Ngaba Sithunywa Sevangeli Nanyana Bengineenhloni

Ngabelethwa ngo-1951 e-Vienna, e-Austria, ababelethi bebamaKatolika. Bengineenhloni kodwana bengikholelwa kuZimu begodu bengithandaza qobe. Nangineminyaka elithoba, ubaba wathoma ukufunda iBhayibheli naboFakazi bakaJehova, ngokukhamba kwesikhathi nomma wathoma ukufundelwa.

Msinyana sathoma ukuhlanganyela ebandleni le-Döbling elise-Vienna. Njengomndeni, besenza izinto ezinengi ndawonye. Besifunda iBhayibheli, siya esifundweni begodu sivolontiya nemihlanganweni yesigodi. Eminyakeni leyo, ubaba bekangisiza bona ngithande uJehova khulu. Ubaba bekahlala asithandazela sinodadwethu bona sibe maphayona. Kodwana ngesikhatheso ukuphayona bekungasimnqophwami.

NANGITHOMA UKUSEBENZELA UJEHOVA ISIKHATHI ESIZELEKO

Ngabhajadiswa ngo-1965, nangineminyaka eli-14. Esimini bengikufumana kubudisi ukuthoma ikulumiswano nomuntu engingamaziko. Kanengi bengicabanga ukuthi abanye abantu abalingana nami bangcono khulu kunami begodu bengifuna ukuthi bangithande. Nje-ke ngemva kokubhajadiswa, ngathoma ukuba mngani nabantu ebebangalotjhi uJehova. Nanyana bengithanda ukuba nabo, unembezami bewungitshwenya ngombana bengihlala isikhathi eside nabantu abangasiboFakazi. Nanyana kunjalo, benginganasibindi sokutjhuguluka. Khuyini eyangisizako?

Ngesikhatheso ebandleni kwafika udade oneminyaka eli-16, u-Dorothée. Ngayithanda indlela ebekakhuthalele ngayo ukutjhumayela endlini ngendlu. Bekamncani kunami, kodwana mina bengingakayikhuthaleli isimu njengaye. Ngacabanga: ‘Ababelethi bami boFakazi kodwana abantu bekhabo-Dorothée abasiboFakazi. Uhlala nonina ogulako begodu uhlala asesimini!’ Isibonelo sakhe sangikhuthaza bona ngimsebenzele khudlwana uJehova. Msinyana sino-Dorothée saba maphayona. Sathoma ngokuba maphayona asizako, ngokukhamba kwesikhathi saba maphayona wesikhathi esizeleko. Ngebanga lokuthi u-Dorothée’ bekakuthanda ukutjhumayela nami ngagcina sengikuthanda. Wangisiza ngathomisa isifundo sami seBhayibheli sokuthoma. Nakukhamba isikhathi, ngathoma ukutjhaphuluka, ngakghona ukuthomisa ikulumiswano nabantu endlini ngendlu, endleleni nakobunye ubujamo.

Emnyakenami wokuthoma ngiliphayona lesikhathi esizeleko, ebandleni lethu kwafika umfowethu ovela e-Austria ibizo lakhe bekungu-Heinz. Wafunda iqiniso nakavakatjhele umfowabo, obekanguFakazi e-Canada. U-Heinz wathunyelwa ebandleni lethu e-Vienna, aliphayona elikhethekileko. Ngamthanda ngithoma nokumbona. Bekafuna ukuba sithunywa sevangeli kodwana mina benginganasifiso sokuba sithunywa sevangeli. Nje-ke ekuthomeni, akhenge ngafuna ukumtjengisa ukuthi ngiyamthanda. Ngokukhamba kwesikhathi, sino-Heinz sathoma ukuthandana, satjhada begodu sathoma ukuphayona sobabili e-Austria.

UMNQOPHO WOKUBA SITHUNYWA SEVANGELI

U-Heinz bekahlala akhuluma nami ngesifiso sakhe sokuba sithunywa sevangeli. Nanyana bekangangigandeleli ngalokho, bekangibuza imibuzo ebeyingenza ngicabange njengokuthi, “Njengombana singanabantwana, singakghona ukusebenzela uJehova khudlwana?” Ngebanga lokuthi ngineenhloni, bengisaba ukuba sithunywa sevangeli. Liqiniso, ngaphayona kodwana indaba yokuba sithunywa sevangeli beyingithusa khulu. Nanyana kunjalo, u-Heinz wangilinda begodu wahlala akhuluma ngomnqopho loyo. Wangikhuthaza bona ngidzimelele khulu ekutlhogomeleni abanye abantu, kunokutshwenyeka ngami. Iseluleko sakhe sangisiza khulu.

