, uZimenu.” Akunabanga lokukholelwa bona uTomasi bekacabanga ukuthi uJesu bekanguZimu umninimandlawoke. (Qala okuzokufundwa ngakho kuJwa 20:17.) UTomasi khewamuzwa uJesu athandaza “kuYise,” ambiza ngokuthi “uZimu weqiniso.” (Jwa 17:1-3) Yeke kungenzeka uTomasi wabiza uJesu wathi “Zimami” ngeenzathu ezilandelakwezi: Bekaqala uJesu “njengozimu,” ingasi uZimu umninimandlawoke. (Jwa 1:1) Namkha wabiza uJesu ngendlela efana naleyo iinceku zakaZimu ebezibiza ngayo iingilozi ezidlulisela umlayezo kaJehova, njengombana kukhulunywa ngazo emiTlolweni yesiHebheru. UTomasi bekajayelene nokulandisa kwabatloli beBhayibheli, ngezinye iinkhathi bebakhuluma baqalisele eengilozini kube ngathi bakhuluma noJehova uZimu. (Madanisa noGen 16:7-11, 13; 18:1-5, 22-33; 32:24-30; Kho 6:11-15; 13:20-22.) Ngalokho-ke, kungenzeka uTomasi wabiza uJesu ngokuthi “Zimami” ngomqondo wokuqala uJesu njengomjameli nomkhulumeli kaZimu weqiniso.

Ezinye zithi ukusetjenziswa kwebizo lesiGirigi ngaphambi kwebizo elithi “kosi” nelithi “zimu” kuveza ukuthi amagama la aqalisele kuZimu umninimandlawoke. Kodwana endabeni le, ukusetjenziswa kwamabizo la kuveza indlela yokutlola yesiGirigi. Eendabeni lakutjenziswe khona amabizo la ngendlela yokuhlonipha yesiGirigi, ingabuye godu ihlathululwe ngokusebenzisa umtlolo kaLukasi 12:32 (ngesiGirigi, “mhlambi omncani”) nokwebeKolose 3:18–4:1 (ngesiGirigi, ‘abafazi’; ‘amadoda’; ‘abantwana’; ‘abobaba’; ‘iingqila’; ‘amakhosi’). Ngendlela efanako, ihlathululo yomtlolo weyoku-1 kaPitrosi 3:7 ufundeka bunjesi: “Madoda.” Yeke ukusetjenziswa kwamagama la ngeze sathi kungasisiza sifumane lokho uTomasi ebekakucabanga nakazakukhuluma amezwi la.

Ukufundwa KweBhayibheli

(Jwanisi 20:1-18) Ngelanga lokuthoma leveke, uMariya Marhdalina waya ethuneni ekuseni, kusesemnyama, wabona ilitje egade livale ithuna lisusiwe. ² Yeke wagijima waya kuSimoni Pitrosi nakomunye umfundi, loyo uJesu ebekamthanda, wathi kibo: “Bayithethe iKosi ethuneni, asazi ukuthi bayilalisephi.” ³ UPitrosi nomfundi loyo baphuma baya ethuneni. ⁴ Bobabili bathoma ukugijima, kodwana umfundi loyo watjhiya uPitrosi ngebelo wafika qangi ethuneni. ⁵ Wahlola, wabona amatjhila welineni alapho, kodwana khenge angene. ⁶ Nje-ke kwafika noSimoni Pitrosi obekamlandela, wangena ngethuneni. Wabona amatjhila welineni alapho. ⁷ Itjhila ebelisehlokwakhe belingasi namanye amatjhila kodwana belisongiwe lisendawenalo lilodwa. ⁸ Umfundi loya owafika qangi ethuneni naye wangena, wabona begodu wakholwa. ⁹ Ngombana bebangakawuzwisisi umtlolo nawuthi kufuze avuke kwabafileko. ¹⁰ Yeke abafundaba babuyela emizinabo. ¹¹ UMariya wasolo ajame ngaphandle eduze nethuna, alila. Asalila njalo, wahlola ngethuneni, ¹² wabona iingilozi ezimbili zembethe okumhlophe zihlezi lapha isidumbu sakaJesu besilaliswe khona, enye ihlezi ngehlokweni enye ihlezi ngeenyaweni. ¹³ Zathi kuye: “Mfazi, ulilelani?” Wathi kizo: “Bathethe iKosami, angazi ukuthi bayilalisephi.” ¹⁴ Ngemva kokutjho lokhu, waphenduka wabona uJesu ajame lapho, kodwana akhenge alemuke ukuthi nguJesu. ¹⁵ UJesu wathi kuye: “Mfazi, ulilelani? Ufuna ubani?” UMariya acabanga ukuthi mtlhogomeli wesimu, wathi kuye: “Mnumzana, nangabe uyithethe, ngitjela ukuthi uyilalisephi, ngizayoyithatha.” ¹⁶ UJesu wathi kuye: “Mariya!” UMariya nakajikako, wathi kuye ngesiHebheru: “Raboni!” (okutjho ukuthi “Mfundisi!”) ¹⁷ UJesu wathi kuye: “Lisa ukungibamba, ngombana angikakhuphukeli kuBaba. Kodwana khamba uye kubafowethu uthi kibo, ‘Ngikhuphukela kuBaba, uYihlo, kuZimami, uZimenu.’” ¹⁸ UMariya Marhdalina wayokutjela abafundi wathi: “Ngiyibonile iKosi!” Wabatjela lokho emtjele khona.

