Thuthukisa Indlela Othandaza Ngayo

1-2. (a) Khuyini engasikhandela ukutjela uJehova indlela esizizwa ngayo? (b) Sazi njani ukuthi uJehova uyayilalela imithandazwethu?

INGA-KGHANI ngezinye iinkhathi ulemuka ukuthi ubuyelela izinto ezifanako nawuthandazako begodu awutjeli uJehova indlela ozizwa ngayo? Lokho kungenzeka kithi soke. Ngebanga lokuba majadu khulu epilweni singazifumana sesinomukghwa wokurhaba nasithandazako. Mhlamunye sikufumana kubudisi ukutjela uJehova indlela esizizwa ngayo ngebanga lokobana sizizwa singakaqakatheki ukukhuluma naye.

² IBhayibheli ifundisa ukuthi okuqakathekileko kuJehova akusiyindlela esikghona ukuzihlathulula ngayo nasithandazako kunalokho kukobana sitjho okusehliziyweni besithobeke. Ulalela ‘umuntu othobekileko nakabawako.’ (Rhu. 10:17) Ngokutjhejisisa ulalela koke esikutjhoko ngombana unendaba nathi.—Rhu. 139:1-3.

3. Ngimiphi imibuzo esizokucoca ngayo esihlokwenesi?

³ Singazibuza ukuthi, Kubayini singazizwa sitjhaphulukile nasithandaza kuJehova? Singathandaza njani ngendlela engasitjhideza khudlwana kuJehova? Ukucabangisisa ngemithandazo esuka ehliziyweni etlolwe eBhayibhelini kungasisiza njani sithuthukise imithandazwethu? Nokuthi khuyini esingayenza nange sigandeleleke kangangobana singazi bona sizokuthini kuJehova nasithandazako? Nje sizokucoca ngeempendulo zemibuzo le.

THANDAZA KUJEHOVA NGOKUQINISEKA

4. Khuyini engasisiza siqiniseke nasithandaza kuJehova? (IRhubo 119:145)

⁴ Nasizwisisako ukuthi uJehova mngani othembekileko ofuna siphumelele sizokulemuka bona singaqiniseka nasithandaza kuye. Umtloli weRhubo 119 wenza okusemandlenakhe ukuba netjhebiswano elinjengaleli noJehova. Ipilwakhe beyizele ngemiraro. Abanye abantu bakhuluma amala amambi ngaye. (Rhu. 119:23, 69, 78) Ngezinye iinkhathi bekazizwa adanile ngebanga lemitjhapho ayenzileko. (Rhu. 119:5)Nanyana kunjalo, akhenge azizwe asaba ukutjela uJehova iindlela ebekazizwa ngayo.—Funda iRhubo 119:145.

5. Kubayini kungakafuzi sivumele imizwa engakhiko isikhandele bona sithandaze? Fanekisa.

⁵ UJehova ufuna nalabo abenze imitjhapho emikhulu bathandaze kuye. (Isa. 55:6, 7) Yeke, akukafuzi sivumele imizwa engakhiko isikhandele ukuthandaza. Ukufanekisa, umtjhayeli wesiphaphamtjhini uyazi bona nakatlhoga isizo kufuze akhulume nomuntu olawula iindlela iimphaphamtjhini ekufuze zikhambe kizo nazisemoyeni. Nange umtjhayeli wesiphaphamtjhini atlhoga isizo, kghani kufuze asabe ukulibawa ngombana aneenhloni ngokuthi ulahlekile namkha wenze umtjhapho? Akukafuzi aphethe njalo! Ngendlela efanako, nange singaqiniseki ngekufuze sikwenze namkha senze isono, akukafuzi sisabe ukukhuluma noJehova ngomthandazo.—Rhu. 119:25, 176.

SINGATHANDAZA NJANI NGENDLELA ENGASITJHIDEZA KHUDLWANA KUJEHOVA

6-7. Khuyini engasisiza sitjele uJehova indlela esizizwa ngayo? Nikela isibonelo. (Funda nomtlolo waphasi.)

⁶ Nasitjela uJehova ngomthandazo lokho esikucabangako nendlela esizizwa ngayo sizokutjhidela khulu kuye. Alo-ke, khuyini esingayenza ukuthuthukisa indlela esithandaza ngayo?

