‘Uyifundile’ Na Ifihlo Yokwaneliseka?

1. Kutjho ukuthini ukwaneliseka begodu khuyini okungatjhiwo kukwaneliseka?

INGA-KGHANI umumuntu owanelisekileko. Umuntu owanelisekileko ufumana ithabo nokuthula ngokudzimelela embusisweni anazo njenganje. Akahlali akwatile ngebanga lezinto anganazo. Nanyana kunjalo, ukwaneliseka akutjho bona singabi nendaba nokuthi siphila njani. Ngokwesibonelo, kuhle bona umKrestu afune ukwenzela uJehova okungeziweko. (Rom. 12:1; 1 Thim. 3:1) Nanyana kunjalo, umuntu owanelisekako akaphelelwa lithabo ngebanga lokuthi akafumani amalungelo msinyana ngendlela alindele ngayo.

2. Kubayini kuyingozi ukunganeliseki?

² Ukunganeliseki kungasenza sigcine sele senza iinqunto ezimbi. Ngokwesibonelo, umuntu onganelisekiko angagcina sele asebenza ama-awara amanengi bona akghone ukuthenga izinto angazitlhogiko. Kuyadanisa ukuthi amanye amaKrestu azifumane sele eba imali nezinye izinto azikhanukelako. Kungenzeka bekazitjela ukuthi, ‘Into le kufuze ibe ngeyami.’ ‘Ngiyilindele isikhathi eside’ namkha, ‘Ngizoyibhadela ngokukhamba kwesikhathi.’ Nanyana ngimaphi amabanga asenza sebe, ukweba akumthabisi uJehova. (IzA. 30:9) Abanye badaniswe kungafumani amalungelo abawafunako kangangokuthi balisa ukulotjha uJehova. (Gal. 6:9) Umuntu ozinikele ekulotjheni uJehova, angayicabanga njani into enjalo? Umraro ungaba sekutheni umuntu loyo ulisile ukusebenzela efanelweni yokwaneliseka.

3. Ngisiphi isifundo esikhuthazako esisifumana kweyebeFilipi 4:​11, 12?

³ Soke singayithuthukisa ifanelo yokwaneliseka. Umpostoli uPowula watlola wathi, “ngifunde ukwaneliseka nanyana ngisebujamweni obunjani.” (Funda kwebeFilipi 4:​11, 12.) Watlola amazwi la asejele. Ngitjho nanyana bekasejele, akhenge alahlekelwe lithabo. ‘Wafunda’ ifihlo yokwaneliseka. Nange singanayo ifanelo yokwaneliseka, amezwi kaPowula nendlela egade aphila ngayo angasisiza sisebenzele ekubeni babantu abanelisekako. Akukafuzi sicabange bona kulula ukwaneliseka. Kunalokho, kufuze sikufunde. Singakwenza njani lokho? Isihlokwesi sizokucoca ngezinto ezingasisiza saneliseke.

LINGA UKUTHOKOZA NGEZINTO ONAZO

4. Kubayini ukuthokoza ngezinto esinazo kungasisiza saneliseke? (1 Thesalonika 5:18)

⁴ Umuntu othokozako kanengi uyaneliseka. (Funda yoku-1 kwebeThesalonika 5:18.) Ngokwesibonelo, nasithokoza kwamambala ngezinto esinazo esizitlhogako bona siphile, angekhe sitshwenyeke khulu ngezinto esizifunako kodwana esinganazo. Nasithokoza ngalokho esikghona ukukwenzela uJehova nje, kuzosisiza sicabange bona singamlotjha njani ngamandlethu woke esabelweni esinaso kunokusolo sicabanga ngokufumana izabelo ezitjha. Kungebangelo imiTlolo isikhuthaza bona sithokoze uJehova emithandazwenethu. Ukuthokoza kuzosisiza sizwe, “ukuthula kwakaZimu okudlula koke ukuzwisisa.”—Flp. 4:​6, 7.

