Inga-kghani Zoke Iinkolelo Ziyafana? Inga-kghani Zoke Ziya kuZimu?

Ipendulo yeBhayibheli

Awa, azifani. IBhayibheli lineembonelo ezinengi zeenkolelo ezingamthabisiko uZimu. Zihlukaniseke ngeengaba ezimbili.

Isigaba 1: Ukulotjha abozimu bamala

IBhayibheli lihlathulula ukulotjha abozimu bamala ngamagama athi ‘lilize’, ‘yikohliso.’ (Joromiya 10:3-5; 16:19, 20) UJehovaa uZimu wayala isitjhaba sama-Israyeli wekadeni wathi: “Ungalotjhi abosingazimu, lotjha mina kwaphela.” (Eksodusi 20:3, 23; 23:24) Bekuthi ama-Israyeli nawalotjha abosingazimu, ‘Ilaka lakaSomnini livuthe.’—Numeri 25:3; Levitikusi 20:2; AbaKhokheli 2:13, 14.

UZimu akakatjhuguluki begodu usazizwa ngendlela efanako ngokulotjha lokho “ekuthiwa bozimu.” (1 Korinte 8:5, 6; Galatiya 4:8) Uyala labo abafuna ukumlotjha ukuthi balise ukuzihlanganisa nalabo abasekolweni yamala, uthi: “Phumani hlangana nabo, nizihlukanise.” (2 Korinte 6:14-17) Nangabe zoke iinkolelo ziyafana begodu zidosela abantu kuZimu, kubayini uZimu asinikela umyalo lo?

Isigaba 2: Ukulotjha uZimu weqiniso ngendlela angayamukeliko

Ngezinye iinkhathi, ama-Israyeli bekalotjha uZimu asebenzisa iinkolelo namasiko asuselwe ekulotjheni kwamala, kodwana uZimu akhenge akwamukele ukuhlanganisa ikolo yeqiniso neyamala. (Eksodusi 32:8; Duteronomi 12:2-4) UJesu wabasola abadosiphambili bekolo bangesikhathi sakhe ngebanga lendlela ebebalotjha ngayo uZimu; bebazenza ngathi bathanda uZimu khulu kani bayazenzisa ngokuthi “baziphayele eqadi izinto eziqakatheke khulu zomThetho, okubulungiswa, umusa nokuthembeka.”—Matewu 23:23.

Ngokufanako nanamhlanjesi, yikolo esekelwe eqinisweni kwaphela edosela abantu kuZimu. Iqinisweli lifumaneka eBhayibhelini. (Jwanisi 4:24; 17:17; 2 Thimothi 3:16, 17) Iinkolelo ezineemfundiso eziphikisana neBhayibheli zidosela abantu kude noZimu. Iimfundiso ezinengi abantu abacabanga bona zivela eBhayibhelini, ezifaka hlangana uZiquntathu, umphefumulo ongafiko, nokuhlunguphazwa ngokungapheliko, zasuselwa kilabo abalotjha abozimu bamala. Ukulotjha okuthuthukisa iimfundiswezo “kulilize,” namkha akunamsebenzi ngombana kujamiselela lokho uZimu akufunako ngamasiko wabantu.—Markosi 7:7, 8.

UZimu uyabanyenya abazenzisi bezekolo. (Titosi 1:16) Bona isize abantu batjhidelane noZimu, ikolo kufuze ithinte ukuphila kwabo ingasi ukuba yisiko nje kwaphela. Ngokwesibonelo, iBhayibheli lithi: “Nangabe nanyana ngubani ucabanga ukuthi ulotjha uZimu kodwana angalawuli ilimu lakhe, ukhohlisa ihliziywakhe, nokulotjha kwakhe kulilize. Umhlobo wokulotjha ohlwengileko ngokombono kaZimethu uBaba ngilo: kutlhogomela iintandani nabahlolokazi esizini labo, nokuhlala unganabala elivela ephasini.” (Jakopo 1:26, 27) I-King James Version isebenzisa amezwi athi “ikolo emsulwa” nayiqalisela ekulotjheni okuhlwengekileko nobunganabuzenzisi.