Isokana libona abantu bangena eWolweni lomBuso

IMIBUZO YABANTU ABATJHA

Kubayini kufuze Uye Esifundweni eWolweni LomBuso?

Kabili ngeveke, aboFakazi bakaJehova baba nemihlangano eendaweni zabo zokulotjha uZimu ezibizwa ngokuthi, maWolo woMbuso. Kwenzekani emihlanganweni le, ukuba khona kiyo kungakuzuzisa njani?

Kwenzekani eWolweni lomBuso?

IWolo lomBuso yindawo ekufundelwa kiyo iimfundiso zeBhayibheli. Imihlangano le ingakusiza bona:

ufunde iqiniso ngoZimu.
uzwisise lokho okutjhiwo zizenzakalo zanamhlanjesi.
ube mumuntu ongcono.
ube mngani onomusa.

Bewazi? Indawo aboFakazi bakaJehova abahlangana kiyo ibizwa ngokuthi yiWolo lomBuso ngombana kula kucocwa khona khulu ngomBuso kaZimu.—Matewu 6:9, 10; 24:14; Lukasi 4:43.

Kubayini kufuze uye?

Ilwazi ozolifumana lapho lizokusiza. Iinkambisolawulo zeBhayibheli ezifundwa emihlanganweni yaboFakazi bakaJehova zizokusiza ‘ufumane ubuhlakani.’ (IzAga 4:5) Lokho kutjho ukuthi iBhayibheli lingakusiza wenze iinqunto ezihlakaniphileko ekuphileni kwakho. Lingakusiza godu nokobana uphenduleke emibuzweni eqakathekileko ethi:

Iinhloko ezilandelako ngezimbalwa esicoca ngazo emihlanganwenethu yangeempelaveke:

Kubayini Kufuze Unqotjhiswe LiBhayibheli?
Ungalitholaphi Isizo Ngeenkhathi Ezibudisi?
Lokho UmBuso KaZimu Osenzela Khona Nje.

“Omunye ebengifunda naye weza esifundweni. Wahlala nebekhaya begodu saqalisana naye incwadi ebeyifundwa. Ngemva kwesifundo, wangitjela ukuthi kumkare khulu ukuzwa indlela abantu ebebaphendula ngayo engcenyeni yemibuzo neempendulo. Wathi esondweni lakhe abanazo iincwadi zokufunda njengathi.”—Brenda.

Bewazi? EWolweni lomBuso kungenwa simahla begodu akuthathwa kongozelo.

Imihlanganwethu yenzelwe bona ikukhuthaze. IBhayibheli lithi elinye ibanga elenza amaKrestu ahlangane ndawonye kukobana ‘avuselelane.’ (Hebheru 10:24, 25) Ukuhlangana ndawonye kwalabo abathanda uZimu nabanye kuyaqabula ephasineli elizele abantu abamarhamaru.

“Ngemva kwelanga elimajadu, nginokuzizwa ngidiniwe begodu ngidanile kodwana ukuhlangana nabafowethu eWolweni lomBuso kungenza ngizizwe ngcono. Nasele ngibuyela emuva ekhaya ngemva kwesifundo, ngizizwa ngithabile begodu ngikulungele nokuthoma ilanga elilandelako.”—Elisa.

Bewazi? Kunamabandla waboFakazi bakaJehova angaphezu kwee-120 000 ephasini mazombe abamba imihlangano eendaweni ezingaphezu kwezii-60 000. Umnyaka ngamunye, kwakhiwa amaWolo womBuso angalinganiselwa kwayi-1 500 ukuhlangabeza isibalo sabantu abeza emihlanganwenethu.a

Okutjhiwo ziintanga zakho

“Ngesikhathi ngisesikolweni samabanga aphezulu, omunye ebengifunda naye weza nami emhlanganweni embalwa begodu kwamkara ukubona ukuhlukahluka kweminyaka yabantu ebebafunda iBhayibheli ndawonye. Muva nje, nomqatjhami weza begodu wakarwa kubona ukuthi besilisebenzisa kangangani iBhayibheli. Ukubona ikarekwabo ngesifundo kwangenza ngayithabela khulu imihlangano!”—Jessica.

“Ukuya esifundweni kuyangisiza ngombana kwehlisa ukutshwenyeka okubangelwa miraro yokuphila. Sifunda ukuphila ngendlela enomnqopho, ukuba babantu abangcono nokhunye okunengi. Qobe ngemva kwesifundo, ngizizwa ngiqabulekile.”—Timothy

“Indoda ethileko engayimemela esifundweni, yathi: ‘Ngiye ngebanga lokuthi bengifuna ukubona imitjhapho kilokho enikukholelwako kodwana ngifumene ukuthi ziinkolelo zami ezingakalungi!’ Kwamkara nokubona indlela aboFakazi bakaJehova abanobungani ngayo. Wathi: ‘Nanyana bengithoma ukuhlangana nani, ningiphathe ngasuthi besele sineminyaka sazana!’”—Jacob.

“Khekwaba neenkhathi lapho bengizitjela ngithi ‘ngizokukhamba msinyana ngemva kwesifundo.’ Nakusaraga isifundo, umuzwa loyo bewuvele uphele. Ngemva kwesifundo, bengikhuluma nabantu ngingasakhumbuli nokuthi konje kubayini bengifuna ukukhamba msinyana ngemva kwesifundo. Isifundo singisizile ngazifumanela abangani abahle.”—Madison.

a Bona ufumane iWolo lomBuso laboFakazi bakaJehova endaweni ohlala kiyo, tjhinga ekhasini elithi, “Congregation Meetings of Jehovah’s Witnesses” ugandelele elithi, “Find a Location Near You.”