Ithando LakaJehova Lihlala Ngokungapheliko

1-2. Ngimiphi imiraro amaKrestu amanengi aqalane nayo?

LINGA ukucabanga umkhumbi ophakathi kwesiwuruwuru esikhulu. Amagagasi amakhulu awunawuna umkhumbi lowo, utjhinga phasi phezulu. Umkhumbi loyo uzokuya nanyana kukuphi lapha amagagasi awusa khona, lokho kungatjhuguluka kwaphela nange umuntu othileko asebenzisa i-ankere ukuwuvimba. I-ankere izokwenza umkhumbi uhlaliseke, iwenze ungaphetjhulwa siwuruwuru.

² Nawuqalene neenkhathi ezibudisi, ungazizwa njengomkhumbi esikhulume ngawo. Imizwakho ingatjhinga phasi naphezulu. Ngelinye ilanga ungaqiniseka ukuthi uJehova uyakuthanda nokuthi uyakusekala, kuthi ngelinye uzibuze ukuthi kghani uJehova uyakubona okwenzeka epilwenakho. (Rhu. 10:1; 13:1) Kwenzeke umngani akududuze begodu uzizwe ungcono kwesikhatjhana. (IzA. 17:17; 25:11) Kodwana uthome ungasaqiniseki godu ngokuthi uJehova uyakusekela. Ungabe ucabange nokuthi uJehova ukulahlele izandla. Khuyini engakusiza nawuqalene nemiraro? Khuyini engakuqinisekisa begodu uhlale uqiniseka ngokuthi uJehova uyakuthanda nokuthi uyakusekela?

3. IRhubo 31:7; 136:1 lisifundisani ngethando nokuthembeka kwakaJehova begodu kubayini singathi uJehova usibonelo esihle khulu sobuntobu? (Qala nesithombe.)

³ Enye indlela ongakhuthazeka ngayo, kukuthi ukhumbule bona uJehova uyakuthanda begodu uthembekile. (Funda iRhubo 31:7; 136:1.) Ibizo elithi ‘ithando elithembekileko’ elisetjenziswe evesineli linomqondo womuntu onamathela entweni, onethando lamambala nothembekileko emuntwini othileko. UJehova usibonelo esihle khulu sethando nokuthembeka. Kuhlekuhle, iBhayibheli nalimhlathululako lithi, “onethando elikhulu, neqiniso.” (Eks. 34:​6, 7) IBhayibheli libuye lithi ngoJehova, “Ubathanda khulu boke abakubizako.” (Rhu. 86:5) Cabanga bona kutjho ukuthini lokho, uJehova angekhe abalahla abantu bakhe abathembekileko. Ukukhumbula bona uJehova uthembekile kuzokusiza ukghodlhelele nawuqalene nemiraro.—Rhu. 23:4.

KHUMBULA BONA UJEHOVA ULITHANDO

4. Nikela iimbonelo eziveza bona kubayini sizikholwa ngeenhliziyo zethu zoke iimfundiso eziseBhayibhelini.

⁴ Enye indlela yokuthi uqiniseke ngokuthi uJehova uzokuhlala akusekela nawuqalene neentjhijilo, kukuthi ukhumbule bona uJehova ulithando. Khuyini oyicabangako nawuzwa amezwi athi, “ifundiso esisekelo?” Kungenzeka ucabanga ngamaqiniso owafunde eliZwini lakaZimu. Ngokwesibonelo, ufunde bona igama lakaZimu nguJehova, ukuthi uJesu yiNdodana kaZimu ebelethwe yodwa, ukuthi abahlongakeleko abazi litho nokuthi iphasi lizokuba yipharadesi abantu abazokuhlala kilo bekube phakade. (Rhu. 83:18; UMtj. 9:5; Jwa. 3:16; IsAm. 21:​3, 4) Nasele ukholwa bona iimfundiswezi ziliqiniso, bekungasilula bona kube nomuntu okulisisa ukuzikholwa. Kubayini? Ngombana uyazi bona amaqiniso la asekelwe ebufakazini. Akhesibone ukuthi ukuqala ithando lakaJehova njengefundiso esisekelo kungakusiza uqiniseke ngokuthi uJehova uyawubona umraro oqalene nawo begodu unendaba nawe.

