IMIBUZO YABANTU ABATJHA
Khuyini Ekufuze Ngiyenze Ngemva Kokubhajadiswa?—Ingcenye 1: Hlala Umajadu
Ikoloyi namkha indlu ngezinye zezinto eziqakathekileko ekufuze zitlhogonyelwe. Kungendlela efanako nangobuhlobo bakho noZimu, kufuze ubutlhogomele. Ungahlala njani unobuhlobo obuqinileko noZimu ngitjho nangemva kokubhajadiswa?
Okusesihlokwenesi
Ragela phambili ufunda iliZwi lakaZimu
Umtlolo oyihloko: ‘Ragelani phambili nithela iinthelo kiyo yoke imisebenzi emihle begodu nikhula elwazini elinembileko lakaZimu.’—Kolose 1:10.
Kutjho ukuthi: Ngemva kokubhajadiswa, kufuze uragele phambili ufunda iBhayibheli bewucabangisise ngalokho okufundako.—IRhubo 25:4; 119:97.
Ekufuze ukulindele: Ngezinye iinkhathi, ungazizwa ungarhaleli ukufunda. Ungaphetha ngokuthi awusilihlobo lomuntu othanda ukufunda.
Lokho ongakwenza: Rhubhulula ngokungeneleleko malungana nesihloko esikukarako. Zenzele ihlelo lakho lokufunda, elizokuba bulula ukulilandela. Umnqophwakho kukuthi ukhulise ithando onalo ngoJehova nangeliZwi lakhe. Ukufunda okunjalo kuyazuzisa begodu kuyathabisa.—IRhubo 16:11.
Okungakusiza: Bona uzuze kuhle kilokho okufundako, linga ukufumana indawo ethulileko lapho engekhe uthikameziseke khona.
Utlhoga isizo elingeziweko?
Funda okulandelako:
“Lingangisiza Kanjani IBhayibheli?—Ingxenye 2: Kujabulele Ukufunda IBhayibheli”
Bukela okulandelako:
Dawuniloda:
Ragela phambili uthandaza kuJehova
Umtlolo oyihloko: “Ningatshwenyeki ngalitho kodwana kikho koke, iimbawo zenu azaziwe nguZimu ngomthandazo, ngokurabhela kunye nokuthokoza.”—Filipi 4:6.
Kutjho ukuthi: Ukukhuluma noZimu kungeendlela ezimbili: Uyamlalela nawufunda iliZwi lakhe, ukhuluma naye nawuthandazako. Lokha nawuthandazako ungambawa akuphe lokho okutlhogako, umthokoze ngezinto ezihle akwenzele zona.
Ekufuze ukulindele: Ngezinye iinkhathi, ungezwa ngasuthi imithandazwakho uyibuyelela kanengi namkha ubuyelela into yinye kanengi. Ungathoma nokuzaza ukuthi uJehova uyayizwa kwamambala imithandazwakho nokuthi uyafuna ukukulalela.—IRhubo 10:1.
Lokho ongakwenza: Hlangana nelanga, cabanga ngezinto ongazithandazela. Nange ubujamo bakho bungakuvumeli ukuthi uthandaze isikhathi eside, zibekele isikhathi sokuthi uthandaze ekukhambeni kwelangelo. Ungathandaza ngezinto eziqakathekileko kuwe kodwana ungalibali nokuthandazela abanye.—Filipi 2:4.
Okungakusiza: Nange uzwa ngasuthi usolo ubuyelela into yinye kanengi, thandaza ngalokho kuJehova. Ufuna ukwazi koke okusitshwenyako, kuhlanganise nalokho okumalungana nemithandazwethu.—1 Jwanisi 5:14.
Utlhoga isizo elingeziweko?
Funda okulandelako:
Dawuniloda:
Ragela phambili ucocela abanye ngalokho okukholelwako
Umtlolo oyihloko: “Hlala uzitjhejile wena nokufundisa kwakho. . . . Ngokwenza lokhu uzokusindisa kokubili wena nabakulalelako.”—1 Thimothi 4:16.
Kutjho ukuthi: Nawucocela abanye ngalokho okukholelwakho, nawe uqinisa ukukholwa kwakho. Umphumela uba kukuthi, usindisa ukuphila kwalabo abakulalelako kuhlanganise nokuphila kwakho.
Ekufuze ukulindele: Ngezinye iinkhathi, kungenzeka ungarhaleli ukucoca ngalokho okukholelwako. Ungarhidlwa livalo nakufuze wenze njalo, khulukhulu esikolweni.
Lokho ongakwenza: Ziquntele ukuthi angekhe uvumele imizwa engakhiko ikuhlule namkha ilawule lokho ofuna ukukwenza. Umpostoli uPowula wathi: “Ngitjho nanyana [ngingatjhumayela iindaba ezimnandi] ngingathandi, uZimu usangiphathise wona umsebenzi lo.”—1 Korinte 9:16, 17.
Okungakusiza: Ngemvumo yababelethi bakho, funa umuntu ozokuba mumelulekakho—umKrestu osibonelo esihle nothanda isimu.—IzAga 27:17.
Utlhoga isizo elingeziweko?
Funda okulandelako:
Ragela phambili uya esifundweni
Umtlolo oyihloko: “Asicabangelaneni ukuthi sivuselelane ithando nemisebenzi emihle, singakuliseleli ukuhlangana kwethu ndawonye.”—Hebheru 10:24, 25.
Kutjho ukuthi: Umnqopho oyihloko wokuya esifundweni kulotjha uJehova. Nanyana kunjalo, ukuya esifundweni kuzuzisa ngeendlela ezimbili. Kokuthoma, ufumana isikhuthazo kubafowethu nabodadwethu. Kwesibili, nawe uyabakhuthaza nawuba khona, ube nengcenye ethileko oyenzako bewuphendule.—Roma 1:11, 12.
Ekufuze ukulindele: Ngezinye iinkhathi, umkhumbulwakho ungazula, lokho kungakwenza ulahlekelwe zizinto eziqakathekileko ezifundiswako. Okhunye, ungalisa ukuza esifundweni ngebanga lokuthi udzimelele ekwenzeni ezinye izinto ezithileko namkha umsebenzi wesikolo.
Lokho ongakwenza: Ungawuliseleli umsebenzakho wesikolo kodwana linga ukuya esifundweni qobe uzibekele nomnqopho wokuthi uzuze nawusesifundweni. Yiba nengcenye ngokuthi uphendule. Ngemva kwesifundo, zibekele umnqopho wokuthokoza okungenani umuntu munye ngependulwakhe.
Okungakusiza: Lungiselela kusese ngaphambili. Dawuniloda i-JW Library® app, usebenzise ingcenye ethi “Meetings” ukubona ukuthi kuzokucocwa ngani esifundweni.
Utlhoga isizo elingeziweko?
Funda okulandelako: