IMIBUZO YABANTU ABATJHA
IBhayibheli Lingangisiza Njani Mina?—Ingcenye 1: Hlolisisa IBhayibheli Lakho
”Ngizamile ukufunda iBhayibheli kodwana ngebanga lokuthi lide khulu lokho kungiqeda amandla!”—Briana, 15.
Kghani nawe uzizwa ngendlela le? Isihlokwesi singakusiza!
Kubayini kufuze ngifunde iBhayibheli?
Kghani ukufunda iBhayibheli kuyinto ekudondisako? Nangabe kunjalo kuyazwisiseka. Ungacabanga ukuthi iBhayibheli liyincwadi enamakhasi amanengi ezele amagama angananthombe okungenza i-TV namavidiyo abonakale akarisa!
Yiqale ngendlela le: nawungahlangana netromula ezele amagugu wekadeni, angekhe wafuna na ukwazi ukuthi kunani ngaphakathi?
IBhayibheli lifana netromula leyo. Lizele amagugu amanengi wokuhlakanipha angakusiza bona
wenze iinqunto ezihle
ube netjhebiswano elihle nababelethi bakho
ufumane abangani abalungileko
uqalane nokugandeleleka
Kuza njani bona incwadi yekadeni le isisize namhlanjesi? Kungebanga lokuthi “Woke umTlolo uphefumulelwe nguZimu.” (2 Thimothi 3:16) Lokhu kutjho ukuthi iseluleko seBhayibheli sivela emthonjeni ophuma phambili.
IBhayibheli lifana netromula ezele amagugu wokuhlakanipha anganakumadaniswa
Kufuze ngilifunde njani iBhayibheli?
Enye indlela ongakwenza ngayo kufunda ikhasi nekhasi leBhayibheli. Lokho kuzokunikeza ihlathululo yomlayezo weBhayibheli sele liloke. Zinengi iindlela zokufunda iBhayibheli. Cabanga ngeembonelo ezimbilezi:
Ungafunda iincwadi ezima-66 zeBhayibheli ngokulandelana kwazo, kusukela kuGenesisi kuya kuSambulo.
Ungayifunda ngokulandelana kwezenzakalo ezitlolwe eBhayibhelini.
Iseluleko: I-Appendix A7 ye-New World Translation inokulandelana kwezenzakalo zokuphila kwakaJesu lokha nakasephasini.
Indlela yesibili yokufunda iBhayibheli kukhetha iindaba ephathelene nesitjhijilo oqalene naso. Ngokwesibonelo:
Kghani angeze wakuthabela ukufumana abangani abathembekileko? Funda indaba kaJonathani noDavida. (1 Samyela izahluko 18-20) Ngemva kwalokho sebenzisa iphepha lemibuzo elithi ”Indlela Yokuthola Abangani Abathembekile” elifumaneka ngesiZulu bona ufumane iimfundo endabeni le.
Ungathanda ukuqinisa ikghono lakho lokujamelana neenlingo? Funda indaba yokuthi uJosefa wajamelana njani nokulingwa. (Genesisi isahluko 39) Ngemva kwalokho sebenzisa iphepha lemibuzo elithi “Indlela Yokumelana Nesilingo uJosefa—ingqenye 1” nelithi “Waqanjelwa Amanga! uJosefa ingqenye 2” afumaneka ngesiZulu bona ufumane iimfundo endabeni le.
Ungathabela ukufunda bona umthandazo ungakusiza njani? Funda ngalokho okwehlela uNerhemiya. (Nerhemiya isahluko 2) Ngemva kwalokho sebenzisa iphepha lemibuzo elithi “UNkulunkulu Wawuphendula Umthandazo Wakhe” elifumaneka ngesiZulu bona ufumane iimfundo endabeni le.
Iseluleko: Nawufunda iBhayibheli qiniseka bona usendaweni ethulileko bona ungaphazamiseki.
Indlela yesithathu yokufunda iBhayibheli kukhetha indaba namkha irhubo,yifunde bese uyacabangisisa ukuthi isebenza njani kuwe. Ngemva kokufunda zibuze imibuzo efana nale:
Kubayini uJehova afake lokhu eBhayibhelini?
Lokhu kungifundisani ngobuntu bakaJehova namkha indlelakhe yokwenza iizinto?
Ngingakusebenzisa njani lokhu ekuphileni kwami?
Iseluleko: Zibekele umnqopho, tlola ilanga ofuna ukuthoma ngalo ukufunda iBhayibheli.