Lingisa UJehova NoJesu Ngendlela Ocabanga Ngayo

1-2. Ukuthanda uJehova kuhlanganisani begodu uJesu watjengisa njani ukuthi uthanda uJehova ngehliziywakhe yoke?

“KUFUZE uthande uJehova uZimakho ngehliziywakho yoke nangomphefumulwakho woke nangamandlakho woke nangomkhumbulwakho woke.” (Luk. 10:27) UJesu wakwenza kwakhanya ukuthi lo bekumthetho oqakatheke khulu emThethweni kaMosi. Ukuthanda uJehova kuhlanganisa ihliziywethu, esikufisako nendlela esizizwa ngayo. Kuhlanganisa ukuzinikela ngehliziyo epheleleko namandlethu. Godu ukuthanda uJehova kuhlanganisa nomkhukhumbulwethu okutjho indlela esicabanga ngayo. Kuliqiniso ukuthi angekhe sayizwisisa ngokupheleleko indlela uJehova acabanga ngayo. Nanyana kunjalo, singayizwisisa ngcono indlela uJehova acabanga ngayo ngokufunda ‘ngomkhumbulo kaKrestu’ ngombana uJesu bekacabanga njengoYise.—1 Kor. 2:16.

² UJesu bekathanda uJehova ngomkhumbulwakhe woke. Bekazi kuhle ukuthi uJehova bekalindele bona enzeni begodu bekazimisele ukwenza njalo nanyana bekazokuphathwa kumbi ngokwenza lokho. Ngebanga lokuthi uJesu bekazimisele ukuthabisa uYise, bakangavumeli nanyana yini bona iqakatheke khulu ekuphileni kwakhe.

3. Khuyini uPitrosi ayifunda kuJesu begodu wafundisa amaKrestu akunye nawo bona enzeni? (1 Pitrosi 4:1)

³ UPitrosi nabanye abapostoli bafumana ilungelo lokuba noJesu begodu bafunda nendlela ebekacabanga ngayo. Nakatlola incwadakhe yokuthoma, uPitrosi wakhuthaza amaKrestu bona abe nomkhumbulo kaKrestu. (Funda yoku-1 kaPitrosi 4:1.) UPitrosi wasebenzisa ikulumo esetjenziswa epini wathi: “Hlomani.” Yeke amaKrestu nawangalingisa indlela uJesu ebekacabanga ngayo, bewazokuba nezinto ezitlhogekako bona alwisane nanyana ngisiphi isifiso sokwenza okungakalungi nokubuswa liphasi lakaSathana.—2 Kor. 10:​3-5; Efe. 6:12.

4. Isihlokwesi sizosisiza njani silalele isiyeleliso sakaPitrosi?

⁴ Sizokuhlolisisa indlela uJesu ebekacabanga ngayo, sibone ukuthi singayilingisa njani. Sisozokubona ukuthi (1) singayilingisa njani indlela uJehova acabanga ngayo, lokho kuzosisiza sicabange njengaye, (2) sithobeke, (3) sicabangisise kuhle begodu sithembele kuJehova ngomthandazo.

LINGISA INDLELA KAJEHOVA YOKUCABANGA

5. Kobunye ubujamo uPitrosi wabhalelwa njani kucabanga njengoJehova?

⁵ Cabanga ngobunye ubujamo lapho uPitrosi abhalelwa khona kucabanga njengoJehova. UJesu watjela abapostoli bakhe ukuthi kufuze aye eJerusalema, anikelwe kubadosi phambili bekolo, akghodlhelele ukuhlunguphazwa begodu abulawe. (Mat. 16:21) UPitrosi wakufumana kubudisi ukwamukela ukuthi uJehova uzokuvumela uJesu, olithemba lakwa-Israyeli uMesiya othenjisiweko bona abulawe. (Mat. 16:16) UPitrosi wabizela uJesu eqadi wathi: “Ungazihloboki Kosi; angeze kwenzeke kuwe lokhu.” (Mat. 16:22) UJesu noPitrosi akhenge bavumelane endabeni le ngombana uPitrosi bekangacabangi ngendlela uJehova acabanga ngayo.