⁷ Cabangisisa ngobuntu bakaJehova.a Nasicabangisisa ngobuntu bakaJehova obukarisako kuzokuba bulula ukutjela uJehova esikucabangako nendlela esizizwa ngayo. (Rhu. 145:8, 9, 18) Cabanga ngesibonelo sakadadwethu u-Kristine, ubabakhe obekanenturhu. Uthi: “Ukukhuluma noJehova njengoBaba bekubudisi. Bengicabanga ukuthi imitjhapho engiyenzako izomenza angasangithandi.” Ngibuphi ubuntu bakaJehova obumsizileko? Uthi: “Ithando lakaJehova elithembekileko lingenza ngizizwe ngiphephile. Ngiyazi ukuthi uzokuhlala angisiza. Nanyana ngingenza imitjhapho, usazokuragela phambili angithanda begodu angisiza. Nangicabanga ngendlela uJehova angithanda ngayo, kuba bulula bona ngimtjele ngezinto ezingithabisako nezingidanisako.”

8-9. Ngiziphi iinzuzo zokucabanga ngozokutjho ngaphambi kobana uthandaze? Fanekisa.

⁸ Cabanga ngozokutjho. Ngaphambi kokuthandaza, ungazibuza imibuzo embalwa. Ngokwesibonelo: ‘Ngimiphi imiraro engiqalene nayo nje? Ukhona na ekufuze ngimlibalele? Inga-kghani ngiqalene nesitjhijilo esitjha engitlhoga uJehova angisize ngisihlule?’ (2 Kho. 19:15-19) Singalandela umtlhala uJesu awubekako ngokucabanga ngokuthi singambawani uJehova malungana negama lakhe, umBuswakhe nentandwakhe.—Mat. 6:9, 10.

⁹ Ngesikhathi udadwethu u-Aliska afumana ukuthi indodakhe iphethwe yikankere yengqondo, bekuba budisi kuye ukuthi athandaze. Uthi: “Bengigandeleleke khulu kangangobana nangithandazako bengingakghoni ukucabanga ngezinto ebekufuze ngizitjho.” Khuyini eyamsizako? Uhlathulula uthi: “Ngaphambi kokuthi ngithandaze ngicabanga ngalokho engifuna ukukutjela uJehova ukwenzela bona ngingakhulumi ngami nobujamo bendodami kwaphela. Ukwenza ngendlela le kungisiza ngibe nokuthula begodu ngikghona ukutjela uJehova izinto ezihlukahlukeneko nangithandazako.”

10. Kubayini kungakafuzi sirhabe nasithandazako? (Qala neenthombe.)

¹⁰ Ungarhabi nawuthandazako. Kuliqiniso ukuthi imithandazo emifitjhani ingasitjhideza kuJehova kodwana nasenza isikhathi semithandazo emidanyana sizokuba nesikhathi esaneleko sokutjela uJehova okunengi malungana nendlela esizizwa ngayo.b U-Elijah, indoda ka-Aliska uthi: “Ngilinga ukuthandaza amahlandla amanengi ngelanga begodu ukungarhabi nangithandazako kungitjhideze khulu kuJehova. UJehova ungilinda ngesineke nangithandazako, yeke ngiyazigedla nangikhuluma naye. Linga lokhu: Cabanga ukuthi ngisiphi isikhathi nendawo ongeze uthikaziseke nawuthandazako nekuvumela bona ungarhabi. Ragela phambili ulinga ukuthandaza ngendlela le.

UKUCABANGISISA NGEMITHANDAZO ESUKA EHLIZIYWENI ETLOLWE EBHAYIBHELINI

11. Sizuza njani ngokucabangisisa ngemithandazo etlolwe eBhayibhelini? (Funda ibhoksi elithi “Uzizwa Njengabo?”)

¹¹ Kungakusiza ukucabanga ngalokho iinceku zakaJehova ezakutjho emithandazwenazo naseengomeni zazo zokudumisa uJehova. Ukucabangisisa ngalokho iinceku zakaZimu ezakutjhoko ukuveza indlela ezizizwa ngayo nezicabanga ngayo kungakusiza uthandaze njengazo. Imithandazwazo ingakufundisa iindlela ezitjha zokuhlathulula indlela ozizwa ngayo nawuthandazako. Ungafumana eminye imithandazo lapho iinceku zakaJehova zikhuluma ngezinto ezikutshwenyako begodu zibawa izinto ezifana nalezo ofuna ukuzibawa.