NOVEMBA 12-​18

AMAGUGU ASELIZWINI LAKAZIMU | IZENZO 1-3

“Ibandla LobuKrestu Lifumana Ummoya Ocwengileko”

(IzEnzo 2:1-8) Ngelanga lePentekoste, bebahlangene boke endaweni yinye. ² Kungakalindeleki kwezwakala itjhada livela ezulwini, linjengelommoya obetha ngamandla, lazala indlu yoke ebebahlezi ngakiyo. ³ Kwabonakala amalimu anjengomlilo, asabalaliswa, ngalinye lahlala phezu komunye nomunye wabo, ⁴ boke bazala ummoya ocwengileko bathoma ukukhuluma ngamalimi ahlukahlukeneko, njengombana ummoya bewubenza bakghone ukukhuluma. ⁵ Ngesikhatheso amaJuda asaba uZimu avela kizo zoke iintjhaba zephasi bewahlala eJerusalema. ⁶ Nakuzwakala itjhadelo, isiqubuthu sabuthana begodu sarareka, ngombana ngamunye wabo esiqubuthwini wabezwa bakhuluma ngelimi lakhe. ⁷ Kwamambala barareka khulu bathi: “Qalani, boke abakhulumakwaba maGalile, kghani akusinjalo? ⁸ Alo kuza njani bona ngamunye wethu ezwe ngelimi lakhe lendabuko?

(IzEnzo 2:14) UPitrosi wasikima nabaliTjhumi naNye wakhuluma nabo ngelizwi elikhulu wathi: “Madoda weJudiya nani noke bahlali beJerusalema, yazini lokhu begodu lalelisisani amezwami.

(IzEnzo 2:37, 38) Nabezwa lokhu, kwaba ngasuthi bahlatjwe ehliziyweni, bathi kuPitrosi nakibo boke abapostoli: “Madoda, bafowethu, kufuze senzeni?” ³⁸ UPitrosi wathi kibo: “Tjhugulukani, ngamunye wenu abhajadiswe ebizweni lakaJesu Krestu bona nilitjalelwe izono zenu, nizokufumana isipho sesihle sommoya ocwengileko.

(IzEnzo 2:41) Yeke labo abamukela ilizwi lakhe ngethabo babhajadiswa, begodu ngelangelo kwangezelelwa abantu abangaba zi-3 000.

(IzEnzo 2:42-47) Baragela phambili bazinikela efundisweni yabapostoli, ekuhlanganeni ndawonye, ekudleni, nemithandazweni. ⁴³ Eqinisweni boke bafikelwa kusaba, abapostoli bathoma ukwenza iimangaliso neembonakaliso ezinengi. ⁴⁴ Boke ababa makholwa bebabuthene ndawonye begodu bahlanganyela zoke izinto, ⁴⁵ bebathengisa ipahlabo nezindlu zabo, baphana ngemali abayifumeneko, ngokwalokho ngamunye akutlhogako. ⁴⁶ Qobe langa bebahlala basethempelini ngomnqopho munye, badlela emizini ehlukahlukeneko bahlanganyela ukudla kwabo ngethabo elikhulu nangehliziyo ethembekileko, ⁴⁷ badumisa uZimu bafumana umusa kibo boke abantu. Qobe langa uJehova bekasolo abalethela abantu abangeziweko bona bahlanganyele nabo, labo babantu uZimu ebekabasindisa.

w86 12/1 29 ¶4-5, 7

Iminikelo Ethabisa Ihliziyo

Ngelanga lokuthoma lokuba khona kwebandla lobuKrestu ngomnyaka ka-33, abantu abayi-3 000 ebebasand’ ukubhajadiswa bebathandaza, baphana ngezinto begodu badla ndawonye. Bebakwenza ngaliphi ibanga? Bona bakghone ukuqinisa ukukholwa kwabo ‘ngokuthi baragele phambili bazinikela efundisweni yabapostoli.’—IzE 2:41, 42.

AmaJuda namaphroselithe beweze eJerusalema bona azokuhlala isikhathi esithileko agidinge uMnyanya wePentekoste. Kodwana labo ebebasand’ ukuba maKrestu bakhetha ukuhlala isikhathi esithileko, bafunda okungeziweko bona baqinise ukukholwa kwabo. Lokhu kwabangela umraro eendabeni zokuhlala nokudla. Ebantwini ebebavakatjhileko, abanye bebanganamali eyaneleko, kanti abanye bebanokunengi. Yeke kwaba nelungiselelo lesikhatjhana lokusiza abantu abatlhogako.—IzE 2:43-47.

Ukuthengiswa kweendawo nokwabelana ngezinto besele kwenziwa ngokuzithandela komuntu. Akekho umuntu ebekabophekile bona athengise namkha anikele; begodu lokhu bekungasi yindlela yokuveza umtlhago wabantu. Umqondo ovezwa la akusikukuthi abantu abanjingileko bekufuze bathengise izinto zabo zoke bese basala batlhaga. Kunalokho, ngebanga lokuzwela amakholwa abakunye nawo ebebaqalene nobujamobo ngesikhatheso, bathengisa izinto zabo, bathatha imali leyo banikela ngayo ukuthi bathuthukise umsebenzi womBuso.—Madanisa neye-2 kwebeKorinte 8:12-15.

