Asisi Sodwa

1-2. (a) Kubayini sithi asiqalani neentjhijilo sisodwa? (b) Khuyini esizokufunda ngayo esihlokwenesi?

NASIQALENE nemiraro eminengi, singazizwa ngasuthi sisodwa ehlathini elikhulu eliminyeneko elinganandlela yokuphuma. Nanyana kunjalo, asiqalani neentjhijilo sisodwa. UBabethu wezulwini akaboni imirarwethu kwaphela, kunalokho uthembisa ukusisiza bona siqalane nayo. UJehova uqinisekisa abantu abamlotjhako ngokuthi: ‘Uzobasiza.’—Isa. 41:10.

² Esihlokwenesi sizokufunda ngeendlela uJehova asisiza ngazo (1) ngokusinqophisa, (2) ngokusinikela izinto esizitlhogako, (3) ngokusivikela (4) nangokusiduduza. UJehova usiqinisekisa ukuthi nanyana singaqalana naziphi iintjhijilo ekuphileni, angekhe asilibala. Angekhe asilahle. Nje-ke asisisodwa.

UJEHOVA UYASINQOPHISA

3-4. UJehova usinqophisa njani? (IRhubo 48:14)

³ Funda iRhubo 48:14. UJehova akakalindeli ukuthi sizinqophise. Namhlanjesi ubanqophisa njani abantu abamlotjha ngokuthembeka? Usebenzisa iBhayibheli bona abanqophise. (Rhu. 119:105) NgeliZwi lakhe eliphefumulelweko, uJehova usisiza sithathe iinqunto begodu sibe nobuntu obuhle obuzosenza sithabe nje, sifumane nokuphila okungapheliko esikhathini esizako.a Ngokwesibonelo, usifundisa ukulibalela abanye, ukuthembeka ezintweni zoke esizenzako begodu sithande abanye ngokusuka ehliziyweni. (Rhu. 37:8; Heb. 13:18; 1 Pit. 1:22) Nasinobuntobu, sizokuba babelethi, balingani bomtjhado nabangani abangcono.

⁴ EBhayibhelini uJehova usitjela ngabantu ebebanemiraro efana neyethu begodu bazizwa njengathi. (1 Kor. 10:13; Jak. 5:17) Nasifunda ngokuphila kwabantwaba begodu sikusebenzise esikufundako sizuza ngeendlela ezimbili. Yokuthoma, sizwisisa ukuthi akusingithi kwaphela esiqalana nemiraro ekuphileni nabanye baqalana nemiraro efanako begodu ngesizo lakaJehova bakghona ukukghodlhelela. (1 Pit. 5:9) Yesibili, sifunda ukuthi singaqalana njani neentjhijilo.—Rom. 15:4.

5. UJehova usebenzisa abobani bona asinqophise endleleni etjhinga ekuphileni?

⁵ UJehova usebenzisa abantu esilotjha nabo bona asinqophise.b Ngokwesibonelo, qobe uJehova uthumela abajikelezi emabandleni bona basikhuthaze. Iinkulumo zabo ziqinisa ukukholwa kwethu begodu zisisiza sihlale sinobunye. (IzE. 15:40–16:5) Abadala bebandla nabo basebenza budisi bona basize ngamunye wethu ahlale atjhidelene noJehova. (1 Pit. 5:​2, 3) Ababelethi bafundisa abantwababo bona bathande uJehova, bathathe iinqunto ezivuthiweko begodu babe nemikghwa emihle. (IzA. 22:6) Abodadwethu abamaKrestu avuthiweko babekela abodadwethu abasese batjha isibonelo esihle, babanikele izeluleko begodu babakhuthaze.—Tit. 2:​3-5.

6. Khuyini ekufuze siyenze bona sizuze esinqophisweni sakaJehova?

⁶ UJehova usinikele koke esikutlhogako bona sithathe iinqunto ezivuthiweko begodu sibe nokuphila okuthabisako. Singatjengisa njani ukuthi siyakuthabela uJehova asenzele khona? IzAga 3:​5, 6 zithi: “Thembela kuJehova ngehliziywakho yoke, ungathembeli ekuzwisiseni kwakho.” Nasenza njalo “uzokwenza iindlela [zethu] zinqophe.” Okutjho ukuthi uzosisiza sibalekele imiraro eminengi sithabele ukuphila. Simthokoza khulu uJehova ngombana usazi kuhle, usithanda khulu begodu unikela ngamunye wethu iseluleko.—Rhu. 32:8.