Kancanikancani, ngathoma ukuba nesifiso sokuba sithunywa sevangeli, nje-ke safaka isibawo sokuya esiKolweni seGiliyadi. Nanyana kunjalo, omunye umfowethu obekasebenza e-ofisini legatja wangikhuthaza bona ngithuthukise indlela engikhuluma ngayo isiNgisi. Ngemva kweminyaka emithathu ngithuthukisa indlela ebengikhuluma ngayo ilimelo, sathukwa nasifumana isabelo sokuyokuhlanganyela ebandleni le-Yugoslavian e-Salzburg, e-Austria. Satjhumayela endaweni leyo iminyaka elikhomba, kuhlanganise nokuba bajikelezi umnyaka munye. Ilimi le-Serbo-Croatian belibudisi kodwana saba neemfundo ezinengi zeBhayibheli.

Ngo-1979 abafowethu abadosa phambili eGatjeni basibawa bona “siyokuvakatjha” e-Bulgaria. Ngebanga lokuthi umsebenzethu wokutjhumayela bewukhandelwe bathi sizenze ngasuthi “sizokuvakatjha.” Bathi singatjhumayeli, bathi ngokutjheja size neencwadi esizenze zaba zincani, sizinikele abodadwethu abahlanu abahlala e-Sofia, ihloko dorobha ye-Bulgaria. Bengithukiwe tle kodwana uJehova wangisiza ngesabelweso. Ukubona indlela abodadwethwaba abathabe ngayo ngitjho nanyana basengozini yokuvalelwa ejele, kwangipha isibindi sokuthi ngenze koke okusemandlenami ukwenza nanyana yini ihlangano kaJehova engibawa bona ngiyenze.

Ngesikhatheso safaka isibawo sokuya e-Gilead godu, nje isibawo sethu samukelwa. Besicabanga bona sizokufundiswa ngesiNgisi, e-United States. Kodwana ngoNovemba 1981, i-Gilead Extension School yathoma egatjeni le-Wiesbaden, e-Germany. Yeke safundiswa ngesi-German, kwaba lula kimi ukuzwisisa. Alo, isabelo sethu besizokuba kuphi?

UKUTJHUMAYELA ENARHENI ENENTURHU

Sathunyelwa e-Kenya! Kodwana i-ofisi legatja e-Kenya lasibawa bona siyokutjhumayela enarheni engumakhelwana, i-Uganda. Eminyakeni elitjhumi eyadlulako, urhulumende we-Uganda bekahlulwe masotja we-coup alawulwa ngu-General Idi Amin. Nakubusa yena, iinkulungwana zabantu zabulawa, kwathi iingidi zatlhaga khulu. Ngo-1979 ezinye iinhlangano zakatelela u-Idi Amin bona afuduke, umbuswakhe waphela. Kungenzeka uyazwisisa bona kubayini bekubudisi bona ngiye enarheni enjalo. Kodwana ibandulo le-Gilead lasifundisa ukuthembela kuJehova. Kwaba njalo, sathembela kuJehova.

Izinto bezihlangahlangene e-Uganda. Urhulumende bekangakghoni ukunikela abantu amanzi, igezi nezinye izinto abantu abazitlhogako. Imitato beyingasebenzi. Abantu bebadumuzana bebe izinto, khulukhulu ebusuku. Yeke nakuba mnyama ngaphandle woke umuntu bekahlala ekhaya, athandaze bona kungabi nomuntu ongenako bona azokweba namkha ababulale. Ngitjho nanyana abafowethu nabodadwethu bebaqalene nezintwezi bebathuthuka khulu etjhebiswaneni labo noJehova!

Sino-Heinz safika e-Kampala, ihloko dorobha ye-Uganda ngo-1982. Eenyangeni ezihlanu zokuthoma besihlala kwa-Sam no-Christina Waiswa nabantwana babo abahlanu neenhlobo zabo ezine. Eenkhathini ezinengi umfowethu nodadwethu u-Waiswa nomndenabo bebadla kanye ngelanga, okwenza ukusamukela kwabo kwaba yinto esithinta iinhliziyo tle! Njengombana besihlala nebakwa-Waiswa, sino-Heinz safunda izinto ezinengi ezasisizako njengombana besiziinthunywa zevangeli. Ngokwesibonelo, safunda ukuhlamba ngamanzi amancani bese sisebenzise wokupula bona siflatjhe indlwana. Sino-Heinz safumana indawethu ngo-1983, e-Kampala indawo ebeyiphephe ngokwezinga elithileko.

Bekusithabisa khulu ukutjhumayela. Ngikhumbula khekwaba nenyanga lapho sakhambisa khona abomagazini abazii-4 000! Besikuthabela khulu ukukhuluma nabantu. Bebamhlonipha uZimu begodu bafuna ukukhuluma ngaye. Sino-Heinz besiba neemfundo zeBhayibheli ezili-10 ukuya kwezili-15 ngamunye. Kunengi ebesikufunda ebantwini esifunda nabo iBhayibheli. Ngokwesibonelo, sifunde okunengi kibo ngokuhlala bathabile, njengombana beza qobe emihlanganweni, banganghonghoyili kodwana bahlala bamomotheka.

