Funda kuJesu Ukuthi Ungatjhumayela Njani Ngetjiseko

1. Abantu bakaJehova bahluke njani ebantwini abazibiza ngokuthi bamaKrestu?

INTO eyenza abantu bakaJehova bahluke ebantwini abazibiza ngokuthi bamaKrestu, yindlela abakhuthalele ngayo ukutjhumayela. (Tit. 2:14) Ngezinye iinkhathi, singazizwa singanamdlandla wokutjhumayela. Kungenzeka uzizwa njengomunye umdala osebenza budisi owathi: “Ngezinye iinkhathi ngizizwa nginganamdlandla wokuya esimini.”

2. Kubayini kungaba budisi ukuragela phambili sitjhumayela?

² Singathabela ukusebenzela uJehova khulu ngezinye iindlela kunokutjhumayela. Kubayini? Kungombana nasakha besitlhogomele amaWolo womBuso, sisize abafowethu abavelelwe ziinhlekelele namkha sibakhuthaze sibona imiphumela emihle khonokho begodu lokho kuyasithabisa. Siyakuthabela ukuthula esiba nakho nasisebenza nabafowethu nabodadwethu begodu siyaqiniseka ukuthi nabo bazizwa ngendlela efanako ngalokho esibenzela khona. Kungenzeka sesitjhumayele isikhathi eside esimini enabantu abambalwa abafuna ukulalela umlayezo weBhayibheli. Ngakelinye ihlangothi, kungenzeka sihlangane nabantu abangafuni ukulalela umlayezwethu. Njengombana isiphelo sitjhidela singalindela ukuthi abantu basiphikise. (Mat. 10:22) Khuyini engasisiza sihlale sikhuthele namkha sithuthukise indlela esitjhumayela ngayo?

3. Umfanekiso okuLukasi 13:​6-9, usifundisani ngoJesu?

³ Isibonelo sakaJesu sisifundisa ukuthi singakhuthala njani emsebenzini wokutjhumayela. Nakasephasini, uJesu wasebenza budisi bona aragele phambili atjhumayela. Njengombana isikhathi sikhamba wathuthukisa indlela ebekatjhumayela ngayo. (Funda uLukasi 13:​6-9.) Emfanekiswenakhe, uJesu wafanekisa umsebenzakhe nomuntu owatjala umuthi begodu wasebenza iminyaka emithathu bona atlhogomele umuthi wamafeyi kodwana akhenge kube neenthelo. Ngokufanako uJesu watjhumayela amaJuda iminyaka emithathu kodwana akhenge alalele. Umuntu owatjala umuthi akhenge alahle ithemba emthini wamafeyi, uJesu naye akhenge alahle ithemba ngabantu namkha alise ukukhuthalela ukutjhumayela. Kunalokho uJesu wasebenza budisi bona atjhumayeze amaJuda, awasize amukele iindaba ezimnandi.

4. Ngiziphi izinto ezine esingazifunda esibonelweni sakaJesu?

⁴ Esihlokwenesi sizokufunda ngokuthi uJesu wakhuthala njani, khulukhulu eenyangeni ezisithandathu zokugcina zomsebenzakhe wokutjhumayela. Nathi singakhuthala njengoJesu, nasingafunda ezintweni azifundisako nebekazenza. Nje sizokubona izinto ezine esingazifunda kuJesu: (1) Ukwenza intando kaJehova bekuqakatheke khulu kuye, (2) bekazwisisa begodu aphila ngokuvumelana neemphorofido zeBhayibheli, (3) wathembela esekelweni lakaJehova (4) bekahlala anethemba lokuthi abanye bazomlalela.

WADZIMELELA EKWENZENI INTANDO KAJEHOVA

5. UJesu watjengisa njani ukuthi udzimelele ekwenzeni intando kaZimu?

⁵ UJesu wakhuthalela ukutjhumayela “iindaba ezimnandi zomBuso” ngombana bekazi ukuthi uZimu ufuna enze njalo. (Luk. 4:43) Ukutjhumayela bekuyinto eza qangi kuJesu. Eenyangeni ezimbalwa zokugcina zomsebenzakhe wokutjhumayela, “wakhamba idorobho nedorobho, isabelo nesabelo” afundisa abanye. (Luk. 13:22) Wabandula abafundi abangeziweko bona batjhumayele iindaba ezimnandi.—Luk. 10:1.

