Kghani IBhayibheli Liyavumelana Nesayensi?
Ipendulo yeBhayibheli
Iye, nanyana iBhayibheli lingasiyincwadi yesayensi, linembile nalikhuluma ngayo. Cabanga ngezinye iimbonelo ezitjengisa bona iBhayibheli nesayensi ziyavumelana nokuthi iBhayibheli linamaqiniso amalungana nesayensi ahluke khulu eenkolelweni zabantu abanengi ebebaphila ngesikhathi elatlolwa ngaso.
Izulu nephasi kwadalwa. (Genesisi 1:1) Ngokuhlukileko, iimfundiso zamala ezinengi zekadeni zithi izulu nephasi azikadalwa kunalokho zaba khona ngengozi. Abantu beBhabhiloni bebakholelwa ukuthi abozimu ababeletha izulu nephasi bebavela emalwandle amabili. Ezinye zithi izulu nephasi kwavela eqandeni elikhulu.
Izulu nephasi zinqotjhiswa mithetho yemvelo yaqobe langa, ingasi imithetho yabosingazimu. (Jobho 38:33; Joromiya 33:25) Iimfundiso zamala zephaseli zifundisa ukuthi abantu abakghoni ukuzisiza nakuvela ihlekelele nezintweni ezimbi ezivela kibosingazimu.
Iphasi lilembelele emoyeni. (Jobho 26:7) Abantu abanengi bekadeni bebakholelwa bona iphasi lipatalele begodu lisekelwe silwana esikhulu njengenyathi namkha ikghuru.
Imilambo nemithombo zifumana amanzi avela elwandle nakwezinye iindawo athululeka ephasini njengezulu, igabhogo namkha isinanja. (Jobho 36:27, 28; UMtjhumayeli 1:7; Isaya 55:10; Amosi 9:6) AmaGirigi wekadeni bekacabanga bona imilambo ifumana amanzi avela ngaphasi kwelwandle begodu umbono lo waragela phambili bekwaba semakhulwini weminyaka ema-18.
Iintaba ziyakhuphuka bezehle begodu iintaba ezikhona namhlanjesi khezaba ngaphasi kwamanzi. (IRhubo 104:6, 8) Ngokuhlukileko, iimfundiso zamala ezinengi zithi iintaba zadalwa bozimu ngendlela ezingayo namhlanjesi.
Ukuhlwengeka kuvikela ukuphila. Umthetho owanikelwa isitjhaba sakwa-Israyeli bewuhlanganisa iindlela zokuzihlwengisa ngemva kokuthinta isidumbu, ukuhlalisa umuntu onokugula okuthelelanako ayedwa nokulahla ubuthuvi ngendlela ephephileko. (Levitikusi 11:28; 13:1-5; Duteronomi 23:13) Ngokuhlukileko, eminye imitjhoga yeGibhide ebeyisetjenziswa nakukhutjhwa imiyalo le, beyihlangiswa nobuthuvi bomuntu begodu itjhatjhwe esilondeni esivulekileko.
Kghani ikhona imitjhapho emalungana nesayensi eBhayibhelini?
Ukuhlolisisa kuhle iBhayibheli kutjengisa bona akusiliqiniso lokho. Nanzi ezinye izinto ezijayelekileko ezingasiliqiniso malungana nokunemba kweBhayibheli ngesayensi:
Amala: IBhayibheli lithi izulu nephasi kwadalwa ngamalanga asithandathu anama-awara ama-24.
Iqiniso: IBhayibheli alitjho ukuthi uZimu wadala izulu nephasi ngamalanga asithandathu anama-awara ama-24. (Genesisi 1:1) Amalanga ekukhulunywa ngawo kuGenesisi isahluko 1 asikhathi esingaziwako ukuthi singangani. Kuhlekuhle, soke isikhathi okwadalwa ngaso izulu nephasi sibizwa nangokuthi ‘lilanga.’—Genesisi 2:4.
Amala: IBhayibheli lithi iintjalo zadalwa ngaphambi kokuthi kube nelanga, elisekela ihlelo lokukhula kweentjalo.—Genesisi 1:11, 16.
Iqiniso: IBhayibheli liveza ukuthi ilanga, okungenye yeenkwekwezi ‘zezulwini’ ladalwa ngaphambi kokudalwa kweentjalo. (Genesisi 1:1) Umkhanyo ovela elangeni waba khona ephasini ‘ngelanga’ lokuthoma lokudala. Njengombana umkayi uthoma ukubonakala, ‘ngelanga’ lesithathu lokudala, umkhanyo besele unamandla aneleko bona ukhulise iintjalo. (Genesisi 1:3-5, 12, 13) Kwathi ngokukhamba kwesikhathi ilanga lathoma ukubonakala ephasini.—Genesisi 1:16.
Amala: IBhayibheli lithi ilanga lizombeleza iphasi.
Iqiniso: UMtjhumayeli 1:5 uthi: “Ilanga liyaphuma bese liyatjhinga; libuyela ngokurhabako endaweni eliphuma kiyo godu.” Nanyana kunjalo, amezwi la ahlathulula indlela ilanga eliqaleka ngayo ephasini. Ngitjho nanamhlanjesi abantu basebenzisa amezwi athi “ukuphuma kwelanga” namkha “ukutjhinga kwelanga” nanyana bazi ukuthi iphasi ngilo elizombeleza ilanga.
Amala: IBhayibheli lithi iphasi lipatalele.
Iqiniso: IBhayibheli lithi ‘emaphethelweni wephasi’ nalihlathulula amezwi athi ‘eendaweni ezikude khulu zephasi’; lokhu akutjho ukuthi iphasi lipatalele namkha linesiqongolo. (IzEnzo 1:8; umtlolo ongenzasi) Ngokufanako, amezwi athi ‘amahlangothi amane wephasi’ asisingathekiso esiqalisele ephasini loke; namhlanjesi umuntu angasebenzisa iingcenye ezine zekhamphasi asebenzisa isingathekiso esifanako.—Isaya 11:12; Lukasi 13:29.
Amala: IBhayibheli lithi umphetho wendulungu ulingana nobude obusuka kwelinye ihlangothi lendulungu ukuya kwelinye ngokubuyelelwe kathathu kodwana inani ekungilo yi-3.1416.
Iqiniso: Iinlinganiso ‘zeLwandle lesimbi encibilikisiweko’ ekukhulunywa ngazo kweyoku-1 yamaKhosi 7:23 nakweyesi-2 yeenKronike 4:2 ziveza ukuthi belimakhubhithi ali-10 ubude begodu “bekuthatha intambo yokulinganisa emakhubhithi ama-30 ubude ukulizombeleza.” Iinomborwezi kungenzeka bezingasikude khulu nenomboro yetjhumi. Kungenzeka ukuthi umphetho nobude bendulungu bekujamele iimbalo zengaphandle nengaphakathi leLwandle lesimbi encibilikisiweko.