Rhubhulula Ngezinto ZakaZimu Eziligugu

(IzEnzo 3:15) nabulala uMjameli omKhulu wokuphila. Kodwana uZimu wamvusa kwabafileko, ngilokho esikufakazelako.

it-2 61 ¶1

UJesu Krestu

“UMjameli omKhulu wokuphila.” Ngebanga lomusa omkhulu kaYise, uJesu Krestu wanikela ngokuphila kwakhe okunganasono kwaba mhlatjelo. Ngomhlatjelo kaJesu, kuyakghonakala ngabalandeli bakaKrestu abakhethiweko bona babuse naye ezulwini nangabantu ukuthi baphile ephasini nasele kubusa umBuswakhe. (Mat 6:10; Jwa 3:16; Efe 1:7; Heb 2:5) Waba “Mjameli omKhulu [“isiKhulu,” KJ; JB] wokuphila” wabantu boke. (IzE 3:15) Ibizo lesiGirigi elisetjenziswe la, litjho isisekelo, “umjameli omrholi,” amezwi la asetjenziswe kuMosi (IzE 7:27, 35) njengombana ‘bekambusi’ kwa-Israyeli.

(IzEnzo 3:19) “Tjhugulukani, nibuye ukwenzela bona izono zenu zisulwe, khona kuzakuthi iinkhathi zokuvuseleleka zivele kuJehova ngokwakhe

cl 265 ¶14

UZimu ‘Uyacolela’

¹⁴ Indlela uJehova alibalela ngayo ihlathululwe ngokunabileko kuzEnzo 3:19: “Tjhugulukani, nibuye ukwenzela bona izono zenu zisulwe.” Umutjho wokugcina ngesiGirigi utjhugululwe ngokuthi “sula, . . . ukuphelisa.” Ngokwezazi ezithileko, indaba okukhulunywa ngayo lapha iveza isithombe sokusula into etlolwe ngesandla. Lokhu kwenzeka njani? Eenkhathini zekadeni i-⁠enke beyisetjenziswa khulu beyenziwe nge-carbon, i-⁠gum, namanzi. Msinyana ngemva kobana umuntu asebenze ngayo, bekathatha isipontjo bese usula ngaso into etloliweko. Lokhu kusitjengisa indlela uJehova anomusa ngayo. Nakasilibalela izono zethu, kuba ngathi uthatha isipontjo bese uyazisula.

Ukufundwa KweBhayibheli

(IzEnzo 2:1-21) Ngelanga lePentekoste, bebahlangene boke endaweni yinye. ² Kungakalindeleki kwezwakala itjhada livela ezulwini, linjengelommoya obetha ngamandla, lazala indlu yoke ebebahlezi ngakiyo. ³ Kwabonakala amalimu anjengomlilo, asabalaliswa, ngalinye lahlala phezu komunye nomunye wabo, ⁴ boke bazala ummoya ocwengileko bathoma ukukhuluma ngamalimi ahlukahlukeneko, njengombana ummoya bewubenza bakghone ukukhuluma. ⁵ Ngesikhatheso amaJuda asaba uZimu avela kizo zoke iintjhaba zephasi bewahlala eJerusalema. ⁶ Nakuzwakala itjhadelo, isiqubuthu sabuthana begodu sarareka, ngombana ngamunye wabo esiqubuthwini wabezwa bakhuluma ngelimi lakhe. ⁷ Kwamambala barareka khulu bathi: “Qalani, boke abakhulumakwaba maGalile, kghani akusinjalo? ⁸ Alo kuza njani bona ngamunye wethu ezwe ngelimi lakhe lendabuko? ⁹ AmaPhathiya, amaMede, ama-Elamu, izakhamuzi zeMesopotamiya, zeJudiya neKaphadosiya, zePontusi nezesifundeni se-Asiya, ¹⁰ zeFrigiya nePhamfiliya, zeGibhide nezesifundeni seLibhiya eduze neSirene, neemvakatjhi ezivela eRoma, kokubili amaJuda nabatjhugulukele ekolweni yobuJuda, ¹¹ amaKrete, nama-Arabhu—sibezwa bakhuluma ngezinto ezibabazekako zakaZimu ngamalimi wethu.” ¹² Boke barareka bathi komunye nomunye: “Kutjho ukuthini lokhu?” ¹³ Kodwana abanye bahlekisa ngabo bathi: “Badakwe liwayini elimnandi.” ¹⁴ UPitrosi wasikima nabaliTjhumi naNye wakhuluma nabo ngelizwi elikhulu wathi: “Madoda weJudiya nani noke bahlali beJerusalema, yazini lokhu begodu lalelisisani amezwami. ¹⁵ Eqinisweni abantwaba abakadakwa njengombana nina nicabanga, ngombana yisimbi yethoba ekuseni. ¹⁶ Kodwana lokhu ngilokho okwatjhiwo ngoJuweli umphorofidi nakathi: ¹⁷ ‘UZimu uthi, “Emihleni yokuphela, ngizokuthululela ummoyami phezu kwayo yoke inyama, amadodanenu namadodakazenu azokuphorofida namasokana ahlangana nani azokubona imibono namadoda amadala ahlangana nani azokubhudanga amabhudango, ¹⁸ emihleni leyo ngizokuthululela ummoyami ngitjho neencekwini neencekukazini zami, begodu zizokuphorofida. ¹⁹ Ngizokwenza iimangaliso ezulwini neembonakaliso ephasini—iingazi nomlilo namafu wentuthu. ²⁰ Ilanga lizokuba mnyama nenyezi ibe ziingazi ngaphambi kobana kufike ilanga elikhulu neliphazimulako lakaJehova. ²¹ Woke umuntu obiza ibizo lakaJehova uzokusindiswa.”’

it-1-E 129 ¶2-3

Ngubani owajamiselela uJudasi IsKariyodi waba mpostoli wetjhumi nambili?