6. Ukutjhumayela kuhlobene njani nezinye izabelo esingaba nazo? (Qala isithombe.)

⁶ Nanamhlanjesi ukutjhumayela msebenzi oqakathekileko kuJehova noJesu abafuna siwenze. (Mat. 24:14; 28:​19, 20) Nanyana ngimuphi umsebenzi esiwenzela uJehova, uhlobene khulu nomsebenzi wokutjhumayela. Ngokwesibonelo, sakha imakhiwo yehlangano namkha sisebenze e-Bethel bona sisekele umsebenzi wokutjhumayela. Senza umsebenzi wokuhlangula nakunehlekelele sisize abafowethu nabodadwethu bona barage nokulotjha uZimu, lokho kuhlanganisa nokutjhumayela. Ukulemuka ukuqakatheka komsebenzi wokutjhumayela, nokukhumbula ukuthi uJehova ufuna siwenze kuzosenza sikhuthalele ukutjhumayela. UJános umdala we-Hungary, uthi: “Ngihlala ngizikhumbuza ukuthi awukho umsebenzi engingawenzela uJehova oqakatheke ukudlula ukutjhumayela.”

7. Kubayini uJehova afuna siragele phambili sitjhumayela? (1 Thimothi 2:​3, 4)

⁷ Singathuthukisa indlela esikhuthalele ngayo ukutjhumayela, ngokuqala abantu ngendlela uJehova abaqala ngayo. Ufuna abantu abanengi bezwe iindaba ezimnandi bazamukele. (Funda yoku-1 Thimothi 2:​3, 4.) Ukutjhumayela iindaba ezimnandi kungasindisa ukuphila kwabantu. Nje-ke uJehova usisiza sithuthukise indlela esikhuluma ngayo nabantu. Incwajana ethi, Thanda Abantu—Yenza Abafundi isisiza sikwazi ukukhuluma nomuntu ngehloso yokuthi afunde iBhayibheli begodu abe mlandeli kaJesu. Nanyana abantu bangasilaleli nje, bangaba nethuba lokulalela ngaphambi kokuphela kwesizi elikhulu. Esikukhuluma nje kungaba khuthaza bona balalele esikhathini esizako. Lokho kuzokwenzeka kwaphela nasiragela phambili sitjhumayela.

BEKAZWISISA BEKAPHILE NGOKUVUMELANA NEEMPHOROFIDO ZEBHAYIBHELI

8.Iimphorofido zeBhayibheli zamsiza njani uJesu wasebenzisa kuhle isikhathi sakhe?

⁸ UJesu bekaqiniseka ngokuthi iimphorofido zeBhayibheli zizokuzaliseka. Bekazi nokuthi bekazokutjhumayela iminyaka emithathu nesiquntu kwaphela. (Dan. 9:​26, 27) Bekasazi nesiphorofido esimalunga nokuthi uzokufa nini nokuthi njani. (Luk. 18:​31-34) Ngebanga lokuthi uJesu bekakwazi okwabikezelwako, wasisebenzisa kuhle isikhathi sakhe. Yeke wakhuthalela ukutjhumayela bona aqede umsebenzi ebekanikelwe wona.

9. Ukuzwisisa iimphorofido zeBhayibheli kusisiza njani sikhuthalele ukutjhumayela?

⁹ Ukuzwisisa iimphorofido zeBhayibheli kusisiza sikhuthalele ukutjhumayela. Siyazi ukuthi ukuphela kwephaseli kutjhidele. Siyalemuka ukuthi indlela abantu abacabanga nabaziphatha ngayo, iBhayibheli yathi kuzokwenzeka emihleni yokuphela. Siyazwisisa ukuthi ipi ehlangana ne-Anglo-American World Power ne-Russia nabakhambisani bayo, izalisa isiphorofido esimalungana nekosi yangesewula nekosi yangetlhagwini “esikhathini sokuphela.” (Dan. 11:40) Siyazi nokuthi i-Anglo-American World Power ijanyelwe ziinyawo esithombeni esihlathululwe kuDanyela 2:​43-45. Njengombana iimphorofido ziveza siyaqiniseka ukuthi umBuso kaZimu kungasikade uzokuqeda aborhulumende babantu. Zoke iimphorofidwezi zitjengisa ukuthi isikhathi sesiphele kangangani.