UJEHOVA USINIKELA IZINTO ESIZITLHOGAKO

7. UJehova usitlhogomela ngaziphi iindlela? (Filipi 4:19)

⁷ Funda kwebeFilipi 4:19. Ngaphezu kokusinqophisa, uJehova usisiza sisebenze budisi bona sifumane ukudla, izambatho nendawo yokuhlala okuzizinto esizitlhogako. (Mat. 6:33; 2 Thes. 3:12) Kungokwemvelo ukutshwenyeka ngokuthi sizozifumanaphi izintwezo, kodwana uJehova akafuni sitshwenyeke khulu ngazo. (Mat. 6:25.) Kubayini? Kungombana uBabethu angekhe abalahla abantu abamlotjha ngokuthembeka nabatlhoga isizo. (Mat. 6:8; Heb. 13:5) Singamthemba nakathi uzosipha esikutlhogako.

8. Khuyini uJehova ayenzela uDavida?

⁸ Cabanga ngendlela uJehova asiza ngayo uDavida. Phakathi neminyaka uDavida ebekabalekela ngayo iKosi uSawula, uJehova wamupha izinto yena namadoda ebekanawo ebebazitlhoga bona baphile. Nakacabanga ngendlela uJehova amtlhogomela ngayo eminyakeni edlulileko, uDavida wathi: “Bengimutjha kodwana nje ngiluphele, kodwana akhenge ngibone umuntu olungileko alahliwe, namkha abantwabakhe bafuna uburotho.” (Rhu. 37:25) NjengoDavida, kungenzeka nawe uyibonile indlela enethando uJehova akutlhogomele ngayo namkha iinceku zakhe ezizinikele kuye.

9. UJehova ubatlhogomela njani abantu bakhe namhlanjesi ngeenkhathi zehlekelele? (Qala neenthombe.)

⁹ UJehova utlhogomela abantu bakhe ngeenkhathi zehlekelele. Ngokwesibonelo, nakunendlala ekulu eJerusalema, amaKrestu weendaweni ezihlukahlukeneko athumelela abafowabo nabodadwabo izinto ebebazitlhoga. (IzE. 11:​27-30; Rom. 15:​25, 26) Nanamhlanjesi, abantu bakaZimu basiza abafowabo nabodadwabo ngezinto abazitlhogako. Nakuba nehlekelele uJehova usebenzisa abantu bakhe bona basize abafowabo nabodadwabo abahlala eendaweni ezithintekileko ngezinto abazitlhogako ezifana nokudla, amanzi, izambatho nemitjhoga. Iinqhema zokwakha, zilungisa imizi namaWolo womBuso amotjhekileko. Abantu bakaJehova babaduduza bebabakhuthaze msinya abantu abalahlekelwe mimizabo nabantu ababathandako.c

10-11. Ufundani kilokho okwenzeka ku-Borys?

¹⁰ Ngomusa uJehova upha nabantu abangamlotjhiko izinto abazitlhogako. Nathi silingisa uJehova ngokufuna iindlela zokusiza abantu abangamlotjhiko. (Gal. 6:10) Nasenza njalo, singabasiza bafunde okunengi ngathi nangoJehova. Cabanga ngalokho okwenzeka ku-Borys, umphathi wesikolo ohlala e-Ukraine. Nanyana angasinguFakazi kaJehova uhlala aphatha abafundi ababoFakazi bakaJehova ngomusa begodu uyakuhlonipha abakukholelwako. Ngebanga lepi u-Borys waqunta ukukhamba endaweni ebekahlala kiyo, wabalekela endaweni ephephileko begodu abafowethu bamsiza. Ngokukhamba kwesikhathi, u-Borys waya esiKhumbuzweni sokufa kwakaKrestu. Nakacabanga ngezinto abafowethu abamenzela zona, u-Borys uthi: “AboFakazi baba nomusa kimi begodu bangitlhogomela. Ngibathokoza khulu aboFakazi bakaJehova.”

¹¹ Nathi singalingisa uBabethu wezulwini onomusa ngokuthanda abantu abatlhoga isizo, kunganandaba ukuthi bakholelwa esikukholelwakho namkha awa. (Luk. 6:​31, 36) Sithemba ukuthi imizamwethu yokutjengisa abantu ukuthi siyabathanda, izobenza babe bafundi bakaKrestu. (1 Pit. 2:12) Kunganandaba ukuthi bakhetha ukulotjha uJehova namkha awa, sizokuthaba ngombana “ukupha kuthabisa khulu ukudlula ukwamukela.”—IzE. 20:35.