12. Ngimiphi imibuzo esingazibuza yona nasifunda ngemithandazo etlolwe eBhayibhelini?

¹² Njengombana ufunda ngemithandazo etlolwe eBhayibhelini zibuze: ‘Ngubani othandaza la begodu bekaqalene nabuphi ubujamo? Inga-kghani indlela azizwa ngayo emthandazweni lo ifana nendlela mina engizizwa ngayo? Ngingafunda ziphi iimfundo emthandazweni lo?’ Kungatlhogeka urhubhulule khudlwana ukufumana iimpendulo zemibuzo le kodwana kuzokuzuzisa khulu ukwenza njalo. Cabanga ngeembonelo ezimbalwa.

13. Ngisiphi isifundo esimalungana nomthandazo esingasifunda kuHana? (1 Samyela 1:10, 11) (Qala nesithombe esingaphandle.)

¹³ Funda yoku-1 kaSamyela 1:10, 11. Ngesikhathi uHana atjho umthandazo lo bekaqalene neentjhijilo ezimbili ezikulu. Bekayinyumba begodu umrharidzwenakhe bekenza ipilo kaHana ibe lisizi. (1 Sam. 1:4-7) Nange uqalene nesitjhijilo esisolo senza ipilwakho ibe budisi, ungafundani emthandazweni kaHana? UHana wazigedla nakatjela uJehova koke okumtshwenyako ngemva kwalokho wazizwa aduduzekile. (1 Sam. 1:12, 18) Nathi sizozizwa singcono khulu ‘nasiphosela umthwalwethu kuJehova’ ngokumtjela ngezinto ezisitshwenyako nendlela ezisenza sizizwe ngayo.—Rhu. 55:22.

14.(a) Khuyini okhunye esikufunda esibonelweni sakaHana? (b) Singayithuthukisa njani imithandazwethu ngokuzindla ngemitlolo? (Funda umtlolo waphasi.)

¹⁴ Ngemva kweminyaka embalwa indodanakhe uSamyela ibelethiwe, uHana wayisa kumPhristi oPhakemeko u-Eli. (1 Sam. 1:24-28) UHana wathandaza ngokusuka ehliziyweni, wathokoza uJehova ngebanga lokobana uvikela bekatlhogomele abantu abathembekileko.c (1 Sam. 2:1, 8, 9) Bekasaqalene nemiraro epilwenakhe kodwana uHana wadzimelela endleleni uJehova ambusise ngayo. Khuyini esiyifundako? Sizokukghona ukukghodlhelelela iintjhijilo esiqalene nazo nange sidzimelela endleleni uJehova asisekele ngayo bekube nje.

15. Singafundani emthandazweni womphorofidi uJoromiya nasiphathwa ngokunganabulungiswa? (Joromiya 12:1)

¹⁵ Funda uJoromiya 12:1. Kwamdanisa uJoromiya ukubona abantu abenza izinto ezimbi babonakala bathabela ukuphila. Godu indlela amanye ama-Israyeli amphatha ngayo yamdanisa khulu. (Jor. 20:7, 8) Nathi nasibona abantu abangakathembeki baphumelela namkha siphathwa ngendlela engasiyihle singazizwa njengoJoromiya. Nanyana uJoromiya aveza indlela adane ngayo kodwana akhenge azaze bona uZimu unobulungiswa. Nakabona indlela uJehova akhalima ngayo abantu bakhe abahlubukako kungenzeka kwamenza wabuthemba khulu ubulungiswa bakaZimu. (Jor. 32:19) Nathi singatjela uJehova indlela okubuhlungu ngayo abantu nabasiphatha ngokunabulungiswa. Ngesikhathi esifanako, sitjengise bona siyamthemba uJehova ukuthi uzokwenza okulungileko ngesikhathi esifaneleko.

16. Singafundani kumLevi obekasekudingisweni nange sizwa kwanga ubujamo bethu busikhandela bona senze okuthileko? (IRhubo 42:1-4) (Qala neenthombe.)

¹⁶ Funda iRhubo 42:1-4. Ingoma le yatlolwa mLevi odingisiweko, obekangakghoni ukuya ethempelini ayokulotjha nabafowabo. Irhubo lakhe liveza indlela ebekazizwa ngayo. Singazizwa njengaye nange singakghoni ukuphuma ngendlini namkha sibotjhwe ngebanga lokukholwa kwethu. Indlela esizizwa ngayo ingatjhuguluka kanengi kodwana kunganandaba bona sizizwa njani senza kuhle ngokutjela uJehova indlela esizizwa ngayo ngobujamobo. Lokhu kuzosisiza sihlolisise indlela esizizwa ngayo, bekusenze sibe nombono ohlukileko ngobujamo esiqalene nabo. Ngokwesibonelo, umLevi walemuka ukuthi uzokuba namathuba amatjha wokudumisa uJehova. (Rhu. 42:5) Wabuye wacabangisisa ngendlela uJehova amtlhogomela ngayo. (Rhu. 42:8) Ukuthandaza kuJehova ngokusuka ehliziyweni kungasisiza sizwisise ngcono indlela esizizwa ngayo, sifumane ukuthula namandla wokukghodlhelela.