10. Iimphorofido zeBhayibheli zisikhuthaza ngaziphi ezinye iindlela bona sirage nokutjhumayela?

¹⁰ Iimphorofido zeBhayibheli zisinikela omunye umlayezo esifuna ukuwutjela abanye abantu. Udadwethu u-Carrie we-Dominican Republic uthi: “Iinthembiso zakaJehova ezihle zengomuso, zingenza ngifise ukutjela abanye iqiniso.” Uraga uthi: “Nangiqala imiraro abantu abaqalana nayo ngilemuka ukuthi iinthembiso zakaJehova akusingezami kwaphela kodwana nabo zingabasiza.” Iimphorofido zeBhayibheli zisikhuthaza bona siragele phambili sitjhumayela ngombana siyazi ukuthi nguJehova osisekelako. Udadwethu u-Leila we-Hungary uthi: “Isaya 11:​6-9 ungikhuthaza bona ngicocele abanye iindaba ezimnandi nanyana babonakala bangekhe bazamukele. Ngiyazi bona nanyana ngubani angatjhuguluka ngesizo lakaJehova. Umfowethu we-Zambia u-Christopher uthi: “Njengombana uMarkosi 13:10 atjho iindaba ezimnandi zirhatjheka ephasini loke, kulilungelo ukusiza ekuzaliseni isiphorofidwesi.” Ngiziphi iimphorofido zeBhayibheli ezikukhuthaza bona uragele phambili utjhumayela?

BEKATHEMBA UKUTHI UJEHOVA UZOMSIZA

11. Kubayini uJesu bekufuze athembele kuJehova nakazakuragela phambili akhuthalela ukutjhumayela? (Lukasi 12:​49, 53)

¹¹ UJesu wathembela kuJehova bona aragele phambili akhuthalela ukutjhumayela. UJesu wakhetha kuhle amezwakhe, ngombana bekazi ukuthi umlayezwakhe bewuzokusilinga abanye abantu begodu abanye bebazowuphikisa. (Funda uLukasi 12:​49, 53.) Ngebanga lokuthi bekatjhumayela, abadosi phambili bezekolo balinga kanengi ukumbulala. (Jwa. 8:59; 10:​31, 39) UJesu waragela phambili atjhumayela ngombana bekazi ukuthi uJehova unaye. Wathi: “Angisingedwa, uBaba ongithumileko unami. . . . Akhenge angitjhiye ngingedwa ngombana qobe ngenza izinto ezimthabisako.”—Jwa. 8:​16, 29.

12. UJesu wabalungiselela njani abafundi bakhe bona barage nokutjhumayela nabaqalene nokuphikiswa?

¹² UJesu wakhumbuza abalandeli bakhe ukuthi bathembele kuJehova. Wabaqinisekisa kanengi bona uJehova uzokuba nabo nabaqalene nokuphikiswa. (Mat. 10:​18-20; Luk. 12:​11, 12) Abantu abanengi bebazoziphikisa iindaba ezimnandi, nje-ke uJesu wakhuthaza abalandeli bakhe bona batjheje. (Mat. 10:16; Luk. 10:3) Wabatjela bona bangakateleli abantu abangafuni ukulalela. (Luk. 10:​10, 11) Wabatjela nokuthi babaleke nabahlunguphazwako. (Mat. 10:23) Nanyana uJesu bekakhuthalele ukutjhumayela begodu athembele kuJehova, bekangafaki ukuphila kwakhe engozini ngabomu.—Jwa. 11:​53, 54.

13. Kubayini ungaqiniseka ngokuthi uJehova uzokusiza?

¹³ Abantu abanengi baphikisana nomsebenzethu wokutjhumayela, yeke sitlhoga bona uJehova asisize siragele nokutjela abantu iindaba ezimnandi. (IsAm. 12:17) Kubayini ungaqiniseka ngokuthi uJehova uzokusekela? Funda umthandazo kaJesu ofumaneka kuJwanisi isahluko 17. Emthandazweni loyo uJesu ubawa uJehova bona avikele abapostoli. UJehova wawuphendula umthandazo loyo. Incwadi yezEnzo isitjela ukuthi uJehova wabasiza njani abapostoli bona bakhuthalele ukutjhumayela nanyana bebahlunguphazwa. Godu uJesu wabawa uJehova bona avikele labo ebebazokukholelwa etjumayelweni yabapostoli. Lokho kuhlanganisa nawe. UJehova usaragela phambili aphendula umthandazo wakaJesu, uzokusiza njengombana asiza abapostoli.—Jwa. 17:​11, 15, 20.