Kusukela ngo-1985 kuya ku-1986, kwaba nezinye izipi ezimbili e-Uganda. Besibona abantwana baphethe iingidi ezikulu. Bebasetjenziswa njengamasotja, ngibo ebebalawula abantu abakhamba endleleni. Ngesikhatheso, besithandazela ukwahlulela okuhle nomoya ophasi njengombana sifuna abantu abafuna ukufunda ngoJehova. UJehova wawuphendula umthandazwethu. Besilibala ngezinto ebesizisaba nasihlangana nomuntu obekafuna ukuzwa umlayezo womBuso.

Besikuthabela nokutjhumayeza abantu abavela kwezinye iinarha. Ngokwesibonelo, besifunda no-Murat no-Dilbar Ibatullin, abatjhadikazi be-Tatarstan (Central Russia). U-Murat bekasebenza ngezamaphilo. Abatjhadikazaba bamukela iqiniso begodu balotjha uJehova bekuba nje. Ngokukhamba kwesikhathi, ngahlangana no-Tatjana Vileyska, udade we-Ukraine obekacabanga ukuzibulala. Ngemva kokuthi u-Tatjana abhajadisiwe, wabuyela e-Ukraine begodu ngokukhamba kwesikhathi waba mtjhugululi weencwadi zethu.a

IINTJHIJILO EZITJHA

Sino-Heinz besisevakatjhweni e-Austria, ngo-1991. Sadoselwa ligatja lalapho bona lisazise ngesabelo sethu esitjha e-Bulgaria. Besele kuphele iminyaka umsebenzethu wokutjhumayela ukhandelwe eenarheni ezinengi ze-Europe. Kodwana lokho besele kutjhugulukile, aboFakazi bakaJehova besele bavunyelwa ukutjhumayela eenarheni lezo. I-Bulgaria beyingenye yeenarhezo. Njengombana khengatjho, sino-Heinz sakhe safaka iincwadi zethu ngeendlela eziphasi ngesikhathi umsebenzethu wokutjhumayela usavinjelwe. Kodwana nje besele sithunyelwe bona siyokutjhumayela.

Satjelwa bona singabuyeli e-Uganda. Yeke akhenge sibuyele endlini yeenthunywa zevangeli ebesihlala kiyo bona siyokubutha ipahlethu, silayelise nabangani bethu, savele satjhinga eBethel ye-Germany, safumana ikoloyi begodu satjhinga e-Bulgaria. Sabelwa ukusebenza nesiqhema sabatjhumayeli abama-20 e-Sofia.

Saqalana neentjhijilo ezinengi ezitjha e-Bulgaria. Kokuthoma besingalazi ilimi elikhulunywa lapho. Ukungezelela kilokho, okukuphela kweencwadi ebezifumaneka ngesi-Bulgaria bekuyincwadi ethi, The Truth That Leads to Eternal Life nethi Incwadami Yeendaba ZeBhayibhili. Bekubudisi ukuthomisa iimfundo zeBhayibheli. Ngaphezu kwazo zoke iintjhijilwezi, isiqhema sethu esincani saboFakazi besithuthuka tle. Isondo i-Orthodox Church lakulemuka lokho, kulapho kwathoma khona imiraro.

Ngo-1994 urhulumende akhenge asaqala aboFakazi bakaJehova njengekolo ezijameleko begodu abantu be-Bulgaria bebacabanga bona siyikolo eyingozi. Abanye abafowethu babotjhwa. Bezeendaba barhatjha amala ngathi, bathi aboFakazi babulala abantwababo begodu bakhuthaza abanye aboFakazi bona bazibulale. Sino-Heinz besikufumana kubudisi ukutjhumayela. Besifumana abantu abanenturhu, abanye babo bebasirasela, basibizele amapholisa begodu bebasiphosa ngezinto. Bekungasilula ukufumana iincwadi zethu enarheni le begodu bekusitjhijilo ukuqatjha amawolo wokubambela imihlanganwethu. Kwaba nesikhathi lapho amapholisa ajamisa umhlanganwethu khona. Sino-Heinz besingakayijayeli ihloyo engaka. Besijayele isimu ethelako, enabantu abanethando e-Uganda! Khuyini eyasisiza saqalana namatjhuguluko la?

Bekusithabisa ukuhlangana nabafowethu nabodadwethu benarheni le. Bekubathabisa ukuthi bafumene iqiniso begodu bebalithabela nesizo lethu. Soke besitjhidelene begodu sisekelana. Sabona lapho ukuthi singathaba nanyana senza siphi isabelo nange sithanda abantu.