5. Hlathulula bona umuntu ongakghona njani ukwala iimfundiso zamala.

⁵ Khuyini eyakusiza bona ubalekele iimfundiso zamala nawuthoma ukufunda iBhayibheli? Kungenzeka wasizwa kumadanisa ebewukufunda ekolweni ebewukiyo nalokho iBhayibheli ekufundisako. Nasi esinye isibonelo salokho: Akhesithi bewukholwa bona uJesu unguZimu uMninimandla woke. Njengombana ufunda iBhayibheli, wazibuza ukuthi, ‘Kghani ifundiso leyo iliqiniso?’ Ngemva kokuqalisisa ubufakazi obuseBhayibhelini wabona ukuthi ipendulo yombuzo loyo ngu-awa. Ngemva kwalokho, wajamiselela ifundiso yamala ngeqiniso elifumaneka eBhayibhelini, uJesu ‘lizibulo layo yoke indalo,’ ‘iNdodana kaZimu ebelethwe yodwa.’ (Kol. 1:15; Jwa. 3:18) Iqiniso kukuthi ifundiso emamala ‘ingadzimelela ngokuqinileko’ begodu kungaba budisi ukuyitjhiya. (2 Kor. 10:​4, 5) Kodwana ngemva kokuthi ufunde iqiniso akhenge usabuyela efundisweni yamala.—Flp. 3:13.

6. Kubayini ungaqiniseka bona ithando lakaJehova “lihlala ngokungapheliko”?

⁶ Ungenza ngendlela efanako nangefundiso eseBhayibhelini ethi uJehova ulithando. Nakwenzeka uqalane nemiraro bese uyazibuza ukuthi kghani uJehova uyangithanda na, zibuze, ‘Ngicabanga kuhle na?’ Madanisa ukungaqiniseki kwakho ngethando lakaJehova namezwi akuRhubo 136:1 okumtlolo okusekelwe kiwo isihlokwesi. Kubayini uJehova athi, ithando lakhe ‘lithembekile’? Kubayini amezwi athi “ithando lakhe elithembekileko lihlala ngokungapheliko” abuyelelwe iinkhathi ezima-20 eRhubweneli? Njengombana sifundile, ithando lakaJehova elithembekileko ngabantu bakhe liyifundiso yeBhayibheli esisekelo, njengezinye iimfundiso eziseliZwini lakaZimu ozamukeleko. Mamala ukuthi uJehova ukuqala njengomuntu ongasililitho nongathandekiko. Wale amala lawo njengombana uzokwala nanyana ngiyiphi ifundiso emamala!

7. Nikela iimbonelo zemitlolo ekuqinisekisa ukuthi uJehova uyakuthanda.

⁷ IBhayibheli inobufakazi obunengi bokuthi uJehova uyasithanda. Ngokwesibonelo, uJesu watjela abalandeli bakhe ukuthi, “Niqakatheke khulu ukudlula abotunwana abanengi.” (Mat. 10:31) UJehova ngokwakhe watjela abantu bakhe bona, “Ngizokuqinisa, ngizokusiza, ngizokubamba ngesandla sami sangesidleni sokulunga.” (Isa. 41:10) Tjheja bona isiqinisekiswesi sikhanya kuhle kangangani. UJesu la akathi, ‘Mhlamunye niqakatheke khulu’ begodu uJehova akathi ‘Kungenzeka ngikusize.’ Kunalokho, amezwi la athi, “Niqakatheke khulu” begodu “ngizokusiza.” Nakwenzeka ungaqiniseki ngethando lakaJehova nawuqalene nemiraro, imitlolo efana nale, angeze ikwenze uzizwe ngcono kwaphela kodwana izokwenza nokuthi wazi ngcono. Imitlolo le ikhuluma iqiniso. Nawuthandaza kuJehova umtjele izinto ongaqiniseki ngazo bese ucabangisisa ngemitlolo le, ungatjho amezwi akweyoku-1 kaJwanisi 4:​16, athi, “Sesiyalazi begodu siyalikholwa ithando uZimu analo ngathi.”a