UJEHOVA UYASIVIKELA

12. UJehova uthembisa ukubavikela njani abantu bakhe njengesiqhema? (IRhubo 91:​1, 2, 14)

¹² Funda iRhubo 91:​1, 2, 14. Namhlanjesi, uJehova uthembisa ukuvikela abantu bakhe kinanyana yini engalimaza ubuhlobo babo naye. Angekhe avumela uSathana bona asilaphaze ukulotjha kweqiniso. (Jwa. 17:15) Ngesikhathi “sesizi elikhulu” singaqiniseka ngokuthi uJehova uzosisiza sihlale sinokukholwa okuqinileko begodu uzosisindisa.—IsAm. 7:​9, 14.

13. UJehova umvikela ngaziphi iindlela umuntu ngamunye?

¹³ UJehova umvikela njani umuntu ngamunye? UJehova usiphe iBhayibheli bona lisisize sihlukanise okulungileko nokungakalungi. (Heb. 5:14) Nasisebenzisa esikufunda eBhayibhelini, sivikela ubuhlobo bethu noJehova begodu sizokuthatha iinqunto ezivuthiweko ezizosisiza sithabele ukuphila. (Rhu. 91:4) Ukungezelela kilokho, uJehova usebenzisa ibandla bona asivikele. (Isa. 32:​1, 2) Abafowethu nabodadwethu bebandleni bathanda uJehova begodu bayamlalela. Ngokuzipha isikhathi sokuba nabo esifundweni, esimini nangokuzithabisa nabo sizokukhuthazeka besibalekele ukwenza izinto ezimbi.—IzA. 13:20.

14. (a) Kubayini uZimu angasivikeli kizo zoke iintjhijilo? (b) Umtlolo weRhubo 9:​10, usiqinisekisa ngani? (Funda umtlolo waphasi.)

¹⁴ Ekadeni uJehova bekavikela abantu bakhe bona bangalinyazwa namkha babulawe. Nanyana kunjalo, bekangahlali abavikela. Ngezinye iinkhathi siba bongazimbi ‘bezenzakalo ezingakalindeleki.’ (UMtj. 9:11) UJehova bekavumela iinceku zakhe bona zihlunguphazwe bezibulawe, ukutjengisa ukuthi uSathana unamala. (Job. 2:​4-6; Mat. 23:34) Njengombana izintwezi bezenzeka eencekwini zakaJehova zekadeni, nakithi zingenzeka. Nanyana kungenzeka uJehova angazisusi iintjhijilo esiqalana nazo, singaqiniseka ngokuthi angekhe abalahle labo abamthandako.d—Rhu. 9:10.

UJEHOVA UYASIDUDUZA

15. Umthandazo, iliZwi lakaZimu namaKrestu esilotjha nawo ungasiduduza njani? (2 Korinte 1:​3, 4)

¹⁵ Funda yesi-2 kwebeKorinte 1:​3, 4. Ngezinye iinkhathi siba nesizi begodu sigandeleleke. Mhlamunye njenganje uqalene nobujamo obugandelelako, obukwenza uzizwe uwedwa. Kghani kukhona ozwisisa indlela ozizwa ngayo? Iye, nguJehova. Akazwelani nathi kwaphela kodwana ‘usiduduza kilo loke isizi lethu.’ Ukwenza njani lokho? Nasithandaza kuJehova ngokusuka ehliziyweni, usinikela “ukuthula kwakaZimu okudlula koke ukuzwisisa.” (Flp. 4:​6, 7) Nasifunda iBhayibheli sifumana induduzo evela kuJehova. NgeBhayibheli uJehova usitjela ukuthi usithanda kangangani, usifundisa ukuthi singahlakanipha njani begodu usinikela ithemba. Esifundweni sifumana induduzo, sifunda izinto ezisikhuthazako ezivela eBhayibhelini begodu siba nabafowethu nabodadwethu abasithandako.