Ngebanga lokuhlubuka kwakaJudasi Iskariyodi, owahlongakala angakathembeki, bekusele abapostoli abali-11 kwaphela, hlangana namalanga ama-40 avusiwe bewabuyela ezulwini uJesu akhenge akhethe omunye ozokuvala isikhundla sakaJudasi. Kwathi ngemva kwamalanga alitjhumi uJesu abuyele ezulwini begodu ngelanga lePentekoste kwatlhogeka bona kukhethwe omunye ozokungena esikhundleni sakaJudasi, kodwana bekungasi ngebanga lokufa kwakhe, kunalokho bekungebanga lezenzo zakhe ezimbi nokuhlubuka kwakhe, njengombana umTlolo kaPitrosi uvezile. (IzE 1:15-22; IR 69:25; 109:8; madanisa nesAm 3:11.) Ngokuhlukile, nakuhlongakala umpostoli othembekileko uJakopo, abukho ubufakazi obutjengisa ukuthi kwakhethwa omunye bona ajamiselele isikhundla sakhe ngokuba mpostoli.—IzE 12:2.

Amezwi kaPitrosi aveza ukuthi nanyana ngubani ozokukhethwa bona abe mpostoli kaJesu Krestu kufuze bonyana uyamazi, wayibona imisebenzakhe, iimangaliso zakhe, khulukhulu ukuvuswa kwakhe. Ngokuya ngalokhu, kungatjhiwo ukuthi angekhe kwaba bulula bona kube nomunye umuntu ozokuba mpostoli, ngaphandle kobana kube nesibonakaliso esivela kuZimu esisekela umuntu loyo ukuthi uyalifanelekela ilungelweli. Ngesikhatheso sangaphambi kwePentekoste, bewakhona amadoda afanelekako, begodu bekunababili ebeba fanelekela ukujamisela uJudasi ongakhenge athembeke. Akunakuzaza bona IzAga 16:33, zikhuluma ngayo indaba le, ukuthi kwenziwa ifumbe, kwakhethwa uMatiyasi begodu ngemva kwalokho “wabalwa nabapostoli abali-11.” (IzE 1:23-26) Yeke uyabalwa hlangana ’nabaliTjhumi namBili’abararulula indaba emalungana nabafundi abakhuluma isiGirigi (IzE 6:1, 2), begodu uPowula wamfaka esibalweni ’sabaliTjhumi namBili’ nakakhuluma ngokuvuswa kwakaJesu nokubonakala kwakhe kweyo-1 kwebeKorinte 15:4-8. Ngaphezu kwalokho, nakufika iPentekoste, abapostoli abali-12 abasisekelo besele kusikhathi sokobana baphumule njengombana besele kwakhiwe u-Israyeli ongokomfanekiso.

NOVEMBA 19-​25

AMAGUGU ASELIZWINI LAKAZIMU | IZENZO 4-5

“Baragela Phambili Bakhuluma IliZwi LakaZimu Ngesibindi”

(IzEnzo 4:5-13) Ngelanga elilandelako ababusi babo, abadala, nabatloli babuthana ndawonye eJerusalema, ⁶ bano-Anasi umphristi omkhulu, uKhayafasi, uJwanisi, u-Alekzandra, nabo boke ebebaziinhlobo zomphristi omkhulu. ⁷ Bajamisa uPitrosi noJwanisi phakathi kwabo, bababuza bathi: “Lokhu nikwenze ngamaphi amandla namkha ngebizo lakabani?” ⁸ UPitrosi azele ummoya ocwengileko, wathi kibo: “Babusi babantu nabadala, ⁹ nangabe namhlanje siphenywa ngesenzo esihle esisenze endodeni erholopheleko, begodu nifuna ukwazi ukuthi ngubani owenze indoda leyo bona iphole, ¹⁰ akwaziwe kini noke nakibo boke abantu bakwa-Israyeli ukuthi ebizweni lakaJesu Krestu weNazaretha, loyo enambulalela esigodweni kodwana uZimu wamvusa kwabafileko, kungaye indoda le ijame lapha phambi kwenu iphilile. ¹¹ Lo ‘lilitje nina bakhi enaliphatha njengelinganamsebenzi eselililitje eliqakatheke ukuwadlula woke.’ ¹² Ukungezelela kilokho, ayikho isindiso kunanyana ngubani omunye, ngombana alikho elinye ibizo ngaphasi kwezulu elinikelweko hlangana nabantu ekufuze sisindiswe ngalo.” ¹³ Nje-ke nababona uPitrosi noJwanisi bakhuluma ngokutjhaphulukileko, babona nokuthi bebangakafundi begodu bababantu abajayelekileko, barareka khulu. Balemuka ukuthi bebanoJesu.

w08 9/1 15, ibhoksi

Ukusuka Emezwini Akhulunyiweko Ukuya Emitlolweni Ecwengileko—AmaKrestu Wekadeni Nemitlolo

Kghani Abapostoli Bebangakafundi?