6. UJesu watjengisa ngayiphi indlela ukuthi ucabanga njengoJehova?

⁶ Indlela uJesu ebekacabanga ngayo beyikhambisana nendlela uBabakhe wezulwini ebekacabanga ngayo. UJesu wathi kuPitrosi: “Iya emva kwami Sathana! Usiqabo phambi kwami ngombana awucabangi imicabango kaZimu kodwana yabantu.” (Mat. 16:23) Kungenzeka uPitrosi bekaneenhloso ezihle kodwana uJesu akhenge asamukele isiyeleliso sakhe. Kunesifundo esisifumanako lapho. UJehova bekangafuni uJesu aphile ipilo yokuzitlhuwela. Kilokhu okwenzekako, uPitrosi wafunda isifundo esiqakatheke khulu sokucabanga njengoJehova.

7. UPitrosi watjengisa njani ukuthi ufuna ukucabanga njengoJehova? (Qala esingaphandle.)

⁷ Ngokukhamba kwesikhathi, uPitrosi watjengisa njani ukuthi ufuna ukucabanga njengoJehova? Besele kusikhathi sokuthi abanye abantu abangasimaJuda, abavela kwezinye iintjhaba balotjhe uJehova. UPitrosi wabelwa bona ayokutjhumayela uKorneliyasi obekangasimJuda, obekazokuba hlangana nesiqhema sokuthoma sabantu ebebazokulotjha uJehova. Ngokujayelekileko amaJuda bewangazihlanganisi nabanye abantu abavela kwezinye iintjhaba. Yeke uPitrosi bekufuze atjhugulule indlela ebekacabanga ngayo bona abatjhumayeze. Nakabona indlela uJehova acabanga ngayo ngendaba le, uPitrosi watjhugulula indlela ebekacabanga ngayo. UKorneliyasi nakabawa uPitrosi bona amvakatjhele, uPitrosi akhenge ‘ale.’ (IzE. 10:​28, 29) UPitrosi watjhumeyela uKorneliyasi nomndenakhe begodu babhajadiswa.—IzE. 10:​21-23, 34, 35, 44-48.

8. Singatjengisa njani bona sicabanga njengoJehova? (1 Pitrosi 3:8 nomtlolo waphasi)

⁸ Ngemva kweminyaka, uPitrosi wakhuthaza amaKrestu akunye nawo bona ‘abe nomkhumbulo onobunye.’ (Funda yoku-1 kaPitrosi 3:8 nomtlolo waphasi.) Singakghona ukucabanga ngobunye nabafowethu nabodadwethu, nasilingisa indlela uJehova acabanga ngayo njengombana sifunda ngayo eBhayibhelini. Ngokwesibonelo, uJesu wakhuthaza abalandeli bakhe bona babeke umBuso qangi ekuphileni kwabo. (Mat. 6:33) Umrhuweleli osebandleni okilo kungenzeka asebenzise iselulekweso, asebenzele uJehova isikhathi esizeleko. Kunokumtjela bona angazihloboki, kufuze sikhulume naye ngendlela eyakhako ngomnqopho azibekele wona begodu simsekele.

THOBEKA

9-10. UJesu wakutjengisa njani ukuthi uthobekile?

⁹ Ngaphambi kobusuku abulawa ngabo, uJesu wafundisa uPitrosi nabanye abapostoli isifundo esiqakathekileko sokuthobeka. Ngelangelo uJesu bekathume uPitrosi noJwanisi bona balungise izinto ebekazozidla nabo ngaphambi kobana abulawe. Kungenzeka amalungiselelo lawo ahlanganisa isikotlelwana nethawula zokuhlambisa abayeni iinyawo ngaphambi kobana badle. Bekungubani obekazokuthobeka ahlambise abanye iinyawo?