16. Ufundani kilokho okwenzeka ku-Nathan no-Priscilla?

¹⁶ Ngokusebenzisa iliZwi lakaJehova, sizokubona indlela asiduduza ngayo bekasikhuthaze ngayo, cabanga ngalokho okwenzeka ku-Nathan no-Priscilla, abahlala e-United States. Eminyakeni edlulileko, baqunta ukuthuthela endaweni ebeyinetlhogeko yabatjhumayeli bomBuso. U-Nathan uthi: “Besinethemba lokuthi uJehova uzosibusisa isiqunto sethu.” Nanyana kunjalo, nabafika esabelweni sabo esitjha, baqalana nemiraro yezepilo neyezeemali. Abatjhadikazaba kwafuze babuyele ekhaya, nalapho baqalana nemiraro yezeemali. U-Nathan wazibuza wathi: “Kubayini uZimu angakhenge asibusise ngendlela ebesicabanga ngayo? Ngathoma ukuzibuza ukuthi, kghani kunento embi engiyenzileko?” Ngokukhamba kwesikhathi, u-Nathan no-Priscilla bathoma ukulemuka ukuthi uZimu akhenge abalahle ngesikhathi ebebatlhoga ngaso isizo. U-Nathan uthi: “Eenkhathini ezibudisezo, iBhayibheli lafana nomngani ohlakaniphileko, osikhuthazako nosinqophisako. Ukudzimelela endleleni uJehova asisiza ngayo bona sikghodlhelele ubudisi bethu kunokudzimelela emirarwenethu, kwasisiza saqiniseka ngokuthi uzokuragela phambili asisiza esikhathini esizako.”

17. Udadwethu u-Helga waduduzeka njani? (Qala nesithombe.)

¹⁷ Abafowethu nabodadwethu bangasiduduza. Njani? Cabanga ngesibonelo saka-Helga, ohlala e-Hungary. Kwaphela iminyaka eminengi aqalana neentjhijilo ezamtjhiya agandelelekile begodu azizwa angasililitho. Kodwana nakaqala emva, wabona indlela uJehova amduduza ngayo asebenzisa ibandla. Uthi: “UJehova bekahlala angisiza nakangibona ngiphelelwa mamandla ngebanga lomsebenzi wokuziphilisa, ukutlhogomela umntwanami ogulako nokuqalana nezinye iintjhijilo. Eminyakeni ema-30 edlulileko, akhenge kube nelanga angakhenge afeze isithembiso sakhe sokungiduduza. Uhlala angiduduza ngamezwi anomusa engiwafumana kwabanye. Kanengi bengifumana umlayezo, ikarada namkha amezwi akhuthazako ngesikhathi ebengiwatlhoga ngaso.”

18. Singabaduduza njani abanye?

¹⁸ Sinelungelo lokulingisa uZimethu ngokududuza abanye. Singakwenza njani lokho? Singabalalelisisa, sikhulume nabo ngokududuzako begodu sibasize nabatlhoga isizo. (IzA. 3:27) Sifisa ukududuza boke abaqalene nobudisi kuhlanganise nalabo abangamlotjhiko uZimu. Abomakhelwana bethu nabaqalene nesizi, ukugula namkha ukugandeleleka siyabavakatjhela, sibalalele begodu sibacocele ngomtlolo okhuthazako oseBhayibhelini. Nasilingisa uJehova, “uZimu wenduduzo yoke,” angekhe sisize kwaphela abantu esilotjha nabo bona bakghodlhelele iintjhijilo, kunalokho sizokusiza nabantu abangamlotjhiko bona bafune ukufunda ngaye.—Mat. 5:16.

UJEHOVA UZOKUHLALA ASISIZA

19. Khuyini uJehova asenzela yona begodu singamlingisa njani?

¹⁹ UJehova unendaba nabo boke abamthandako. Akasilahli nasiqalene nobudisi. Njengombelethi onethando otlhogomela umntwanakhe, uJehova unendaba nabantu bakhe abamlotjha ngokuthembeka. Uyasinqophisa, asinikele izinto esizitlhogako, asivikele begodu asiduduze. Silingisa uBabethu wezulwini nasisekela besikhuthaze abanye nabaqalene neentjhijilo. Nanyana ephasineli sizwa ubuhlungu begodu siqalana nobudisi, singaqiniseka ukuthi uJehova uzokuhlala anathi. Ngaphezu kwalokho, usithembisile wathi: “Ungasabi ngombana nginawe.” (Isa. 41:10) Lokhu kusiqinisekisa khulu ukuthi asisisodwa.