8. Khuyini ongayenza nawungaqiniseki bona uJehova uyakuthanda?

⁸ Khuyini ongayenza nange ngezinye iinkhathi ungaqiniseki bona uJehova uyakuthanda? Madanisa indlela ozizwa ngayo nalokho okwaziko. Indlela esizizwa ngayo ingatjhuguluka kodwana iqiniso lihlala linjalo, ithando uJehova analo ngathi liqiniso eliseBhayibhelini. Nange singakholwa bona uJehova uyasithanda, sisuke singazi ubuntu bakaJehova obuqakatheke khulu, ithando lakhe.—1 Jwa. 4:8.

CABANGA ‘NGETHANDO’ UJEHOVA ANALO NGAWE

9-10. Bewuyini umongo wamezwi kaJesu akuJwanisi 16:​26, 27 athi, “UBaba ngokwakhe uyanithanda”? (Qala nesithombe.)

⁹ Singafunda okunengi ngethando lakaJehova endleleni uJesu aphatha ngayo abalandeli bakhe, wathi, “UBaba ngokwakhe uyanithanda.” (Funda uJwanisi 16:​26, 27.) UJesu akhenge ase akhulume amezwi la bona athabise abalandeli bakhe. Nasifunda amavesi angehla kwaleli, sifunda bona uJesu bekangakhulumi ngendlela abalandeli bakhe ebebazizwa ngayo. Kunalokho bekakhuluma ngendaba yomthandazo.

¹⁰ UJesu bekaqeda ukutjela abalandeli bakhe bona bathandaze ngaye ingasi kuye. (Jwa. 16:​23, 24) Bekuqakathekile bona bakwazi lokho. Ngemva kobana uJesu avusiwe kungenzeka abalandeli bakhe bebafuna ukuthandaza kuye. UJesu bekangumnganabo. Bebangacabanga ukuthi, ngebanga lokuthi uJesu ubathanda khulu, bekazokulalela iimbawo zabo bese abawe uYise bona abasize. Kodwana uJesu wathi akukafuzi bacabange njalo. Kubayini? Wathi kibo, “UBaba ngokwakhe uyanithanda.” Enye godu ifundiso yeBhayibheli esisekelo, yifundiso yomthandazo. Cabanga ukuthi kukuthinta njani lokho wena: Nawufunda iBhayibheli ufunde ngoJesu wafunda nokumthanda. (Jwa. 14:21) Nawe njengamaKrestu wangekhulu lokuthoma ungakghona ukuthandaza ngesibindi kuZimu, wazi kuhle bona uZimu ‘ngokwakhe uyakuthanda.’ Utjengisa bona uyawakholwa amezwi la ngaso soke isikhathi nawuthandaza kuJehova.—1 Jwa. 5:14.

ZWISISA BONA KHUYINI EKWENZA UNGAQINISEKI

11. Kubayini uSathana athaba nasingaqiniseki ukuthi uJehova uyasithanda?

¹¹ Khuyini ebangela bona abantu bangaqiniseki ngokuthi uJehova uyabathanda? Ungaphendula umbuzo lo ngokuthi uSathana wenza abantu bacabange ngendlela le begodu lokho kuliqiniso. UDeveli ufuna ‘ukusirhiribidela’ begodu kungamthabisa khulu nange singathoma ukungaqiniseki ngokuthi uJehova uyasithanda. (1 Pit. 5:8) UJehova usenzele ilungiselelo lesihlengo, okuyinto uSathana afuna sizizwe singayifanelekeli. (Heb. 2:9) Ngubani uzokuthaba ngokuthi singaqiniseki ngethando lakaJehova? NguSathana. Begodu ngubani uzokuthaba nasiphelelwa mamandla kangangokuthi silise ukulotjha uJehova? NguSathana. USathana ufuna sicabange bona uJehova akasithandi kodwana lokho akusiliqiniso. USathana nguye ongathandwa nguJehova. Kodwana elinye ‘lamaqhingakhe’ kukuthi asenze sizizwe kungithi esingathandwa nguJehova. (Efe. 6:11) Nasibonako ukuthi inaba lethu lilinga ukwenzani, zingazimisela ‘ukulwisana’ nalo.—Jak. 4:7.

