Ngifuna Ukufa, iBhayibheli Lingangisiza Njani Nangifikelwa Micabango Yokuzibulala?
Ipendulo YeBhayibheli
Iye! IBhayibheli livela ‘kuZimu oduduza abadanileko.’ (2 Korinte 7:6) Nanyana iBhayibheli lingasiyincwadi emalungana nezamaphilo, lisize abanengi bahlula imicabango yokuzibulala. Iseluleko salo singakusiza nawe.
Ngisiphi iseluleko esifumaneka eBhayibhelini?
● Veza indlela ozizwa ngayo.
Okutjhiwo yiBhayibheli: “Umngani weqiniso unethando ngazo zoke iinkhathi begodu uba mfowenu ngeenkhathi zokugandeleleka.”—IzAga 17:17.
Ihlathululo: Sitlhoga isizo elivela kwabanye nasinemicabango egandelelako.
Nange ungavezi indlela ozizwa ngayo, uzokugandeleleka khulu. Nawuveza indlela ozizwa ngayo, ungazizwa ungcono begodu uqale izinto ngendlela efaneleko.
Linga lokhu: Khuluma nomuntu othileko namhlanjesi, mhlamunye kungaba lilunga lomndeni namkha umngani omthembako.a Ungaveza indlela ozizwa ngayo ngokutlola phasi imizwakho.
● Fumana isizo labodorhodere.
Okutjhiwo yiBhayibheli: “Abantu abaphilileko abamtlhogi udorhodere kodwana ngabagulako abamtlhogako.”—Matewu 9:12.
Ihlathululo: Kufuze siye kudorhodere nasigulako.
Ukuba nemicabango yokuzibulala kungaba litshwayo lokugula komkhumbulo namkha ngokomzwelo. Njengombana ungabineenhloni nawungazizwa kuhle emzimbeni, akukafuzi uzizwe uneenhloni ngokugulokhu. Ukugula komkhumbulo namkha komzwelo kuyalapheka.
Linga lokhu: Bawa isizo kudorhodere msinya.
● Khumbula ukuthi uZimu unendaba nawe.
Okutjhiwo yiBhayibheli: “Abotunwana abahlanu abathengiswa na ngeempaparwana ezimbili zenani eliphasi? Nanyana kunjalo uZimu akakhohlwa namunye wabo. . . . Ningasabi; nina niqakatheke khulu ukudlula abotunwana abanengi.”—Lukasi 12:6, 7.
Ihlathululo: Uligugu kuZimu.
Kungenzeka uzizwe uwedwa kodwana uZimu uyazi bona uqalene nani. Unendaba nawe nanyana uzizwa ngasuthi awusafuni ukuphila. IRhubo 51:17 lithi, “maye! Zimu, angeze uyilahle ihliziyo ephukileko nezisolako.” UZimu ufuna uphile ngombana uyakuthanda.
Linga lokhu: Hlola ubufakazi obufumaneka eBhayibhelini bokuthi uZimu uyakuthanda. Ngokwesibonelo, qala IsiThala No.3 2018 ku-jw.org/nr.
● Thandaza kuZimu.
Okutjhiwo yiBhayibheli: ‘Niphosele koke okunitshwenyako [kuZimu] ngombana unendaba nani.’—1 Pitrosi 5:7.
Ihlathululo: UZimu ukubawa bona umvulele isifuba sakho bewumtjele koke okusemkhumbulwenakho.
UZimu uzokupha kokubili ukuthula namandla wokuragela phambili. (Filipi 4:6, 7, 13) Ngendlela le, usekela labo abambiza ngokuthembeka.—IRhubo 55:22.
Linga lokhu: Thandaza kuZimu namhlanjesi. Sebenzisa igama lakhe elithi Jehova begodu umtjele indlela ozizwa ngayo. (IRhubo 83:18) Mbawe akusize uragele phambili uphila.
● Zindla ngeenthembiso zeBhayibheli zengomuso.
Okutjhiwo yiBhayibheli: “Sinethembeli elinjenge-ankera yokuphila kwethu, liqinisekile begodu lidzimelele.”—Hebheru 6:19, umtlolo ongenzasi.
Ihlathululo: Indlela ozizwa ngayo ingatjhuguluka msinya, ungazizwa uthabile ngemva kwalokho uzizwe udanile kodwana ithemba elifumaneka eBhayibhelini lingakusiza.
Ithembelo akusingilokho esikucabangako kunalokho lithemba elisekelwe esithembisweni sakaZimu sokususa boke ubuhlungu esiqalana nabo.—IsAmbulo 21:4.
Linga lokhu: Funda okungeziweko malungana nethemba esilifumana eBhayibhelini esahlukweni 5 sencwajana ethi Iindaba Ezimnandi Ezivela KuZimu!
● Yenza into oyithandako.
Okutjhiwo yiBhayibheli: “Ihliziyo ethabileko injengesihlahla esipholisako.”—IzAga 17:22.
Ihlathululo: Nasenza izinto ezisithabisako, sizokuphila kuhle ngokomkhumbulo nangokomzwelo.
