Kubayini Kuneenkolo ZobuKrestu Ezinengi Kangaka?
Ipendulo yeBhayibheli
Abantu basebenzise iimfundiso zakaJesu ukwenza iinkolo “zobuKrestu” ezihlukahlukeneko. Nanyana kunjalo, iBhayibheli litjengisa ukuthi kunekolo yinye kwaphela yobuKrestu beqiniso. Akhuqale amabanga amathathu kwaphela wokufikelela isiphethwesi.
UJesu wafundisa “iqiniso” begodu amaKrestu wokuthoma bewaqalisela ekolwenawo ngokuthi “iliqiniso.” (Jwanisi 8:32; 2 Pitrosi 2:2; 2 Jwanisi 4; 3 Jwanisi 3) Lokhu kutjengisa ukuthi labo abathuthukisa iimfundiso eziphambana neemfundiso zakaJesu, abasisekolweni yobuKrestu beqiniso.
IBhayibheli lifundisa ukuthi amaKrestu ‘kufuze akhulume ngokuvumelana.’ (1 Korinte 1:10) Nanyana kunjalo, iinkolo ezinengi zobuKrestu azivumelani neemfundiso ezilula ezitjho ukuba mKrestu. Iinkolwezo angekhe kwathiwa ziqinisile zoke njalo.—1 Pitrosi 2:21.
UJesu waphorofida ukuthi abanengi bazokuthi bamaKrestu kodwana babhalelwe kulalela imiyalwakhe nokuthi angekhe abamukele abanjalo. (Matewu 7:21-23; Lukasi 6:46) Abanye abantu bebazokudurhiswa badosiphambili bamasondo abasilaphaza ukulotjha kweqiniso bona bazizuzise bona. (Matewu 7:15) Nanyana kunjalo, abanye abantu bebazokuthanda ubuKrestu obungasibo beqiniso ngombana batjelwa lokho abafuna ukukuzwa kunokuzwa amaqiniso aseBhayibhelini.—2 Thimothi 4:3, 4.
Emfanekiswenakhe wekoroyi nekhula, uJesu wabikezela ngokuhlubuka okukhulu ngokujamelene nobuKrestu. (Matewu 13:24-30, 36-43) Bekuzokudlula isikhathi eside khulu amaKrestu weqiniso angahlukaniseki namaKrestu wamala. Njengombana uJesu abikezela, ukuhlubuka kwanda ngemva kokuhlongakala kwabapostoli. (IzEnzo 20:29, 30) Nanyana iimfundiso zeenhlubuki zingahluka, yoke imihlobo yobuKrestu bamala ehlukahlukeneko ‘iphambukile eqinisweni.’—2 Thimothi 2:18.
UJesu godu wabikezela ukuthi kuzokuba nomehluko phakathi kobuKrestu beqiniso nebamala. Lokhu kwenzekile esikhathini sethu, okusikhathi ‘sokuphela kwephaseli.’—Matewu 13:30, 39.