Siyini Isono?
Ipendulo yeBhayibheli
Isono sisenzo esinye nesinye, umuzwa, namkha umcabango ongakhambisani neenkambisolawulo zakaZimu. Lokhu kuhlanganisa ukuphula imithetho kaZimu ngokwenza okumbi namkha okungakalungi, emehlweni kaZimu. (1 Jwanisi 3:4; 5:17) IBhayibheli godu lihlathulula izono zokungenzi okulungileko nakufuze ukwenze.—Jakopo 4:17.
Emalimini okwatlolwa ngawo iBhayibheli kokuthoma, amezwi ajamele isono atjho “ukulahlekelwa liphuzu” namkha umnqopho. Ngokwesibonelo, isiqhema samasotja kwa-Israyeli ekadeni besinekghono lokuphosa amatje ngeswarayi kangangobana ‘besingakhuthi.’ Ibizweli nange litjhugululwa ngokunqophileko, lingafundeka bunjesi ‘besingekhe sone.’ (AbaHluleli 20:16) Yeke, ukwenza isono kulahlekelwa ziinkambiso zakaZimu ezipheleleko.
NjengoMdali, uZimu unelungelo lokubekela abantu iinkambiso zokulungileko nokungakalungi. (IsAmbulo 4:11) Sizoziphendulela kuye ngezenzo zethu.—Roma 14:12.
Kghani kuyakghonakala ukuthi singoni nakancani?
Awa. IBhayibheli lithi “boke bonile, bayabhalelwa kutjengisa iphazimulo kaZimu.” (Roma 3:23; 1 AmaKhosi 8:46; UMtjhumayeli 7:20; 1 Jwanisi 1:8) Kubayini kunjalo?
Abantu bokuthoma, u-Adamu no-Eva, bebanganasono ekuthomeni. Lokho kungebanga lokuthi benziwa ngomfanekiso kaZimu, bebaphelele. (Genesisi 1:27) Nanyana kunjalo, balahlekelwa kuphelela kwabo ngokungalaleli uZimu. (Genesisi 3:5, 6, 17-19) Nababa nabantwana babadlulisela isono nokungapheleli ngefuzo. (Roma 5:12) Kunjengombana iKosi yakwa-Israyeli uDavida yatjho, “Ngabelethwa ngimlandu.”—IRhubo 51:5.
Kghani ezinye izono zikulu kunezinye?
Iye. Ngokwesibonelo, iBhayibheli lithi amadoda weSodoma yakade ‘bewakhohlakele begodu azizoni ezikulu kuJehova’ isono sawo ‘besesisikhulu kwamambala.’ (Genesisi 13:13; 18:20) Akhuqale izinto ezintathu ezenza isono sisiqale njengesikhulu namkha esincani.
Izinga. IBhayibheli lisiyelelisa ngokuthi sibalekele izono ezikulu njengokuziphatha kumbi ngokomseme, ubufebe, ukweba, ukudakwa, ukudlelezela, ukubulala nobungoma. (1 Korinte 6:9-11; IsAmbulo 21:8) IBhayibheli lihlukanisa izonwezi nalezo umuntu azenza ngebanga lokungacabangi kuhle begodu angakahlosi, ngokwesibonelo amezwi namkha izenzo ezilimaza abanye. (IzAga 12:18; Efesu 4:31, 32) Naphezu kwalokho, iBhayibheli lisikhuthaza bona singaqaleli phasi ezinye izono sithi zincani, njengombana zingasenza sone khulu siphule imithetho kaJehova.—Matewu 5:27, 28.
Ihloso. Ezinye izono abantu abazenzako bazenza ngebanga lokungazi lokho uZimu akufunako nangakufuniko. (IzEnzo 17:30; 1 Thimothi 1:13) Nanyana iBhayibheli lingazithatheli phasi izono ezinjalo, litjengisa umehluko phakathi kwazo nalezo umuntu azenza ngehloso bona aphule imithetho kaZimu. (Numeri 15:30, 31) Ukwenza isono ngehloso kuvela ‘ehliziywenakhe ekhohlakeleko.’—Joromiya 16:12.
Ukubuyelela. IBhayibheli lenza umehluko phakathi kokwenza isono kanye nokubuyelela isono kanengi. (1 Jwanisi 3:4-8) Labo ‘abenza isono ngabomu,’ ngitjho nanyana sebafundile ukuthi bangakwenza njani okulungileko, bazokuqalana nesahlulelo sakaZimu esithusako.—Hebheru 10:26, 27.
Labo abanomlandu wokwenza isono esikhulu bangazisola ngebanga lemitjhaphwabo emikhulu. Ngokwesibonelo, iKosi uDavida yatlola: “Izono zami zipakelene zidlula ihlokwami; njengomthwalo obudisi, zinengi khulu bona ngingazithwala.” (IRhubo 38:4) Kodwana iBhayibheli linikela ithembeli: “Umuntu okhohlakeleko akatjhiye indlelakhe nomuntu omumbi akatjhiye imicabangwakhe; akabuyele kuJehova, ozokuba nesirhawu kuye, kuZimethu, uzomlibalela ngokutjhaphulukileko.”—Isaya 55:7.