17. (a) Singafundani emthandazweni womphorofidi uJona? (Jona 2:1, 2) (b) Amanye amezwi womRhubi angasisiza njani nasiqalene nobudisi? (Funda umtlolo waphasi.)

¹⁷ Funda uJona 2:1, 2. Umphorofidi uJona watjho umthandazo lo ngesikhathi angemathunjini wehlambi ekulu. Nanyana angakhenge alalele uJehova ngaphambilini, uJona bekaqiniseka bona uJehova uyawuzwa umthandazwakhe. UJona wasebenzisa amezwi amanengi afumaneka kumaRhubo emthandazwenakhe.d Kungenzeka bekawazi kuhle amaRhubo la. Ukucabangisisa ngawo kwamenza waqiniseka ukuthi uJehova uzomsiza. Ngendlela efanako, nange silinga ukubamba amavesi weBhayibheli ngehloko singakghona ukuwakhumbula begodu azosiduduza nasithandaza kuJehova ngeenkhathi ezibudisi.

RAGELA PHAMBILI UTJHIDELA KUJEHOVA NGOMTHANDAZO

18-19. Ngisiphi isiqinisekiso esisifumana kwebeRoma 8:26, 27 nange singazi bona sizokuthini nasithandazako? Nikela isibonelo.

¹⁸ Funda kwebeRoma 8:26, 27. Ngezinye iinkhathi singatshwenyeka khulu kangangobana singasazi ukuthi sizomtjela njani uJehova indlela esizizwa ngayo. Nanyana kunjalo, asisisodwa. Ebujameni obunjalo umoya ocwengileko “uyasincengela.” Ngayiphi indlela? UJehova wasebenzisa umoyakhe ocwengileko ukwenza abatloli beBhayibheli bona batlole imithandazo eminengi. Lokha nasibhalelwa kuveza kuhle indlela esizizwa ngayo, uJehova uzowamukela umthandazwethu ngombana uyazwisisa ukuthi sifuna ukuthini begodu angasiphendula.

¹⁹ Ukucabanga ngendlela le kwasiza udadwethu u-Yelena ovela e-Russia. Wabotjhwa ngebanga lokobana bekathandaza, afunda neBhayibheli. U-Yelena wagandeleleka khulu kangangobana bekubudisi bona athandaze. Uhlathulula uthi: “Ngakhumbula ukuthi nangigandelelekileko begodu ngingazi bona ngithandazele ini, uJehova uzozizwa iimbawo zami njengombana ayizwa imithandazo yeenceku zakhe zekadeni etlolwe eBhayibhelini. . . . Lokhu kwangiduduza khulu ngeenkhathi ezibudisi.”

20. Khuyini engenza kube lula ukuthandaza nawutshwenyekileko?

²⁰ Singathikaziseka lula nasithandazako ngebanga lokuthi sigandelelekile. Bona sizilungiselele, singalalela iBhayibheli elirekhodiweko emtlolweni wamarhubo ngaphambi kobana sithandaze. Godu singatlola phasi indlela esizizwa ngayo njengombana kwenza iKosi uDavida. (Rhu. 18, 34, 142; amezwi angaphezulu.) Kuliqiniso bona ayikho imithetho emalungana nokuthi singazilungiselela njani ukuthandaza. (Rhu. 141:2) Yenza lokho okukusebenzelako.

21. Kubayini kufuze sithandaze ngehlizwethu yoke?

²¹ Kusithokozisa khulu ukwazi ukuthi uJehova uyayizwisisa indlela esizizwa ngayo ngitjho nangaphambi kobana sikhulume. (Rhu. 139:4) Nanyana kunjalo, uyathaba nasimtjela indlela esizizwa ngayo nokuthi simthemba kangangani. Yeke, ungazazi ukuthandaza kuBabakho wezulwini. Funa iinkhuthazo emithandazweni etlolwe eliZwini lakhe. Thandaza ngehliziywakho yoke. Mazise izinto ezikwenza uthabe nezikudanisako. NjengoMnganakho weqiniso, uJehova uzokuhlala akusekela.