Linga lokhu: Yenza izinto othabela ukuzenza. Ngokwesibonelo, lalela umvumo, ufunde okuthileko okukhuthazako namkha uzibekele isikhathi sokwenza into oyithandako. Uzokuthaba khulu nange wenza into ethileko ukusiza abanye ngitjho nanyana ingaba yincani kangangani.—IzEnzo 20:35.
● Zitlhogomele.
Okutjhiwo yiBhayibheli: ‘Ukubandula umzimba kuyazuzisa.’—1 Thimothi 4:8.
Ihlathululo: Siyazuza nasibandula umzimba, silale ngokwaneleko begodu sidle ukudla okunepilo.
Linga lokhu: Thatha isikhatjhana ukhambakhambe ngaphandle, ngitjho nanyana kungaba mizuzu eli-15.
● Khumbula ukuthi indlela ozizwa ngayo nezinye izinto ekuphileni ziyatjhuguluka.
Okutjhiwo yiBhayibheli: ‘Anazi ukuthi ukuphila kwenu kuzokuba njani kusasa.’—Jakopo 4:14.
Ihlathululo: Ubujamo obugandelelako, ngitjho nalobo obubonakala bungaphezu kwamandlakho kungenzeka bubengebesikhatjhana.
Nanyana ubujamo bakho bungabonakala bubumbi kangangani namhlanjesi, bungatjhuguluka kusasa. Yeke funa iindlela zokuqalana nobujamobo. (2 Korinte 4:8) Ubujamo bakho obugandelelako bungatjhuguluka ekukhambeni kwesikhathi kodwana nasele uzibulele akunalitho elingenziwa.
Linga lokhu: Funda ngeendaba eziseBhayibhelini ezimalungana nabantu ebebagandelelekile begodu bafuna ukuzibulala bewubone ukuthi ukuphila kwabo kwatjhuguluka njani kwabangcono ngendlela ebebangakayicabangi. Cabanga ngeembonelo ezilandelako.
Kghani iBhayibheli liyakhuluma ngabantu abebafuna ukufa?
Iye. IBhayibheli lisitjela ngabantu abakhe bathi, “Ngifuna ukufa.” UZimu akhenge abasole kunalokho wabasiza. Angenza okufanako nakuwe.
U-Eliya
● Bekangubani? U-Eliya bekamphorofidi onesibindi. Kodwana ngezinye iinkhathi naye bekaphela amandla. UJakopo 5:17 uthi, “U-Eliya bekamumuntu onamazizo afana nawethu.”
● Kubayini bekafuna ukufa? Khekwaba nesikhathi lapho u-Eliya azizwa ayedwa, asaba begodu angasililitho. Yeke wathi: “Jehova ngibawa uthathe ipilwami.”—1 AmaKhosi 19:4.
● Wasizwa yini? U-Eliya watjela uZimu indlela azizwa ngayo. UZimu wamkhuthaza njani? Wamtjengisa ukuthi unendaba naye nokuthi unamandla angangani. Waqinisekisa u-Eliya bona usamtlhoga bewamnikela nomuntu ozomsiza.
▸ Funda ngo-Eliya: 1 AmaKhosi 19:2-18.
UJobho
● Bekangubani? UJobho bekayindoda enjingileko elotjha uZimu weqiniso ngokuthembeka.
● Kubayini bekafuna ukufa? Ngokuphazima kwelihlo, uJobho wavelelwa zizinto ezinengi ezimbi. Walahlekelwa ngikho koke anakho. Boke abantwana bakhe bahlongakala ngebanga lehlekelele eyavelako. Waphathwa bulwele obubuhlungu. Wasolwa kabuhlungu ngamala, kwathiwa nguye ozibangele imiraro ebekaqalene nayo. UJobho wathi: “Ngiyakuhloya ukuphila kwami; angisafuni ukuphila.”—Jobho 7:16.
● Wasizwa yini? UJobho wathandaza kuZimu begodu wakhuluma nabanye. (Jobho 10:1-3) Wakhuthazwa mnganakhe onezwela u-Elihu, owamsiza wabona ubujamo ebekakibo ngendlela ehlukileko. Ngaphezu kwakho koke, uJobho wamukela isiyalo nesizo lakaZimu.
▸ Funda ngoJobho: Jobho 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.
UMosi
● Bekangubani? UMosi bekamdosiphambili wama-Israyeli wekadeni begodu amphorofidi othembekileko.
● Kubayini bekafuna ukufa? UMosi bekaphathiswe imisebenzi eminengi, ngezinye iinkhathi bekaqalelwa phasi begodu aphele amandla. Yeke walilela uZimu wathi: “Ngibawa ungibulale khona nje.”—Numeri 11:11, 15.
● Wasizwa yini? UMosi watjela uZimu indlela azizwa ngayo. UZimu wasiza uMosi ngokuphungula umsebenzi ebekaphathiswe wona ukwenzela bona angasagandeleleki.
▸ Funda ngoMosi: Numeri 11:4-6, 10-17.
a Nange ucabanga khulu ngokuzibulala begodu abantu otjhidelene nabo bangekho eduze, ungadosela iinomboro zomtato zobujamo oburhabako.