¹⁰ UJesu akhenge adose iinyawo bona enze umsebenzi lo. Watjengisa ukuthi uthobekile. Kwabarara khulu abapostoli ukubona uJesu enza umsebenzi kanengi ebewenziwa sisebenzi. UJesu wahlubula izambatho zakhe zangaphandle, wathatha ithawula walitantela edinini, wathela amanzi ngesikotlelweni wathoma ukuhlambisa abapostoli bakhe iinyawo. (Jwa. 13:​4, 5) Kungenzeka kwathatha isikhathi eside ukuhlambisa abapostoli abali-12 iinyawo, kuhlanganise noJudasi obekazomjikela ingasikade. UJesu wathobeka wawenza umsebenzi lo. Ngesineke wahlathulula wathi: “Niyakuzwisisa na engikwenze kini? Ningibiza ngokuthi ‘Mfundisi’ nokuthi ‘Kosi,’ nitjho kufanele ngombana ngingikho. Nje-ke, nangabe mina, nanyana ngiyiKosi noMfundisi, nginihlambise iinyawo, nani kufuze nihlambisane iinyawo.”—Jwa. 13:​12-14.

11. UPitrosi watjengisa njani ukuthi ufunde ukuthobeka? (1 Pitrosi 5:5) (Qala isithombe esingaphandle.)

¹¹ UPitrosi wafunda ekuthobekeni kwakaJesu. Ngemva kobana uJesu abuyele ezulwini, uPitrosi wenza ikarisomraro ngokulapha indoda eyabelethwa irholophele. (IzE. 1:​8, 9; 3:​2, 6-8) Isiquthu sabantu sayibona ikarisomraro le, sabungelela uPitrosi. (IzE. 3:11) UPitrosi akhenge afune bona abantu bamdumise, nanyana bekakhulele endaweni enabantu abathanda ukuhlonitjhwa nokuqalelwa phezulu. Awa, uPitrosi akhenge enze njalo, ngokuthobeka wadumisa uJehova noJesu wathi, “Ngegama [lakaJesu], nangokukholelwa kwethu egameni lakhe, indoda eniyibonako neniyaziko le yenziwe yaqina.” (IzE. 3:​12-16) Amezwi asetjenziswa nguPitrosi encwadinakhe ayitlolela amaKrestu malungana nokuthobeka, angasikhumbuza ngesikhathi uJesu atantela ngaso ithawula edinini wahlambisa abapostoli bakhe iinyawo.—Funda yoku-1 kaPitrosi 5:5.

12. Singamlingisa njani uPitrosi, siragele phambili nokufunda ukuthobeka?

¹² Singalingisa uPitrosi ngokuthi siragele phambili sifunde ukuthobeka. Khumbula ukuthi ukuthobeka akutjho ukukhuluma amezwi asenza sibonakale ngathi sithobekile. UPitrosi wasebenzisa igama elithi “ukuthobeka” ukutjengisa ukuthi ukuthobeka kuhlanganisa indlela esicabanga ngayo ngabanye abantu. Senzela abanye izinto ezihle ngombana sithanda uJehova begodu sithanda nabantu ingasi ngebanga lokuthi sifuna ukubukwa. Nasilotjha uJehova sithabile begodu senzela abanye izinto esikghona ukubenzela zona, kunganandaba ukuthi abanye bayakubona esikwenzako, lokho kutjengisa ukuthi sithobekile.—Mat. 6:​1-4.

“QAQULUKANI EMKHUMBULWENI”

13. Kutjho ukuthini ‘ukuqaquluka emkhumbulweni?’

¹³ Kutjho ukuthini ukuba ‘nomkhumbulo oqaqulukileko’? (1 Pit. 4:7) UmKrestu onomkhumbulo oqaqulukileko wenza koke okusemandlenakhe bona athathe iinqunto ezitjengisa ukuthi ucabanga njengoJehova. UmKrestu onjalo uyalemuka bona ekuphileni kwakhe ayikho into eqakatheke ukudlula ubuhlobo bakhe noJehova. Uzokubalekela ukuzibona ngasuthi uqakatheke khulu begodu uzokuzwisisa bona akazi yoke into. Uzokutjengisa ukuthi uthembele kuZimu ngokuthi ahlale athandazela isinqophiso sakhe.a