Ababusi namadoda amadala weJerusalema “nababona uPitrosi noJwanisi bakhuluma ngokutjhaphulukileko, babona nokuthi bebangakafundi begodu bababantu abajayelekileko, barareka khulu.” (IzE 4:13) Kghani mbala abapostoli bebangakafundi? Malungana nendaba le, I-New Interpreter’s Bible iphawula ithi: “Indaba le akukafuzi ithathwe njengombana injalo, akukafuzi sikholelwe ukuthi mbala uPitrosi noJwanisi bebangakafundi begodu bebangakwazi ukufunda nokutlola. Bakghona ukubona umehluko ebewukhona ngokwezinga lefundo hlangana kwabahluleli ebebasekhotho kunye nabapostoli.”

w08 5/15 30 ¶6

Amaphuzu Asencwadini YezEnzo

4:13—Kghani uPitrosi noJwanisi bebangakafundi? Awa, akusinjalo. Bekuthiwa ‘abakafundi begodu bababantu abajayelekileko’ ngombana akhenge baye eenkolweni zaborabi zokubandulelwa ikolo.

(IzEnzo 4:18-20) Ngalokho bababiza, babakhalima bona bangakhulumi litho namkha bafundise ngesisekelo sebizo lakaJesu. ¹⁹ Kodwana uPitrosi noJwanisi baphendula bathi kibo: “Ukuthi kulungile emehlweni kaZimu bona silalele nina kunoZimu, yahlulelani ngokwenu. ²⁰ Kodwana thina, angekhe silise ukukhuluma ngezinto esizibonileko nesizizwileko.”

(IzEnzo 4:23-31) Ngemva kokutjhatjhululwa, batjhinga kwabanye abafundi, bababikela lokho abaphristi abakhulu nabadala ababatjele khona. ²⁴ Nabezwa lokhu, baphakamisa amezwabo kuZimu ngokuvumelana bathi: “Kosi ePhakemeko, nguwe owenze izulu nephasi nelwandle nakho koke okukizo, ²⁵ begodu owathi ngommoya ocwengileko ngomlomo kakhokho wethu uDavida, incekwakho: ‘Kubayini iintjhaba zitshwenyekile nabantu bazindla ngezinto ezingekho na? ²⁶ Amakhosi wephasi ajame ngomumo nababusi babuthene ndawonye njengalabo abaphikisana noJehova nozesiweko wakhe.’ ²⁷ Ngombana eqinisweni uHerode noPontiyasi Pilatu nabantu beentjhaba nabantu bakwa-Israyeli bebabuthene ndawonye edorobheneli ngokujamelene nencekwakho ecwengileko uJesu, loyo omzesileko, ²⁸ ukwenza lokho isandla neseluleko sakho esakubikezela kusesengaphambili bona kuzokwenzeka. ²⁹ Nje-ke, Jehova, sibawa utjheje ukuthusela kwabo, usize neenceku zakho bona ziragele phambili zikhuluma ilizwi lakho ngesikhulu isibindi, ³⁰ kukulapho uthabulula isandla sakho bona ulaphe begodu kwenzeke iimbonakaliso neemangaliso ngebizo lencekwakho ecwengileko uJesu.” ³¹ Ngemva kokuthandaza ngetjiseko, indawo ebebabuthene kiyo yasikinyeka, boke bazala ummoya ocwengileko, bakhuluma ilizwi lakaZimu ngesibindi.

it-1 128 ¶3

Abapostoli

Okwenzeka Ebandleni LobuKrestu. Ukuthululwa kommoya ocwengileko ngePentekoste kwabaqinisa khulu abapostoli. Izahluko ezihlanu zokuthoma zencwadi yezEnzo zikuveza kuhle ukuthi abapostoli bebangasabi begodu bebanesibindi nakuziwa ekutjhumayeleni iindaba ezimnandi kuhlanganise nokuvuswa kwakaJesu nanyana bebabetjhwa, bafakwa ejele begodu nababusi bebabathusela ngokubabulala. Ngemva kwePentekoste, uburholi babapostoli basekelwa mumoya ocwengileko, kwaba nemiphumela emihle ngombana kwakhula ibandla lobuKrestu. (IzE 2:41; 4:4) Ekuthomeni umsebenzi wokutjhumayela bewenziwa eJerusalema, wathuthukiselwa eSamariya, kwathi ngokukhamba kwesikhathi warhatjheka ephasini loke.—IzE 5:42; 6:7; 8:5-17, 25; 1:8.

Rhubhulula Ngezinto ZakaZimu Eziligugu

(IzEnzo 4:11) Lo ‘lilitje nina bakhi enaliphatha njengelinganamsebenzi eselililitje eliqakatheke ukuwadlula woke.’

it-1 514 ¶4

Ilitje

IRhubo 118:22 liveza ukuthi ilitje abakhi abaliphatha njengelinganamsebenzi belizokuba ‘ngeliqakathekileko kinawo woke’ (Heb., roʼsh pin·nahʹ). UJesu wasidzubhula bewasisebenzisa kuye isiphorofidwesi njengombana kunguye ‘ilitje eliqakatheke ukuwadlula woke’ (Gr., ke·pha·leʹ go·niʹas, ngeliqakathekileko kinawo woke). (Mat 21:42; Mar 12:10, 11; Luk 20:17) Ngokufana nelitje elikhulu lomakhiwo obonakalako, yeke noJesu Krestu ulilitje elikhulu lebandla lobuKrestu labazesiweko, elifana nethempeli elingokomfanekiso. UPitrosi naye wawusebenzisa umtlolo weRhubo 118:22 manqophana noKrestu nakaveza bona ‘ulilitje’ elaninwa babantu kodwana elakhethwa nguZimu bona libe ‘lilitje elikhethiweko.’—IzE 4:8-12; qala neyoku-1Pt 2:4-7.