14. Sazi njani ukuthi sokuragela phambili sitjhumayela ngetjiseko? (Qala nesithombe.)

¹⁴ Nanyana kungaba budisi ukukhuthalela ukutjhumayela njengombana isiphelo sitjhidela, sizokufumana isizo esilitlhogako. (Luk. 21:​12-15) NjengoJesu nabapostoli sivumela abantu bazikhethele ukuthi bayafuna ukulalela namkha awa, asiphikisani nabo. Naphezu kokukhandelwa komsebenzethu, abafowethu bakghona ukutjhumayela iindaba ezimnandi ngombana bathembela kuJehova ingasi emandlenabo. Njengombana uJehova anikela amaKrestu wekadeni amandla wokutjhumayela, nathi usinikela amandla bona “ukutjhunyayelwa kwenziwe ngokupheleleko.” (2 Thim. 4:17) Ungaqiniseka ukuthi nawuthembela kuJehova uzokukhuthalela ukutjhumayela.

BEKANETHEMBA LOKUTHI ABANTU BAZOKULALELA

15. Khuyini eyenza uJesu waqiniseka ngokuthi umsebenzakhe wokutjhumayela uzokuba nemiphumela emihle?

¹⁵ UJesu waqiniseka ngokuthi umsebenzakhe wokutjhumayela uzokuba nemiphumela emihle. Lokho kwamenza wahlala athabile begodu wakhuthala emsebenzinakhe wokutjhumayela. Ngokwesibonelo, ngekupheleni kwabo-30 C.E. uJesu wabona ukuthi abanengi bazimisele ngokulalela nakatjhumayelako, wabafanisa nesimu elungele ukuvunwa. (Jwa. 4:35) Ngemva komnyaka watjela abafundi bakhe wathi: “Isivuno sikhulu.” (Mat. 9:​37, 38) Kamuva wabuyelela wathi: “Isivuno sikhulu. . . Bawani iKosi yesivuno bona ithumele iinsebenzi esivunweni sayo.” (Luk. 10:2) UJesu wahlala anethemba lokuthi abantu bazokulalela iindaba ezimnandi begodu wathaba nabalalelako.—Luk. 10:21.

16. Imifanekiso kaJesu yatjengisa njani ukuthi bekuzokuba nabantu abazokulalela iindaba ezimnandi? (Lukasi 13:​18-21) (Qala nesithombe.)

¹⁶ UJesu wafundisa abafundi bakhe bona bangalahli ithemba ngomlayezwabo, lokho bekuzobenza bakhuthalele ukutjhumayela. Ngokwesibonelo, akhesicoce ngemifanekiso emibili. (Funda uLukasi 13:​18-21.) Komunye umfanekiso uJesu wamadanisa umlayezo womBuso nembewu encani yemastedi eyakhula yaba mumuthi omkhulu. Lokhu bekutjho ukuthi abantu abanengi bebazokwamukela iindaba ezimnandi, ebekunganasiqabo ebesingawujamisa. Komunye umfanekiso wamadanisa umlayezo womBuso nesibiliso. Lokhu kungebanga lokuthi umlayezo lo bewuzokutjhunyayelwa eendaweni ezinengi ephasini loke begodu bewuzokwenza abantu batjhuguluke, nanyana amatjhuguluko lawo bewangekhe abonakale msinya kabanye. Ngemifanikiso le, uJesu wasiza abalandeli bakhe babona ukuthi umlayezo abawutjhumayelako bewuzokuba nemiphumela emihle.

17. Ngimaphi amabanga esinawo wokuba nethemba lokuthi abantu bazokulalela iindaba ezimnandi?

¹⁷ Ukucabanga ngendlela umsebenzi wokutjhumayela osiza ngayo abantu abanengi ephasini, siyakhuthazeka bona siragele phambili nokutjhumayela. Qobe mnyaka iingidi zabantu abathanda ukufunda iBhayibheli beza esiKhumbuzweni begodu bafunda nathi iBhayibheli. Iinkulungwana zabantu ziyabhajadiswa begodu zihlanganyela nathi emsebenzini wokutjhumayela. Asazi ukuthi bangakhi abantu abazokulalela umlayezwethu kodwana siyazi ukuthi uJehova ubuthelela isiqubuthu esikhulu esizokusinda esizini elikhulu elizako. (IsAm. 7:​9, 14) IKosi yesivuno ibona abantu abanengi abangalalela esimini, nje-ke sinebanga elizwakalako lokuraga nokutjhumayela.

18. Khuyini esifuna abanye abantu bayitjheje?

¹⁸ Abalandeli bakaJesu beqiniso bebahlala baziwa ngokukhuthalela ukutjhumayela iindaba ezimnandi. Abantu nabalemuka indlela abapostoli ebebakhuluma ngayo “balemuka ukuthi bebanoJesu.” (IzE. 4:13) Njengombana abantu basibona esimini nabo bangabona ukuthi silingisa isibonelo sakaJesu.