14. Kobunye ubujamo uPitrosi wabhalelwa njani kuthembela kuJehova?

¹⁴ Ngobusuku bakhe bamaswaphela, ngaphambi kobana uJesu ahlongakale wayelelisa abalandeli bakhe wathi: “Noke nizokuwa ngebanga lami kilobu busuku.” UPitrosi wazithemba khulu, waphendula wathi: “Nanyana boke bangawa ngebanga lakho, mina angekhe ngiwe!” UJesu wathi kwabanye abalandeli bakhe: “Hlalani niqalile begodu nithandaze qobe.” (Mat. 26:​31, 33, 41) UPitrosi akhenge asilalele isiyelelisweso, ngathana wasilalela kungenzeka bekazokuba nesibindi sokuziveza ukuthi bekamlandeli kaJesu. Kunalokho uPitrosi waphika iKosakhe begodu wazisola kabuhlungu.—Mat. 26:​69-75.

15. UJesu watjengisa njani bona unomkhumbulo oqaqulukileko ngobusuku bakhe bamaswaphela nakamumuntu?

¹⁵ UJesu wathembela kuJehova ngokupheleleko. Nanyana bekanganasono, wathandaza ngokubuyelelweko ngaphambi kokufa kwakhe. Lokho kwamnikela isibindi sokwenza ngokuvumelana nentando kaJehova emalungana naye. (Mat. 26:​39, 42, 44; Jwa. 18:​4, 5) UPitrosi akhenge akukhohlwe ukuthi uJesu wathandaza ngokubuyelelweko ngobusuku bakhe bamaswaphela nakasephasini.

16. UPitrosi watjengisa njani ukuthi ufunde ukuba nomkhumbulo oqaqulukileko? (1 Pitrosi 4:7)

¹⁶ Ngokukhamba kwesikhathi, uPitrosi wafunda ukuthembela khulu kuJehova. Ngemva kokuvuswa kwakhe, uJesu waqinisekisa uPitrosi nabanye abapostoli bona bazokufumana umoya ocwengileko ozobasiza bona batjhumayele iindaba ezimnandi. Nanyana kunjalo, uJesu wathi balinde eJerusalema ukuthi kwenzeke lokho. (Luk. 24:49; IzE. 1:​4, 5) Nabasalindileko, uPitrosi wenzani? UPitrosi namanye amaKrestu “bathandaza ngokubuyelelweko.” (IzE. 1:​13, 14) Ngokukhamba kwesikhathi, encwadinakhe yokuthoma uPitrosi wakhuthaza amaKrestu akunye nawo bona aqaquluke emkhumbulweni begodu athembele kuJehova ngomthandazo. (Funda yoku-1 kaPitrosi 4:7.) UPitrosi wafunda ukuthembela kuJehova wakghona ukusiza nokuqinisa abafowabo nabodadwabo.—Gal. 2:9

17. Nanyana singaba namakghono akhethekileko, khuyini ekufuze siragele phambili siyenza? (Qala nesithombe.)

¹⁷ Nasizokuqaquluka emkhumbulweni, kufuze sithandaze kuJehova qobe. Siyalemuka bona kufuze siragele phambili sithandaza kuJehova kunganandaba ukuthi sinamaphi amakghono. Nje-ke nakuneenqunto eziqakathekileko ekufuze sizithathe, kufuze sithandaze kuJehova sibawe isinqophiso sakhe begodu simthembe ngombana uyazi bona khuyini esilungeleko.

18. Singayitjhugulula njani indlela esicabanga ngayo bona ivumelane nendlela kaJehova yokucabanga?

¹⁸ Simthokoza khulu uJehova ngendlela asidale ngayo, esenza sikghone ukulingisa ubuntu bakhe. (Gen. 1:26) Kuliqiniso ukuthi angekhe sakghona ukumlingisa ngokupheleleko uJehova. (Isa. 55:9) Nanyana kunjalo, njengoPitrosi singakghona ukutjhugulula indlela esicabanga ngayo bona ivumelane nokucabanga kwakaJehova. Kwangathi soke singaragela phambili silingisa indlela kaJehova yokucabanga, sithobeke begodu siqaquluke emkhumbulweni.