(IzEnzo 5:1) Indoda ethileko ekuthiwa ngu-Ananiyasi, inomkayo uSafira, bathengisa isiqetjhana sendawo.

w13 3/1 15 ¶4

UPitrosi No-Ananiyasi Baleya Amala—Sifundani?

U-Ananiyasi nomkakhe bathengisa indawo bona bafumane imali yokusiza abaqeda ukubhajadiswa. U-Ananiyasi nekaletha imali ebapostolini, wathi ngiyo yoke imali ayifumeneko. Kodwana akusinjalo! Wazibekela enye imali! UZimu wenza bona uPitrosi azi ngentwele, ngalokho uPitrosi watjela u-Ananiyasi wathi: “Awukakhulumi amanga ebantwini kodwana kuZimu!” Ngesikhatheso u-Ananiyasi waduleka phasi wafa! Pheze ngemva kwama-awara amathathu, kungena umkakhe. Angazi bona kwenzekeni endodenakhe, naye wakhuluma amanga, waduleka phasi wafa.

Ukufundwa KweBhayibheli

(IzEnzo 5:27-42) Babaletha babajamisa phambi kweSanhedrini. Yeke umphristi ophakemeko wababuza ²⁸ wathi: “Sinitjele indlebe ukuzwa bona ningasafundisa ngesisekelo sebizweli, kodwana senizalise iJerusalema ngefundiso yenu, begodu nizimisele ukuletha iingazi zomuntu lo phezu kwethu.” ²⁹ UPitrosi nabanye abapostoli baphendula bathi: “Kufuze silalele uZimu njengombusi kunabantu. ³⁰ UZimu wabokhokho bethu wamvusa uJesu, loyo enambulalako, namphanyeka esigodweni. ³¹ UZimu umkhuphulele esandleni sakhe sokudla njengoMjameli omKhulu noMsindisi, bona anikele u-⁠Israyeli ukutjhuguluka nokulitjalelwa kwezono. ³² Sibofakazi beendabezi, ngokunjalo nommoya ocwengileko, lowo uZimu awunikele labo abamlalela njengombusi.” ³³ Nabezwa lokhu, basilingeka bafuna ukubabulala. ³⁴ Kodwana umFarisi ekuthiwa nguGamaliyeli wasikima hlangana kweSanhedrini; bekamfundisi womThetho ohlonitjhwa babantu boke, begodu wanikela umyalo wokuthi abantwaba bakhutjhelwe ngaphandle isikhatjhana. ³⁵ Nje-ke wathi kibo: “Madoda wakwa-Israyeli, yelelani lokho enihlose ukukwenza ebantwinaba. ³⁶ Ngokwesibonelo, mhlapha nje kwavela uTheyudasi, athi yena umumuntu oqakathekileko, begodu abantu abanengi, abangaba ma-400, baba malunga wehlangano yakhe. Kodwana wabulawa, begodu boke ebebamlandela baphadlhalala azange babe lilitho. ³⁷ Ngemva kwakhe, kwavela uJudasi weGalile ngesikhathi sokubalwa kwabantu, wazidosela abalandeli. Naye umuntu loyo wafa, begodu boke ebebamlandela baphadlhalala. ³⁸ Nje-ke ngaphasi kobujamo esikibo, ngithi kini, ningacabheli eendabeni zabantwaba, kodwana baliseni. Ngombana nangabe amano namkha umsebenzi lo uvela ebantwini, uzokuketulwa; ³⁹ kodwana nangabe uvela kuZimu, angekhe nikghone ukuwuketula; begodu ningazifumana senilwa noZimu ngokwakhe.” ⁴⁰ Basilalela iseluleko sakhe, babiza abapostoli, babaritha, begodu babayala bona balise ukukhuluma ngesisekelo sebizo lakaJesu, babalisa bakhamba. ⁴¹ Baphuma eSanhedrini, bathabile ngombana babalwa njengabafanelwe ukuhlaziswa ngebanga lebizo lakhe. ⁴² Qobe langa ethempelini nendlini ngendlu baragela phambili bangaliseleli, bafundisa begodu batjhumayela ngeendaba ezimnandi ezimalungana noKrestu, uJesu.