5. Ngiziphi izinto ebekufuze zenze ama-Israyeli athaba? (Qala nesithombe.)

⁵ Cabanga ngezinto ezenzeka kuma-Israyeli. Anghonghoyila kuJehova kanengi ngebanga lokuthi bekafuna ukudla ebekanakho eGibhide. (Num. 11:​4-6) Kuliqiniso ukuthi ukuphila bekungasilula emmangweni. Khuyini ebeyingawasiza bona aneliseke? Bekufuze acabange ngazo zoke izinto uJehova awenzele zona begodu bekufuze athokoze. Bekufuze akhumbule bona eGibhide bekaziingqila begodu bekaphathwa kabuhlungu. UJehova waletha iimbetho ezilitjhumi eGibhide begodu wawasindisa. Ngemva kokuthi ama-Israyeli atjhatjhululiwe “athathela amaGibhide” isiliva, igolide nezambatho zawo. (Eks. 12:​35, 36) Ngesikhathi ama-Israyeli aragelelwe hlangana namasotja kaFaro neLwandle eliBomvu, uJehova wahlukanisa amanzi welwandle phakathi bona ama-Israyeli akghone ukuyamela ngale kwalo. Njengombana bekakhamba emmangweni, wawapha imana qobe. Alo umraro bewukuphi? Ama-Israyeli bekanganeliseki, ingasi ngombana bekanganakudla kodwana bekangathokozi ngezinto ebekanazo.

6. Khuyini engasisiza sithokoze?

⁶ Khuyini engasisiza sithokoze? Kokuthoma, qobe langa cabanga ngezinto ezithabisako epilwenakho. Mhlamunye ungatlola izinto ezimbili namkha ezintathu ozithokozelako. (IsiL. 3:​22, 23) Kwesibili, khuluma ngezinto othokoza ngazo. Thokoza abantu abakwenzele izinto ezihle. Ngaphezu kwakho koke, thokoza uJehova qobe. (Rhu. 75:1) Kwesithathu, khetha abantu abathokozako bona babe bangani bakho. Nange abangani bethu bangathokozi begodu bahlala banghonghoyila nathi singagcina sele sinjengabo. Kodwana nange abangani bethu bathokoza nathi singafana nabo. (Dut. 1:​26-28; 2 Thim. 3:​1, 2, 5) Nasidzimelele ekuthokozeni ngalokho esinakho, kuzokwehla ukudaniswa budisi esihlangabezana nabo namkha izinto esizifunako kodwana esinganazo.

7. Khuyini eyasiza u-Aci wathokoza khudlwana begodu waba yini umphumela?

⁷ Tjheja okwasiza u-Aci ohlala e-Indonesia. Uthi, “Ngesindabelaphi i-COVID-19 bengimadanisa ubujamo bami nebabantu engilotjha nabo. Ngebanga lalokho ngaphelelwa kukwaneliseka.” (Gal. 6:4) Khuyini eyamsiza watjhuguluka? Uthi, “Ngathoma ukubala iimbusiso ebengizifumana qobe langa begodu bengicabanga nangezinto ezihle engizifumeneko ngokuba yingcenye yehlangano kaZimu. Ngemva kwalokho, bengithokoza uJehova. Lokho kwangenza nganeliseka kwamambala.” Nange uzizwa ungakaneliseki ngobujamo okibo, lingisa u-Aci bona uthabe.

THOBEKA

8. Kwenzekani kuBharuki?

⁸ Unobhala kamphorofidi uJoromiya uBharuki wawela esilingweni kwesikhatjhana. UBharuki bekanesabelo esibudisi, bekufuze asekele uJoromiya njengombana bekethula umlayezo obudisi esitjhabeni esingathokoziko. Kwesikhatjhana uBharuki akhenge adzimelele kilokho ebekufuze akwenze. Kunokuthi adzimelele kilokho uJehova ebekafuna akwenze, wathoma ukucabanga khulu ngaye ngokwakhe nalokho afuna ukukwenza. UJehova wasebenzisa uJoromiya bona atjele uBharuki ukuthi, “uzifunela izinto ezikulu. Lisa ukuzifunela izinto ezinjalo.” (Jor. 45:​3-5) Ngamanye amezwi bekathi: “Yaneliseka ngezinto onazo.” UBharuki wamukela ukukhalinywa begodu waragela phambili anetjhebiswano elihle noJehova.

9. Sifundani kweyoku-1 kwebeKorinte 4:​6, 7? (Qala neenthombe.)

⁹ Ngezinye iinkhathi umKrestu angacabanga bona ufanelwe lilungelo elithileko ekonzweni. Angazizwa njalo ngebanga lamakghono anawo, ukusebenza budisi, namkha ngebanga lokuthi usebenzele uJehova isikhathi eside. Kuthi kusese njalo abanye bafumane ilungelo yena alifunako. Khuyini engamsiza nange azizwa adanile ngebanga lalokho? Angacabanga ngalokho umpostoli uPowula akutlola kweyoku-1 kwebeKorinte 4:​6, 7. (ifunde.) Woke amalungelo esiwafumanako nawo woke amakghono esinawo siwafumene kuJehova. UJehova akhenge asinikele iziphwezi ngebanga lokuthi siqakatheke ukudlula abanye. Kunalokho kungebanga lokuthi uyasithanda begodu unomusa.—Rom. 12:​3, 6; Efe. 2:​8, 9.