Ngokukhamba kwesikhathi izinto zatjhuguluka. Ihlanganwethu yaba semthethweni ngo-1998 begodu iincwadi ezinengi zafumaneka ngesi-Bulgarian. Kwathi ngo-2004 isakhiwo esitjha segatja sanikezelwa kuJehova. Namhlanjesi kunamabandla ama-57 e-Bulgaria, kunabarhuweleli abazii-2 953. Emnyakeni ogadungileko kweza abantu abazii-6 475 esiKhumbuzweni. Khekwaba nesikhathi la bekunabodade abahlanu kwaphela e-Sofia, sikhuluma nje sinamabandla alithoba! Sibone ngewethu ukuthi ‘omncani. . . ube yikulungwana.’—Isa. 60:22.

UKUQALANA NEENTJHIJILO ZEPILO

Zinengi iintjhijilo engiqalene nazo ekuphileni kwami. Eminyakeni eyadlulako ngavela amaqa amanengi emzimbeni, elinye belisehloko. Ngasebenzisa indlela yokulapha ebizwa ngokuthi yi-radiation therapy begodu ngahlinzwa ama-awara ali-12 e-India bona kukhitjhwe amanengi wawo. Ngemva kokuba ngcono sabuyela esabelweni sethu e-Bulgaria.

Ngesikhatheso u-Heinz waphathwa yi-Huntington. Bekangakghoni ukukhuluma kuhle, ukukhamba, angakghoni nokulawula ukusikinyeka komzimbakhe. Njengombana ukugulokhu kuthuthuka, bekufuze ngimtlhogomele ngezinto ezinengi. Bengigandeleleka ngezinye iinkhathi, ngizibuza ukuthi kazi kuzokwenzekani. Bekunomfowethu osese mutjha u-Bobi, bekanande eza azokutjhumayela no-Heinz. U-Bobi bekangananhloni ngendlela u-Heinz akhuluma ngayo nendlela angakghoni ngayo ukulawula ukusikinyeka komzimbakhe. U-Bobi bekangisiza ukutlhogomela u-Heinz. Nanyana sino-Heinz singakhenge sibe nabantwana ephasineli, uJehova wasipha u-Bobi waba yindodanethu!—Mar. 10:​29, 30.

U-Heinz bekaphethwe nayikankere. Ngokudanisako indodami ethandekako yahlongakala ngo-2015. Ngiyikhumbula khulu indodami. Ngiyo ebeyingisiza khulu bona ngingatshwenyeki ngokudluleleko. Kube budisi ukujayela bona akasekho. Kodwana iyaphila emkhumbulwenami. (Luk. 20:38) Ngihlala ngikhumbula amezwayo anomusa nesiyalo sayo esihlakaniphileko qobe langa. Ngiyathokoza ngeminyaka esasebenzela ngayo uJehova sithembekile ndawonye.

NGIYAKUTHOKOZA UKUSEKELWA NGUJEHOVA

UJehova ungisekele kizo zoke iintjhijilo ebengiqalana nazo. Ungisizile ngahlula ukuba neenhloni, ngaba sithunywa sevangeli esithanda abantu. (2 Thim. 1:7) Ngiyamthokoza uJehova ngokuthi mina nodadwethu omncani sisekonzweni yesikhathi esizeleko. Namhlanjesi yena nendodakhe bajikeleza e-Serbian e-Europe. Umthandazo kababa awuthandaza kade waphendulwa!

Ukufunda iBhayibheli kunginikela ukuthula. Nangiqalene neentjhijilo, ngifunde ukuthandaza “ngokudephileko,” njengombana kwenza uJesu. (Luk. 22:44) Enye indlela imithandazwami ephendulwe ngayo, lithando nomusa labafowethu nabodadwethu bebandleni le-Nadezhda, e-Sofia. Bayangimema bona ngibe nabo begodu bayangithokoza, lokho kungenza ngithabe kwamambala.

Ngihlala ngicabanga ngokuvuswa kwabahlongakeleko. Ngizicabanga ngibona ababelethi bami phambi kwendlu babahle njengalokha nabatjhadako. Ngibona udadwethu enza ukudla. Ngibona u-Heinz ajame hlanu kwenjomani. Ukucabanga izintwezi kungenza ngingasolo ngicabanga izinto ezimbi kodwana kungenza ngithokoze uJehova.

Nangicabanga ngezinto ezenzekileko epilwenami begodu ngicabanga ngezinto ezisazokwenzeka esikhathini esizako, ngivumelana namezwi kaDavida akuRhubo 27:​13, 14 ngehliziywami yoke nakathi, “Ngangikuphi ngathana bengingakholwa ukuthi ngizokubona ubuhle bakaJehova enarheni yabaphilako? Thembela kuJehova; iba nesibindi bese uqine. Iye, thembela kuJehova.”