NOVEMBA 26–DISEMBA 2

AMAGUGU ASELIZWINI LAKAZIMU | IZENZO 6-8

“Ibandla LobuKrestu Elitjha Liyalingwa”

(IzEnzo 6:1) Emihleni leyo ngesikhathi abafundi banda, amaJuda akhuluma isiGirigi athoma ukunghonghoyila ngamaJuda akhuluma isiHebheru, ngombana abahlolokazi bawo bebangatjhejwa ekwabiweni kokudla kwaqobe langa.

bt 41 ¶17

“Kufuze Silalele UZimu NjengoMbusi Kunabantu”

¹⁷ Ibandla elisand’ ukuthonywa laqalana nengozi yokuthuselwa ebeyingaphakathi. Bekuyini lokho? Inengi labafundi elabhajadiswako belivakatjhele eJerusalema begodu belifuna ukufunda okunengi ngaphambi kokubuyela emakhaya. Abafundi ebebahlala eJerusalema bebazimisele ukusekela ngeemali bona kutholakale ukudla nezinye izinto. (IzE 2:44-46; 4:34-37) Nakusesenjalo, kwavela ubujamo obuthileko. Abafelokazi bamaGirigi “bebangatjhejwa ekwabiweni kokudla kwaqobe langa.” (IzE 6:1) Kanti abafelokazi bamaHebheru bona bebatjhejwa. Umraro bekukuthi abafelokazi bamaGirigi bebabandlululwa. Imiraro yona beyikhona, kodwana lo, bewuhlukile.

(IzEnzo 6:2-7) Nje-ke abaliTjhumi namBili babizela isiqubuthu sabafundi ndawonye, bathi kiso: “Akukalungi ngathi ukutjhiya ilizwi lakaZimu bona siyokwaba ukudla ematafuleni. ³ Ngalokho bafowethu, zikhetheleni amadoda alikhomba akhulunyelwa kuhle hlangana nani, azele ummoya nokuhlakanipha, bona siwabeke phezu komsebenzi otlhogekako lo; ⁴ kodwana thina sizozinikela emthandazweni nemsebenzini welizwi.” ⁵ Amezwi lawo asithabisa soke isiqubuthu, begodu bakhetha uStefani, indoda ezele ukukholwa nommoya ocwengileko, bakhetha noFlebhe, uProkhorasi, uNikanori, uThimoni, uPharimenasi, noNikholawu, umphroselithe we-Anthiyokiya. ⁶ Babaletha ebapostolini; abapostoli bathandaza, ngemva kwalokho bababeka izandla. ⁷ Nje-ke, ilizwi lakaZimu laragela phambili lirhatjheka, nenani labafundi belisolo landa khulu eJerusalema; begodu isiqubuthu esikhulu sabaphristi saba makholwa.

bt 42 ¶18

“Kufuze Silalele UZimu NjengoMbusi Kunabantu”

¹⁸ Isihlopha esibusako sabapostoli sebandla elikhulako, salemuka ukuthi angekhe kube kuhle ngaso “ukutjhiya ilizwi lakaZimu bona siyokwaba ukudla.” (IzE 6:2) Bona sirarulule indaba le, salayela abafundi ukuthi bafune amadoda alikhomba “azele ummoya nokuhlakanipha” bona siwabeke phezu “komsebenzi otlhogekako lo.” (IzE 6:3) Amadoda akhulunyelwa kuhle bewatlhogeka, ingasi ngebanga lomsebenzi wokwaba ukudla kwaphela, kodwana nokuqalelela iimali, ukuthenga izinto, nokutlola phasi yoke imininingwana. Woke amadoda akhethwako bewanamabizo wesiGirigi, kungenzeka lokho kwenza abafelokazi ebebabandlululwa bawamukela. Ngemva kokucabangisisa nokuthandaza ngendaba le, abapostoli bakhetha amadoda alikhomba bona atlhogomele ‘umsebenzi otlhogekako lo.’

(IzEnzo 7:58–8:1) Bamlahlela ngaphandle komuzi, ngemva kwalokho bamkghadlha ngamatje. Abofakazi babeka izambatho zabo zangaphandle eenyaweni zesokana ekuthiwa nguSawula. ⁵⁹ Njengombana bamkghadlha ngamatje, uStefani wenza nasi isibawo: “Kosi Jesu, yamukela ummoyami.” ⁶⁰ Nje-ke waguqa ngamadolo, warhuwelela ngelizwi elinamandla wathi: “Jehova, ungabajezisi ngesonwesi.” Ngemva kokutjho lokho, wahlongakala.

⁸ USawula bekavumelana nokubulawa kwakhe. Mhlokho ibandla ebeliseJerusalema lathoma ukuhlunguphazwa kabuhlungu; yeke boke ngaphandle kwabapostoli barhatjhekela kizo zoke iimfunda zeJudiya neSamariya.

Rhubhulula Ngezinto ZakaZimu Eziligugu

(IzEnzo 6:15) Njengombana boke ebebahlezi eSanhedrini bamrhudulele amehlo, babona ukuthi ubuso bakhe bebunjengobuso bengilozi.

bt 45 ¶2

UStefani—“Azele Umusa KaZimu Namandla”

² Bekube nje kunento ephawulekako ngomlando wakaStefani. Abahluleli bamrhudulela amehlo, babona ukuthi ubuso bakhe “bebunjengobuso bengilozi.” (IzE 6:15) Iingilozi zimemezela ngoJehova uZimu, yeke lokho kwenza zingasabi begodu zibe nokuthula. Ngitjho nabahluleli abanehloyo bakubona lokho kuStefani. Yini eyamenza waba nokuthula kangaka?