10. Khuyini engasisiza sithobeke?

¹⁰ Singasebenzela bona sibe babantu abathobekileko ngokuthi sicabangisise ngesibonelo sakaJesu. Cabanga ngokwenzeka ngelanga uJesu ahlambisa ngalo abapostoli bakhe iinyawo. Umpostoli uJwanisi wathi, “UJesu, azi ukuthi [1] uBaba unikele zoke izinto ezandleni zakhe nokuthi [2] uvele kuZimu begodu [3] bekaya kuZimu, . . . wahlambisa abafundi bakhe iinyawo.” (Jwa. 13:​3-5) UJesu bekangalindela bona kuhlanjiswe yena iinyawo. UJesu akhenge acabanga bona njengombana ayiNdodana kaJehova kufuze afumane nanyana yini ayifunako, abe nendlu ehle, imali enengi namkha aphile kamnandi. (Luk. 9:58) UJesu bekathobekile begodu aneliseka. Wasibekela isibonelo esihle.—Jwa. 13:15.

11. Ukuthobeka kwamsiza njani u-Dennis bona aneliseke?

¹¹ Umfowethu u-Dennis ohlala e-Netherlands uthi ulinga budisi ukulandela isibonelo sakaJesu sokuthobeka kodwana akusilula. Uthi, “Ngezinye iinkhathi ngizizwa ngifuna ukuzikhakhazisa begodu ngizizwe ngingakaneliseki, njengalokha kunomuntu othileko ofumene isabelo sekonzo. Nangizizwa njalo, ngifunda ngokuthobeka. Ngimerege imitlolo ekhuluma ngokuthobeka ku-JW Library^® app, lokho kungisiza ngokuthi ngiyifumane lula nangifuna ukuyifunda godu. Ngidawunilode neenkulumo ezikhuluma ngokuthobeka bona ngizilalele.a Ngifunde bona yoke imisebenzi esiyenzako, siyenza bona sidumise uJehova ingasi thina. UJehova usivumela bona sidlale indima ethileko kodwana nguye owenza umsebenzi uphumelele.” Nawuzizwa ungakathabi ngebanga lokuthi awukafumani isabelo osifunako, sebenzela efanelweni yokuthobeka. Lokho kuzokuqinisa itjhebiswano lakho noJehova begodu kuzokusiza waneliseke.—Jak. 4:​6, 8.

CABANGISISA NGEENTHEMBISO ZAKAJEHOVA

12. Ngiliphi ithemba ngengomuso elisenza saneliseke? (Isaya 65:​21-25)

¹² Sizizwa sanelisekile nasicabanga ngeenthembiso zakaJehova zengomuso. Amezwi kaJehova atlolwa ngu-Isaya asiqinisekisa ngokuthi uyazwisisa ukuthi siqalene nezinto ezinengi ezibudisi. (Funda u-Isaya 65:​21-25.) Sizokuhlala ngeendlini ezihle neziphephileko. Sizokuba nemisebenzi esithabisako begodu sizokudla ukudla okunepilo nokumnandi. Angekhe sisatshwenyeka ngokuphepha. (Isa. 32:​17, 18; Hez. 34:25) Sinengomuso elihle nelivikelekileko.