12-13. Ukuba nesono kwethu kungasenza njani singaqiniseki ngethando lakaJehova?

¹² Kunokhunye godu okungasibangela bona singaqiniseki ngokuthi uJehova uyasithanda. Khuyini lokho? Sisono esibelethwe naso. (Rhu. 51:5; Rom. 5:12) Isono simotjha itjhebiswano abantu abanalo noJehova. Godu simotjha indlela esicabanga ngayo, esizizwa ngayo simotjhe nemizimbethu.

¹³ Isono sithinta indlela esizizwa ngayo, senze bona sizizwe mlandu, sitshwenyeke, sizizwe singakavikeleki begodu sineenhloni. Singazizwa njalo nasenze isono. Begodu singazizwa njalo ngebanga lokuthi siyazi bona sinesono, okungasiyindlela esidalwe ngayo. (Rom. 8:​20, 21) Njengombana ivili lekoloyi elinganamoya owaneleko lingekhe lakhamba ngendlela efaneleko, nathi njengombana sibabantu abanesono asikghoni ukuba ngendlela esidalwe ngayo. Yeke akurari ukuthi ngasikhathi, asiqiniseki ukuthi uJehova uyasithanda. Lokho nakwenzekako, kufuze sikhumbule bona, ‘UZimu mkhulu [begodu] uyasabeka, uphetha isivumelwano sakhe, uthanda labo abamthandako balalele nemiyalwakhe.’—Nerh. 1:5.

14. Ukucabanga ngesihlengo kungasisiza njani siqiniseke bona uJehova uyasithanda? (Roma 5:8) (Funda nebhoksi elithi “Tjheja ‘Amandla Akhohlisako Wesono.’”)

¹⁴ Iqiniso kukuthi ngezinye iinkhathi singacabanga bona ithando lakaJehova alikasifaneli. Kuhlekuhle lona alikasifaneli, lokho kwenza liqakatheke khulu. Asifumani ithando lakaJehova ngombana kunokuthileko esikwenzako. Nanyana kunjalo, uJehova wenze ilungiselelo lesihlengo bona alibalele izono zethu ngebanga lokuthi uyasithanda. (1 Jwa. 4:10) Khumbula nokuthi uJesu uze ephasini bona asindise izoni ingasi abantu abanganasono. (Funda kwebeRoma 5:8.) Akekho ongenze izinto ngendlela epheleleko begodu noJehova akakalindeli bona senze izinto ngendlela epheleleko. Nasizwisisako bona ukuba nesono kwethu kusenza singakholwa kuhle bona uJehova uyasithanda, ilwazelo kufuze lisenze silwisane nokucabanga njalo.—Rom. 7:​24, 25.

KHETHA UKUHLALA UTHEMBEKILE

15-16. Khuyini esingaqiniseka ngayo nasizimisele ukuhlala sithembekile kuJehova? (2 Samyela 22:26)

¹⁵ UJehova ufuna sikhethe kuhle ngokuthi ‘sinamathele kuye.’ (Dut. 30:​19, 20) Nasenza njalo singaqiniseka ngokuthi uzokuhlala athembekile kithi. (Funda yesi-2 kaSamyela 22:26.) Ngokuthi sihlale sithembekile kuJehova singaqiniseka ngokuthi uzokuhlala asisiza bona sikghodlhelelele nanyana ngibuphi ubujamo.

¹⁶ Njengombana sicocile, sinawo woke amabanga angasenza sihlale sinamandla nasiqalene nemiraro. Siyazi bona uJehova uyasithanda nokuthi uzosisekela. Ngilokho iBhayibheli elisifundisa khona. Nakwenzeka singasaqiniseki ngokuthi uJehova uyasithanda, kufuze sikhumbule ukuthi esikwaziko kuliqiniso kunalokho esikuzwako. Sifuna ukuhlala simthemba uJehova ngokuthi ithando lakhe lihlala ngokungapheliko.