(IzEnzo 8:26-30) Kodwana ingilozi kaJehova yakhuluma noFlebhe, yathi: “Sikima utjhinge esewula endleleni eyehla ukusuka eJerusalema ukufika eGaza.” (Indlela le beyisebhudwini.) ²⁷ Wasikima watjhinga khona, wabona isikhulu sesigodlweni seTopiya, indoda ebeyimlawuli ngaphasi kwakaKhandakhe, indlovukazi yamaTopiya, begodu isikhulwesi besiphathiswe woke umnothwayo. Besiye eJerusalema siyokulotjha uZimu, ²⁸ kodwana besesibuyela emva sihlezi ekaranenaso, sifunda ngokuzwakalako umtlolo womphorofidi u-Isaya. ²⁹ Nje-ke ummoya wathi kuFlebhe: “Tjhidela ekaraneni le.” ³⁰ UFlebhe wagijima eqadi kwayo wasizwa sifunda ngokuzwakalako umtlolo womphorofidi u-⁠Isaya, wathi kiso: “Uyakuzwisisa lokho okufundako na?”

bt 58 ¶16

Batjhumayela “Iindaba Ezimnandi NgoJesu”

¹⁶ Namhlanjesi amaKrestu anelungelo lokuhlanganyela emsebenzini owenziwa nguFlebhe. Kanengi amaKrestu akghona ukutjhumayela umlayezo womBuso ebantwini abahlangana nabo ngokungakahlelwa, nalokha nawasekhambweni. Esikhathini esinengi, ngokunqotjhiswa ziingilozi ahlangana nabantu abathembekileko. Lokhu akukafuzi kusimangaze ngombana iBhayibheli likubeka ebaleni ukuthi iingilozi zinqophisa umsebenzi wokutjhumayela ukwenzela bona umlayezo lo ufikelele “kizo zoke iintjhaba, iinkoro, amalimi nabantu.” (sAm 14:6) Kazi ngilokho uJesu akubikezela ukuthi iingilozi ngizo ezizokunqophisa umsebenzi lo. Emfanekiswenakhe wekoroyi nekhula, uJesu wathi ngesikhathi sokuvuna—okusikhathi sokuphela kwephasi—‘abavuni kuzokuba ziingilozi.’ Wangezelela ngokuthi iindalwa zommoya ‘zizokukhupha emBuswenakhe zoke izinto ezibangela ukuwa nabantu abanganamthetho.’ (Mat 13:37-41) Ngesikhathi esifanako, iingilozi zizokubuthelela iindlalifa ezizokubusa ezulwini—kuzokuthi ngemva kwalokho kulandele “isiqubuthu esikhulu” ‘sezinye izimvu’ uJehova asidosele ehlanganwenakhe.—sAm 7:9; Jwa 6:44, 65; 10:16.

Ukufundwa KweBhayibheli

(IzEnzo 6:1-15) Emihleni leyo ngesikhathi abafundi banda, amaJuda akhuluma isiGirigi athoma ukunghonghoyila ngamaJuda akhuluma isiHebheru, ngombana abahlolokazi bawo bebangatjhejwa ekwabiweni kokudla kwaqobe langa. ² Nje-ke abaliTjhumi namBili babizela isiqubuthu sabafundi ndawonye, bathi kiso: “Akukalungi ngathi ukutjhiya ilizwi lakaZimu bona siyokwaba ukudla ematafuleni. ³ Ngalokho bafowethu, zikhetheleni amadoda alikhomba akhulunyelwa kuhle hlangana nani, azele ummoya nokuhlakanipha, bona siwabeke phezu komsebenzi otlhogekako lo; ⁴ kodwana thina sizozinikela emthandazweni nemsebenzini welizwi.” ⁵ Amezwi lawo asithabisa soke isiqubuthu, begodu bakhetha uStefani, indoda ezele ukukholwa nommoya ocwengileko, bakhetha noFlebhe, uProkhorasi, uNikanori, uThimoni, uPharimenasi, noNikholawu, umphroselithe we-Anthiyokiya. ⁶ Babaletha ebapostolini; abapostoli bathandaza, ngemva kwalokho bababeka izandla. ⁷ Nje-ke, ilizwi lakaZimu laragela phambili lirhatjheka, nenani labafundi belisolo landa khulu eJerusalema; begodu isiqubuthu esikhulu sabaphristi saba makholwa. ⁸ UStefani, azele umusa kaZimu namandla, bekenza iimangaliso neembonakaliso ezikulu hlangana nabantu. ⁹ Kodwana kweza amanye amadoda avela esiqhemeni esibizwa ngokuthi yiSinagogi labaTjhaphulukileko, akunye namanye amaSirene nama-Alekzandriya, begodu akhamba namanye avela eSilisiya ne-Asiya, azokuphikisana noStefani. ¹⁰ Kodwana azange akghone ukujamelana nokuhlakanipha nommoya ebekakhuluma ngawo. ¹¹ Ngemva kwalokho ahlohlozela amadoda athileko ngerhorhomejeni bona athi: “Simuzwe ahlambalaza uMosi noZimu.” ¹² Aphehla abantu, abadala, nabatloli, beza kuye kungakalindeleki, bamthatha ngekani batjhinga naye eSanhedrini. ¹³ Baletha abofakazi bamala, bathi: “Indoda le isolo ikhuluma izinto ezimbi ngendawo ecwengileko le nangomThetho. ¹⁴ Ngokwesibonelo, simuzwe athi uJesu weNazaretha lo uzokugiriza indawo le begodu atjhugulule amasiko uMosi awadlulisele kithi.” ¹⁵ Njengombana boke ebebahlezi eSanhedrini bamrhudulele amehlo, babona ukuthi ubuso bakhe bebunjengobuso bengilozi.