13. Ngibuphi ubudisi esiqalene nabo begodu ukucabanga ngethemba esinalo kungasisiza njani?

¹³ Kubayini kuqakatheke khulu bona sicabange ngengomuso lethu nje? Kungebanga lokuthi siphila “emihleni yokuphela” begodu soke siqalene neenkhathi “okubudisi ukuqalana nazo.” (2 Thim. 3:1) UJehova uhlala asisiza bona sikghodlhelele ngokuthi asinqophise, asiphe amandla begodu asisekele. (Rhu. 145:14) Ukungezelela kilokho, ithemba esinalo lingasisiza eenkhathini ezibudisi. Mhlamunye usebenza budisi kodwana ukghona ukuthenga ukudla, izambatho nendawo yokuhlala kwaphela. Inga-kghani lokho kutjho bona uzokuhlala udobha phasi? Awa, angekhe! UJehova uthembise ukukunikela izinto ozitlhogako nokungaphezu kwalokho ePharadesi. (Rhu. 9:18; 72:​12-14) Mhlamunye uhlala uzwa ubuhlungu qobe langa, ugandelelekile emkhumbulweni namkha unokhunye ukugula okumasikizi. Inga-kghani uzokuhlala uzwa ubuhlungu ngendlela le? Awa, angekhe. Ukugula angekhe kusaba khona ephasini elitjha lakaZimu. (IsAm. 21:​3, 4) Ithembelo lisenza saneliseke, singaphatheki kabuhlungu namkha sikwate ngebanga lezinto ezenzekako nje. Singaneliseka ngitjho nanyana siqalene nokungabi nobulungiswa, silahlekelwa zizinto ezithileko, sikghodlhelelele ukugula nezinye iintjhijilo ezinengi. Kubayini? Ngombana kunganandaba ukuthi ubujamo esiqalene nabo bubudisi kangangani, siyazi ukuthi “isizi [lethu] lingelesikhatjhana” begodu siyazi ukuthi ephasini elitjha angeze sisatlhaga godu.—2 Kor. 4:​17, 18.

14. Singaliqinisa njani ithemba lethu eenthembisweni zakaJehova?

¹⁴ Njengombana ithemba liqakathekile bona sihlale sanelisekile, singaliqinisa njani? Into engasisiza kuzicabanga sisephasini elitjha. Ngokwesibonelo, nasizizwa sitshwenyeke khulu ngebanga lokuthi kubudisi ukuphila unganamali eyaneleko, singacabanga ngokuthi kuzokuba njani nasele singasayitlhogi imali begodu kungasenamuntu otlhagako. Nange sitshwenyeke ngamalungelo wekonzo esingakawafumani, singacabanga ngokuthi lokho angekhe kusasitshwenya ephasini elitjha nasele singasenasono begodu sesilotjha uJehova iinkulungwana zeminyaka. (1 Thim. 6:19) Ekuthomeni kungaba budisi ukucabanga ngengomuso nakunento esitshwenyeke ngayo. Kodwana isikhathi nasikhambako, kuzokuba bulula ukucabanga ngeenthembiso zakaJehova zengomuso.

15. Khuyini oyifundako ngokwatjhiwo ngu-Christa?

¹⁵ Kunengi esingakufunda kilokho okwenzeka ku-Christa umka-Dennis esikhulume ngaye phambilini. Uthi, “Nginokugula okungenza ngidinwe khulu, angikghoni ukukhamba, ngikhamba ngesitulo sabarholopheleko begodu esikhathini esinengi ngihlala embhedeni. Ngiphila ngobuhlungu qobe langa. Mvanje udorhoderami uthe ubujamo bami abusibuhle nakancani. Kodwana khonokho ngacabanga, ‘Akaboni ingomuso ngendlela mina engilibona ngayo.’ Ngidzimelele engomusweni lami, lokho kungipha ukuthula. Namhlanjesi, kungatlhogeka bona ngikghodlhelele ephasineli kodwana ngizolithabela ngokupheleleko iphasi elitjha.”

“ABAMSABAKO ABATLHOGI LITHO”

16. Kubayini iKosi uDavida yathi abantu abasaba uJehova “abatlhogi litho”?

¹⁶ Ngitjho nanyana sibabantu abanelisekako, sisaqalana neentjhijilo. IKosi uDavida yahlongakalelwa bantwabayo abathathu. Yasolwa ngento engakayenzi, yajikelwa bangani bayo, ikosi uSawula beyifuna ukubulala iKosi uDavida, kwaphela iminyaka isolo imfuna. Ngitjho nanyana beyiqalene neenkhathi ezibudisi yathi ngoJehova: “Abamsabako abatlhogi litho.” (Rhu. 34:​9, 10) Kubayini yatjho njalo? Ngebanga lokuthi beyazi bona ngitjho nanyana uJehova angenzi bona abantu bakhe bangaqalani nemiraro kodwana bekazokunikela uDavida izinto azitlhogako. (Rhu. 145:16) Nathi njengoDavida singaqiniseka bona uJehova uzosisiza sikghodlhelele nasiqalene neentjhijilo. Singakghona ukwaneliseka.

17. Kubayini ufuna ukufunda ukwaneliseka?

¹⁷ UJehova ufuna saneliseke. (Rhu. 131:​1, 2) Yeke, yenza koke okusemandlenakho bona waneliseke. Nawe sebenza ngamandla bona ube mumuntu othokozako, othobekileko begodu uqinise ithemba lakho, uzokukghona ukutjho uthi: “Kwamambala, nganelisekile.”—Rhu. 16:​5, 6.