Lithini IBhayibheli Ngokupha?
Ipendulo YeBhayibheli
IBhayibheli likhuthaza ukupha ngokuzithandela nangeenhloso ezihle. Liveza ukuthi ukupha okunjalo akuzuzisi umuntu ophiwako kwaphela kodwana naloyo ophako. (IzAga 11:25; Lukasi 6:38) UJesu wathi: “Ukupha kuthabisa khulu ukudlula ukwamukela.”—IzEnzo 20:35.
Kukupha okunjani okuthabisa uZimu?
Ukupha kuyazuzisa nakwenziwa ngokuzithandela. IBhayibheli lithi, “Omunye nomunye akenze njengombana aquntile ehliziywenakhe, ingasi ngokuzikhuja namkha ngokukatelelwa ngombana uZimu uthanda umuphi othabileko.”—2 Korinte 9:7.
Ukupha okusuka ehliziyweni ‘mhlobo wekolo’ owamukelwa nguZimu. (Jakopo 1:27, umtlolo ongenzasi) Umuntu osiza abatlhogako ngokusuka ehliziyweni usebenza noZimu, njengombana aqala umuntu onomusa onjalo njengaloyo amkolodako. (IzAga 19:17) IBhayibheli lifundisa ukuthi uZimu uzokunikela abantu abaphanako umvuzo.—Lukasi 14:12-14.
Kukupha okunjani okungamthabisiko uZimu?
Nakwenziwa ngamabanga angakalungi. Iimbonelo zalokhu zihlanganisa:
Ukufuna ukubonwa babantu.—Matewu 6:2 6:2.
Ukulindela into ethileko nawuphako.—Lukasi 14:12-14.
Ukucabanga ukuthi uzokufumana isindiso ngokunikela.—IRhubo 49:6, 7.
Nange kusekela izinto uZimu angazithandi. Ngokwesibonelo, akukalungi ukunikela umuntu imali yokugembula, yokubhema iindakamizwa namkha yokusela khulu utjwala. (1 Korinte 6:9, 10; 2 Korinte 7:1) Akukafaneli ukunikela umuntu othileko imali khisibe uyakghona ukuzitlhogomela kodwana angafuni ukwenza njalo.—2 Thesalonika 3:10.
Nange sipha abanye khulu besibhalelwe kutlhogomela imindenethu. IBhayibheli lifundisa ukuthi iinhloko zemindeni kufuze zitlhogomele imindenazo. (1 Thimothi 5:8) Ihloko yomndeni akukafuzi iphe kangangobana ingasakghoni ukutlhogomela umndenayo. Ngokufanako, uJesu wakhalima labo abangafuni ukutlhogomela ababelethi babo abalupheleko, bathi lokho abanakho ‘kuzizipho ezinikelwe kuZimu.’—Markosi 7:9-13.